San Mateo 16

Unacuꞌ bee fariseo cuna bee saduceo nú riꞌi Jesuse tucu milagro

(Mr. 8:11-13; Lc. 12:54-56)

1Uya bee fariseo cuna bee saduceo lu Jesuse para nú riꞌi beei preo liꞌinu. Nu unacuꞌ beei lunu nú riꞌinu tucu milagro nú lubeꞌnu lubeei tunu neli nú nzeꞌtanu lu cuendaꞌ Diose.

2Che uni Jesuse lubeei:

―Bee uche chenu neluu rnaa liñibe, che rnihua: “Nú nzeꞌta nú ñia tsu bichia yeꞌe.” 3Nu bee zilaꞌ chenu rlañiꞌhua nú neluu rnaa liñibe nu nuꞌ xcabe che rnihua: “Necha tsu bichia quieꞌ, rriꞌihua beyaꞌ xa neca bee seña liñibe.” ¿Xiquie nú la riꞌihua beyaꞌ xa neca lunú reca nee? 4Bee enu necha rriꞌi bee lee lecaxi chili arquiꞌhua nu rnacuꞌhua tucu milagro lua, pero lecaꞌ xi milagro lañiꞌlaꞌhua ulañiꞌtsiahua tucu milagro nú ulleꞌca Jonás. Nu chu utsaꞌnanu bee bene cuaꞌ, nu chu nzanu.

Levaduraꞌ bee Fariseo

(Mr. 8:14-21)

5Chequie chenu udete beella stucu chu inzatuꞌ, uzañiꞌ bee beneꞌnu a uyaꞌ beella pa acu beella. 6Che uni Jesuse lubeella:

―Ubiꞌyahua liꞌihua, lu cuendaꞌ levaduraꞌ bee fariseo cuna bee saduceo.

7Che uni bee beneꞌnu lu saꞌbeella:

―Uninu scua xne lá auyaꞌahua pá daꞌcuaꞌahua.

8Pero uriꞌi Jesuse beyaꞌ nú unibeella lu saꞌbeella, nu uninu lubeella:

―¿Xinu rnihua nú la luꞌcuhua pá? ¡Xinu lleꞌnatsia nzeli arquiꞌhua liꞌá! 9¿Xieꞌ lascaꞌ riꞌihua beyaꞌ, nu la elluꞌcu arquiꞌhua chenu udetea ayuꞌtsia pá udacu ayuꞌ mili bee bene la? ¿Nu se xala llume pá nú uzucu subrascaꞌ uquietesaꞌhua? 10¿Nu xieꞌ leꞌca la elluꞌcu arquiꞌhua chenu udetea achi pá udacu tacu mili bee bene, nu se xala llume pá nú uzucu subra uquieteꞌsaꞌhua la? 11Xiquie nú lá riꞌihua beyaꞌ nú lá nia luhua lu cuendaꞌ pá, liꞌá rnia luhua nú biꞌyahua liꞌihua lu levaduraꞌ bee fariseo cuna bee saduceo.

12Che uriꞌi bee beneꞌnu beyaꞌ nú lá ninu lu cuendaꞌ levadura, sino que uninu lubeella nú biꞌya beella liꞌibeella lunú xa seteꞌ bee fariseo cuna bee saduceo bee bene.

Uni Pedro nú neca Jesuse Cristo

(Mc. 8:27-30; Lc. 9:18-21)

13Chenu uriña Jesuse lu iliu Cesarea de Filipo, unedichiaꞌnu lubee beneꞌnu nú uninu:

―¿Ti rni bee bene nú neca Liꞌá Bene enu uxeꞌla Diose?

14Nu ucuaqui beella lu Jesuse, nú unibeella:

―Nuꞌ bee bene enu rni nú necalu Juan Bautista, nu leꞌca nuꞌ bee enu rni nú necalu profeta Elías, nu nuꞌ bee enu rni nú necalu profeta Jeremías, urre stucu profeta huaꞌtu.

15Che uninu lubeella:

―Liꞌiquiehua, ¿ti rnihua nú necaa?

16Nu ucuaqui Simón Pedro lunu:

―Liꞌilu necalu Cristo, Lliꞌñi Diose enu nehuañi.

17Che uni Jesuse lulla:

―Ñia neca lu cuendaꞌlu Simón llianaꞌ Jonás, xne niꞌ tucu bee bene ne ixiuleꞌe nucuaꞌ lulu, sino que Paa enu nzucu liñibe ulubeꞌ nucuaꞌ lulu. 18Nu liꞌá nia nú necalu Pedro, nu rni nucuaꞌ quiee, nu equie cuendaꞌ liꞌilu aca huaxilá bee benea nu niꞌ eluti la riꞌi ana nitilu liꞌibeella. 19Liꞌá liquia elurnibiyaꞌ nú nzeꞌta enza liñibe lulu, nu lu titse enu niilu nú neca perdonala stula lu iliulabe quieꞌ, leꞌca neca perdonala stula nzeꞌe liñibe, nu bene enu niilu nú la neca perdona stula lu iliulabe quieꞌ, leꞌca la neca perdona stula nzeꞌe liñibe.

20Che uni Jesuse lubee beneꞌnu nú la ixiuleꞌe beella lu niꞌtucu bee bene, nú liꞌinu necanu Cristo.

Udixiuleꞌe Jesuse nú atinu

(Mr. 8:31–9:1; Lc. 9:22-27)

21Desde che uquixie Jesuse udixiuleꞌenu lubee beneꞌnu nú rquiꞌña nú nzanu Jerusalén. Nu bee usticiaꞌ bee bene Israel cuna bee uleꞌya enu rnibiyaꞌ lubeelá bee uleꞌya cuna bee ulaxcuela enu reca ley, riꞌibeei nú chiquiꞌ nehuana zecanu. Nu udixiuleꞌenu nú utibeei liꞌinu, pero bichia rriuna huañi zecanu. 22Chequie unguyaꞌ Pedro liꞌinu tucu chu nu unilla lunu:

―¡La zela Diose nú acane scua! ¡Nu la zecalu scua!

23Che ubelleta Jesuse nu uninu lu Pedro:

―¡Ullunaꞌ lua bezeꞌlu, nu la riꞌixiꞌilu lua! Xne elliebacuꞌ nú rriꞌilu la yeꞌta nucuaꞌ lu Diose, rriꞌitsialu elliebacuꞌ tucu nú rriꞌi bee bene iliulabe elliebacuꞌ.

24Che uninu lubeelá bee beneꞌnu:

―Tunu nuꞌta tucu bee bene enu niarquiꞌ aca bee benea, la yala nú riꞌilla tucu nú niarquiꞌtsialla, rquiꞌña nú riquiꞌlla xitse nú nehuana zecalla nu yeꞌta quiella liꞌá. 25Xne bee bene enu masela niarquiꞌ nú huañi lu iliulabequieꞌ enta bichia nú nitilu nucuaꞌ, pero bee bene enu ati equie nú neca beei bee benea, luꞌcu bee nzeꞌe elunehuañi nú leca xunga laxu lu Diose. 26¿Lecaxi zibiꞌ nú riꞌi bee bene ana ye nú nuꞌ lu iliulabequieꞌ, tunu nitilulla ante Diose? Xne leca modo tsibene elunehuañiꞌ bene liñibe. 27Nu Liꞌá Bene enu uxeꞌla Diose, chenu nzela stucu bese, nzela cuna poder nú rluꞌcu Pa Diose nu cuna bee ángeleꞌnu. Bichia zeꞌe detea lu cada tucua bee bene lunú riala atiꞌlla, equie cuendaꞌ lunú uriꞌilla. 28Liꞌá nia luhua, nú nuꞌ bee bene enu nucuaꞌa caꞌa lá ati hasta nú lañiꞌbeei nú riña zeca Liꞌá Bene enu uxeꞌla Diose, nzela cuna poder nú rluꞌcua para nú nibiyaꞌa.

Currently Selected:

San Mateo 16: zpl

Highlight

Copy