1 JA̰A̰ 4
4
Ndíĺ Nə́ɓā ō, ndíl nge rɔ̄ɔ̄ Kərist ō
1Kó tár yāḿ gə̄, ī-taāī kem ndíl gə̄ malang alé, banī ī-nāāī ndíl gə̄ á̰a̰ī ké ḭḭn̄ i rɔ̄ Nə́ɓā tə́ wa. Tɔdɔ̄ ngé koō ta kə́ rɔ̄kum aĺ gə̄ teēn̄ ngá̰ý kə̄ loo gə̄ tə́ dɔ nang tə́. 2Yá̰á̰ ń ā ī-gerīneé Ndíĺ Nə́ɓā ní n toó: Ndíĺ ń əda na Jeju Kərist na reē i kə́ deē tə́ ní, ḭḭ i rɔ̄ Nə́ɓā tə́. 3Ba ndíĺ ń əda na n-ger̄ Jeju aĺ ní, ḭḭ i rɔ̄ Nə́ɓā tə́ alé. Ndíl ngeé ń noō i nge ba̰ā̰ Kərist ń ōōī kadə̄ na a reē ní, ba ngɔlaā ni i dɔ nang tə́ laā kɔ̄ɔ́.
4Sḭḭ̄ ngánə́ḿ kə́ dūú gə̄, sḭḭ̄ ń i yā Nə́ɓā ní, ī-tetiī ngé koō ta kə́ rɔ̄kum aĺ gə̄ ń noō rɔ̄ɔ̄ kɔ̄ɔ́. Tɔdɔ̄ nge ń ndi kemsí tə́ ní bo tɔȳ nge ń ndi dɔ nang tə́ ní. 5Nin̄ i de kə́ dɔ nang tə́ gə̄, i tām̄ najə̄ ń noō tə́ n nin̄ a ɔrə̄n̄ najə̄ kɔr̄ de kə́ dɔ nang tə́ gə̄, adə̄ de kə́ dɔ nang tə́ gə̄ oōn̄ najə̄ yādə́ ní. 6Jḭḭ̄ i yā Nə́ɓā. Deē ń ger̄ Nə́ɓā ní, a oō yājí. Deē ń i yā Nə́ɓā aĺ ní, a oōjí alé. J-a jə-gerī Ndíl najə̄ kə́ rɔ̄kum ō, ndíĺ kə́ nge ndúm̄ kə deé ō i tītə̄ ń noō.
Nə́ɓā i tár
7Kó tár yāḿ gə̄, ādə̄ jə-táriī naā, tɔdɔ̄ tár ḭḭ i rɔ̄ Nə́ɓā tə́. Adə̄ deē ń tár i kemən tə́ ní, i Nə́ɓā n ojən ō, i de kə́ ger̄ Nə́ɓā ō. 8Deē ń tár i kemən tə́ aĺ ní, ger̄ Nə́ɓā alé, tɔdɔ̄ Nə́ɓā i tár. 9Á̰a̰ī loo kɔjə ń Nə́ɓā ɔjə tár yān dɔ dáńjí tə́ ní. Ni-əla Ngōnən kə́ kal kógə̄ḿ beē dɔ nang tə́ laā yā kadə̄ jə-ndiī kə kumjí i kə ta kūl̄neé. 10Yá̰á̰ ń i táŕ ní n toó: I jḭḭ̄ n jə-táriī Nə́ɓā alé, ba i ni n táŕjí á əla Ngōnən adə̄ reē ní. Ngōnən ní əya̰ rɔ̄n adə̄ tɔ̄l̄nən̄ tām̄ yājí tə́. I tām̄ najə̄ ń noō tə́ n Nə́ɓā mā̰yń rɔ̄n dɔ majaĺ yājí gə̄ tə́ ní.
11Kó tár yāḿ gə̄, ré Nə́ɓā táŕjí tītə̄ ń noō anī, i gáŕ kadə̄ jə-táriī naā ō. 12Deē kógə̄ḿ kə́ a̰a̰ Nə́ɓā gətóo#4.12 K. 12a: Á̰a̰ī Teē 33.20; Ja̰a̰ 1.18. Ré jə-táriī naā anī, Nə́ɓā ndi kemjí tə́ ō, tár yān kə́ kemjí tə́ i kə́ majə ɔtə̄ kə taá mámák ō.
13I tām̄ kadə̄ ń ni-adə̄jí Ndílən ní n jə-gerīneé kadə̄ jḭḭ̄ i kemən tə́ ō, ni i kemjí tə́ ō ní. 14Adə̄ jḭḭ ń j-a̰a̰n ní j-əda najə̄ kə́ loo de gə̄ kə́ kum tə́ tə́ na Bɔbə̄ Ngōn̄ əla Ngōnən kadə̄ ajə de gə̄ kə́ dɔ nang tə́. 15Deē ń əda na Jeju i Ngōn̄ Nə́ɓā ní, Nə́ɓā ndi kemən tə́ ō, ni-ndi kem Nə́ɓā tə́ ō. 16Jḭḭ̄, jə-gerī tár yā Nə́ɓā kə́ tām̄ yājí tə́ ō, jə-taāī kem táŕ ní ō.
Nə́ɓā i tár, adə̄ deē ń tár i kemən tə́ ní, ndi i kem Nə́ɓā tə́ ō, Nə́ɓā ndi kemən tə́ ō. 17Táŕ kə́ dɔ dáńjí tə́ majə ɔtə̄ kə taá i kə ta kūl̄ yá̰á̰ ń toō: Jḭḭ̄ jə-sōlī yá̰á̰ kógə̄ḿ alé tām̄ yā ndɔ̄ gān̄g sarya tə́, tɔdɔ̄ jə-toī i tītə̄ Jeju Kərist beé dɔ nang tə́ laā. 18Ɓōĺ gətóo tū táŕ tə́, banī táŕ kə́ majə ɔtə̄ kə taá tə̄ɓā ɓōĺ ndágá kɔ̄ɔ́, tɔdɔ̄ ɓōĺ ɔjə kadə̄ ndéy a to noó. Deē ń ndi kə ɓōló ní táŕ kə́ kemən tə́ majə ɔtə̄ kə taá alé.
19Ba jḭḭ̄ jə-táriī Nə́ɓā i tɔdɔ̄ ni-táŕjí kété. 20Ré deē kógə̄ḿ əda na n-táŕ Nə́ɓā, banī ni-im̄ ngōkó̰o̰n anī, ni i nge sor̄. Tɔdɔ̄ ré deē tár ngōkó̰o̰n ń a̰a̰n kə kumneé ní aĺ anī, Nə́ɓā ń ni-a̰a̰n kə kumneé aĺ ní, loo kadə̄ a tárən i ba̰ý? 21Adə̄ gō míndə Kərist ń adə̄jí ní n toó: Deē ń táŕ Nə́ɓā ní, majə kadə̄ tár ngōkó̰o̰n ō.
Currently Selected:
1 JA̰A̰ 4: SARDC
Highlight
Share
Copy
Want to have your highlights saved across all your devices? Sign up or sign in
Bibəl ta Sar̄ © L'Alliance Biblique du Tchad, 2006, 2010.
