Mt 18

¿Jach'e jogamaĝa p'ajaye gaa'me Jesús lapaĝaguenataqa?

(Mc 9.33-37; Lc 9.46-48)

1Nach'ejo jojo' nolo' ca'li dajoeda'aguet gaa'me lapaĝaguenataqa ñe'me Jesús qama'le yachimaĝadeta:

—¿Jach'e jogamaĝa yataqachiñe p'ajaye queda'me uetaue da'me lejaliaĝa di'me piyem?

2Chane'eja Jesús yiyaĝana ga'me notolec, yachañgui laeñi jogaa'me 3qama'le enaac:

—Eja ami ja'aĝatema queda'me qom ja aueñiya'ama gaa'me ñoqolqa da'me anejouoqoeñi, qama'le ja auaqanachichi ta'le ayoue da'me lejaliaĝa jodi'me piyem. 4Ñe'me jo'ne qoyen p'ajaye da'me lejaliaĝa di'me piyem, nach'eñe jo'ne ja ni'yoĝodela't nataq'aen 'viyelaĝaguet da'me ena'am jenjo' notolec. 5Nataq'aen joñe'me jo'ne jayem naquiaĝana qama'le yaconeguet ga'me notolec ena'am jenjo', mach'e jayem yaconeguet.

Joda'me lichic ta'le auelo jodaa'me adoeco

(Mc 9.42-48; Lc 17.1-2)

6Nataq'aen enaac joñe'me Jesús:

—Gamachaqaega ga'me jo'ne en tauelo daa'me loeco nat'olqa jo'ne maliaĝa 'najodolqa 'me jayem p'iida'a, qama'le 'noota da'me qoyecoñeteguet ga'me qa' t'adaic jo'ne dejali ga'me loqojot, qama'le qoyajaĝañgui ga'me noĝop let'adaic qaedi domaliñe. 7¡Degueja da'me lachoĝodec jena'me jiyaĝadipi yajouaĝa't gaa'me qoyejapoto nale, qaya'te yaeyaĝan ga'me qoyejapot nale! Qalaĝaja, ¡degueja da'me lachoĝodec qomle ga'me jo'ne yauegouelo da'me loe'j jogaa'me laqaya'olqa!

8“Qo'che' qom na'me adouaq uotaĝa adapia' auachiyoĝotaye da'me aua'uo ga'me adoec, qama'le ¡'noota qom avichaĝayi qama'le aueguem! Qaedi adiyamaqa'teguet da'me aue da'me at'oyaĝac queda'me am uayodaĝaic uotaĝa am jopo. Yataqata ja 'noota ta'le nalo'ta't naa'me adoua' nataq'aen naa'me adapia'te da'me am qoyijaĝaue di'me dole' jo'ne ja 'naidena'a. 9Nataq'aen qom jana'me at'aete auachiyoĝotaye da'me aua'uo ga'me adoec, ¡'noota qom anaqat, auen qayalegue! Qa'a 'noota da'me onole jana'me at'aete qom auaconeguet joda'me at'oyaĝac, qaedi ja nalo'ta'ajalo naa'me at'ae'te qom am qoyijaĝaue ga'me dole' di'me payac 'lachaqa'.

Qodaloqotenaĝana jaga'me 'naĝanaĝate 'me yejomac

(Lc 15.3-7)

10-11Ena'te a'uotañi ga'me onolec naa'me naajo' 'najodolqa, qa'a ami ja'aĝatema queda'me uo'oe joga'me neuatoqo'tpi jo'ne piyem laje' 'me nach'e eta't dajoeda'aguet na'me latajoĝoc ñe'me Taĝadena'. 12“¿Jach'e ga'me eeta da'me dojo'? Qom 'uo ga'me jiyaĝaua yauanalo cien 'naĝanaĝatelpi qama'te onole yejomac, ¿qo'li ja yepotadoue ga'me viaq joga'me noventa y nueve 'naĝanaĝatelpi qaedi yelaque jaga'me yejomac? 13Qama'le qom maqachaĝa yaqanatet da'me yauana, qama'le eja yataqachiñe yaguegue da'me lamaic jouaĝat jaga'me 'naĝanaĝate jo'ne te'me yejomac, napacalegue da'me lamaic jouaĝat joga'me noventa y nueve jo'ne ja yejoma'ape. 14Qama'le nach'e ena'am ñe'me Adet'ai 'me na'ague di'me piyem ja jetaque yejomac ga'me onolec naa'me naajo' 'najodolqa.

Da'me lajoĝoc ta'le auapalaĝat ga'me am yaviyaĝatec ga'me adaqaya

(Lc 17.3)

15“Qom ga'me adaqaya am 'yetec gamachaqaega ja no'en, auojapegue' ga'me qom onolec auayatenaĝanec ga'me lepatenaĝanaĝac. Qom am naquiaĝana, joote yitaĝa anaueguela't ga'me adaqaya. 16Qom ja am 'te naquiaĝana, qama'le aviyaĝanalo uoja'aegaua onolec uotaĝa dos jiyaĝa'u qaedi am lecochita da'me dojedapegue' ga'me, nataq'aen am detaĝadelegue. 17Qom nach'edi ja naquiaĝanalo gaa'me, qama'le a'uaqataĝanema joga'me nepi'iyaĝa'upi; qama'le qom nach'edi ja naquiaĝanalo joga'me nepi'iyaĝa'upi, chane'eja aualoqochichigui ga'me jo'ne ja p'iida'a ñe'me Dios uotaĝa ga'me lo'o da'me nejetenaguec di'me Roma.

18“Dojo' ami ja'aĝatema, qom dojolqa ami adaloi'ta't jena'me jenjo' aleua qom 'uo ga'me aviyaĝañiyaque nale anetameñi, ñe'me Taĝadena' 'me na'ague di'me piyem ami yanema.

19“Ami jayatenaĝaneque queda'me qom ga'me auecoñediye jena'me jenjo' aleua, nach'e ena'am qoyecoñe' da'me daja' piyem, nataq'aen ga'me jo'ne auejoyitañe jena'me jenjo' aleua, nach'e ena'am da'me daja' piyem qoyejotaye ga'me. 20Qa'a qom ga'me dojolqa uotaĝa trejolqa yema'a't yajouaĝat da'me jayem yemetede'eguet, qama'le jouetañe laeñi jogaa'me.”

21Chane'eja Pedro yachimaĝata ñe'me Jesús, enaac:

—Jaliaĝanec, ¿jach'e ga'me nalo'taguet da'me japalaĝa't gaa'me laviyaĝaco ga'me yaqaya, qom 'uo ga'me jayem 'yetec? ¿Qo'li chayovida'a siete?

22Jesús 'yateguet:

—Ja am 'te ja'aĝatem ta'le chayovida'a siete 'viyelaĝalegue, dite da'me chayovida'a setenta 'viyelaĝalegue siete.

Qodaloqotenaĝana ñe'me nalemaĝajet jo'ne ja dichoĝodenataĝan

23“Qa'a da'me lejaliaĝa ñe'me Dios 'me ne'tague di'me piyem ena'am ga'me jaliaĝanec jo'ne jetaque naloqotena't jana'me laviyaĝajete gaa'me lamaĝa's. 24Ca'li yachimaĝachiñe da'me male ye'et qanach'e 'uo ñe'me qoyaue'uo jo'ne 'uo jaga'me nep'ia 'me nalo'taguet diez mil ga'me nemenapi jo'ne talentos. 25Qalaĝaja qaga'te dejetenataĝanec ñe'me nalemaĝajet, qama'le ñe'me jaliaĝanec damaĝajoĝolegue qaedi qoyemenoue da'me nelataguec, qoyen capegue'to gaa'me c'oqo'te, loua nataq'aen yema ga'me jo'ne yauana, qaedi nalo'taguet yema yejeten jañe'me laviyaĝajete. 26Ñe'me nalemaĝajet yejoidiñe naa'me leliquetel da'me dajoya'aguet ñe'me jaliaĝanec qama'le nachoĝodenot: «¡Jaliaĝanec, jayem avichoĝoden! Cha'li yitaĝa jayem auajoya'a qama'le yema jejeten qomle.» 27Qama'le ñe'me jaliaĝanec yichoĝoden joñe'me qama'le yapalaĝat yema jañe'me laviyaĝajete. Chane'eja yitaĝa yejoye qaedi ec.

28“Qalaĝaja mane'e ca'li yenoĝonegue, jojo' nalemaĝajet uada'aguet ga'me mach'e 'lonataĝanaĝaua jo'ne cien ga'me nemenapi jo'ne denariopi jaga'me laviyaĝajete. Qama'le yechiyoqot ga'me loqojot qama'le enapega joñe'me, enaac: «¡Jayem auejeten nayi! ¡Auejeten jañe'me adaviyaĝajete!» 29Ñe'me 'lonataĝanaĝaua yejoidiñe naa'me leliquetel da'me dajoya'aguet, qama'le nachoĝodenot: «Jayem avichoĝoden, cha'li jayem auajoya'a qama'le am jejeten.» 30Qalaĝaja ja jetaque dajoya'a, dite da'me yamaĝaue jaga'me coñetaĝanaĝaiqui chayovida'a yejeten yema jañe'me laviyaĝajete. 31Dojo' jalcote yec'o'n jogaa'me nalemaĝaje'te laqaya', qama'le yec'adeta ñe'me jaliaĝanec qaedi 'yaĝadetem ga'me 'uo ca'li. 32Chane'eja ñe'me jaliaĝanec damaĝajoĝona ca'li, qama'le enapega: «¡Am ja no'en! Am jichoĝodenec yema jaga'me adaviyaĝajete qa'a jayem anachoĝodenot. 33¿Toqoch'e ja nach'e ena'am avichoĝodenec jañe'me laviyaĝajete ga'me adecochaĝaua, nach'e naq'aeta da'me am jichoĝoden?» 34Ua'a da'me yataqachiñe dalemata ñe'me jaliaĝanec, qama'le damaĝajoĝolegue qaedi qoye'uaĝan chayovida'a yema yejeten jañe'me laviyaĝajete.”

35Yitaĝa enaac ñe'me Jesús:

—Nach'e naq'aeta da'me ami 'yeteque qomle ñe'me Taĝadena' 'me na'ague di'me piyem, qom ja chiyaqayilo naa'me adai'lidi' da'me yataqata auapalaĝachi' gaa'me laviyaĝaco jogaa'me adaqayadi'.

Currently Selected:

Mt 18: TSN

Highlight

Copy