Yuhunna 20

Hali hobor

(Moti 28:1–10; Mark 16:1–8; Luk 24:1–12)

1Haftar foila din binna sore, andar taite Mogdaleni Moriyame hoboror hãse giye, ar hibaye dekedde hoboror mukottu fattorgan algaifela oiye. 2Hibaye dũri Simon Fitoror hãse edde dusora sahabi zare Isaye ador gorito hibar hãse aišše, ar hitarare hodde, "Hitara Malikore hoborottu loigiyegoi; ar hitara hibare hoṛe raikke ãra no zani."

3Toi Fitor edde he dusora sahabiwa hetunot niyoli giye edde hoboror mikka zat aššil. 4Ar hitara dunizon ekku fũwati dũrat aššil, kintu he dusora sahabiwaye Fitorottuwaro aro beši dũriyore mummika giye edde hoborot agottu fõissegai; 5edde niyuriyore hoboror butore saiye, heṛe kafonor hor fori taikkede deikke, kintu hibaye hoboror butore no za. 6Simon Fitor o hibar fise fise aišše, edde hoboror butore giye edde dekedde kafonor horgun heṛe fori roiye, 7Ar ze rumalgan hibar matat beraiya aššil hiyan kafonor horor fũwati nai, kintu ar ekkan zagat hok gori raka oiye. 8Tarfore dusora sahabi ze age hoboror hãse fõissil, hibaye o butore giye. Hibaye deikke edde biššaš goijje. 9(Hehon foijjonto hitara kitabor ei hota buzi no fare ze, mora okkolor butottu abar hiba uṛa iyan dorhari.) 10Tarfore sahabi okkol górot firi giyegoi.

Isaye Mogdaleni Moriyamore deha diya

(Mark 16:9–11)

11Toi Moriyam hoboror baire tiyai handat roiye, hibaye handat maze niyuriyore hoboror butore saiye, 12ar dekedde, dola hor finda duizon firista Isar ga ze zagat neṛai diya oil, ekzon hibar matar hentu, ar ekzon ṭengor hentu, boi taikke. 13Hitara hibare hodde, "He mayafuwa, handor kiyolla?"

Hibaye hitarare hodde, "Hitara ãr Malikore loigiyegoi, edde hibare hoṛe raikke ãi no zani."

14In okkol hoiyore hiba fissa firi sadde Isa tiyai roiye, kintu hiba Isade hiyan hibaye buzi no fare.

15Isaye hibare hodde, "He mayafuwa, handor kiyolla? Hare tuwor?"

Isare baganor mali boli ṭariyore, hibaye hodde, "So, õne zodi hibare loi giyogoide o, toile ãre ho hoṛe raikko, ãi hibare loi ainnumboi."

16Isaye hibare hodde, "Moriyam."

Henot Moriyame hibar mikka firiyore Ibroni zubanot Isare hodde, "Rabbuni" zar mani "ustad."

17Isaye Moriyamore hodde, "Ãre no suis, kiyollahoile ãi ehono uwore Bafor hãse no zai. Tui bolke ãr báiyaindor hãse zaiyore hogoi, ze ãr edde tũwarar Baf, ze ãr edde tũwarar Allah, ãi uwore hibar hãse zair."

18Toi Mogdaleni Moriyam hentu giyegoi edde sahabi okkolore hodde, "Ãi Malikore dekki!" Ar Isaye hibare ki hoil hin okkol o hibaye hitarare hoiye.

Isaye sahabi okkolore dehaiye

(Moti 28:16–20; Mark 16:15–16; Luk 24:36–49)

19He ekkui dinor hazinna, haftar foila din, Ihudi okkolor ḍore, sahabi okkol ziyot dola oiya aššil he góror doroza okkol bon gori dil. Isa nize ai hitarar maze tiyaiyore hodde, "Tũwarar šanti ok." 20Ei hota hoi bade hibaye hitarare hat edde ḍak dehaiye. Sahabi okkole Malikore dekiyore beši kuši oiye.

21Toi Isaye abar hodde, "Tũwarar šanti ok; zendilla ãre he Bafe defeṛaiye, ãi o tũwarare defeṛair." 22Ei hota hoiyore hibaye hitarar uwore fu diye edde hodde, "Pak Ruhure goso. 23Tũwara zodi honokiyor guna maf gori do, toile hitarar guna maf oibo, ar zodi honokiyor guna maf gori no do, toile hitarar guna maf gora no oibo."

Isa edde Ṭomas

24Isa zẽtte aššil, hẽtte Ṭomas, he barozonor ekzon, (zare Didymus ḍaka oito,) hiba oinno sahabi okkolor fũwati nu aiššil. 25Toi oinno sahabi okkole hibare hodde, "Ãra Malikore dekki."

Kintu hibaye hitarare hodde, "Ãi zodi hibar dui hatot ferakor sinno no deki, edde he ferakor sinnot ãr õl diyore, edde hibar ḍakot ãr hat diyore ãi sai no fari, toile hono mote ãi biššaš no goriyum."

26Ar ašṭo din bade, hibar sahabi okkole abar he górot dola oiye, edde Ṭomas o hitarar fũwati aššil, ar hẽtte dorozagun banda taki bade o Isa aišše, edde hiba hitarar maze tiyaiye, ar hodde, "Tũwarar šanti ok."

27Tarfore hibaye Ṭomasore hodde, "Tor õl eṛe an, ar ãr dui hat sa. Ar tor hat barai de, edde ãr ḍakot rak. Obiššaši no ois, kintu biššaši o."

28Hetunot Ṭomase zuwab diye edde hibare hodde, "Ãr Malik, ãr Allah."

29Isaye hibare hodde, "Ṭomas, tui ki ãre deikkos boli biššaš ainnos? Mubarok hitara, zara no dekiyore biššaš gore."

30Isaye sahabi okkolor sukor sarme aro bout keramoti ham goijje, zin ei kitabot leka no o. 31Kintu in okkol leka oiye, zene tũwara biššaš gori faro ze, Isa oilde Messiyah, Allar Fut, ar zene biššašor duwara tũwara hibar namot zibon fo.

Currently Selected:

Yuhunna 20: rhgB

Highlight

Copy