Ni been ree apóstoles 6

Bibee gajdx ree bén güün yudar

1Lën ree dxej zii chi canuu cayajcxhiej ree bén rliladx Jesús, guzuloj cabeꞌc ree bén rniee diidx grieg xguialquia ree bén rniee diidx hebreo, rëb reeman guial gra dxejczi chi riëꞌs ni raw ree béngunaa bizëjb, taꞌndoon rtiaꞌ ree bén rniee diidx grieg guial loj ree bén rniee diidx hebreo.

2Dxel guidxibtioꞌp ree apóstoles guin batoꞌp reeman graczi ree bén rliladx Jesucrist, abiꞌ rëb reeman:

―Ad zagdxet na̱j guial yacwëëz yalüün xtiidx Dios par yadiꞌsan ni gaw ree bejn. 3Zeel yanan lëjt compniar raliduladx ree Jesucrist, gol gudiil entr lojdi gajdx ree bén ragbeedi naban ziꞌc rayal, bén yuꞌ xSprijt Dios luxdoo, bén yuꞌ tëë ree xquiarguiejn, din yazuj reeman güün reeman dxiin guin. 4Guiáad dunujn yasnuu yarejdx yanaaban Dios, yalüü tëën xtiidxaman.

5Graczi reeman cwëjb ni rëb reeman, abiꞌ gulej reeman bén la Esteban, laaman rliladx Jesucrist guidib luxdooman, rniabee tëë xSprijt Dios luxdooman guidiblagaa. Gulej tëë reeman Felip, Prócoro, Nicanor, Timón, Parmenas në Nicolás bén zëëd Antioquía, nëman bililadx ni rliladx ree bén Israel chi gadaman chililadx Jesucrist. 6Dxel binë reeman laa reeman loj ree apóstoles guin, persi gurejdx gunab reeman Dios por laa reeman badxiib tëë yaa reeman guijc reeman.

7Canuu careꞌch xtiidx Dios, abiꞌ Jerusalén cayajcxhiej ree bén rliladx Jesucrist, në zien ree bixhioz Israel bililadx laaman.

Biniaaz Esteban

8Dád gognë Dios Esteban badëë tëëman guialrniabee persi rüjnman zien loj milagr delant loj ree bejn. 9Abiꞌ bëlzi ree bén yadoo ni la Libertados në ree bén Cirene con ree bén Alejandría con ree bén niz Cilicia nëtëë ree bén zëëd niz Asia, guzuloj cadildiidxnë reeman Esteban, 10per ad gojct nadxiꞌ reeman xtiidxaman guial cayagnë xSprijt Dios laaman. 11Dxel gudijx reeman bëlzi ree bejn din guiëb reeman, bacaagdiajg reeman rniee Esteban contr Dios në contr Moisejs. 12Zian been reeman persi bidxeꞌch ree bén luguiedx guin, në ree bengol në ree mextr rulüü ley. Dxel gunaaz reeman Esteban, binë reeman laaman loj guxtis. 13Gudiil tëë reeman bén basquiee ree persi rëb reeman loj ree guxtis guin:

―Ad rucwëëzt rnieeguijdx xin guie xley Moisejs në xyadoo Dios. 14Dunujn ma bacaagdiajg rëbix guial Jesús xin Nazaret guseꞌnx dux yadooroꞌ ree, guchaa tëëx costumbr basaꞌn Moisejs du loj ree.

15Abiꞌ guxtis guin ree në gra ree bén rigaꞌ yagaj, chi baguiaa reeman loj Esteban, baguiaa reeman najn ziꞌc tijb loj anjl.

Currently Selected:

Ni been ree apóstoles 6: zas

Highlight

Copy