Luuka 6

Yesu nio Omwami owa Sabato

(Math 12:1–8; Mari 2:23–28)

1Owuire wulala olwa *Sabato, Yesu yawitanga mu emisiri egia engaano. Awalonzi waae waatanika okuiiya ewigala ewia engaano, ni wazikunya-kunya mu amakono gaawu ni waria.#Owuiz 23:24–25 2Na *Awafarisaayo wandi waawawuuzia watino, “Muiiya ewigala ewia engaano olwa Sabato kolaki, ne endagirra iifu ngetuganyiire okukola otio?”#Okuf 20:8–10 3Yesu yawairania otino, “Inywe mukiari okusoma ekia Omwami Daudi yakola olwa iye alala na awantu awayawanga nawo waawurranga enzala? 4Yagia mu enyumba eya Katonda aeewua emikaati egitengeekwe emberi wa Katonda aria. Emikaati egia endagirra etaganyiire omuntu-umuntu okuria mala *awoozia wengʼene, kandi yaesania egindi ku awantu awaawanga nae wagiria.”#Awal 24:5–9; 1Sam 21:1–6 5Yesu yamariizia na awalaga otino, “*Omuzia owa Omuntu nio Omwami owa Sabato.”

Yesu alamiizie omurema olwa Sabato

(Math 12:9–14; Mari 3:1–6)

6Owuire wundi olwa Sabato, Yesu yaingira mu *esinagoogi atanika okugerera. Omwo yawangao omuntu owa okukono kwae okusaaza kwaremera. 7Awafarisaayo na *awagerezi awa endagirra waagalanga ekintu ekia wakamuingirra nakio mbwe aonre Sabato. 8Ni Yesu yamanya ekia waingirizianga, kutio yalaga omuntu owa okukono kwaremera oyo otino, “Iza oimerre emberi ano.” Omuntu oyo yaema kandi aimerra ao. 9Nikuemao Yesu yawalaga otino, “Mbawuuzia, niki ekia endagirra iifu etuganyiire okukola olwa Sabato? Okukola geeza nakuwa okukola owuwiiwi? Okutunzia owulamu owua omuntu nakuwa okuwuona?” 10Yawawarra woona awasunguuzia nikwo amulaga otino, “Golola okukono kwao.” Yakola otio kandi okukono okwo kwairana kuwa okulamu ngʼese. 11Okusu kwa-amba Awafarisaayo na awagerezi awa endagirra ino, okwagera watanika okugamba-gamba agati yaawu ku ekia wakakorra Yesu.#Yowa 7:1

Yesu alowoole awatumwa ikumi ni wawiri

(Math 10:1–4; Mari 3:13–19)

12Mu amiire ago, Yesu yafuma agia mu ekigiri okusawa, kandi yawa eyo owuire owulamba na asawa Katonda nawuno wukia.#Luuk 5:16 13Ni wuakia, yaeta awalonzi waae kandi alowola awantu ikumi ni wawiri agati yaawu, awa yaeta mbwe *awatumwa waae.#Luuk 9:10; 11:49; 17:5; 22:14; 24:10; Awat 1:2, 21–22, 26; 2:42 14Waawanga Simioni, owa yaluka mbwe Petro, Andereeya wamwawu Petro; Yakoobo, Yowaana, Piliipo, Batholomeo; 15Mathaayo, Thomaasi, Yakoobo omuzia owa Alfaayo, Simioni, owaetwanga Omuzalooti,#6:15 Awazalooti mu Olugiriiki waawanga ekifuwo ekia *Awayaudi awasiani awaawanga ni waifumiizie okulwanra ekialo kiawu okuema ku owukire owua amambala owua Awaruumi. 16Yudaasi omuzia owa Yakoobo, ni Yudaasi Iskarioti, owawa omuguzi owa Yesu.#Yowa 1:40–44; Awat 1:13

Yesu alamiizie kandi agereere awantu awangi

17Yaika nawo agia aimerra mu ekiriwo. Omurima ogwa awalonzi waae waawanga ao alala na awantu awangi owuluku awaaema mu ewialo wiona ewia Yudeea ni Yerusaleemu na awaema mu ewialo ewia Taaya ni Sidooni ewiri ku omwalo ogwa Galiili, waaza okumutegerezia no okulamiwua ku amalwire gaawu. 18Awantu awa *ewikeeno wianyaasianga, waalamiwua. 19Awantu woona waagalanga mbwe wamuambeko, aeniki amaani gaamuemangako ni galamia awalwire woona.#Math 9:20

Awasereekwe na awatasereekwe

(Math 5:1–12)

20Yesu yawarra awalonzi waae nikwo awalaga otino,

“Musereekwe inywe awamanyire mbwe muri awataka awa ensereki ezia mu omwoyo,

aeniki *Owuami owua Katonda wuri owuinyu.

21Musereekwe inywe awari ne enzala nyingeeno,

aeniki muuza okuigusiwua.

Musereekwe inywe awarra nyingeeno,

aeniki muuza okuseka.#Zabu 126:5; Isaa 61:3

22Musereekwe inywe na awantu wawarega, ni wawalowa kandi ni wawanyega, ni waona amiina giinyu, ku olugonzi olwa mugonziizie nalwo Omuzia owa Omuntu.#Math 10:22; 24:9; Yowa 15:18–19; 16:2; Awat 5:41; 1Pet 4:14

23“Musangaale kandi muomererwe, aeniki omugawo ogwa muwiikiirwe ku igulu guri omukaate. Aeniki, nintio waaguukwa waawu waakorra *awagambi awakulu.#Math 5:2–12#2Amiir 36:16; Awat 7:52

24“Ni, muri owuwiiwi inywe awanyazi,

aeniki mumiire okutuukra owulootu wuinyu.#Math 19:23–24; Yako 5:1

25Muri owuwiiwi inywe awaiguta ku enyingeeno,

aeniki muriongera enzala.

Muri owuwiiwi inywe awaseka ku enyinga zino

aeniki muuza okurira na amaziga garerenga.#1Kori 4:8

26Muri owuwiiwi inywe awa awantu wagamba-gambako geeza,

aeniki nintio lwona waaguukwa waawu waakorra awagambi awa owuweeyi.#Yere 5:31; Yako 4:4

Okuoloola owuoni ku owuoni kuganiziiwue

(Math 5:38–48)

27“Ni mbalaga inywe awantegerezia, mbwe mugonzie awazigu wiinyu, mukorre awawarega geeza. 28Musereke awantu awawafuuwa, kandi musawire awantu awawakorra ewintu ewiwiiwi.#Math 5:44 29No omuntu akukubre oluyu oluwega olulala, mugalusizie oluwega lundi lwona akube. No omuntu atoorre ikooti riao, otamulowera okutoola esaati yaao yoona.#Awaru 12:17 30Omuntu-umuntu okusawire ekintu mu-ee, kandi no omuntu atoorre ekintu kiao otamunigirizia akuiranizie. 31Kandi korra awandi ewia okaagala mbwe woona wakukorre.#Math 7:12

32“Iwue no ogonziizie mala awakugonziizie wengʼene, ao otio ekia okakaserekrwa niki? Aeniki namba ‘awooni’ woona wakola watio. 33Kandi no okola geeza mala ku awantu awakukorra geeza, ao ekia okaserekrwa niki? Aeniki namba ‘awooni’ woona wakola watio. 34Iwue no ozia mala awantu awaesa waakuiranizia, ao ekia okaserekerwa niki? Namba ‘awooni’ woona waozia ‘awooni’ awiina waawu ni warindirra okuiraniziwua.#Luuk 14:12–13 35Ni, mugonzie awazigu wiinyu, muwakorre geeza, kandi muwaozie ni mutawariire mbwe waaza okuwairanizia. Nikuemao omugawo gwinyu guuza okuwa omunene, kandi muuza okuwa awaana awa Katonda omunene, aeniki Katonda ari omusiza na awatairania otioo, na awa endandulu.#Awal 25:35–37 36Muwe na amasaasra kiomo Soinyu ari na amasaasra.

Okukengera awandi ekiina kuganiziiwue

(Math 7:1–5)

37“Otakengera owundi ekiina, kugere iwue oona otakengerwa ekiina. Otata owuoni ku omuntu nikwo iwue oona ngoriteewuako owuoni. Rekera awandi amawi gaawu nikwo iwue oona orirekerwa amawi gaao.#Math 6:14–15 38Ezania ku awandi nikwo iwue oona ooza okueewua, mu omurengo omulootu, oguigatiirwe kandi oguizuule gwasaawaala, ooza okuteerwa mu amakono. Aeniki omurengo ogwa orenga nagwo, nigwo iwue oona ooza okurengerwa nagwo.”#Mari 4:24

39Lwona yawalaga olugero otino, “Omuntu omuwuunu aesa otie okukangatra omuwuunu omwina waae? Woona ngawaaza okugwa mu owuina?#Math 15:14 40Omuntu oigerera ngakira omugerezi waae, no omuntu-umuntu na agereerwe nawuno ainogerezie geeza, aesa okuwa ki omugerezi waae.#Math 10:24–25; 23:8–10; Yowa 13:13–16 41Iwue niki ekigera no owarra akantu akatono akari mu eriiso eria omwina waao, no oguntu ogunene oguri mu eriiso riao omwene ngagukunyaasia? 42Oesa otie okulaga omwina waao mbwe, ‘Wamwifu, reka nkutoorreo akaatu akari mu eriiso riao,’ ni iwue omwene ngowona oguntu ogunene oguri mu eriiso riao? Iwue omuntu oisemerezia ono, sooka otooleo oguntu ogunene gueme mu eriiso riao, nikwo ooza okuwona geeza, kandi oese okutoolao akaatu akatono mu eriiso eria omwina waao.

Omuti gumanywa ne ensaafu ziagwo

(Math 7:16–18; 12:34b–35)

43“Guwulao omuti omulootu oguama ensaafu embiiwi, kandi guwulao omuti omuwiiwi oguama ensaafu endootu. 44Kutio omuti ki omuti gumanywa ne ensaafu ziagwo. Ensaafu ezia emikuyu ngaziesa okunogwa okuema ku emiti egia amawua, nakuwa emizabiibu okuema ku omunyenya. 45Omuntu omulootu afumia mala ewintu ewilootu okuema ku owulootu owuri mu omwoyo gwae, kandi omuntu omuwiiwi afumia mala ewintu ewiwiiwi okuema ku owuwi owuri mu omwoyo gwae. Aeniki ewintu ewia omunwa guwoola wiema mala ku ewiizuule omwoyo ogwa omuntu.

Omuomboki omumaya no omuomboki omuganga

(Math 7:24–27)

46“Ekigera ni munyeta mbwe ‘Omwami, Omwami,’ ni ngamukola ewia mbalaga niki?#Mala 1:6 47Nyiza okuwalaga kiomo omuntu onyizreko, owurra amangʼana gange kandi yakola nago, afwanana. 48Afwanana no omuntu owa na aomboka enyumba, a-aawa na agia munsi nawuno owulusa wuatuuka ku iwaale. Olwa omugera gwaza kandi amanzi gaika, gaikuba ku enyumba eyo, enyumba ngekazegera, aeniki yawanga ne eombookwe wukalu. 49No omuntu owurra amangʼana gange ni yareka okukola nago afwanana no omuntu owaomboka enyumba ku ilowa na ataawre owulusa. Olwa amanzi gaaika, gaikuba ku enyumba eyo, yagwa ansi boo, mala eoneka chee.”#Math 7:21

Currently Selected:

Luuka 6: sxb

Highlight

Copy