San Mateo 14

Unguti Juan Bautista

(Mc. 6:14-29; Lc. 9:7-9)

1Timbu zeꞌe arre Herodes enu rnibiyaꞌ lu iliu Galilea, ubeneꞌlla ye beenú rriꞌi Jesuse, 2nu unilla lubee mosoꞌlla:

―Juan Bautista nucuaꞌ, uhuañi zeca. Enzeꞌe rluꞌculla poder cuaꞌ nú rriꞌilla bee milagro.

3Uni Herodes scua xne liꞌilla unibiyaꞌlla nú ulluna Juan nu uyacaꞌculla cuna cadena uyuꞌulla niꞌcuꞌ. Uriꞌi Herodes scua equie cuendaꞌ Herodías, enu unga unaꞌa bichilla Felipe, 4xne uni Juan lu Herodes:

―La yala nú zucunuulu leꞌcatsia unaꞌa bichilu.

5Nu niarquiꞌ Herodes nú utilla Juan, pero xiquilla bee bene, xne ye bee bene rni nú neca Juan tucu profeta. 6Pero chenu reca eliñi nú relluꞌcu Herodes lana, che uyeꞌe xinchiuꞌcu Herodías lubee bene enu nezeneꞌ lu eliñi zeꞌe, nu chiquiꞌ uyuꞌ arquiꞌ Herodes xa uyeꞌenchu, 7nu hasta uquieꞌella Diose nú deteꞌlla xitse nú nacuꞌnchu lulla. 8Nu naꞌ enduꞌ cuaꞌ uni lunchu, nú ninchu lu Herodes:

―Uliꞌquiꞌ lluca equie Juan Bautista liñi tucu pliato lua.

9Che nehuana utsu arquiꞌ arre Herodes, pero lunú uquieꞌelalla Diose lu ye bee bene enu nezeneꞌ lu eliñiꞌlla nú deteꞌlla xitse lunú nacuꞌnchu, enzeꞌe unibiyaꞌlla lubee sundaduꞌlla nú yeꞌtayu beei nú rnacuꞌnchu lulla. 10Che unibiyaꞌlla nú chiecuꞌ bee sundadu lluca equie Juan liñi niꞌcuꞌ, 11nu uriñayu beei lluca equie Juan nchiucuꞌ liñi tucu pliatu, nu udeteꞌ beeii yanchu, nu chu udeteꞌnchue ya naꞌnchu.

12Che uriña bee beneꞌ Juan unguyaꞌ cuerpoꞌ Juan nu uya caꞌchiꞌ beella cuerpoꞌlla, cheelá uyatixiuleꞌe beella lu Jesuse lunú unga.

Udeteꞌ Jesuse nú udacu ayuꞌ mili bee bene

(Mr. 6:30-44; Lc. 9:10-17; Jn. 6:1-14)

13Chenu ubeneꞌ Jesuse nú unguti Juan, uchiuꞌunu zeꞌe nza tuculiꞌnu liñi tucu barco, tucu luhuare elu lecalí tinuꞌ, para nú nzu tuculiꞌnu zeꞌe. Pero chenu uriꞌi bee bene beyaꞌ nú nzanu uchiuꞌu bee bene bee eyeche enza zeꞌe nzenala liꞌinu nu se eꞌya beei nzuebeei elu riñanu. 14Chenu ulaca Jesuse equie barco, ulañiꞌnu nú tesquielaꞌ huaxi bee bene nucuaꞌa zeꞌe nu uhuaꞌa arquiꞌnu beella, che uriyecanu bee bene enu riti nuyaꞌ beella. 15Nu chenu uchela, uyabica bee beneꞌnu lunu nu uni beella lunu:

―Uchela nee nu caꞌa neca tucu luhuare elu la nucuaꞌa niꞌ tucu bee bene. Uniꞌ lubee bene nú chue beei lubee eyeche para nú tsi beei nú acu beei.

16Nu uni Jesuse lubeella:

―La quiꞌña nú yue beei, liꞌihua udeꞌtehua nú acu beei.

17Nu uni beella lunu:

―Pero rluꞌcutsiaru ayuꞌ pa cuna chiucu bela.

18Che uni Jesuse lubeella:

―Uteyuhuane caꞌa.

19Chequie unibiyaꞌnu nú cuaꞌa bee bene añi zeꞌe lu ixi xata. Nu unaꞌtsenu lu ayuꞌ pa zeꞌe cuna rucu bela nu ubiꞌyanu enza liñibe nu udeteꞌnu cheꞌtsa lu Diose. Nu chu uleꞌenu bee pa cuaꞌ udeteꞌnu ya bee beneꞌnu para nú ritsiꞌ beellae lu ye bee bene. 20Ye bee bene zeꞌe udacu beei hasta nú ubelaꞌ beei, nu uquietesaꞌscaꞌ beei chiꞌchiucu llume bee pa nú uyaꞌna. 21Bee enu udacu neca casi ayuꞌ mili puro bee niyu, sin nú bacuꞌ bee unaꞌa cuna bee enduꞌ.

Utse Jesuse lu inzatuꞌ

(Mr. 6:45-52; Jn. 6:16-21)

22Che chu unibiyaꞌ Jesuse nú chuꞌu bee beneꞌnu liñi barco para nú riculubeella chue beella stucu chu inzatuꞌ. Diquila nú rninu lubee bene nú nzanu. 23Chenu ulaxu uninu lubee bene zeꞌe nú nzanu, uquienu equie tucu dañi para nú nacuꞌnu lu Diose zeꞌe. Chenu uyuꞌu rulaꞌ nzu tuculiꞌnu zeꞌe, 24nu barco nú nza bee beneꞌnu istula nzae lu inzatuꞌ, nu chiquiꞌ necha rriꞌinu inzatuꞌ barco, xne chiquiꞌ reca bii enza lu barco. 25Nu elliecabe see Jesuse lu inzatuꞌ, nzanu enza lubee beneꞌnu. 26Chenu ulañiꞌ bee beneꞌnu nú senu lu inzatuꞌ, ulliqui beella nu ubixialí beella nú uni beella:

―¡Tucu benechiquiꞌ!

27Pero uni Jesuse lubeella:

―¡Utsu naaqui arquiꞌhua! ¡Liꞌá nucuaꞌ la lliquihua!

28Chequie uni Pedro lu Jesuse:

―Detá, tunu liꞌilu nucuaꞌ, unibiyaꞌ nú tsea lu inzatuꞌ nzela hasta lulu.

29Che uni Jesuse lulla:

―Utee che.

Nu che chu ulaca Pedro equie barco nu uquixiella sella lu inzatuꞌ nzalla lu Jesuse. 30Pero chenu utsiꞌlla nú chiquiꞌ reca bii, ulliquilla nu uquixie ratseꞌlla lu inzatuꞌ, nu urixialilla unilla:

―¡Detá, utsilaꞌa liꞌá!

31Hora zeꞌe unaꞌtse Jesuse yalla, nu uninu lulla:

―¡Xinu lleꞌnatsia nzeli arquiꞌlu liꞌá! ¿Xiquie nú uzaꞌ arquiꞌlu?

32Nu chenu uquie beella equie barco, ungaxe bii. 33Chequie beelá bee enu nchiucuꞌ equie barco, utsulliqui beella lu Jesuse nú uni beella lunu:

―¡Nelíca nú liꞌilu necalu lliꞌñi eꞌcu Diose!

Uriyeca Jesuse bee bene eyeche Genesaret

(Mr. 6:53-56)

34Chequie udete beella lu inzatuꞌ zeꞌe, nu uriña beella stucu chu ruꞌu inzatuꞌ lu iliu nú lee Genesaret. 35Nu uyuꞌulu bee bene luhuare zeꞌe liꞌinu nú necanu Jesuse, nu ungabiyaꞌ ye bee bene diqui enza zeꞌe nú uriñanu zeꞌe, che uriñayu bee bene zeꞌe bee bene enu riti lunu. 36Nu uziquie beei lunu nú zelanu nú tiꞌya beei masia ruꞌu xucunu, nu ye bee bene enu utiꞌya ruꞌu xucunu uyecaꞌ beei.

Currently Selected:

San Mateo 14: zpl

Highlight

Copy