APOCALIPSIS 10

Angel ne nzen gyiich

1Zhich guin wii noo ste angel ne kesentyent fwert, wruu ne gyeybaa zëdtseeb ne, nrël ne bëw no zu te fkyiit xtoo ne no rkabtsa lo ne zegnak lo ngbiz, le yrup kuur ne nak zegnak ledne rgaa bël. 2Nzen ne te gyiich ne zemyal lo; lex wzu nibëë ne lo nisdoo, le nibëg ne wzu ne lyu. 3Lex wobtsaa ne ndípse zegnak chene robtsaa te meedx; or ne wobtsaa ne, wlen xrëz guedx ngwzii. 4Chene wluzh wnii guedx ngwzii, za noo nkagyiich noo ne wzëët ngwzii, per won noo wlen te rëz gyeybaa, na we lo noo:

―Gukeedx negwa ne wzëët yra guedx ngwzii, ykagyiichdet do.

5Angel ne wii noo zu nii lo nisdoo no le lyu, wlisgya nyabëë ne nes gyeybaa. 6Wgon ne Dëdyuzh ne mbán ydeblo siguelendxee. Laa Dëdyuzh wzhexkwaa gyeybaa gyëzlyutee no le nisdoo no le yrandxee ne nuu lo we, re angel guin:

―Che xchedetre gako; 7porke chene ydxiin dxe ne kwëz angel ne yzaa angel guedx xtrompet ne, laa ne gak kumplir yra ne che wlebleedx Dëdyuzh nga zegne wzëët No lo yra mén ne wak profet ne wlaa xdxiin Ne. Yra neree waknandetgue méno chekwlo.

8Rëz ne won noo ne wlen gyeybaa, wnii we lo noo ste, na we:

―Gutsa gunëëz gyiich ne zemyal lo ne nzen angel gwa ne zu nii lo nisdoo no le lyu.

9Orguin wa noo lo angel guin, re noo ne yniiz ne gyiich guin lo noo; lex na ne lo noo:

―Le we nee, gugu we. Lenruu de gaknexo zegnak dxin, per le lenlextoo de gaknla we.

10Lex wnëëz noo gyiich guin nya angel guin, wu noo we; lenruu noo waknexo zegnak dxin, per chene wluzh wu noo we, waknla we lenlextoo noo. 11Zhich guin na angel guin:

―Rap de degne yberee de yzëët ke de ne sak ndal gyëz, ne sak ndal nacion, ne sak ndal mén ne rnii wren wren diiz, no le ne sak rrey.

Currently Selected:

APOCALIPSIS 10: zpi

Highlight

Copy