Qolasiyaase Asaas 3

Geeshshateththa Duussas Maaddiza Woga

1Histtiko intte Kirstoosara issife dendidayta gidikko Kirstoosi Xoossa achchan uttidasohon puden diza hanoteththaa koyite.#Maza 110:1 2Intte qofay pude bollan diza miishsha bolla gido attiin ha biittaa yo7o bolla gidoppo. 3Gaasoykka intte hayqqidetanne intte de7oykka Kirstoosara Xoossa achchan qotettides. 4Inttes de7o gidida Kirstoosi qoncciza gallas intteka he wode izara issife bonchchora qonccana.

5Hessa gishshas inttes biitta bolla diza amoteth diggite; heytikka layma, tunateth, asho amo, iita amoteththinne eeqas goyno mala gidida gaphigapho. 6Heytantta gaason Xoossa hanqoy Xoossas azazettonttayta bolla yaana. 7Intteka kase diza duussaan he miishshata ooththideta.

8Ha7i gidikko hanqo, yiillo, cashshe, zigirsinne yeellasiza haasaya heytantta misatizayta ubbaa diggite. 9Kase ceega asateth iza oosora gaththi inttefe qaari yeggida gishshas intte intte garsan issoy issaara wordo haasayopite.#Efe 4:22 10Bana medhdhidayssa misatana mala eran ooraxida ooraththa asateth may7ideta.#Efe 4:24; Medhe 1:26 11Heen Girike as gidiin woykko Ayhuda as woykko qaxxarettidayta woykko qaxxarettonttayta woykko tamaardaytanne tamaaronttayta woykko maarettonttayta woykko aylle woykko goqa geetettiza dummateththi deenna; Kirstoosi heytantta ubbaassa; qasse ubbaankka dees.#3:11 Tamaardaytanne tamaaronttayta gizayssi kase koyro Girike qaalan Barbariyanne Asikute guussi gidishin izikka wora giddofe yida asatanne Girike qaala eronttayta bessees 12Hessa gishshas dumma gididi dosettidaytoo! Intte Xoossas doorettidayta gidida mala misheteththinne kiyateth, ashketeth, bonchchonne dandaya may7ite.#Efe 4:2 13Intte issoy issaa dandayte; inttefe issaadey issaade bolla mishettiko yo7oykka iza bolla diikko issoy issaas atto atto geetettite; Godaykka inttes atto gida mala intteka hara asas atto giite.#Efe 4:32 14Hessa ubbaa bolla ubbaa kumeththa issifeteththan shiishshi qachchiza siiqo may7ite. 15Intte wurikka issi asho gididi saroteththas xeygettida Kirstoosa saroteththi intte wozinan kawoto; intte galatizayta gidite.

16Kirstoosa qaalay inttenan kumeth gido; intte intte garsan aadho erateththan tamaartenne zorettite; mazamureninne saban Ayana yeththan galatara gaththi intte wozinara Xoossas yexxite. 17Iza baggara Xoossaa Aawaas galata shiishshishe qaalan gidiin woykko ooson intte ooththizayssa ubbaa Godaa Yesusa sunththan ooththite.

Ammaniza Asay Baso Asaa Kaaleththiza Woga

18Machchetoo! Godaa achchan inttes bessiza miish gidida gishshas intte azinatas azazettite.#Efe 5:22; 1Phex 3:1 19Azinatoo! Intte intte machcheta siiqitenne isttas menxe iitopite.#Efe 5:25; 1Phex 3:7

20Naytoo! Intte Godaa ufayssana mala intte inttena yelidaytas ubba miishshan azazettite.#Efe 6:1 21Aawatoo! Nayti hidota qanxxontta mala intte nayta hanqeththofte.#Efe 6:4

22Aylletoo! As ufayssanaassinne coo ayfeson beettanaas gidontta suure wozinappe intte Godaas babbite; hayssa ha biittan haariza godataska hano ubbaan azazettite.#Efe 6:5-8 23Intte ooththiza miish ubbaa asas gidontta Godaas ooththiza mala taybidi kumeththa wozinappe ooththite. 24Intte Godaa achchafe intte ooso mala ekkanaas laatay dizayssa intte ereeta; intte ooththizay Godaa Yesus Kirstoosassa. 25Qoho ooththidaadey ba ooththidaari kushe ekkana; iza achchan dumma maadoy deenna.#Zaare 10:17; Efe 6:9

Currently Selected:

Qolasiyaase Asaas 3: GM

Highlight

Copy