San Matew 14

Güjt Waj Bén baroobnijs bejn ree

(Mr. 6:14‑29; Lc. 9:7‑9)

1Tiampzii Herodes bén canabee niz Galilea, biguiejnman ni cayüjn Jesús. 2Abiꞌ rëbaman loj ree xbejnman:

―Waj bén baroobnijs bejn ree, laaman baban zatijb, zeel rajpaman guialrniabee rüjnman milagr ree.

3Rëb Herodes zian guial laaman gunabee biniaaz Waj, abiꞌ bixiiman con caden dxel badxeꞌ reeman laaman ladxguiib. Been Herodes guin zian por Herodías lacheel bijchaman bén la Felip, 4guial rëb Waj guin loj Herodes:

―Ad laat guial zojbnël laagajc lacheel bijchil.

5Guyën Herodes nugüjtaman Waj, per bidxebaman xhie nüjn ree bejn laaman guial graczi reeman rëb Waj na̱j tijb bén rudëëd xtiidx Dios loj ree bejn. 6Per chi bazaꞌ Herodes ijz, brii xiꞌn Herodías bayaꞌm loj ree xbioozaman. Abiꞌ dád bayuladx Herodes ziꞌc bayaꞌm, 7dxel rëb Herodes gudëëdaman xhietëëz ni guiniabim. 8Abiꞌ xniaam rëb lojm xhie guiniabim, dxel rëbim loj Herodes:

―Banee guijc Waj bén ruroobnijs bejn ree, baneen loj tijb pliajt.

9Dád guyunaya rey Herodes, per guial mal bayaꞌn reeman diidx niz loj gra ree xbioozaman, gunabeeman xsuldadaman gudëëd reeman ni gunabim. 10Dxel gunabeeman guitüꞌ reeman guijc Waj lën ladxguiib guin, 11abiꞌ bidxinnë reeman laan loj tijb pliajt badëëd reeman laan lojm, dxel bayümin loj xniaam.

12Zianz bidxin ree xbejn Waj bacaꞌ reeman xcuerpaman persi biquieꞌch reeman laaman. Dxel bicojn reeman Jesús.

Ruyaan Jesús gaay mil bejn

(Mr. 6:30‑44; Lc. 9:10‑17; Jn.6 :1‑14)

13Chi gogbee Jesús zian, guyuman loj tijb barcw zëman niz lod achutczi zojb din su laazaman. Chi gogbee ree bejn, dxel brii ladx reeman zë guiaꞌzi reeman lod guidxinman. 14Chi barii Jesús loj barcw guin baguiaaman bén guixiuj ree rigaꞌ yagaj, bayaman laa reeman abiꞌ bayüjnman bénragxuu zinë reeman. 15Chi ma gudxe, gubig ree xbejnman lojman rëb reeman:

―Ma gudxe yan, abiꞌ achut bejn zojb niz guie. Güjdx loj ree bén guin ma gojl yaguiaj reeman, din che reeman guiedx lod sii ni gaw reeman.

16Per badxiꞌ Jesúsan rëbaman:

―Ad rüjnt naguiejn yaguiaj reeman, lëjt gol badëë ni gaw reeman.

17Badxiꞌ reeman laan rëb reeman:

―Per gaayzi guiadxtil nacaꞌn con zatioꞌp bëjl.

18Dxel rëb Jesús loj reeman:

―Gol tanë reen guie.

19Dxel gunabeeman gurej gra ree bén guin loj guixyaꞌ. Abiꞌ cwaꞌman guigaay guiadxtil guin con grop bëjl guin. Dxel gules lojman xanyabaa badëëman quixtëë loj Dios, abiꞌ gulaꞌman guiadxtil guin badëëman laan loj ree xbejnman persi gudiꞌs reeman laan loj gra ree bén guin. 20Gra reeman gudaw xt bigdxinladx reeman, abiꞌ staczi bacha reeman za chiptioꞌp dxüm ni bayaꞌn. 21Bén gudaw guin ree na̱j reeman cost gaay mil xinguiaaw garenqui ree béngunaa con ree xindoo.

Riza Jesús loj nijs

(Mr. 6:45‑52; Jn.6 :16‑21)

22Dxel gunabee Jesús xbejnman guyu reeman loj barcw din ned reeman tëd gaj reeman stiblad roꞌ nijs guin, laꞌtgaj cuzaadiidx nëman benzien guin ree. 23Chi ma gulox bazaadiidx nëman laa reeman, dxel zë xtijbaman guijc tijb guiaꞌ din cwedx guiniabaman Dios. Chi gure guiaal xtijbzaman zaꞌ guijc guiaꞌ guin. 24Guiáad barcw guin zijt ma zën loj nijs, dád rliaroꞌ xtüjp nijs guin laan guial rliaj bi niz loj barcw guin. 25Chi ma cayreguiaal, zibig Jesús loj ree xbejnman rzaman loj nijs guin. 26Dxel baguiaa ree xbejnman laaman rzaman loj nijs guin, dád bidxeb reeman abiꞌ gurixdiaj reeman rëb reeman:

―¡Tijb anman!

27Per guneenë Jesús laa reeman rëbaman:

―¡Gol baguꞌ luxdoodi! ¡Najn, ad rdxebidi!

28Badxiꞌ Bëdan rëbaman:

―Dad, bal lüjn, gunabee gazan loj nijs guin guialan lojl.

29Abiꞌ rëb Jesús lojman:

―Guda.

Dxel baguiajt Bëd loj barcw guin, rzaman loj nijs guin zëman loj Jesús. 30Per chi baguiaaman bidoxhan cabiꞌ dxel bidxebaman, abiꞌ guial guzuloj cazëëbaman xan nijs guin guridxaꞌman rëbaman:

―¡Gognë naj, Dad!

31Loj hor ziigajc basli yaa Jesús gunaazaman yaa Bëd, rëbaman lojman:

―¿Chexc zeel ad rliladxzaꞌctil, chexc zeel yuꞌ nawëëguil?

32Abiꞌ chi bayëꞌp reeman loj barcw guin, laa bacwëëz gajc bi guin. 33Guiáad ree bén yuꞌ loj barcw guin bazuxib reeman loj Jesús, rëb reeman:

―Diidxliczi lüjn na̱j xiꞌn Dios.

Rayüjn Jesús bénragxuu ree Genesaret

(Mr. 6:53‑56)

34Chi gudëd reeman loj nijs guin dxel bidxin reeman xyuj ree bén Genesaret. 35Abiꞌ ree bén niz ni bayünbee reeman Jesús, abiꞌ guidibczi niz yagaj gutieꞌch reeman diidx guial zaꞌman ni. Dxel binë ree bejn bénragxuu ree lojman, 36guzajc reeman liaadx lojman din tiëbaman gugaal reeman majsi guiaꞌzi xabaman. Abiꞌ gra ree bén bagaal xabaman bayajc.

Currently Selected:

San Matew 14: zas

Highlight

Copy