Mt 13

Yabixal jun nak tzicom trigo

(Mc 4.1-9; Lc 8.4-8)

1A yet jun c'u tu', max eltek Jesús yul na. Max toj ay chotan ti a' mar. 2Xiwil anima max apni oc bay, bay ayic' tu'. Yuj tu xan max octok yul jun barco, max ay chotanok. Axa eb anima tu xin, max canc'alta' eb ti a' tu'. 3Xiwil abix max yaltek Cham bay eb, max yalon axca ti': Ay jun winak max eltok tzicoj trigo. 4A yet lanan tzicon yinat tu', ay ixim max apnican tz'itlajbok yulak be. Palta axa no tz'iquin max ec' sic'on ajok. 5Ay janic' ixim max apni c'apax can oc yibanlak ch'en, bay xaxoj ch'an tx'otx'al. Jun bek max ajol ixim tu', yujtol xaxoj ch'an tx'otx'. 6Palta axa yet max ajol c'u xin, jun bek max takajok, yujtol c'am wal xe' aytok yul tx'otx'. 7Ay janic' ixim max apni c'apax can xol q'uix, palta maxc'al ch'ibaj te q'uix tu', cax max c'ayil ixim. 8Axa pax ixim, a bay yax tx'otx' max ayc'ayi, a yet max yak'on sat, ay ixim jolomej 100 bak' max yak'a', ay ixim 60 bak' max yak'a', ay ixim xin, 30 bak' max yak'a'. 9A juntzan tzet che yab ti', naobtanejek sic'libil, ẍi Cham bay eb.

Tix yelapnok juntzan abix tx'oxom el cuybanilej

(Mc 4.10-12; Lc 8.9-10)

10Axa jitzontok ba eb cuywom tu' c'atan Jesús, cax max k'anlen eb bay Cham axca ti':

—¿Tzet yuj xan asan yin abix tx'oxom el cuybanilej chach k'anjab bay anima? ẍi eb.

11Xan max tak'wi Cham bay eb axca ti': Asan ayex chi tx'ox Dios juntzan tzet yetal c'amto mac ojtaknej, yet watx' chi nachaj el e yuj tzet chi yun e yoc yul k'ab Cham. Axa bay juntzanokxa xin, c'am chi ak'lay yojtaknej el eb. 12Yujtol a mac chi yochej chi yojtaknej elok, yelxac'al ok aj can yojtaknen elok. Axa mac c'am chi yochej chi yojtaknej el juntzan ti xin, ta ayxa ch'an jabok tzet yojtak, ok tzakaytok yilay ec' bay. 13Yuj tu xan yin abix tx'oxom el cuybanilej chin k'anjab bay anima, yujtol caxc'al chi yil eb junok tzet yetal, palta chi can eb axca tol c'am tzet chi yil eb. Yetok c'apaxok, caxc'al chi yab eb, palta c'am jabok chi nachaj el yuj eb. 14Xan lanan yunen el yin juntzan anima ti' tzet max yal Isaías yet payxa, yet max yalon axca ti':

Wal yel ok e yabc'al; palta man ok nachaj el e yuj. Wal yel ok e yilc'al; palta man ok nachaj el e yuj tzet ok e yil tu', cachi bay eb.

15Yujtol a juntzan anima ti', toxa mayal pitbi el eb. Axca wal tol chi makchej el eb is txiquin, yet watx' c'am chi yab eb. Yetok c'apaxok, axca wal tol chi mutz' eb sat, yet watx' c'am chi yil eb, tamwal chi nachaj el yuj eb, yet watx' c'am chi meltzojtek eb ayin, cax chin colon eb, ẍi Dios yul txan Un Tz'ibbilcan tu'.

16Axa pax ex xin, watx' e yet, yujtol caw wal che yila', cax che yaben wali. 17Wal yel chi wal ayex, xiwil eb chekbej Dios yet payxa, yetok juntzanxa eb watx' is beybal, max yochej c'ul max yil juntzan che yil ti', palta maj yil eb. Max yochej c'apax eb max yab juntzan che yab ti', palta maj yab eb.

A tzet chi yal elapnok yabixal nak tzicom trigo

(Mc 4.13-20; Lc 8.11-15)

18Acbajek e txiquin xin. Ok waltek ayex tzet chi yal elapnok yabixal nak tzicom trigo tu'. 19A ixim max aycan c'ay yul be, yenel eb anima chi aben k'anej Dios, tzetbil chi yun yoc eb yul k'ab, palta c'am chi nachaj pax el yuj eb. Chi jayoc nak diablo bay eb xin, cax chi yak'on c'aytok juntzan k'anej tu' yul c'ul eb. 20Axa ixim max apni c'apax can yibanlak ch'en, yenel eb anima chi chaon k'anej Dios yin tzalojc'ulal. 21Palta c'am chi techaj yuj eb, man mimanok tiempo chi beytok eb yin, yujtol a yet chi jay junok yailal, ma xin, yet chi yilon eb yailal yujc'al k'anej Dios, jun bek chi somchaj el c'ul eb. 22Axa ixim max apni c'apax can xol q'uix, yenel c'apax junxa makan eb chi aben k'anej Dios, palta asan tzet yetal ay yulyibank'inal ti' chi na eb. Chi etax el is nabal eb, yujc'al yochen eb yoc beyomal. Yuj tu' nabac'al chi yetnej el ba k'anej Dios yin eb. Lajanxa chi yun yelapnok eb axca ixim trigo c'am bak' chi yak'a'. 23Palta a ixim max ayc'ay bay yax tx'otx', yenel eb chi aben k'anej Dios, cax chi nachaj el yuj. A ton eb tu' lajan axca ixim jolomej xiwil bak'. Ay eb lajan axca ixim jolomej 100 is bak', ay eb xin, axca ixim jolomej 60 bak'. Ay eb xin, axca ixim 30 bak' chi yak'a', ẍi Jesús.

Yabixal an awal an xol ixim trigo

24Max yaltek Jesús junxa abix ti' bay eb is cuywom: Ok waltek ayex tzet ok yun yoc eb anima yul k'ab Cham aj satcan. K'inalok ta ay junok winak chi tzic inat trigo watx' bay junok is tx'otx'. 25Axa yet lanan wayi, chi jay mac ajc'ul oc yin, cax chi ul tzicontok an awal an xol is trigo tu'. 26Ato yet ok poj ixim trigo tu' cax ok txecloj el an awal an tu' xol. 27Yuj tu' chi toj al-lay yuj eb mosejal bay jun aj awoj tu', cax chi yalon eb axca ti': A ixim enat max bet a tzicay sat a tx'otx', caw watx' ixim, ¿palta bay max tit pax oc an awal an xol xin? ẍi eb bay. 28Tekan a junok eb ajc'ul oc win max bet tzicontok xol, ẍi mi bay eb. ¿Chi mi yal a c'ul chi toj joquil an awal an tu' xol ixim trigo? ẍi pax eb. 29C'amak, yujtol a talaj yet chi jocon ajok, cax chi tit ixim trigo yetok. 30Yel mi watx' chi can axca tu', masantac'al yet chi pol-lay aj ixim trigo tu'. Catatu' ok walon bay eb in majan, tol chi sic'can el eb an yin babelal. Yin topanil ok yut eb, cax ok yak'on tz'a eb. Ok lajwok tu xin, cax ok yiontok eb ixim trigo tu' bay in c'una, ẍi jun winak tu', ẍi Jesucristo bay eb.

Yabixal an bak' mostaza

(Mc 4.30-32; Lc 13.18-19)

31Max lajwi tu xin, max yalontek Jesús junxa abix ti': Ok waltek ayex tzetbil chi yun ch'ib bisil eb anima chi oc yul k'ab Cham aj satcan. Lajan wal axca junok inat mostaza chi yaw junok anima bay is tx'otx'. 32A an yinatil mostaza tu', yaliẍ an yintak masanil inat. Palta a yet chi ch'ib an, miman chi yun an yintak juntzanokxa awoj chi jawa'. Mimek chi yun tzicjabi, xan chi jay no tz'iquin yin k'ablak, chi watx'nen no' wayub bay tu', ẍi Jesucristo.

Yabixal ixim yich pan

(Lc 13.20-21)

33Max yalon c'apaxtek Jesús junxa abix ti' bay eb: Ok waltek ayex tzetbil chi yun ch'ib bisil eb anima chi oc yul k'ab Cham aj satcan. Lajan wal ch'ib axca jabok yich pan chi yatok junok ix ix xol oxebok echbal harina. Echc'al chi pajbitok ixim yuj jab yich pan tu', ẍi Jesús.

A tzet max yun cuywaj Jesús bay anima

(Mc 4.33-34)

34A yet max k'anjab el Jesús nan xol anima tu', yin abix tx'oxom el cuybejc'al max k'anjab bay eb, 35Axca tu' max yun tzet albilcan yuj is chekbej Dios yet payxa, yet max tz'ibencan axca ti':

Ok wal abix tx'oxom el cuybej ayex. A tzet yetal c'amc'alta' chi al-lay elok, ok wala', tol c'am chi al-lay el yet payxa, ẍi yul txan Un Tz'ibbilcan tu'.

A tzet chi yal elapnok abix yin an awal an

36Axa yalon toj ba Jesús bay eb anima tu xin, max octok yul na. Max oc c'apaxtok eb cuywom yetok, axa yalon eb bay axca ti':

—A yabixal an awal an max ala', al ayon tzet wal chi yal elapnok, ẍi eb bay.

37Axa yalon Jesús bay eb: A jun tzicom trigo watx', ayin Chekbilintek yuj Dios xol eb jet animail ti', a chi yala'. 38A tx'otx' tx'otx' bay max oc awoj tu', a yulyibank'inal ti' chi yala'. A ixim inat watx' tu', a ton eb ayxa oc yul k'ab Cham aj satcan chi yala'. A an awal an, a ton eb yet diablo chi yala'. 39A jun ajc'ul oc yin jun aj tx'otx' tu', a ton nak diablo chi yala'. A tiempoal yajbal ixim trigo tu', a ton yetok jun tiempoal ok lajwok ti' chi yala'. Axa eb polom trigo, a eb ángel chi yala'. 40Axca wal chi yun sic'lay el an awal an tu', cax chi toj an tz'aok, caywal tu' ok yun eb anima yet ok lajwok yulyibank'inal ti'. 41Ayin Chekbilintek yuj Dios xol eb jet animail ti', ok in chektek eb wángel. Pilan ok ec' wajaj eb masanil eb chi ak'on somchaj nabal yet animail, yetok c'apax eb yob tzet chi el yuneni. Pilan ok ec' ilay el eb bay ok wak' Yajawilal. 42Cax ok k'oklaytok eb bay jun lugar axca wal horno bay ow k'ak'ej. Ok ok' eb bay tu', cax ok natx'atx'ok ye eb yuj yail. 43Axa eb watx' beybal xin, axca wal yili c'u caytu' ok yun yili eb yul k'ab co Mam Dios. Naobtanejek juntzan tzet che yab ti' sic'libil, ẍi bay eb.

Yabixal jun tzet mukbil

44A eb chi oc yul k'ab Cham aj satcan, lajan eb axca junok tzet yetal caw can tojol mukbil yul tx'otx'. Chi ilchaj yuj junok winak, cax chi mukoncan junelxa bayc'alta' ay tu'. Yujxac'al tzalojc'ulal xan chi toj txoncan el masanil tzet ay, cax chi manon el jun tx'otx' bay mukan jun beyomal tu'.

Yabixal jun ch'en perla

45A bay chi oc eb anima yul k'ab Cham aj satcan, lajan axca junok comerciante, chi ec' sayon juntzan ch'en ton can is tojol, chi yik perla. 46K'inalok ta ay junok caw watx' chi ilchaj yuj, chi txoncan el masanil is tzetak yetal, cax chi manon el jun perla tu'.

Yabixal jun txim mitx'bal txay

47Ok waltek junxa abix ti' ayex, yuj tzetbil ok yun yeloc eb anima yet chi oc eb yul k'ab Cham aj satcan. K'inalok ay junok txim mitx'bal txay chi alay aytok yul a'. Tojolc'al yion ajtek masanil makanil txay. 48Axa yet chi noj tx'an xin, chi yion ajtek eb txaywom tu' tx'an ti a', cax chi ay chotan eb yion el no' watx', chi c'ubantok eb yul is motx, cax chi k'okoncan el eb no' yob. 49Cayton tu' ok yun yeloc eb anima yet ok lajwok jun tiempoal ti'. Ok tit eb ángel ul yion el eb yob xol eb watx', 50cax ok k'okoncantok eb eb yob tu' yul jun lugar, axca wal horno bay xiwil k'ak'ej. A bay tu' ok ok' eb, ok natx'atx'ok ye eb yuj yail, ẍi Jesucristo.

Is yopiso eb cuywom Jesús

51Max lajwi tu xin, cax max k'anlen Jesús bay eb is cuywom axca ti':

—¿Chi mi nachaj el masanil juntzan ti' e yuj? ẍi bay eb.

—A ton Mamin, chi nachaj el juj, ẍi eb bay.

52Ayex ti', cuybil exxa yin tzet chi yun yeloc eb anima chi oc yul k'ab Cham aj satcan. Yuj tu' xan chi je' e yak'on cuylay juntzan ac' cuybanilej yetok juntzan icham, ẍi bay eb.

Ayic' Jesús bay Nazaret

(Mc 6.1-6; Lc 4.16-30)

53A yet max lajwi yalontek Jesús juntzan cuybej ti' yin abix tx'oxom el cuybej, axa toj tu'. 54Max apni oc bay is conob. Max octok yul nail wajayil bay chi oc culto, max c'oli cuywaj nan xol eb yul tu'. Toxac'al chi c'aycan aj c'ul eb anima tu' yuj, cax max yalon eb:

—¿Bay max cuy jun winak ti' is jelanil? ¿Tzetlaj chi yun jeon milagro ti' yuj? 55A jun ti', a ton jun is c'ajol nak carpintero, a pax is txutx xin, a ton María. Jojtak c'apax eb yuẍtak, a ton Jacobo, José, Simón yetok Judas. 56Yetok c'apax eb yanab, ayic' eb co xol. Yuj tu', ¿bay mi max bet yi' is jelanil ti'? ẍi eb.

57Yuj tu xin, toc'al max somchaj el c'ul eb yin, xan max yal Cham bay eb axca ti':

—Ayc'alta' yelapnok eb chekbej Dios yul sat masanil anima. Asan yul sat eb yet conob eb, c'al yul sat eb junnej nail yayji yetok eb, c'am ton yelapnok eb, ẍi Jesús.

58Jayebnej milagro max el yunen Cham bay is conob tu', yujtol maj yaoc eb c'ul yin.

Currently Selected:

Mt 13: ATBYK89

Highlight

Copy