1 Bituru 4
4
I yuwan ununa Zamawawa yuwain
1Gogo nda, adama a na Zamawawa sowoi a̱tsuma̱lima̱ a̱ lipu va̱ yi, a̱ɗu fo i da̱na̱ ufoɓu u na yoo sowo a̱tsuma̱lima̱. Adama a na ni i usu i sowo a̱tsuma̱lima̱ adama a Zamawawa i ꞌyuwan ta̱ a yuwan unusu. 2Adama o ndolo ne ɗa ya̱a̱ kuru ili i na lipu ɗu cigai shi, amma reve i yuwan ulinga na̱ wuma u ɗu i yuwan ili i na A̱sula̱ a cigai. 3I tara ta̱ ɗe mantsa lon nu ujimu a yuwusan ili i na aza a na e revei A̱sula̱ shi aa yuwusan. I yuwusan ta̱ tsipere icuꞌun icuꞌun, i shi ta̱ i yuwan ili i wuya i na lipu cigai, i yuwan ta̱ ɗe oso na̱ a̱buki† a vanvama na̱ yisowishi ni itoni ya̱ a̱ma̱li i na A̱sula̱ a ꞌyuwain.
4Akuci a̱ nꞌutsa̱ n ɗu a ta yuwan asalama a na i da̱shi ɓoloi aci ne ele a̱tsuma̱ a mayan me ili i vama shi. Hali gba a uwa a yuwusan adanshi a vama a aci a̱ ɗu adama o ndolo. 5Agba na a ciga a ꞌyuwan a̱ usu za na ee geꞌeto koyan ɗa, aza a wuma na aza a na a̱ kuwa̱i ɗe. 6Adama o ndolo a ɗa u yuwayin a̱kwa̱kwa̱ alajiya a Alabari a Saꞌani. Adama ko ne e geꞌeto le tsa akapi a ama a̱ lipu, u yuwaan le ta̱ ne tsa̱ra̱ a̱ tsura̱ mantsa ma na a vadala a yuwan wuma a̱tsuma̱ a̱ ruhu cuꞌun na A̱sula̱ a̱ ri na̱ a̱yi.
7Aa jima shi ili biti i to koto. Adama o ndolo i voton ugbozu a̱vu i guza̱ aciya̱ɗu adama i gura yuwan avasa. 8Ili i na i laꞌai a̱yi ɗa, i cigalai ni icigi ya amayun, adama a na icigi i tsu zuwa ta̱ i yuwan gafura vu nusu va̱ a̱bunda̱ a na a yuwaan nɗu. 9Ni i ciga i ꞌyuwan i ka̱lyuwula̱i ulobonu babu adanshawuya.
10A̱sula̱ a ca ta̱ koyan ɗa a̱tsuma̱ a̱ ɗu uneꞌe kokoꞌo. I yuwan ulinga ni ili i na A̱sula̱ a ca nɗu adama i roco isaꞌani† ya̱ A̱sula̱ a̱ tyo a ama. 11Na̱ a̱vu za na tsu yuwan adanshi a ɗa, vu yuwan adanshi gashi A̱sula̱ na aciya̱yi a ɗa aa yuwusan adanshi na̱ a̱vu. Ne e ɗe wu ta̱ adama vu kamba ama, vu yuwan yi na̱ a̱tyo o ucira u na A̱sula̱ a ca nuwu. Adama e ili biti A̱sula̱ a̱ tsura̱ ica a̱tsuma̱ e Yesu Zamawawa. Tsugbain tsa̱ yi nu ucira wa̱ yi a̱ ri nu utyo shi. Ami.
A̱tsuma̱lima̱ adama e itoni
12Ama a̱ va̱, she i yuwan asalama wan na a ca ɗu a̱tsuma̱lima̱ gashi akina. She i yuwan majiyan gashi ili i ro i ɗa koꞌo wan. 13Amma i yuwan ma̱za̱nga̱ adama a na i uwai a̱ a̱tsuma̱lima̱ a Zamawawa. Adama yo oꞌwo na̱ ma̱za̱nga̱ ma̱ a̱bunda̱ a mantsa ma na o rocoi tsugbain tsu Zamawawa. 14Ne e isula ɗu adama a ala a Zamawawa, i ushi ta̱ abaꞌun, adama a na u roco ta̱ tsugbain tsa̱ Ruhu va̱ A̱sula̱ u to oɓolo na̱ a̱ɗu. 15U lobono ta̱ i sowo awuya na̱ yu una vuma, ko i yuwan wivu, ko ili i vama i ro. Ne ɗa waru ni i damaton aciya̱ɗu ugondoru a̱tsuma̱ e ili ya ama o ro, u lobono ta̱ i sowo awuya. 16Amma ni i sowo a̱tsuma̱lima̱ adama a na yo oꞌwoi a̱za̱ e Itoni, she yu uwwa wono wan. Amma i cuwa A̱sula̱ a na i ri na ala o ndolo.
17Gogo nda mantsa ma ɗa a na A̱sula̱ aa fara ugeꞌetosu na ama o uꞌwa wa̱ yi neꞌen. Waru nu ugeꞌetosu u fara na̱ a̱tsu a̱za̱ e Itoni, cuꞌun vu ugeꞌetosu wu usuɗuwu u na waa yuwaan aza a na a ꞌyuwain a yuwan tsutoni na Alabari a Saꞌani a̱ yi? 18Adanshi a̱ A̱sula̱ a damma ta̱,
“Nu u ri usa̱n za va̱ a̱ɓula̱† tsura̱ iwawi,
cine tsa ɗa woo oꞌwo e ekere a aza a na e revei A̱sula̱ shi, na̱ a̱za̱ o unusu?” #Udm. 11:31.
19Adanshi a nda suru a̱yi ɗa na̱ yoo sowuso a̱tsuma̱lima̱ ununa A̱sula̱ a zuwai, i lyuwa elime na̱ mayan me mejege, i ca okolo, A̱sula̱ za na yuwan nɗu u ta kamba ɗu. Amayun a ɗa wa̱a̱ kuɗa̱ a kamba ɗu shi.
Currently Selected:
1 Bituru 4: tswNT
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.