Moti 15

Buzurgó ókkol or rosóm

(Mak 7:1-13)

1Yárbaade Jerúsalem ottu hoozzon alem edde Féroci, Isár hañse aái hoór de, 2“Tuáñr ummot ókkole agor zobanar buzurgó ókkol or rosóm kiyá báñge? Ítara hána háibar agor ttu át no dúwe.”

3Isá ye ítara re zuwabe hoór de, “Tuáñra nize yó kiyá tuáñrar rosóm or zoriya Allar hókum báñgo? 4Alla ye toh endilla hoiyé, ‘Bafmaa re izzot goríba’ #15:4 Hízorot 20:12; Córiyot-nama 5:16 aar ‘Zee niki baf or yáh maar bodnam goré, ítare mariféla zaybo.’#15:4 Hízorot 21:17; Imami-ham 20:9 5Montor tuáñra hoó de, ‘Zodi honókiye baf ore yáh maa re eén hoó, “Ze siz loi tuáñra añr ttu laf faita híyan Alla re diiféla gíyeh,” 6tóoile ítar ttu baf ore yáh maa re izzot gorár zorur nái.’ Héen gorí, tuáñra tuáñrar rosóm or zoriya Allar kalam ore baatel gorífelaiyo. 7Ó munafék ókkol, tuáñrar baabute nobi Yesáyah ye sóiyi hotá hoiyé, ki hoilé,

8 ‘Manúc iíne Añré nizor muké beh izzot goré,

montor tarár dil Añr ttu duré.

9 Tará Añr ebaadot goréde behar;

kiyólla-hoilé tará taalim ísafe cíka de óilde insán or niyom-kaanun ókkol.’ ” # 15:9 Yesáyah 29:13

Ziíne manúc ore nafak goré

(Mak 7:14-23)

10Isá ye manúc ókkol ore Nizor hañse matai, ítara re hoór de, “Fúno aar buzó. 11Gal ot ziín góle manúc ore híine nafak goré de no, bólke gal ottu ziín neeliaiyé manúc ore híine beh nafak goré.”

12Hétunot cárit tune aái Íba re hoór de, “Tuñí hoi faro né, Féroci ókkole yián fúni bezar óiye dé?”

13Íba ye zuwabe hoór de, “Ze sara Añr asmani Bafe lagaiyé de no, híyan háñrifela zaybo. 14Ítarar hotá félai ero. Ítara óilde añdá ókkol or añdá foñt dahóya; zodi ek añdá ye arek añdá re foñt dahá, duní zon toh gañt ot forizaybói.”

15Fitore Íba re hoór de, “Añára re meésal híyan buzáido.”

16Isá ye hoór de, “Tuáñra yó aijjó obuz táigiyogoi dé? 17Tuáñra kí no buzó, ziín gal or bútore góle híin zaa de óilde feṛot, aar feikána ttu neelizagói dé? 18Montor ziín gal ottu neeliaiyé híin aiyé de óilde dil ottu, aar manúc ore híine beh nafak goré. 19Kiyólla-hoilé dil ottu éna kukíyal, kotólakotóli, ḍoilla-boḍoilla zenákari, suri, misá gobá, edde gifot aiyé. 20Manúc ore híine beh nafak goré; montor adúiya áte hána háile manúc ore nafak goré de no.”

Ekgwá mayafuar iman

(Mak 7:24-30)

21Baade Isá hé zaga félai, Ṭayár edde Sídon cóor or elakat giiyégoi. 22Hé elakar eggwá Kánani mayafua neeli aái yore guzori-guzori Íba re hoór de, “Ó Malik, Dawud or Fua, añr uore rahám goró! Añr zérfua wa búte fai bicí duk far.”

23Montor Isá ye híba re honó zuwab nó deh. Hétunot Íbar cárit tune aái yore Íba re aros gorér de, “Ibáh re duñrai difélo, kiyólla-hoilé ibáh toh añárar fisé-fisé guzorat asé.”

24Isá ye zuwabe hoór de, “Añré siríf Isráil koum or áñzigiyoi de bérasóol ókkol or hañse beh difeṛá gíyeh.”

25Montor mayafua wa aái yore Íbar muúntu sóida fori hoór de, “Ó Malik, añré modot goró!”

26Isá ye zuwabe hoór de, “Fuain dor hána looi kuñir or muúntu félai dón gom no.”

27Híba ye hoór de, “Ói, Malik, montor toóu de girós or mes ottu forizagói de tukuṛa híin kuñire háa.”

28Hétunot Isá ye híba re hoór de, “Ó mayafua, tuáñr iman bicí ḍoóñr! Tuñí ziyán soór tuáñr lla híyan gorá záybo.” Tói éhon or bútore híbar zérfua wa gom óigiyoi.

Becábicí maincóre gom goijjé

29Baade Isá héntu bacá lói, Galil Ḍií báy zai eggwá faár or uore uṛí boiccégoi. 30Hétunot Íbar hañse becábicí manúc ókkol aiccé, zetará fúañti leng, añdá, mazur, buk, edde aró boóut kisím or biyaraimma ókkol aní Íbar ṭéng or gurat eijjé; aar Íba ye ítara re gom goijjé. 31Zeñtté manúc ítara buk ókkole hotá hoór de, mazur gom óiye de, lenge áñṛer de, añdá ye dekér de híin deikké, ítara taajup óigiyoi, aar ítara Boni Isráil or Allar taarif goijjé.

Sair ázar maincóre hána hábaiye

(Mak 8:1-10)

32Isá ye Nizor cárit tun ore matai hoór de, “Añr ttu manúc itará lla feṭfurer, kiyólla-hoilé itará Añr fúañti asé de tin din óiye aar itará ttu háito kessú nái. Añr ttu itará re waácca duñraidito mone no hoór, zeéne itará foñt ot matá gúrai fori no zagói.”

33Cárit tune Íba re hoór de, “Manúc or ettór ḍoóñr dol ore feṭ bóri hábai bolla añára e bocóti-sára elakat hédun ruṭi hoṛé faiyum?”

34Isá ye ítara re hoór de, “Tuáñra ttu ruṭi houwá asé?”

Ítara hoór de, “Háñt twa, aar houggwá gura mas.”

35Íba ye manúc cún ore meṛit boitó hoiyé; 36baade hé háñt twa ruṭi edde mas sún looi Alla re cúkuriya goijjé, aar híin báñgi cárit tun ore diiyé, aar cárit tune manúc cún ore diiyé. 37Beggúne feṭ bóri háiye, baade ze tukuṛa ókkol basi accíl híin bóijje rár lai loi háñt lai óiye. 38Zetará háiye ítara óilde sair ázar beṛaáin, beṛiyáin edde fuain bad dih. 39Isá ye manúc or dol lwá re bidai gorídi baade, noow ot uṛí Magádan elakat giiyégoi.

Currently Selected:

Moti 15: RST

Highlight

Copy