JUAN 18

Wdekwent Judas Jesus

(Mt. 26:47-56; Mr. 14:43-50; Lc. 22:47-53)

1Wluzhse re Jesus yra neree, wruu Ne yra Ne xpén Ne, za Ne stebkoo guexgyow-Cedrón te ledne nuu yag-olivo, wdee Ne lad yag guin yra Ne men. 2No ke Judas ne wdekwent Jesus nan gan pazh nak lugar guin, porke ndal tir wa Ne nga yra Ne xpén Ne. 3Lex wdxinno Judas tebëd soldad nga no le tebëd mén ne rapkwent xeydoo Dëdyuzh; laa fxuz ne rnebééy lo yra fxuz no le men ne nak farisew wxaal yra men guin. Zanzen men bnii, no zanzen men gyerbël, no zanzen men spad. 4Per kom che nan Jesus yra ne sak Ne, wruu Ne nga wnabdiiz Ne lo men, re Ne:

―¿Txu rye de?

5Wke men re men:

―Le noo rye Jesus men-Nazaret.

Wke Jesus, re Jesus:

―Noo ne.

No ke Judas ne ydekwent Jesus zu lad men. 6No chene re Jesus: “Noo ne”, wberezhich men yra men wkantaa men lyu. 7Lex wnabdiiz Jesus lo men ste, re Jesus:

―¿Txu rye de?

Wke men re men:

―Le noo rye Jesus men-Nazaret.

8Orguin re Ne:

―Che na noo lo de ne noo ne. Belne noo rye de, gudee si gya yra ménree.

9Wak neree chen gak kumplir ne re Ne, chene re Ne: “Ni te mén ne wniiz de lo noo wakdet perdid.” 10Lex wboo Simon-Bëd spad ne neey Simon-Bëd, wtxugnëz men gyedyagbëë men ne la Malco ne nak xmos fxuz ne mazre nondee. 11Orguin re Ne lo Bëd:

―Gugutsoow spad gwa xlugaro. Belne Xuz noo rniiz gyelenlesree ne sak noo we, ¿peguin sakdet noo we?

Wano mén Jesus lo fxuz ne mazre nondee

(Mt. 26:57-58; Mr. 14:53-54; Lc. 22:54)

12Orguin wbig soldad ne rnebééy yra men xsoldad men no le men ne rapkwent xeydoo Dëdyuzh, wnëëz men Jesus wliib men Ne. 13Wano men Ne primer ruxyuu Anás porke laa men nak xuzsweguer Caifás ne nak fxuz ne mazre nondee iz guin. 14Laake Caifásree nga nak ne re lo men-Israel ne wendee guet tebegue mén por yra men-Israel.

Wkedxnruu Bëd ne rnebeey Bëd Jesus

(Mt. 26:69-70; Mr. 14:66-68; Lc. 22:55-57)

15Wanal Simon-Bëd Jesus yrup men ste xpén Ne. Kom rnebeey fxuz ne mazre nondee ste men guin, neguin wdenal men Ne ruxyuu fxuz, 16le Bëd wyan zhiin yaglaa por fwer. Lex wruu xpén Ne ne rnebeey fxuz ne mazre nondee, wnii men lo wnaa ne zunap ruyaglaa; por neguin wdee wnaa guin si wdee Bëd. 17Orguin re wnaa guin lo Bëd:

―¿Pe let nodet de nak te xpén mén gwa?

Wke Bëd, re Bëd:

―Let nodet noo.

18Kom rak nyag, lex wgoob yra mén ne rlaa dxiin nga yag, wzuul men gyi, yra men men ne rapkwent xeydoo Dëdyuzh, kazanen men. No Bëd zu lad men rzanen Bëd lo gyi.

Laa fxuz ne mazre nondee wnabdiiz lo Jesus

(Mt. 26:59-66; Mr. 14:55-64; Lc. 22:66-71)

19Wzelo fxuz ne mazre nondee wnabdiiz men lo Jesus xkwent xpén Ne no le xkwent ne rneluu Ne. 20Orguin re Ne lo men:

―Noo nes lo yrandxee mén wnii noo, bet ne ngueedx wneluudet noo; yzaandxee dxe wneluu noo mén lenxeydoo Dëdyuzh ledne rdop yra men-Israel. 21¿Penak rnabdiiz de lo noo? Lo yra mén ne won ne wzëët noo gunabdiiz; laa men nan gan kox wneluu noo lo men.

22Zegne re Ne zenga, wgapgue te ke men ne rapkwent xeydoo Dëdyuzh temya gyedkwes Ne, re men lo Ne:

―¿Pe zegwa yke de lo fxuz ne mazre nondee?

23Wke Ne re Ne:

―Belne nuu ne mal wnii noo, guzëët gan pe ne malzho; per belne wen ne wnii noo, ¿penak wgap de gyedkwes noo?

24Lex wxaal Anás Ne lo Caifás men ne nak fxuz ne mazre nondee, zengategue nliib Ne.

Wkedxnruu Bëd ste ne rnebeey Bëd Jesus

(Mt. 26:71-75; Mr. 14:69-72; Lc. 22:58-62)

25Le Bëd benak zuzanen lo gyi. Lex wnabdiiz men ne ndxin nga lo Bëd, re men:

―¿Pe let nodet de nak te xpén mén gwa?

Wke Bëd, re Bëd:

―Let nodet noo.

26Nga zu te men ne nak xmos fxuz ne mazre nondee, xparyent men ne wtxuug Bëd gyedyag, re men lo Bëd:

―¿Pe let laadet de nga wii noo zu lad yag-olivo yrup de men?

27Wkedxnruu Bëd ste ne rnebeey Bëd Jesus; orguin wkarëz te ngyedgol.

Wano mén Jesus lo Pilato

(Mt. 27:1-2, 11-14; Mr. 15:1-5; Lc. 23:1-5)

28Ne zëdyenii lyu, wruno men Jesus ruxyuu Caifás, wano men Ne ruxyuloow gobernador, per wdeedet men lenyuloow, porke nduxo por laa men. Belne ndee men, nuudetre nyu men ne ruxsëë men lo pask. 29Por neguin wruu Pilato re Pilato lo men:

―¿Pagox rkagyii de ménree?

30Wke men re men:

―Belne nyakdet men menmal, ndxidnodet noo men lo de.

31Lex re Pilato lo men:

―Gusano men laa de, gulaa gyelextis lo men zegne zëëd lo xley de.

Wke men re men:

―Noo yra noo yëten noo poder ne yket noo ni te mén.

32Zenga wak kumplir ne re Ne chene wzëët Ne gan pezee guet Ne. 33Wberee Pilato wdee ke Pilato lenyuloow, lex wbëz Pilato Ne wnabdiiz men lo Ne, re men:

―¿Pe laa de nak xerrey men-Israel?

34Lex re Ne:

―¿Pe noze lextoo de rlen negwa ne rnabdiiz de lo noo, u nuu ste mén na we lo de?

35Wke Pilato, re Pilato:

―¿Pe men-Israel nak noo u? Laake menlaz ke de yra men fxuz ne rnebééy lo yra fxuz wnizkwent de lo noo. ¿Kox wlaa de bes?

36Lex re Ne:

―Noo rnebééydet noo nee gyëzlyuree. Belne nako ne nee gyëzlyuree rnebééy noo, nyap noo xpén noo ne nlaa dil, chen nnëëzdet men-Israel noo. Per noo rnebééydet noo nee gyëzlyuree.

37Lex re Pilato:

―¿Rrey nak de cheguin?

Wke Ne re Ne:

―Zegwa we zeg na de, rrey nak noo. Por neguin wal noo no por neguin zëëd noo nee gyëzlyuree por ne yzëët noo ne nli. Yrandxee mén ne zanal ne nli, rkagyedyag men ne rzëët noo.

38Orguin re Pilato:

―¿Kox nak ne nli?

Wdekwent ke Pilato Jesus lo soldad chen yket men Ne

(Mt. 27:15-31; Mr. 15:6-20; Lc. 23:13-25)

Wluzhse re Pilato zenga, wruu Pilato ste wnii men lo men-Israel, re men:

―Ryenen noo ne bet ne mal wlaadet ménree, por neguin rzëldeto lo noo. 39Per laa de yra de rap de koxtumber ne lo pask rnab de ne rláá te mén ne nuu chegyiib. Orrenaa, ¿pe rlaan de yselaa noo xerrey men-Israel?

40Wzelo men rderëz men yra men, re men:

―¡Yselaadet de men gwa! ¡Barrabás guselaa!

No te ngbaan nak Barrabás.

Currently Selected:

JUAN 18: zpi

Highlight

Copy