Asab 2

Sahabi okkole Pak Ruh faiye

1Fõnzaš dinna idor din sahabi okkol beggune ek zagat dola oiye. 2Hetunot atikka asmanottu bári boyaror abazor ḍoilla ek abaz aišše edde ze górot hitara boiššil hiyanor hár mikka he abaze furaigiyegoi. 3Toi hitara dekedde, hinore saite oinor zil okkolor ḍoil, zin šiṛiyore hitara fottizonor uwore boišše. 4Henot hitara beggune Pak Ruhuye furaiya oiye edde Ruhuye zare zendilla hota hoibar šokti diye he mozin hitara oinno oinno zuban okkolot hota howa šuru goijje.

5Hẽtte Allar ḍorwala Ihudi okkol duniyair har zatittu ai Zeruzalemot bošobaš goijjil. 6Ar hitara ei abaz funiyore ek dol manuš zoma oiye edde hitara beggune giyan hara oigiyoi, kiyollahoile hitara fotti ekzonor nizor zubanot hota howa odde fuinne. 7Hitara kub beši ammuwak edde tajjuf oiyore fusar goredde: "So, hota hodde itara beggun ki Galilor manuš no neki? 8To ãra kene fottikiyor nizor nizor madinna zuban hodde funir? 9Fartiyo, Madiyo edde Elamiyo, edde Mesofotamiyar bašinda okkol, Ehudiya edde Kafnadkiya, Pontus edde Ešia, 10Forugiya edde Famfuliya, Mišor edde Leviya deš šoho Kuronir ate hãsor elehar bašinda okkol edde boidešitta Romiyo, 11Ihudi edde Ihudi dórmo manoya manuš okkol edde Kreṭiyo edde Arabiyo manuš okkol ze ãra, ãra ze zar zar zubanot hitara Allar ḍõr ḍõr hamor hota hodde funir!" 12Endilla gori hitara beggune tajjuf oiye. Ar hitara suhara oiyore ekzonore ekzone fusar gora šuru goijje, "Iyanor mani ki?"

13Abar hodune hitarare loi ṭaṭṭa urar edde hodde, "Hitara taza šoraf beši fifelaiyore fool oiyede."

Fitoror boyan

14Kintu Fitore he egarozon sahabir fũwati tiyaiyore he manušor dolore guzori hodde: "Oh Ihudi manuš okkol edde Zeruzalemor bašinda okkol! Tũwara beggune ei hota zani rako edde ãr hota funo! 15Tũwara ziyan mone goror hiyan no, itara šoraf hái fool oiyede no, kiyollahoile aizo binna nowa baijjede! 16Kintu iyan oilde he goṭona ze hota Zuel nobir duwara howa oiye:

17"'Šeš hale endilla oibo, Allaye hor,

har mainšor uwore ãi ãr Ruhure ḍali diyum.

Tũwarar futziyainde nobi hisabe agam hota hoibo,

He zuwan okkole deha faibo,

ar he burá okkole šoppon dekibo.

18En ki, ãr gulam edde bandi okkolor uwore,

he din okkolot ãi ãr Ruh ḍali diyum,

ar hitara nobi hisabe agam hota hoibo.

19Ãi uwore asmanot nanan keramotor alamot

ar nise duniyait nanan ḍoilla sinno,

lou, oin ar dũwa dehaiyum.

20Malikor he moha mohimar din aibar age,

beil andar oi zaiboi,

san louwor ḍoilla oi zaiboi,

21Ar ze honokiye Malikor nam ḍake,

hite uddar faibo.'

22"Oh Israili manuš okkol, ei hotagun funo: Nasarator Isaye kuduruti ham, keramot, ar sinno okkolor duwara tũwarar hãse hiba ekzon Allar torfottu formanwala manuš. Isar duwara Allaye tũwarar maze ei ham okkol goijje, zin tũwara nize nize zano. 23Allah, ze age loti zane edde faisala gori rakkil, he mozin hibare tũwarar hatot šebi diya oiye. Ar tũwara hibare bedormiyo okkolor hatot tuli di kurušot di mari felaiyo. 24Kintu Allaye hibare moron zontronar hatottu uddar gori tuli loi giyegoi, kiyollahoile hibare moute dori rakibolla šaiddo no aššil. 25Badša Daude hibar babute hor:

"'Ãi Malikore hamiša ãr sarme deki,

kiyollahoile hiba ãr ḍen ḍakottu ase,

zene ãi bifodot no fori.

26Hetolla ãr dil kuši o, edde ãr zile kušir hota ho,

ar ãr gagan o aša loi basibo.

27Kiyollahoile tũi ãr foranore fatalfurot raki no zaibagoi,

No diba tũi, tũwar Paki zonor gare fõsito.

28Tũi ãre sinaiyo, zibon fõtore,

tũwar hazirir duwara ãre kušiye furon gore.'

29"Báiyain okkol, he raz bongšor baf Daudor babute ãi tũwarare kula zubane hoi fariyum, ze hiba morigiyegoi edde hibare dohon gora oiye, ar hibar hobor aizo foijjonto ãrar hãse ase. 30Bala, hiba ekzon nobi aššil ar hibaye zanito ze Allaye hosom hái son goijje, Daudor ekzon bongšodorore hibar šingašonot buwaibo. 31Hetolla Daude agottu loti dekkil buli Isa Mosir uwafes zinda uṛar babute hoiye ze hibare fatalfurot feli raka no o, hibar ga o no fõse. 32Ehon! Ei Isare Allaye morattu uwafes tuille, ar ãra beggun iyanor goba. 33Allar ḍen ḍakottu boibar ijjot hibare diya oiye edde hibaye wada gora Pak Ruhure hibar Bafottu faiye, ar ehon tũwara zin dekor edde funor hin oilde he Pak Ruh zin Isaye ḍali diye. 34Daud hono behostot no za, kintu hibaye nize ei hota hoiye,

"'Mabude ãr malikore hodde:

"Tui ãr ḍen ḍakottu boi,

35zetodin ãi tor dušmon okkolore

tor fottole no raki."'

36"Etolla Israilor hár mainše haṭi gori zanok: Zare tũwara kurušot marifelaila, Allaye he Isare Malik edde Mosi duni ḍoilla goijje."

Tin hazar manuš dola oiye

37Ei hota funone hitarar dilot tir góillefan oiye. Ar hitara Fitorore edde oinno asab okkolore hodde, "Báiyain okkol, ãrattu ki gora foribo?"

38Fitore zuwabe hodde, "Tũwara fotti ekzone gunattu mon firao edde Isa Mosir name torikotor gusol lo, toi tũwara guna maf faiba, ar hadiya hisabe tũwara Pak Ruhure faiba. 39Kiyollahoile tũwaralla edde tũwarar futziyain okkololla edde zara dure ase hitara beggunolla, zar mani zedun manušore ãrar Allah Malike ḍaki anibo hitara beggunolla ei wada gora oiye."

40Hin bade o aro bout hota hoi Fitore goba diye, edde hitarare endilla nosiyot goijje: "Ei zobanar naforman, horaf manuš okkolottu tũwara nizore dure raikko." 41Henot hitara zara Fitoror hota mani loiye, hitara torikotor gusol loiye edde henot hedin hom beši tin hazar manušore Allaye hitarar ekku fũwati zug goijje.

Biššaši okkolor solafira

42Ar hitara sahabi okkolor šikka lowat, edde hitarar fũwati šongo diyat, ruṭi bangat edde munazat gorat fori taito. 43Toi beggunor dilot Allar ḍor góille, kiyollahoile sahabi okkole bout tajjuiffa alamot edde sinnor ham okkol goitto. 44Ar biššaši okkol beggune ekku fũwati takito edde hár kissu ek taillatt rakito. 45Ar hitarar zaga zobin edde šombotti za kissu aššil hin besi zar zendilla zorulot oito he mozin beggunore baṛi diya oito. 46Hitara fotti din dórmogóror uṛanot ekku fũwati dola oito, ar gór okkolot hitara hãši kušiye edde šorol mone há fiya gorito. 47Hitara Allar tarif gorat taito edde hár mainše hitarare ijjot goitto. Ar zara din din uddar faito, Malike hitarare o ani itarar dolot zug gorito.

Currently Selected:

Asab 2: rhgB

Highlight

Copy