Makətūbə̄ yā Jeremi 49
49
Amon gə̄
1Kə́ tām̄ yā Amon gə̄ tə́ ní, najə̄ ń Kɔ́ɔ̄ɓē əda ní n toó:
*Israel ojə ngōn̄ aĺ a?
Ngé kán̄ ta yá̰a̰ ndəbān gə̄ gətóon̄ a?
Ní, i tām̄ rí tə́ á ɓesə̄ Milkom o̰o̰ ɓē Gad tə́ ō,
gír deē yān gə̄ ndin̄ kem ɓē gə̄ tə́ ō ní?
2Tāmə̄n̄ ń noō tə́, m-ā m̄-rāā kadə̄ ndɔ̄ gə̄ ń a reēn̄ tə́ noō,
kɔŕ rɔ̄ɔ̄ a ɓār̄ ɓē kə́ Raba yā Amon gə̄ tə́.
Raba a tél dɔ nang kə́ yá̰a̰ gətóo tū tə́ ō,
hor a róō ɓē yān gə̄ ń ndi gīrə̄n̄ gidən ní ō.
Adə̄ *Israel a tél yā kənge yá̰a̰ ndəbā yān
jī ngé gə̄ ń taān̄ jīn tə́ kété ní.
Najə̄ ń Kɔ́ɔ̄ɓē əda ní n noó.
3Hesəbon, ī-nōō kə̄ dɔɔ́ ɓororo na
ɓē kə́ Ai nujə sák sák kɔ̄ɔ́.
Ɓē gə̄ ń Raba o̰o̰ ɓē dɔsí tə́ ní, ə́gaī kɔŕ.
Ə́laī kūbə̄ kəhɔ ndoō rɔ̄sí tə́ ō, ī-nōōī rɔ̄sí ō.
Ī-dáyī kə̄ yóō kə̄ laā kem ndogə̄ mbal̄ gə̄ tə́.
Tɔdɔ̄ aw̄n̄ kə ɓesə̄ Milkom ō, *ngé tun̄ yá̰a̰ yān gə̄ ō,
de kə́ bo yān gə̄ ō, naā tə́ malang dɔ nang kə́ rang tə́ kɔ̄ɔ́.
4Sḭḭ̄ gír de kə́ ta tḭ̄ḭ̄ kɔ̄ɔ́ gə̄,
i tām̄ rí tə́ á ɔ́jiī rɔ̄sí kə wól loo yāsí ní?
Man̄ nūgə́ ngá̰ý kem wól loo yāsí tə́,
adə̄ ə̄ndāī kemsí dɔ dūbə̄ yá̰a̰ kənge yāsí tə́
ba ə́daī na: I náā n a ənījí rɔ̄ɔ̄?
5I beé tā anī, mā m-ā m-ə́la ɓōĺ kə́ ngá̰ý kemsí tə́ kə ta
kūl̄ madə̄ ɓēsí gə̄.
I Kɔ́ɔ̄ɓē, Nə́ɓā kə́ bo kə́ tɔ́gən i ngá̰ý n əda ní.
A tə̄ndā tḭn̄sí kə̄ loo gə̄ tə́,
yā kadə̄ náā nəkɔ́ ɓáa aw̄ súmūú kə̄ non tə́ ō,
de kə́ yā kɔsə dɔ ngé ka̰ȳ naā gə̄ kə̄ naā tə́ a gətóo ō.
6Gō yá̰á̰ ń noō tə́ anī,
m-ā m̄-t-él yā kəndā Amon gə̄ kadə̄ majə tītə̄ kə́ kété.
Najə̄ ń Kɔ́ɔ̄ɓē əda ní n noó.
Edom
7Kə́ tām̄ yā Edom tə́ ní, najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó:
Gír kum kedə̄ gān̄g kɔ̄ɔ́ Teman tə́ i mbée a?
Gír̄ yá̰a̰ reē dɔ nge ger̄ kum najə̄ láẃ tə́ to̰ aĺ i mbée a?
Kum kedə̄ yādə́ majə aĺ i mbée kɔ̄ɔ́ a?
8Sḭḭ̄ Dedan gə̄ ī-tūrī gándə́sí ā̰yī naā
aw̄ ī-ɓɔ̄ɔ̄ī rɔ̄sí kem bəlo gə̄ tə́.
I mbang kə́ yā kadə̄ ɔ́jəmīneé kəla rāāsí gə̄.
9Ré ngé tə́jā kan̄ *kāgə̄ nduú gə̄ aw̄n̄ looí anī,
a əya̰n̄ dɔ bəran kógə̄ḿ kə́ yā ɓur alé.
Ré ngé ɓogə gə̄ reēn̄ ndɔ̄ɔ́ anī,
nin̄ a ɔyn̄ yá̰a̰ malang ń kemdə́ ndigə ní.
10Sḭḭ̄ de kə́ gír kaa yā Esau tə́ gə̄, i mə̄kɔ́ n m-ā m-ɔ́ý yá̰a̰ kənge yāsí malang kɔ̄ɔ́ ní.
Yá̰a̰ kənge yāsí gə̄ ń ton̄ loo ɓɔ̄ɔ̄ rɔ̄ tə́ ní, i mə̄kɔ́ n m-ā m̄-teēń ndágá ní.
Ā ásiī ɓɔ̄ɔ̄ rɔ̄sí to̰ alé.
Ngán kaasí gə̄ ō, ngákó̰ó̰sí gə̄ ō, madə̄ ɓēsí gə̄ ō ní, a nujən̄də́ sák sák kɔ̄ɔ́ ō,
de kə́ yā kəda na:
11Ī-sōlī najə̄ ngán hal yāsí gə̄ tə́ alé, na m-ā m-ə̄tōdə́ ō,
dəyá̰ kə́ ngaa koy yāsí gə̄ a asən̄ kəndā kemdə́ dɔḿ tə́ ō ní, a gətóo.
12Rɔ̄kum, najə̄ ń Kɔ́ɔ̄ɓē əda ní n toó:
Á̰a̰ī tá, ngé gə̄ ń majə kadə̄ yá̰a̰ tōr̄ rāādə́ aĺ ní, gāngə̄n̄ sarya dɔdə́ tə́ kadə̄ yá̰á̰ kə́ tōr̄ rāādə́. Ní ḭ̄ tá ā ī-teē kum tə́ karī a? Ā ī-teē kum tə́ karī alé. A ɔdə rɔ̄í gáŕ! 13Rɔ̄kum, m̄-túbə́ m-ə́da na: Bosra a tél loo kə́ to kum ko̰ ō, loo kə́ nujə sák sák ō. De gə̄ tájə̄n̄ naā ō, a ndɔ̄lə́n̄ naā kə rīneé ō. Ɓē gə̄ malang ń i gíŕ tɔ́gə yān tə́ ní, a télən̄ ndəbā loo kə́ nujə sák sák kə́ njɔ́ḿ gə̄ tə́.
14M-ōō najə̄ kógə̄ḿ kə́ teē ta Kɔ́ɔ̄ɓē tə́.
Əlan̄ kɔdə mbēr̄ kógə̄ḿ rɔ̄ nápar de gə̄ tə́.
Ɔ́siī dɔsí naā tə́ āw̄ ə̄nīniī rɔ̄ɔ̄. Ḭ́ḭī dɔɔ́, āw̄ ī-rɔ̄ɔ̄ī!
15A̰á̰ā̰, m-ā m̄-rāāī kadə̄ ā ī-tél de kə́ dūú ráá kə́ dan nápar de gə̄ tə́ ō,
m-ā m̄-rāā kadə̄ de gə̄ a kídīīn̄ ō.
16Ḭ̄ ń ī-ndi bəlo ngán mbal̄ gə̄ tə́ ō,
loo kə́ ḭḭ kə̄ dɔɔ́ gə̄ tə́ ō ní,
ɔ́jə rɔ̄í al̄ naā najə̄ ɓōĺ kə́ ngá̰ý ń ə́la kem de gə̄ tə́
kanjə̄ ka̰a̰ kum tō ndoō yādə́ tə́ ní.
Ré ī-rāā ɓē loo kə́ ḭḭ kə̄ dɔɔ́ ngá̰ý tə́
tītə̄ yā kə̄rō beé gə̄gē anī,
m-ā m̄-mbəreī tū tə́ kadə̄ ī-teē ə̄sō nang tə́.
Najə̄ ń Kɔ́ɔ̄ɓē əda ní n noó.
17Edom tél ndágə loo kə́ to kum ko̰, adə̄ de gə̄ malang ń a mānə̄n̄ kadə tə́ ngɔr ní a ɔr kumdə́ seneé ngá̰ý ō, a əgan̄ kɔŕ ɓōĺ dɔn tə́ ō. 18Tītə̄ ń deē gətóoń Sodom ō, Gomor ō, ɓē gə̄ ń ndin̄ kə gō gidədə́ á nujən̄ sák sák kɔ̄ɔ́ ō ní tītə̄ ń toō deē kógə̄ḿ kə́ yā rāā ɓē loo ń noō tə́ a gətóo ō, deē ndul kə́ yā kaw̄ ndi kemeé a gətóo ō. Najə̄ ń Kɔ́ɔ̄ɓē əda ní n noó.
19Tītə̄ ń ɓɔl teēń kem ku kāgə̄ gə̄ kə́ dɔ gɔ́sə bā Jurdḛ tə́,
ba aw̄ kumən sɔɔ̄ gong gə̄ kə́ yá̰a̰ kul̄ gə̄ i ngá̰ý kemeé tə́ ní,
i tītə̄ ń noō n m-ā m̄-tə̄ɓāńdə́ kɔ̄ɔ́ gidə kógə̄ḿ tītə̄ kum kə́ kənda sapə beé, kadə̄ aw̄n̄ sa̰y kɔ̄ɔ́ rɔ̄n tə́ ní.
M-ā m-ə́lá ngé rɔ̄ɔ̄ kə́ balsáa gə̄ kadə̄ aw̄n̄ láẃ rɔ̄n tə́.
Tɔdɔ̄ i náā n to tītə̄ḿ mā ní?
I náā n asə ɓārə́m̄ loo sarya tə́ ní?
I nge kul̄ yá̰á̰ kə́ rá n a asə dum̄ taḿ mā ní?
20Ī-nēlī mbīsí ɓáý to̰
oōīneé yá̰á̰ ń Kɔ́ɔ̄ɓē ɔjə loo rāā kə ɓē kə́ Edom ní ō,
ōōī yá̰a̰ gə̄ ń núm̄ yā rāā kə de kə́ Teman gēé ō ní.
I gáŕ kadə̄ ngáń dā̰ gə̄ a ndɔ́rə̄n̄ gotə gə̄ gōdə́ tə́ ō,
i gáŕ kadə̄ de gə̄ a nujən̄ loo yādə́ sák sák kɔ̄ó najə̄ yādə́ tə́ ō.
21Əsōn̄ kəsō kə́ to ɓōĺ ngá̰ý adə̄ dɔ nang ndebə.
Kōōdə́ ɓār̄ bátə́ ugə̄ bā tə̄ɓā gə̄ tə́.
22To i tītə̄ kə̄rō kə́ ḭḭ kum kə̄ dɔɔ́ ba nēl̄ ō, j-ā̰ā̰ bɔ̄gə̄n dɔ Bosra tə́ ō. Ndɔ̄ ń noō tə́ ní, kem go̰ rɔ̄ɔ̄ gə̄ kə́ Edom tə́ a to i tītə̄ kem dəyá̰ kə́ nge rāā kem beé.
Damas
23Najə̄ kə́ tām̄ yā Damas tə́.
Hamat ō, Arpad ō nin̄ i kə rɔ̄sɔlɔ̄ɔ́.
I tɔdɔ̄ oōn̄ najə̄ kə́ majaĺ kógə̄ḿ.
Kemdə́ ḭḭ huyuyu tītə̄ man̄ bā bo beé. Nin̄ ɓōlə́n̄ i ɓōĺ kə́ dum̄ ger̄ kum ō.
24Tɔ́gə Damas teē kɔ̄ɔ́.
Ni tūr̄ rɔ̄n yā ka̰ȳ. Ni-ndew yakə yakə.
Ni sōl̄ kekəre ō, rɔ̄n tōrə̄n ō,
tītə̄ dəyá̰ kə́ a rāā kem beé.
25Ɓē kə́ rīn ɓār̄ ngá̰ý ō, i ɓē rɔ̄nel̄ yāḿ ō ní,
i ba̰ý á mbātə́nən̄ kɔ̄ɔ́ ní?
26A̰á̰ā̰, ndɔ̄ nəkɔ́ ń noō tə́ ní, balsáa yān kə́ ngé rɔ̄ɔ̄ gə̄ tə́sōn̄ ndágə loo yān gə̄ tə́ ō, kōō áskar yān gə̄ malang ɓār̄ to̰ aĺ ō. Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n noó. 27M-ə́la hor dɔ ɓē kə́ Damas tə́, adə̄ o̰o̰ kújə gə̄ yā mban̄g Ben Hadad.
Gír ɓē yā Arabə gə̄
28Kə́ tām̄ yā Kedar tə́ ō, ɓē ko̰o̰ kə́ Hasor tə́ ō ń Nabukodonosor, mban̄g kə́ *Babilon tetədə́ rɔ̄ɔ̄ ní, najə̄ ń Kɔ́ɔ̄ɓē əda ní n toó:
Ḭ́ḭī dɔɔ́, āw̄ ə̄nīī Kedar rɔ̄ɔ̄ ō,
āw̄ ī-nujiī kə yá̰a̰ yā ngáń kə́ gír ɓē tə́ gēé malang kɔ̄ɔ́ ō.
29De gə̄ taān̄ tandā yādə́ gə̄ ō, ɓūtə̄ yá̰a̰ kul̄ yādə́ gə̄ ō,
kūbə̄ kə́ hɔɔ́lɔ̄ yādə́ gə̄ ō, ngáń gájə́ yá̰a̰ rāā kəla yādə́ gə̄ malang ō, jīdə́ tə́ kɔ̄ɔ́.
Əhɔn̄ jámbal yādə́ gə̄ aw̄n̄neé ba ədan̄ dɔdə́ na: Loo malang i ɓōĺ.
30Hasor gə̄ ā̰yī naā, i mbutiī ngɔ̄də̄ láẃ, āw̄ ī-ɓɔ̄ɔ̄ī rɔ̄sí kem bəlo gə̄ tə́.
Tɔdɔ̄ Nabukodonosor, mban̄g kə́ Babilon ɔjə yá̰á̰ kə́ yā rāā sesí ō,
núm̄ yá̰á̰ kə́ sɔɔ̄ dɔsí ō.
31Ḭ́ḭī dɔɔ́, āw̄ ə̄nīī nápar de kə́ usədə́ yá̰a̰ aĺ gə̄ ń
ndin̄ kanjə̄ sōl̄ yá̰á̰ kógə̄ḿ ní rɔ̄ɔ̄.
Najə̄ ń Kɔ́ɔ̄ɓē əda ní n noó.
Ta róbə yādə́ gə̄ gətóon̄ ō,
gində̄ kutə ta róbə yādə́ gə̄ gətóon̄ ō.
I de gə̄ kə́ nin̄ ndin̄ i kə kéŕdə́.
32De gə̄ a narə̄n̄ jámbal yādə́ gə̄ ō,
a ənīn̄də́ rɔ̄ɔ̄ yā taā ɓūtə̄ yá̰a̰ kul̄ kə́ ngá̰ý gə̄ ō jīdə́ tə́.
Ngé dəsā mbāý kə́ mdɔ́ŕdə́ tə́ gə̄ ń noō,
m-ā m̄-tə̄ndā yā tḭ̄ḭ̄də́ kógə̄ḿ kógə̄ḿ kə̄ loo gə̄ tə́ ō,
m-ā m̄-rāā kadə̄ yá̰á̰ kə́ to nujə loo gə̄ teēn̄ kə̄ ta loo gə̄ tə́ malang kə̄ dɔdə́ tə́ ō.
Najə̄ ń Kɔ́ɔ̄ɓē əda ní n noó.
33Hasor tél loo ra tal̄ gə̄ ō,
tél ndágə loo kə́ to kum ko̰ kə́ njɔ́ḿ gə̄ tə́ ō,
de kə́ yā kaw̄ ndi kemeé gətóo ō.
Elam
34Najə̄ ń Kɔ́ɔ̄ɓē ɔr̄ kə Jeremi *nge koō ta tām̄ yā ɓē kə́ Elam tə́, dan ń Sedekias, mban̄g kə́ *Juda əlań gír ko̰o̰ ɓē ní n toó.
35Najə̄ ń Kɔ́ɔ̄ɓē kə́ bo kə́ tɔ́gən i ngá̰ý əda ní n toó:
Ga̰ gərā yā Elam ń i ngaa dan tɔ́gən kə́ ngá̰ý ní,
m-ā m̄-tétə̄ kɔ̄ɔ́.
36m̄-rāā adə̄ nél kə́ sɔ́ gə̄ teēn̄ kíl dɔ nang kə́ sɔ́ tə́
ba əlan̄ dɔ ɓē kə́ Elam tə́.
M-ā m̄-tə̄ndā Elam gə̄ yā tḭ̄ḭ̄də́ kə̄ loo gə̄ tə́ yā kadə̄ nápar de gə̄ kə́ nin̄ aw̄ ugə̄n̄ dandə́ tə́ aĺ gətóo.
37m̄-rāā Elam gə̄ adə̄ ndewn̄ ta kum madə̄ ba̰ā̰də́ gə̄ ń
i nge sāā tɔ̄l̄də́ gə̄ ní tə́,
ta kum ngé gə̄ ń ndigən̄ ka̰a̰də́ kə kumdə́ aĺ ní tə́.
m̄-rāā adə̄ yá̰á̰ kə́ to kum kaȳ aĺ əsō dɔdə́ tə́,
adə̄ i wōn̄g yāḿ kə́ al̄ naā.
Najə̄ ń Kɔ́ɔ̄ɓē əda ní n noó.
m̄-ngɔ̄də̄də́ kə kaskaraá yā tɔ̄l̄də́ bátə́ kadə̄ təgān̄.
38M-ə̄ndā kōr̄ kāgə̄ mbang yāḿ ɓē kə́ Elam tə́.
m̄-tɔ̄l̄ mban̄g ō, de kə́ bo gə̄ ō, kə́ kemeé malang.
Najə̄ ń Kɔ́ɔ̄ɓē əda ní n noó.
39Banī ta tɔ̄l̄ ta ndɔ̄ gə̄ tə́
anī, m-ā m̄-tél yā kəndā Elam gə̄ kijə.
Currently Selected:
Makətūbə̄ yā Jeremi 49: BS
Highlight
Share
Copy
Want to have your highlights saved across all your devices? Sign up or sign in
© 2006, 2010 Alliance Biblique du Tchad
