Marako 7
7
Kite a jo adoŋo
(Nen daŋ Matayo 15.1-9)
1Oparicayo kede opwony-cikkogo ame oya i Jerucalem ocokere baŋe. 2Ote neno jo mogo i akina olub Yecu ame cemo aboŋo lubo kwer, te koppere ni mom ologo ciŋgi. 3(Pien Oparicayo kede Ojudaya ducu ka mom ologo ciŋgi atek, mom otwero cem, pien oma-ko kite a jo adoŋo. 4Dok ka odwogo i cuk, mom ocemo ituno ka koŋ olwokere; dok tye lwak cik ocele apol ame gin lubo, bala me lwoko ikopo-gu, kede weer, kede gulli mola.) 5Oparicayo kede opwony-cik openye ni, “Piŋo joni a lubi mom lubo kit a jo adoŋo, ento ocemo a pe ologo ciŋgi?” 6#Ica. 29.13 En te gamo ni, “Adwarpiny Icaya yam okobo aber i komwu, wun ogoba, acalo rik ocoo ni,
‘Rok-k i wora i doggi nono,
cunygi kara bor keda;
7ento owora nono,
pwony ame gin opwonyo obedo kite a dano.’
8Iweko wunu cik Obaŋa oko, ite lunyo wunu mako kite a dano.”
9Dok okobbigi ni, “Itimo wunu ber me bolo cik Obaŋa, me ite gwoko wunu kitewu! 10#Yaa 20.12; 21.17; Olev. 20.9; Lodo 5.16Pien Muca nwaŋ okobo ni, ‘Wor pappi kede totti,’ dok ni, ‘Dano a yeto pappere onyo tottere myero nek oko’. 11Cite wun ikobo wunu ni, ‘Ka ŋattoro okobbi pappere onyo tottere ni, Gin a kono akonyi kede en Korban’ (te koppere ni, doŋ omio oko baŋ Obaŋa), 12mom oye ni en tim ginnoro pi konyo pappere onyo tottere. 13Amannono imio wunu kop Obaŋa to nono pi kitewu ame ipwonyo wunu kede jo. Dok daŋ itimo wunu gin ocele apol ame rom kede mano.”
Gin abalo jo
(Nen daŋ Matayo 15.10-20)
14En dok ocwano lwak baŋe, okobbigi ni, “Wun ducu winy wunu koppa, daŋ iniaŋ wunu iye. 15Mom tye ginnoro ame ya i oko ame twero balo dano ka odonyo i yie; ento gin ame ya i yi dano en ame balo dano. [16Ka ŋattoro tye i yit me winyo, myero winy.]” 17Ka doŋ odonyo i ot, ame oweko lwak, jo mere a lube openye pi carokoppono. 18En te kobbigi ni, “Wun daŋ kara pwod pe iniaŋ wunu? Pe iŋeo wunu ni, jami ducu ame donyo i yi dano kun oya i oko pe twero bale? 19Pien mom donyo i cunye, cite kato i cin-yic, te kato oko.” (Ka okobo amannono, olonyo wit cem ducu.) 20Te dok kobo ni, “Gin ame ya i yi dano en ame balo dano. 21Pien gin oya i yi dano, ame oya i cunye, en tam areco, coco, kwo, nek, cot, 22woro me lim, timmogo areco, bwolo jo, tarwaŋ, nyeko, ayet, wakere, miŋo. 23Jami ducu arecc-ni ya i yi dano, daŋ obalo dano.”
Iyee a dako me Curo-poiniki
(Nen daŋ Matayo 15.21-28)
24Yecu oya i kuno, owoto i lobo a ceggi kede Turo kede Cidon. Odonyo i ottoro, mom omito ni ŋattoro ŋe ni etye kuno; ento mom gire etwero pono. 25Oyotoyot dako moro a nyare tye kede cen arac te winyo rwoŋe oko, obino te ryebere i te tyene. 26Dan-nu dano me Grik, rokkere Curo-poinike. En okwao Yecu ni ryem cen arac i kom nyare. 27En te kobbe ni, “Koŋ iwek itino kwoŋ yeŋ, pien mom ber ikwanyo cem itino, ote yuyi gwogi.” 28Dako te gamo ni, “Mannono ikobo kakare, Adwoŋ; ento otino gwogi ame i te meja daŋ camo ŋid cem itino do.” 29Te kobbe ni, “Pi kop ame ikobo-nu, dok giri paco; cen doŋ oya oko i kom nyari.” 30Dako te dok paco; te nwoŋo atin obuto i wi tanda, a cen arac doŋ oya oko i kome.
Yecu ocaŋo dano ame yite odiŋ ame mom kobo aber
31Yecu oya i lobo a ceggi kede Turo, obeo i Cidon, otuno i nam me Galilaya, te pello i dye lobo me Dekapoli. 32Gin te kela baŋe dano moro ame yite odiŋ, ame mom kobo aber, gin te bako doggi baŋe ni eket ciŋe i kome. 33Otere teŋe iya i baŋ lwak i muŋ, te keto nyako ciŋe i yit dano-nu, te ŋulo lao, omulo lebe; 34dok te neno malo i polo, ocur kun kobo ni, “Epata,” te koppere ni, “Yabere!” 35Yit dano-nu te yabere oko, te lebe daŋ te gony oko, te cako kop aber, aboŋo peko moro. 36Yecu te cikogi ni, kur dok otit baŋ ŋattoro; ento kadi bed ocikogi, gin omedde omeda i lalo kop-pu. 37Gin owuro okato kare a kun okobo ni, “Jami ducu ame en otimo ber; omio jo ame yitgi odiŋ owinyo, kede jo ame te lebgi oto okobo.”
Currently Selected:
Marako 7: La79
Highlight
Share
Copy
Want to have your highlights saved across all your devices? Sign up or sign in
Lango New Testament © Bible Society of Uganda, 1979.
