Masmur 17
17
Sambaya Amisye anajo arono marova wo nawatan
1Daud apa sambaya.
Sya AMISY, syare Nyo sya anonae so raraniv muno Nyo moyare raugaje rinai,
namarikoame rasakinav de sya ana danajo inanuga tugae raije so rai.
2Syare Nyo patimu moyare raugaje rinai indamu mbe rarorombe risya ana dave mamo musyo marambe jewen,
weye Winyirati Nyo ana mamaisye raen.
3Ranivara Winyo inanuga so rayasiro mavabe,
Nyo rayasiro mavabe no arono naman,
muno Nyo rinakani mavabe rai,
indati Nyo inaen risyamo ayao kakai meweno rinai,
sya ana idaura musyo marambe jewen.
4Vatano wanui awa ana udave nsasye risya rai,
yara risyamo sya ana dave mamaisyo Nya ayao rai.
Risyamo syo inanasine so rayaranande ti itavobombe vatano wo ivuinye rave awa unanui raije ramu.
5Risyamo itavondi Nya unanui obo rai,
muno risyusyo akirive rai ramu.
6Sya Amisy, syo winanonae,
weye Winyirati indati Nyo sya ana danajo raveti mamaisy,
syare namarikoame rasakinav de rinai muno Nyo sya ana idaura so raraniv.
7Syare Nya muinyo no tawan mbe anainambe rarorono rinai.
Weye Winyirati Nyo vatano mansamamavube Nai mapaya irati kakai rai,
nanemo mbambunine omirati mo mavijuri awa marova mai.
8Syare Nyo rinayaranande maisyare risyamo Nya nanuga rave pi risy,
Nyo inangkokaibe no nanem ate rai, maisyare mangkuere mo ama pepake veano tuvane rarau wemaisy,
9no inaora irati vatano mamun ware wo inaupaeta mai.
Sya marova ware wo inaubaisye wo rinawariki,
10onawamo mansaemeno vatano kaije mai ramu,
muno mansararino ayao rai.
11Ude umarovave rinai ti wo rinakijaniri,
mansami ntetero rinai indamu wo rinakupisen muno wo rinangkukuv asyo tami no kopa.
12Onawamo maisyare singa kokaibe no varoro maninimbe ti po rinamane wemaisy,
maisyare singa kamuram pare pirak indamu po rinatao wemaisy.
13Sya AMISY, mbeseo ra naroyaro sya marova mai,
indamu Nyo mataopon,
Nya omake veano rinapaya irati vatano mamune mai.
14Sya AMISY, syare nanemo vambunine veano rinapaya
irati vatano ubekero ananugo mine so obo rai mai.
Syare mangke ndatayao mai mamo,
ndaugaje ra ratutumbe mai indamu mangke mai,
muno mangke so merere masyo awa arikainye, ajavije mansai tavon.
15Yara risyamo indati syore te no Winamun,
weye ibeto Nya ananyao rai muno syusyo akirive Nya ayao rai ramu.
Muno arono rinikija ibeseo weamo inananibe,
weye taune winarorono rinai.
Currently Selected:
Masmur 17: yva
Highlight
Share
Copy
Want to have your highlights saved across all your devices? Sign up or sign in
© 2011 Yayasan Sumber Sejahtera (New Testament)
@ 2019 Yayasan Kartidaya (Psalms)
