San Lujc 9

Rxhiaal Jesús guidxiptioꞌp ree xbejnman chiglüü reeman xtiidx Dios

(Mt. 10:5‑15; Mr. 6:7‑13)

1Gurejdx Jesús guidxiptioꞌp ree xbejnman, abiꞌ badëëman guialrniabee loj reeman din yabëë reeman graloj xindxab luxdoo ree bejn yayüjn tëë reeman bénragxuu ree. 2Guxhaalaman laa reeman chiglüü reeman xhienaag na̱j xguialrniabee Dios, yayüjn tëë reeman bénragxuu ree. 3Rëbaman:

―Ad chinëdi xhienin par runejz: niꞌqui yagrliadxidi, niꞌqui guijxh, niꞌqui guialraw, niꞌqui milia, niꞌqui stibnejz xabidi. 4Chutëëz lidx guidxindi, tib gol bayaꞌnzi xt chi yazadi luguiedx guin. 5Bal yuꞌ guiedx lod ad rënt reeman lëjt, gol baza yagaj, gol gudxijp guxyuj guiaꞌdi ziꞌc tijb sen guial ad rënt reeman guzoob reeman xtiidx Dios.

6Dxel brii reeman zë reeman tijbgaj guiedx zigtieꞌch reeman xtiidxzaꞌc Dios, rayüjn tëë reeman bénragxuu ree.

Riguiejn Herodes ni cayüjn Jesús

(Mt. 14:1‑12; Mr. 6:14‑29)

7Chi gogbee rey Herodes graczi ni cayüjn Jesús. Guyunawëëgaman guial yuꞌ ree bejn rëb, Waj bén baroobnijs bejn ree ma baban, 8yuꞌ tëë reeman rëb Elíasan bén badëë xtiidx Dios loj ree bejn ma balüüloj, yuꞌza reeman rëb, tijb ree bén badëë xtiidx Dios loj ree bejn gocli ma baban. 9Per rëb Herodes:

―Naj gajc gunabee biruꞌ yëjn Waj. ¿Chuza bénan riguiejnan ruzaꞌt ree bejn xcwent ni cayüjnman?

Zianan zeel rüjn Herodes naguiejn guguiaaman Jesús.

Ruyaan Jesús gaay mil bejn

(Mt. 14:13‑21; Mr. 6:30‑44; Jn.6 :1‑14)

10Chi badxin ree xi apóstoles Jesús, be reeman graczi ni biguieen reeman. Dxel binëman laa reeman lod achutczi bejn zojb, gajxh guiedx Betsaida. 11Per chi gogbee ree bejn, dxel zinal reeman laaman lod zëman. Abiꞌ balüüman laa reeman xcwent xguialrniabee Dios bayüjn tëëman bénragxuu ree.

12Chi ma cadxe, bibig guidxiptioꞌp ree apóstoles lojman rëb reeman:

―Güjdx loj gra ree bén guin din yaguiaj reeman chitiil lod yayaꞌn reeman luguiedx doo ree në ree ranch, chitiil tëë ni gaw reeman din lod nadxuꞌ ree achetczi yuꞌ.

13Dxel rëbaman loj reeman:

―Lëjt gajc gol badëëd ni gaw reeman.

Abiꞌ rëb reeman:

―Per gaayzi guiadxtil nacaꞌn con zatioꞌp bëjl, bajtëë bal yoꞌn yusiin ni gaw gra reeman.

14Abiꞌ cost gaay mil ree xinguiaaw rigaꞌ yagaj. Per rëb Jesús loj ree xbejnman:

―Gol güjdx loj reeman din cwe tüꞌpchii gaj reeman.

15Abiꞌ bagojn reeman laa reeman persi gurej gra reeman zian. 16Dxel cwaꞌman guigaay guiadxtil guin con zatioꞌp bëjl guin. Gules lojman xanyabaa, badëëman quixtëë loj Dios, zianz gulaꞌman laa reen badëëman loj ree xbejnman din quiꞌs reeman laan loj ree bén guin. 17Graczi reeman gudaw xt bigdxinladx reeman. Abiꞌ batoꞌp reeman chiptioꞌp dxüm nilaay bayaꞌn.

Rëb Bëd guial Jesús na̱j Cristo

(Mt. 16:13‑19; Mr. 8:27‑29)

18Tijb dxej cabejdx canab Jesús Dios, zaꞌnë ganaxzi ree xbejnman. Gunabdiidxaman loj reeman, rëbaman:

―¿Chu rëb ree bejn najn?

19Badxiꞌ reeman laan rëb reeman:

―Yuꞌ reeman rëb lüj na̱j Waj bén baroobnijs bejn ree, yuꞌza reeman rëb lüj na̱j Elías bén badëë xtiidx Dios loj ree bejn, yuꞌ tëë reeman rëb lüj na̱j tijb ree bén badëë xtiidx Dios loj ree bejn gocli, bén ma baban.

20Dxel gunabdiidx Jesús zatijb, rëbaman:

―Laadx lëjt, ¿xhie nadi chu najn?

Badxiꞌ Bëdan rëbaman:

―Lüj na̱j Cristo. Lüj na̱j Xiꞌn Dios.

Rugojn Jesús guiëtaman

(Mt. 16:20‑28; Mr. 8:30–9:1)

21Rëb Jesús loj reeman achuczi loj guiëb reeman zian, 22rëb tëëman:

―Rayal sagdiaj Bén guxhaal Dios: ad zënt ree guxtis Israel laaman, niꞌqui ree bixhioz rniabee ree bixhioz, niꞌqui ree mextr rajc ley. Gugüjt reeman laaman, per ni yayon dxej yabanman.

23Dxel rëbaman loj gra reeman:

―Bal chu rën gac da bejnan ad rayalt güünman ziꞌc na̱j xixgabaman, siibnejzaman guialzi ni tëdzaman guixie guixie abiꞌ guidnalaman naj. 24Din bén mazri rën guialnaban ni rajpaman loj guidxliuj guie, zadxin dxej gusëëbaman laan, per bén guiët por naj, zajpaman guialnaban tiblayaa con Dios. 25¿Xhie gan güün bejn gapaman gra ni yuꞌ loj guidxliuj abiꞌ nitaman loj Dios? 26Bal chu ratu guzaꞌt naj në da diidxan, ziangajc naj najn Bén guxhaal Dios, yatunëꞌn laaman chi guialan con da guialrniabeen loj xbiani da Dadan nëtëë loj xbiani ree xianjlaman. 27Per diidxliczi rnin lojdi, yuꞌ ree bén zaꞌ guie ad zëjtt xt guguiaa reeman xguialrniabee Dios.

Bidxaa Jesús loj choon ree xbejnman

(Mt. 17:1‑8; Mr. 9:2‑8)

28Chi gudëd cost xhujn dxej ni gunee Jesús diidx guin ree, wejman persi gurejdx gunabaman Dios tijb guijc guiaꞌ, binëman Bëd con Waj con Jacob. 29Laꞌtgaj cabejdx canabaman Dios, bidxaa lojman guiáad xabaman gojcan naquichbëj bidiin tëën bachaꞌ. 30Dxejczi gulentie tioꞌp ree bejn, caneenë reeman laaman. Tijbaman na̱j Moisejs zatijbaman na̱j Elías. 31Yuꞌ reeman galay biani cayü reeman diidx guial guiët Jesús Jerusalén. 32Majsi yuꞌ bacaal loj Bëd në loj ree xcompniaraman, batieꞌch xbacaal reeman persi baguiaa reeman xbiani Jesús con zatioꞌp ree bén zaꞌnëman. 33Chi ma baza ree bén caneenë Jesús, rëb Bëd lojman:

―Mextr, ¡zagdxen nadxuꞌ ree guie! Zajc yaguieenan choon ranch, tijban par lüj, tijban par Moisejs zatijban par Elías.

Per ad ragbeet Bëd xhienin caneeman. 34Laꞌtgaj caneeman zian, biguiajt tijb za̱j xt guijc reeman, chi ma yuꞌ reeman lën za̱j guin dád bidxeb reeman. 35Dxel loj za̱j guin biguien chaꞌ bejn, rëbaman:

―Bén guie na̱j da Xiꞌnan bén rën daꞌtan. Gol bacaagdiajg xtiidxaman.

36Chi gulox biguien chaꞌman loj za̱j guin, baguiaa reeman xtijbzi Jesús zaꞌman. Abiꞌ ad gutieꞌcht reeman diidx. Lën ree dxej zii achutczi loj rëb reeman ni baguiaa reeman.

Rayüjn Jesús tijb xin yuꞌ xindxab luxdoo

(Mt. 17:14‑21; Mr. 9:14‑29)

37Bareguiaal, chi baguiajt reeman guijc guiaꞌ guin, dád benzien brii bigchaagloj Jesús. 38Abiꞌ tijb bén noꞌch loj reeman guridxaꞌ, rëbaman lojman:

―¡Mextr!, been wen baguiaa da xiꞌnan din tijbzi laax raꞌpan. 39Tijb xindxab ru luxdoox abiꞌ rucwixdiajx laax, rugüjtyaꞌx laax rbëë tëëx bichijn roꞌx. Dád rusagdiajx laax ad rëntix guslaax laax. 40Ma gunaaban loj ree xbejnl din nabëë reeman xindxab guin, per ad gojct reeman.

41Badxiꞌ Jesús laan rëbaman:

―¡Benguijdx, bén ad rliladxt! ¿Xt goc gazunëꞌn lëjt gadaan tëën lëjt? Tanë xiꞌnl guie.

42Chi cabig xin guin basajb xindxab guin laax luyuj, bagüjtyaꞌx laax zatijb. Per gunabee Jesús barii xindxab guin, bayüjnman laax dxel bayüman laax loj xdadix. 43Graczi reeman badxaloj guialrniabee ni rajp Dios.

Rugojn Jesús zatijb guial guiëtaman

(Mt. 17:22‑23; Mr. 9:30‑32)

Laꞌtgaj caydxa loj reeman ni cayüjn Jesús, rëbaman loj ree xbejnman:

44―Gol bacaagdiajgchaaw ni ganin lëjt: yayü reeman Bén guxhaal Dios loj ree bejn.

45Per laa reeman ad bigniaꞌt reeman ni rnieeman guial ad badëëtaman mod nigniaꞌ reeman, abiꞌ bidxeb reeman niniabdiidx reeman lojman xhie rën guiëb ni rëbaman.

¿Chu mazri zojbloj?

(Mt. 18:1‑5; Mr. 9:33‑37)

46Dxel guzuloj ree xbejnman rëb loj lasaꞌ reeman chu loj gra reeman mazri zojbloj. 47Per gogbee Jesús xgab ni cayüjn reeman abiꞌ cwaꞌman tijb xindoo, bazujman laax cwëꞌman, 48dxel rëbaman loj reeman:

―Bén ridxgaꞌ tijb xindoo por naj, najn ridxgaꞌman, guiáad bén ridxgaꞌ naj, bén guxhaal najn ridxgaꞌman. Din bén rüjn sirv lojdi, laaman mazri zojbloj lojdi.

Bén ad zaꞌt contr dunuj ree zaꞌman con dunuj ree

(Mr. 9:38‑40)

49Rëb Waj loj Jesús:

―Mextr, baguiaan tijb bejn rabëëman xindxab luxdoo ree bejn por xguialrniabeel. Per badxoonan guial ad najtaman dux bejn ree.

50Per rëb Jesús lojman:

―Ad rudxoondi, din bén ad zaꞌt contr dunuj ree, zaꞌman con dunuj ree.

Gudilë Jesús Jacob con Waj

51Chi ma cadxin dxej yayëꞌp Jesús xanyabaa, dxel beenman xgab guial rüjn naguiejn cheman Jerusalén. 52Guxhaalaman bén guned ree, wej reeman tijb guiedxdo nulen Samaria bitiil reeman lod yayaꞌn reeman. 53Per ad cwëjbt ree bén Samaria guin nudëëd reeman lod nayaꞌnman guial gogbee reeman cheman Jerusalén. 54Chi baguiaa Waj con Jacob zian, rëb reeman lojman:

―Dad, ¿rënl ya yanabeen guiat bajl xanyabaa din gunijtan bén guin ree ziꞌc been Elías bén badëë xtiidx Dios loj ree bejn?

55Dxel badxiꞌ loj Jesús loj reeman, abiꞌ gudilëman laa reeman rëbaman:

―¿Nid ragbeedi ya guial loj xindxab zëëd ni rnieedi? 56Naj, Bén guxhaal Dios, ad zialtan din gunijtan xguialnaban bejn loj Dios, zialan din yabën laa reeman loj dol.

Dxel zë reeman zatijb guiedx.

Bén rën chinal Jesús

(Mt. 8:19‑22)

57Chi zë reeman lunejz, tijb bejn rëb loj Jesús:

―Dad, rënan guidnaalan lüj bantëëz guin chel.

58Badxiꞌ Jesús laan rëbaman:

―Cuyojt ree yuꞌ xguiajbiliaa reeb guiáad ree biguijn yuꞌ xguixbitiaꞌs reeb. Per Bén guxhaal Dios niꞌqui lod quixh guijcaman ad yuꞌt.

59Rëb Jesús loj ben ren:

―Tanal naj.

Per badxiꞌman laan rëbaman:

―Dad, banee mod gabenëꞌ da Dadan xt chi guiëtaman.

60Abiꞌ rëb Jesús lojman:

―Basaꞌn xdadil con ree bén ad rënt guidnal naj, laa reeman guquieꞌch laaman. Saꞌn lüj bigtieꞌch diidx xhienaag na̱j xguialrniabee Dios.

61Dxel rëb zatijb bén guin:

―Dad, rënan guidnaalan lüj, per yalojxgaj banee mod chigzadiidxnëꞌ ree da familan.

62Per rëb Jesús:

―Bén guiniaaz guiaꞌ garad abiꞌ gudxiꞌ lojman niz xijchaman, ad zileꞌt guiliaꞌman yuj zagdxe. Ziangajc bén rën guidnal naj, bal id zusaꞌnman graczi tiblad ad zileꞌt chuꞌman loj xguialrniabee Dios.

Currently Selected:

San Lujc 9: zas

Highlight

Copy