Gén 20

Ri Abraham y ri Abimélec

1Ri Abraham xel-el akuchi k'o-wi, y xbe pa xokon ri nibix chuqa' Négueb chire, y roma niyuq'un beneq, xbe kela' xbe kela' xuben chupan ri ruwach'ulew ri k'o chukojol ri tinamit Cadés y ri ruwach'ulew rubini'an Sur. Y xapon k'a pa tinamit Guerar. 2Y toq k'o chik qa chiri', ri Abraham, xubij chi ri Sara ri rixjayil xa rana', y ri Abimélec ri rey richin Guerar, xuteq ruk'amik ri Sara richin nok rixjayil. 3Y ri Dios xch'on pa rachik' ri Abimélec chupan ri aq'a' ri', y xubij chire: Wakami rat kan k'o chi xkaken roma re jun ixoq re xak'en-qa, xa k'ulan y k'o rachijil, xcha'.

4Jak'a ri Abimélec xa k'a man jani tik'oje' rik'in ri Sara, roma ri' xtikir xubij chire ri Dios: ¿Ajaw kan ye'ak'is kami re winaqi' chupan re nuruwach'ulew y xa maneq kimak? 5Roma kan ja ri Abraham ri xbin chuwe chi rana' y chuqa' ri Sara xubij chi kan ruxibal-wi. Rik'in ruch'ajch'ojil ri wánima xinben kere'. Y roma ri' yin man jun itzel nubanon, xcha' ri Abimélec.

6Y ri Dios xch'on k'a rik'in ri Abimélec pa jun chik rachik' y xubij chire: Yin chuqa' wetaman chi rat xaben rik'in ruch'ajch'ojil ri awánima. Roma ri' man xinya' ta q'ij richin xamakun ta chinuwech yin. 7Wakami k'a tatzolij-el ri ixoq chire ri Abraham, ri rachijil y roma rija' jun q'alajirisey ri nuch'abel yin, kan xtuk'utuj chuwe yin pan awi' rat. Jak'a wi man xtatzolij ta xkaken rat y konojel ri winaqi' ri ek'o chupan ri aruwach'ulew, xcha'.

8Y ri Abimélec nimaq'a' yan k'a xyakatej richin xeroyoj konojel ri achi'a' ri e aj-raqen ri kan yesamej rik'in y xubij chike ronojel ri xubij ri Dios chire pa rachik' y toq rije' xkak'axaj ri', kan janila k'a xkixibij-ki'. 9K'ari' ri Abimélec xroyoj ri Abraham y xubij chire: ¿Achike k'a ri xawajo' ri xaben ta chiqe? ¿Achike ta k'a itzel banobel ri nubanon chawe richin xak'en-pe re jun nimalej mak re' pa nuwi' y pa kiwi' konojel ri winaqi' ri ek'o chupan re ruwach'ulew re'? Re' kan man utz ta ri xaben wik'in yin. 10¿Achike k'a ri anojin pa nuwi' toq kere' xaben chuwe?, xcha'.

11Y ri Abraham xubij: Yin xinch'ob-qa chi re wawe' chupan re tinamit re' maneq rukiy ri Dios chikiwech, y xkinkikamisaj, roma ri wixjayil. 12Y kan qitzij na wi chi rija' wana' roma junan qatata', xaxe k'a ri man junan ta qate' y yin xik'ule' rik'in. 13Y toq ri Dios xubij chuwe richin xinel-pe pa rachoch ri nata', jari' toq xinbij-pe chire ri Sara: Xabakuchi k'a xqojbe-wi, rat xtabij chi yin in axibal, in chayineq-pe chire, xcha' ri Abraham.

14K'ari' ri Abimélec xuya-el chire ri Abraham kokoj y nima'q taq rawej, y xeruya-el rusamajela' ri e yuqul pa samaj rik'in, chi achi'a' chi ixoqi' y xujech chuqa' el ri Sara, ri rixjayil. 15Y chuqa' xubij chire ri Abraham: Ronojel ri ruwach'ulew ri natzu', pa nuq'a' k'a yin k'o-wi; kak'oje' k'a ri akuchi xtiqa-wi chawech rat, xcha' chire. 16Y chire ri Sara xubij-el: Chuqa' xinya-el chire ri axibal juwineq ka'i' libra saqipueq, y re' xtik'atzin chawe rat richin niq'alajin chikiwech ri asamajela' y chikiwech ri ch'aqa' chik winaqi' chi yin man ximakun ta awik'in, xcha' ri Abimélec.

17-18Roma ri' ri Jehová kan xuben k'a chike konojel ixoqi' ri ek'o chiri' chi man xk'oje' ta chik kal, roma ri Abimélec xuk'en-qa ri Sara. Y k'a ja toq xch'on na ri Abraham rik'in ri Dios pa ruwi', k'ari' ri Abimélec y ri rixjayil xek'oje' chik kalk'ual y konojel ri rusamajela' e ixoqi' xek'oje' chik kal.

Currently Selected:

Gén 20: KQC

Highlight

Copy