ᒨᓯᓯ ᓯᕗᓪᓖᑦ 25

ᐂᑉᕋᕼᐋᒻ ᑭᖑᕚᕆᔭᖏᑕᑦᑕᐅᖅ ᐃᓚᖏᑦ

ᑯᕉᓂᑲ ᓯᕗᓪᓖᑦ 1:32,33

1ᐂᑉᕋᕼᐋᒻᓗ ᓄᓕᐊᓂᒃᑲᓐᓂᕐᐳᖅ, ᐊᑎᖃᕐᑐᒥᒃ ᑭᑑᕋᒥᒃ. 2ᑖᑦᓱᒪᓗ ᕿᑐᕐᖓᕐᑖᕐᑎᑉᐹ ᔨᒻᕋᓐᒥᒃ, ᔫᒃᓵᓐᒥᒡᓗ, ᒥᑖᓂᒥᒡᓗ, ᒥᑎᐊᓂᒥᒡᓗ, ᐃᓴᐸᒃᒥᒡᓗ, ᓱᐊᒥᒡᓗ. 3ᔫᒃᓵᓐ ᐊᑖᑕᒋᔭᐅᓚᐅᕐᐳᖅ ᓰᐸᒧᑦ ᑎᑖᓂᒧᓪᓗ, ᑎᑖᓂᓗ ᐃᕐᓂᖃᕐᓗᓂ ᐊᓱᕆᒥᒃ, ᓕᑐᓯᒥᒡᓗ, ᓕᐅᒥᒥᒡᓗ. 4ᒥᑎᐊᓂᐅᓪᓕ ᐃᕐᓂᖏᑦ ᐅᑯᐊᖑᕗᑦ ᐃᐸ, ᐃᐱᕆ, ᕼᐊᓅᒃ, ᐊᐰᑕ, ᐃᐅᓪᑖᓗ. ᑖᒃᑯᐊᓕᒫᓪᓗ ᑕᒪᕐᒥᒃ ᑭᖑᕚᕆᔭᐅᕗᑦ ᑭᑑᕋᒧᑦ.

5ᐂᑉᕋᕼᐋᒻᓗ ᑕᒪᕐᒥᒃ ᐱᖁᑎᓕᒫᓂ ᐂᓴᑭᒧᑦ ᑐᓂᕔᑦ; 6ᓄᓕᐊᖓᑕ ᐊᓯᐊᒍᑦ ᐃᕐᓂᕐᑖᕆᓯᒪᔭᓂ ᑐᓂᓯᕕᒋᕔᑦ ᑐᓂᕐᕈᑎᓂᒃ, ᐃᓅᓂᕐᒥᓂ ᓱᓕ ᑖᒃᑯᐊ ᐃᕐᓂᓂ ᐊᐅᓪᓚᕐᑎᑉᐰᑦ ᐃᕐᓂᕐᒥᓄᑦ ᐂᓴᑭᒧᑦ ᑲᑎᒪᔭᐅᖁᓇᒋᑦ, ᓄᓇᐅᑉ ᓯᕿᓐᓂᓕᕐᕕᐊᑕ ᓇᓛᓄᑦ.

ᐂᑉᕋᕼᐋᒻ ᑐᖁᓂᖓ ᐃᓗᕕᕐᑕᐅᓂᖓᓗ

7ᐅᑯᐊ ᑕᕝᕙ ᐂᑉᕋᕼᐋᒻ ᐅᓪᓗᖏᑦ ᐊᕐᕌᒍᖏᓪᓗ ᐃᓅᓯᕐᒥᓂ, ᐊᕐᕌᒍᖃᓚᐅᕐᐳᖅ 175ᓂᒃ. 8ᐂᑉᕋᕼᐋᒻ ᐊᓂᕐᓇᖏᓚᐅᕐᐳᖅ ᐃᑦᑐᐊᓘᓕᕐᓗᓂ, ᐃᓄᑐᖃᐅᓪᓗᓂ ᐊᕐᕌᒍᖏᑦ ᐅᓄᕐᑐᐊᓘᓕᕐᓗᑎᒃ, ᐃᓚᒋᓚᐅᕐᑕᒥᓄᓪᓗ ᐃᓚᓕᐅᑎᓪᓗᓂ. 9ᐃᕐᓂᖏᒃᑕᓗ ᐂᓴᑭᐅᑉ ᐃᓯᒥᐅᓪᓗ ᐃᓗᕕᕐᐹᒃ ᕾᕈᓱᖕᒥ ᒪᒃ-ᐲᓚᒥ, ᐱᕈᕐᓰᕕᖃᕐᑐᒥ ᐃᐸᕋᓂᐅᑉ ᔪᕼᐊᕆᐅᑉ ᐃᕐᓂᖓᑕ ᓄᓇᖁᑎᕕᓂᖓᓄᑦ ᕼᐃᑍᑎᒥᐅᑕᕐᒧᑦ, ᒪᒻᕆᐅᑉ ᓯᕿᓐᓂᓕᕐᕕᐊᑕ ᓇᓛᓃᑦᑐᒧᑦ. 10#ᒨᓯᓯ ᓯᕗᓪᓖᑦ 23:3-16.ᑖᓐᓇ ᐂᑉᕋᕼᐋᑉ ᐱᕈᕐᓰᕕᒃ ᓂᐅᕕᐊᕆᓚᐅᕐᒪᒍ ᕼᐃᑍᑎᒥᐅᓂᑦ; ᐂᑉᕋᕼᐋᒻᓗ ᐃᓗᕕᕐᑕᐅᕗᖅ ᓄᓕᐊᓂ ᓵᕋ ᐃᓗᕕᖃᖃᑎᒋᓪᓗᒍ. 11ᐂᑉᕋᕼᐋᒻᓗ ᑐᖁᓯᒪᓕᕐᑎᓪᓗᒍ, ᐃᕐᓂᖓ ᐂᓴᑭ ᒎᑎᐅᑉ ᓮᒻᒪᕐᑎᓚᐅᕐᐹ. ᐂᓴᑭᓗ ᓄᓇᖃᓚᐅᕐᐳᖅ ᐱᐊᕐ-ᓚᕼᐂ-ᕈᐂᒥ.

ᐄᓯᒥᐅᓪ ᑭᖑᕚᖏᑦ

ᑯᕉᓂᑲ ᓯᕗᓪᓖᑦ 1:28-31

12ᐅᑯᐊ ᑕᕝᕙ ᐃᓯᒥᐅᓪ ᑭᖑᕚᖏᑦ, ᐂᑉᕋᕼᐋᒻ ᐃᕐᓂᖓᑕ, ᐂᒡᒐᐅᑉ ᐄᑦᔨᑉᑎᒥᐅᑕᐅᑉ ᓵᕋᐅᑉ ᓯᐊᓛᖓᑕ, ᐂᑉᕋᕼᐋᒻᒥᑦ ᐃᕐᓂᕐᑖᕆᓚᐅᕐᑕᖓᑕ, 13ᐅᑯᐊ ᑕᕝᕙ ᐊᑎᖏᑦ ᐃᓯᒥᐅᑉ ᐃᕐᓂᖏᑕ ᐊᖓᔪᒃᓯᕐᓂᑦ ᐱᒋᐊᕐᓗᒋᑦ; ᓂᐰᐅᑎ ᐄᓯᒥᐅᑉ ᐊᖓᔪᒃᓯᕐᐹᖁᑎᖓ; ᑭᑕᕆ, ᐊᑉᑎᐅᓪ, ᒥᑉᓵᒻ, 14ᒥᔅᒪ, ᑑᒪ, ᒫᓴ, 15ᕼᐊᑖᑦ, ᑎᒪ, ᔨᑖᕐ, ᓇᐱᔅ, ᑭᑎᒪᓗ. 16ᑖᒃᑯᐊ ᑕᕝᕙ ᐃᓯᒥᐅᑉ ᐃᕐᓂᖏᑦ ᐊᑎᖏᓪᓗ, ᓄᓇᒋᔭᖏᑕ ᐊᑎᕐᑖᕆᓚᐅᕐᐰᑦ, ᓄᓇᖃᕐᕕᒋᕙᒃᑕᕕᓂᖏᓐᓄᓪᓗ ᐊᑎᕆᔭᐅᓪᓗᑎᒃ, 12ᓗᑎᒃ ᐊᖓᔪᖅᑳᖑᓚᐅᕐᐳᑦ ᑭᖑᕚᒥᖕᓄᑦ. 17ᐅᑯᐊ ᑕᕝᕙ ᐃᓯᒥᐅᑉ ᐊᕐᕌᒍᖏᑦ ᐃᓅᓚᐅᕐᐳᖅ 137ᓂᒃ ᐊᕐᕌᒍᓂᒃ; ᐊᓂᕐᓇᖏᓚᐅᕐᐳᖅ ᑐᖁᓪᓗᓂ ᐃᓚᒋᓚᐅᕐᑕᒥᓄᓪᓗ ᐃᓚᓕᐅᑎᓪᓗᓂ. 18ᑐᖁᓚᐅᕐᐳᖅ ᐃᓚᓕᒫᓂ ᑲᑎᒪᓪᓗᓂᒋᑦ. ᑖᒃᑯᐊ ᓄᓇᖃᓚᐅᕐᐳᑦ ᕼᐊᕕᓚᒥᑦ ᓲᕆ ᑎᑭᓪᓗᒍ, ᐄᑦᔨᑉᑎᐅᑉ ᐃᑎᕕᐊᓂ ᐊᓯᕆᐊᒧᐊᕆᐊᑉ ᓇᓛᓂ; ᑖᒃᑯᐊᓗ ᓄᓇᖃᓚᐅᕐᐳᑦ ᐃᓅᖃᑎᑎᒃ ᓄᓇᖃᖃᑎᒋᓪᓗᒋᑦ.

ᐄᓴᐅᓪᓗ ᔧᑰᓪᓗ ᐃᓅᓕᕐᓂᖏᒃ

19ᐅᑯᐊ ᑕᕝᕙ ᐂᓴᑭᐅᑉ ᑭᖑᕚᖏᑦ, ᐂᑉᕋᕼᐋᒻ ᐃᕐᓂᖓᑕ; ᐂᑉᕋᕼᐋᒻ ᐂᓴᑭᐅᑉ ᐊᑖᑕᒋᓚᐅᕐᐹ. 20ᐂᓴᑭ ᓄᓕᐊᓂᓚᐅᕐᐳᖅ ᕇᐱᑲᒥᒃ ᐊᕐᕌᒍᖃᓕᕐᓗᓂ 40ᓂᒃ, ᐱᑐᐃᓕᐅᑉ ᐸᓂᖓᓂᒃ ᐊᕋᒥᐊᒥᐅᑕᒥᒃ#25:20 ᐊᕋᒥᐊ ᑍᔭᐅᖕᒥᔪᖅ ᓯᕆᐊᒥᒃ ᓄᓇᒥᑦ ᐸᑖᓐ-ᐊᕌᒻᒥ,#25:20 ᐸᑖᓐ-ᐊᕌᒻᒥ ᑍᔭᐅᖕᒥᔪᖅ ᒥᓱᐳᑍᒥᐊᒥᒃ ᓔᐸᓂᐅᑉ ᓇᔭᖓᓂᒃ ᐊᕋᒥᐊᒥᐅᑕᐅᑉ. 21ᐂᓴᑭᓗ ᑐᒃᓯᐊᓚᐅᕐᐳᖅ ᐊᑕᓂᕐᒧᑦ, ᓄᓕᐊᖓ ᕿᑐᕐᖏᓱᐃᑦᑑᖕᒪᑦ; ᑐᒃᓯᐊᕐᓂᖓᓗ ᐊᑕᓂᐅᑉ ᑐᓴᕐᐹ, ᓄᓕᐊᖓᓗ ᕇᐱᑲ ᓄᑕᕋᒃᓴᖃᓕᕐᐳᖅ. 22ᓄᑕᕋᒃᓵᒡᓗ ᐃᒻᒥᖕᓅᓕᕐᐴᒃ ᐃᓗᖓᓂ; ᕇᐱᑲᓗ ᐅᖃᕐᐳᖅ, “ᖃᓄᐃᖏᑉᐸᑎᒃ, ᓱᖕᒪᑦ ᑍᒤᒃᐳᖔ?” ᐊᑕᓂᕐᒧᓪᓗ ᐊᐱᕐᓱᓕᕐᐳᖅ.

23 # ᕉᒪᒥᐅᓄᑦ 9:12. ᐊᑕᓂᐅᓪᓗ ᐅᖃᐅᑎᕚ,

“ᐃᓅᖃᑎᒌᒡᔪᐊᓂᒃ ᒪᕐᕈᐃᓂᒃ ᐃᓗᒥᐅᑕᖃᕐᐳᑎᑦ ᐃᒡᓕᐊᕐᓂ,

ᐃᓅᒃ ᒪᕐᕉᒃ, ᐃᕐᓂᐊᕆᒍᕕᒋᒃ, ᐃᓅᖃᑎᒌᒍᓐᓇᕈᒫᓐᖏᓚᒃ;

ᐂᑉᐸᖓ ᓴᓐᖏᓂᕐᓴᐅᔪᒫᕐᐳᖅ ᐂᑉᐸᕐᒥᓂᑦ,

ᐊᖓᔪᒃᓯᕐᓗ ᐱᔨᑦᓯᕈᒫᕐᐳᖅ ᓄᑲᕐᒥᓂᒃ.”

24ᕿᑐᕐᖏᕕᒃᓴᖓᓗ ᓇᓪᓕᐅᑎᖕᒪᑦ, ᑕᑯᒋᑦ, ᒪᕐᕈᓕᕗᖅ. 25ᓯᕗᓪᓕᐅᓪᓗᓂ ᐊᓂᔪᖅ ᐊᐅᐸᕐᑐᒥᒃ ᐅᕕᓂᖃᕐᐳᖅ, ᒥᖅᑯᕐᒥᒡᓗ ᐅᓕᒃᓯᒪᔫᔮᕐᓗᓂ; ᑍᒤᓐᓂᖓᓄᑦ ᐊᑎᖃᕐᑎᑕᐅᓕᓚᐅᕐᐳᖅ ᐄᓴᒥᒃ. 26ᑭᖑᓪᓕᐅᓪᓗᓂ ᐊᓂᔪᖅ, ᑎᒍᒥᐊᓚᐅᕐᐳᖅ ᐄᓴᐅᑉ ᑭᖕᒥᐊᓂᒃ; ᐊᑎᖃᕐᑎᑕᐅᕗᕐᓗ ᔧᑯᒥᒃ. ᐂᓴᑭᓗ ᐊᕐᕌᒍᖃᓕᓚᐅᕐᐳᖅ 60ᓂᒃ ᐃᕐᓂᖏᒃ ᐃᓅᓕᕐᑎᓪᓗᒋᒃ.

ᐄᓴᐅᑉ ᓂᐅᕐᕈᑎᖃᕐᓂᖓ ᐊᖓᔪᒃᓯᐅᓂᕐᒥᓂᒃ

27ᑖᒃᑯᐊᒡᓗ ᓄᑲᑉᐱᐊᒃ ᐱᕈᕋᒥᒃ, ᐄᓴ ᐊᔪᖏᑦᑑᓪᓗᓂ ᐆᒪᔪᕐᓯᐅᕐᑎᐅᓚᐅᕐᐳᖅ, ᓯᓚᒥᐅᑕᐅᓪᓗᓂᓗ, ᔧᑯᓕ ᐃᓱᒪᒃᓴᕐᓯᐅᕐᑎᓚᐅᕐᐳᖅ, ᑐᐱᕐᒥᐅᑕᐅᓪᓗᓂ. 28ᐂᓴᑭᐅᓪᓗ ᓇᒡᓕᒋᓚᐅᕐᐹ ᐄᓴ, ᐆᒪᔪᕐᑕᕕᓂᖏᓐᓂᒃ ᓂᕆᖃᑦᑕᕋᒥ; ᕇᐱᑲᐅᓪᓕ ᔧᑯ ᓇᒡᓕᒋᕚ.

29ᐅᓪᓗᐃᑦ ᐃᓚᖓᓐᓂ ᔧᑰᑉ ᓂᕿᓕᐅᓚᐅᕐᐳᖅ ᖃᔪᓕᐅᕐᓗᓂ ᐃᓚᖃᐅᕐᑐᒥᒃ, ᐄᓴᓗ ᑎᑭᑉᐳᖅ ᐆᒪᔪᕐᓯᐅᕐᑐᕕᓂᐅᓪᓗᓂ, ᑳᓕᕐᓯᒪᓪᓗᓂᓗ. 30ᐄᓴᓗ ᔧᑯᒧᑦ ᐅᖃᕐᐳᖅ, “ᑳᒃᑐᐊᓘᒐᒪ; ᑕᕝᕙᓐᖓᑦ ᐊᐅᐸᕐᑐᒥᑦ ᓂᕆᑎᓚᐅᓐᖓ.” (ᑍᒤᒻᒪᑦ ᐄᓴ ᐊᑎᖃᕐᑎᑕᐅᓕᓚᐅᕐᐳᖅ ᐄᑐᒥᒥᒃ.)#25:30 ᐄᑐᒥ ᐄᑉᕉᑎᑐᑦ ᑐᑭᖃᕐᑑᔮᕐᑐᖅ ᐊᐅᐸᕐᑐᒥᒃ

31ᔧᑰᑉ ᑭᐅᕚ, “ᓯᕗᓪᓕᕐᒥᒃ ᐊᖓᔪᒃᓯᐅᓃᑦ ᐊᑭᓕᐅᑎᓚᐅᕈᒃ ᐅᕙᓐᓄᑦ.”

32ᐄᓴᓗ ᐅᖃᕐᐳᖅ, “ᐱᕐᓕᕐᓗᖓ ᑐᖁᑐᐃᓐᓇᕆᐊᖃᓕᕋᒪ; ᓱᓇᒧᓪᓕ ᐊᑐᕋᔭᓕᕐᐹ ᐊᖓᔪᒃᓯᐅᓂᖅ?”

33 # ᐄᑉᕈᐃᓄᑦ 12:16. ᔧᑰᑉ ᑭᐅᕚ, “ᐅᖃᕕᖅᑳᓚᐅᕆᑦ ᐅᕙᓐᓄᑦ.”

ᐄᓴᓗ ᐅᖃᕕᒃᐳᖅ, ᐊᖓᔪᒃᓯᐅᓂᓂ ᐊᑭᓕᐅᑎᒋᔪᒪᓪᓗᒍ ᔧᑯᒧᑦ. 34ᑕᕝᕙ ᔧᑰᑉ ᐄᓴ ᓂᐊᖂᔭᒥᒃ ᑐᓐᓂᕆᕚ ᖃᔪᓕᐊᒥᓂᒡᓗ ᐱᕈᕐᑐᓂᒃ ᓕᓐᑎᓪᓯᓂᒃ ᐊᑎᖃᕐᑐᒥᒃ ᐃᓚᓕᖕᒥᒃ, ᓂᕆᕗᖅ ᐃᒥᕐᓗᓂᓗ, ᒪᑭᓐᓇᒥ ᑕᕝᕙᓐᖓᑦ ᐅᐸᒃᑕᒥᓄᐊᕆᓪᓗᓂ. ᑍᒫᒃ ᐄᓴᐅᑉ ᐊᖓᔪᒃᓯᐅᓂᓂ ᖁᔭᓈᓚᐅᕐᐹ.

Currently Selected:

ᒨᓯᓯ ᓯᕗᓪᓖᑦ 25: EAIB

Highlight

Copy