1 Lakana 3
3
Otino Obaŋa
1 #
Lak. 1.12
Koŋ inenu kite mar me awura a rik Papo omiowa, me lwoŋowa ni wan otino Obaŋa; daŋ wan otye amannono. Gin omio lobo mom ŋeowa, pien yam okwie. 2Owotena, aman doŋ wan otino Obaŋa; kite a wan obino bedo kede mom ru onen, ento wan oŋeo ni, ka en bino nen, wan obino bedo bala en, pien obino ne ne kite a en tye kede. 3Ŋat acel acel ame tye kede gen man ame omoko i kom Kricito, lonyere kene bedo acil, acalo Kricito daŋ cil.
4Dano acel acel ame timo bal nwoŋo aturo cik; bal gire en turo cik. 5#Lak. 1.29Iŋeo wunu ni Kricito rik onen me ekwany balwa oko; i en ikome balloro mom iye. 6Ŋattoro ame bedo i en mom timo bal; ŋattoro ame timo bal nwoŋo mom oneno en, daŋ pe oŋee.
7Itinona, kur imi ŋattoro bwolwu.
Ŋat ame timo gin a tye atir, en ame kite atir, acalo Kricito daŋ kite atir. 8Ŋat ame timo bal en dano a Catan; pien Catan ya i ageyi obedo ka timo bal. Gin omio Wot Obaŋa rik onen, pi turo tic a Catan.
9Mom tye ŋattoro ame Obaŋa onywalo ame timo bal, pien koti Obaŋa bedo i yie; en mom twero balo, pien nwoŋo Obaŋa onywale. 10Man en a bino miyo oneno jo mene obedo otino Obaŋa kede jo mene obedo otino a Catan: ŋat a mom timo gin a tye atir mom atin Obaŋa, naka ŋat a mom maro ominnere.
Omarre wunu kenwa kenwa
11 #
Lak. 13.34
Pien man en kwena ame iwinyo wunu cakere i ageyi, ni myero omarre wunu kenwa kenwa. 12#Age. 4.8Kur obedu bala Kain ame rik obedo atin Arac, te neko ominnere oko ca, ŋo ce omio oneke? Pien en ticcere rac, ento me ominnere onwoŋo tye atira. 13Omegona, kur iwur wunu ka lobo dagowu. 14#Lak. 5.24Wan oŋeo ni wan oya oko i to, otuno doŋ i kwo, pien omaro omegowa. Ŋat a mom tye kede mar pwod odoŋ gire i to. 15Ŋattoro ame dago ominnere en anek, daŋ iŋeo wunu ni, mom tye anekkoro ame kwo a perakino odoco bedo i yie. 16Man doŋ mio wan oniaŋ i kom mar, pien Kricito ojalo kwo mere pirwa. Wan daŋ myero ojal kwowa pi omegowa. 17Ka ŋattoro tye kede jami me lobo man a romme, ce oneno ominnere ame piny oloo, eka te kwero miye kony, kara mar Obaŋa bedo i yie niŋo?
18Itinona, kur obedu kede mar i kopwa onyo i dogwa keken, cite omar wunu jo kede mar me ateni ame nen i tic. 19Man en a bino miyo wan oŋeo ni wan ojo ame otye i ateni, eka cunywa bino kwe i nyime, 20ka ce cunywa ŋolliwa kop, pien Obaŋa dwoŋ kato cunywa dok en ŋeo kop luŋ.
Tekcuny i nyim Obaŋa
21Owotena, ka cunywa mom ŋolliwa kop, otye i tekcuny i nyim Obaŋa; 22daŋ wan onwoŋo ginnoro keken ame okwao baŋe, pien wan ogwoko cikkere dok otio gin a yomoro yie. 23#Lak. 13.34; 15.12, 17Doŋ cikkere en ene, ni, myero wan oye nyiŋ Wode Yecu Kricito, dok omarre kenwa kenwa, acalo en rik ocikowa. 24Ŋat a gwoko cikkere bedo i Obaŋa, Obaŋa daŋ bedo i yie. Gin a mio wan oŋeo ni en bedo i yiwa, pi Cuny Acil ame en omiowa.
Currently Selected:
1 Lakana 3: La79
Highlight
Share
Copy
Want to have your highlights saved across all your devices? Sign up or sign in
Lango New Testament © Bible Society of Uganda, 1979.
