Luke 6
6
1အူန်းပူစ်မာန်းရာပ် ရာပ်အာလည် ကိုယ်တော်ယေရှုနောက် တပည့်ဖူမ်ငေါ် အန်တွန်ဖူမ်နယ် ပလာပ်ကယ်အယ် လာမ်ငါးကာ့ အချိန်နယ် တပည့်လာပ်ကော် အန်တူတူဖူမ်နယ်ကူမ်ကဲ့အယ် လာပ်ခေါက်ဖူမ်နယ် တာပ်ပါးနောက် ဘီပလောမ်ကယ်အယ် အဆာပ်ဖူမ်နယ် ရောက်ချီးမာ့။ 2အင်းမာချိန်နယ် ဖာရိရှဲကြအာကော ကိုယ်တော်ယေရှုကာ့ တပည့်လာပ်သယ် “နီမ်ငေါ အူန်းပူစ်မာန်းရာပ်သယ် ခွင့်အပြုလောပေးကားလည် မဟာအောမ်ကယ် အောမ်ဟီးကားသယ်” ငေါကဲ့အယ် သပေါက်ချီးမာ့။ 3ကိုယ်တော်ယေရှုကော “ဘုရင်ဒါဝိဒ်နောက် ဟီမ်ငါတပည့်လာပ်ကော်a ရောက်ခေါပ်ကားအချိန်နယ် မဟာအောမ်မီမာ့ ငေါကားကာလည် ကျမ်းစာပါအာ နီမ်ကြေဟီမာန်ငိုလေး။ 4ဟီမ်ငေါ ဘုရားရှင်ငါ ကျဉ်းbနား ဆာမ်ကဲ့အယ် ဘုရားရှင်ဟနန်း သီးသန့် ကာပ်သော်ပေကယ်အယ် ပုရောဟိတ်သာပ်ချာ ရောက်တီမ် ခွင့်ငါကားကာ ဟမူမ်cနယ် ဟီမ်ကိုယ်တိုင် ရောက်စာမ်းဟာဟီပ်ယို ဟီမ်ငါတပည့်ဖူမ်နယ်ရား အီနောပ်လီမာ” ရယ် မိန့်နောစီးကဲ့အယ် ဆက်သောကဲ့အယ် 5“တီတ်ဆာကာ့ဆာ ထာကာကာ့ ငါကော အူန်းပူစ်မာန်းရာပ်ကာ့ အရှင်သခင်ထာမာ့” ငေါကဲ့အယ် မိန့်နာန်မာ့။ 6အခြားအူန်းပူစ်မာန်းရာပ်သယ် ကိုယ်တော်ကော ဓမ္မာရုံငါး ဟောပြောလောကဲ့လင်းငါးအချိန်နယ် ညာဘက်ထော်ရှီးကဲ့ လင်းငါး တီတ်ဆာဟော်ဝါရီး အင်းမာနေရား ငါမာ့။ 7ဖာရိရှဲနောက် ကျမ်းထောကား ဆရာကြအာကော အူန်းပူစ်မာန်းရာပ်သယ် ကိုယ်တော်ကော ဟော်ဝါဟော်ဝါလည် ကုလောကဲ့အီမာငေါနော စွပ်စွဲလောတီမ် အကြောင်းပြချက် ဟော့ပ်သောကွန်းနယ် ကိုယ်တော်လည် ထံပါအာအယ် ထက်ကဲ့ယူကဲ့အယ် လင်းဟီးမာ့။ 8အင်းညယ်ငေါဝမ်ရီ ကိုယ်တော်ယေရှုကော ဟီမ်နာပ်မညယ် တွေးလောမာ့ ငေါကားကာလည် မီမ်းဟော်ကယ် အင်းမာ့ညာဘက် ထော်ရှီး ကားဟီမ်နယ် “လီကဲ့အယ် တီတ်ဆာအားလုံးနာပ်ကာ့မန်းနား စာပ်လာမ်နိတ်” ငေါကဲ့အယ် မိန့်နာန်စန်နော် အင်းမာဟီမ်ငေါ လီကဲ့အယ် စာပ်လာမ်မာ့။ 9စီးရာပ်သော် ကိုယ်တော်ယေရှုကော ဟီမ်နာပ်သယ် “နီမ်နယ် ငါကြအာစီမ်ညူနာ့ပ်။ အူန်းပူစ်မာန်းရာပ်သယ် ကလန်ငါကာ့ အလုပ်အောမ်ငါးနောက် ဆိုးလောကားလည် အောမ်ငါး အင်းညယ်အဟီပ်ရယ် ဟော်ဝါဟော်ဝါကာ အသက်သယ် ကယ်တင်နောကားနောက် ကတ်ရှီးကား သမာ့ကော ပညတ်တော်နောက် ညီလောမ်းတယ်” ငေါကဲ့အယ် စီမ်ညူကဲ့အယ် 10ဘေးပတ်လည်ပါအာမာ့ တီတ်ဆာဖူမ်နယ် မန်းကဲ့ယူကဲ့အယ် ညာဘက်ထော်ရှီးကားဟီမ်နယ် “နာန်ငါထော်လည် လာရာမ်းနိတ်” ငေါကဲ့အယ် မိန့်နာန်ကယ် အင်းမာဟီမ်ငေါ ဟီမ်ငါထော်လည် လာရာမ်းစန်နော် ထော်ကောပကတိအတိုင်းရယ် ထာဝမ်မာ့။ 11အင်းမာချိန်ငါ ဖာရိရှဲလာပ်နောက် ကျမ်းထောကား ဆရာလာပ်ကော ရှေရှောတင်းကဲ့အယ် ကိုယ်တော်ယေရှုလည် မညယ်အောမ်ထော်ပ်ကားငေါကားလည် အချန်းချန်း တိုင်ပင်နောဟီးမာ့။ 12ရာပ်အာလည် ကိုယ်တော်ယေရှုကော ဆုစိမ်တီမ် တောင်စုတ်အား လာမ်ကဲ့အယ် နာန်ကြည်လော်ဝါ ဘုရားရှင်ပါအာ ဆုစိမ်ကဲ့အယ် လင်းမာ့။ 13ဟလာမ်းလားဝမ်စန်နော် တပည့်အားလုံးနယ် ဟီမ်ပါအာ စုလောစီမ်းကဲ့အယ် ဟီမ်နာပ်ပါအာမာ့ ဆယ့်နှစ်ယောက်သယ် သာဝကdအဖြစ် ရွေးထုတ်သာမ်မာ့။ 14အင်းမာဟီမ်နာပ်ကော ပေတရုရယ် ကိုယ်တော်နံမယ်အီပေးကားကာ့ ရှိမုန်နောက် ဟီမ်ငါနရှီ အန္ဒြေ၊
ယာကုပ်၊
ယောဟန်၊
ဖိလိပ္ပု၊
ဗာသောလမဲ၊ 15
သောမ၊
အာလဖဲကာ ဆာ ယာကုပ်၊
အမျိုးလည် မွန်းငါး ကာပုဂ္ဂိုလ် ကော်ကားက ရှိမုန်e ၊ 16
ဆာ ယုဒနောက်
နောင်တစ်ချိန်ငါ ကိုယ်တော်လည် သစ္စာဖောက်သောဟပ်ကာကာ့ ယုဒရှကာရုတ်fသာပ် ထာမာ့။ 17စီးရာပ်သော် ကိုယ်တော်ကော သာဝကဖူမ်နောက်တူတူ တောင်စုတ်အားအယ် ဆာပ်လီကဲ့အယ် ကာပြန့်နာ စာပ်ကဲ့လင်းမာ။ အင်းမာနေရား တပည့်တော်လာပ်နောက်တူတူ ယုဒပြည်၊ ဂျေရုဆလင်မြို့၊ တုရုမြို့နောက် ဇိဒုန်မြို့ ကမ်းတစ်လျှောက်လုံးပါအာမာ့ မြို့ဖူမ်ပါအာမာ့ တီတ်ဆာဖူမ်ငေါ ထုတ်အာပ်ချီးရီမာ့။ 18ဟီမ်နာပ်ကော ကိုယ်တော်ဟောလောကား တရားတော်ဖူမ်နယ် သပ်တီမ်နောက် ဟီမ်နာပ်ကာ အနာရောဂါဖူမ် ကုလောကားခံနောတီမ် ထုတ်အီကား ထာမာ့။ ကိုယ်တော်ကော စိတ်ဆလားဆာမ်ငါး ခံနောထော်ကာ တီတ်ဆာလာပ်သယ် ကုလောကဲ့အယ် အီရီမာ့။ 19ကိုယ်တော်ပါအာ တီတ်ဆာအာလုံးနာပ်ကာ အဇလာကာဖူမ်အားလုံးနယ် မီမ်ဟာမ်းစီမ်းရင်ငါကာ တန်ခိုးငါကယ်မာ့ တီတ်ဆာအားလုံးငေါ ကိုယ်တော်ယေရှုလည်ထာဟီတီမ် ကြိုးစားလောဟီးမာ့။ 20စီးရာပ်သော် ကိုယ်တော်ကော တပည့်လာပ်ကာ့ဘက်လာ မန်းကဲ့အယ် ဟီမ်နာပ်သယ် “အပေါ်ဟာကားကာ နီမ်ငေါ ကံကလန်ဟီမာ့။ မဟာအောမ်ကယ်လိုးငေါနော ဘုရားရှင်ငါ သာသနာတော်ကော နီမ်ဟနန်းဟာ ထာမာ့။ 21ရာ ရောက်ခေါပ်ကဲ့လင်းငါးဟီမ်နာပ်ရီး ပျော်လောဟီးစာပ်။ မဟာအောမ်ကယ်လိုးငေါနော နီမ်ရီး စိတ်ကျေနပ်သောကွန်းနယ်အထိ ကျေးကွန်းနယ် ရောက်ချီးမူကိုက်ပန်။ ရာ ဟပ်ကဲ့အယ် လင်းငါးကာ့ ဟီမ်နာပ်ရီး ပျော်လောဟီးစာပ်။ နီမ်ရီး နီးကာပ်ကယ်အယ် ပျော်လောဟီးမူကိုက်ပန် ထာမာ့။ 22တီတ်ဆာကာ့ဆာလည် ယုံကြည်လောဟီးကယ်မာ့ တီတ်ဆာလာပ်ယူနီကာ ခံနောထော်ကာ အခါလည်ဟာမ်း ထာဂါက်ထာ၊ ပစ်ပယ်လော်ကာခံနောထော်ကာ အခါလည်ဟာမ်း ထာဂါက်ထာ၊ နှိပ်စာပ်သောကား ခံနောထော်ကာ အခါလည်ဟာမ်း ထာဂါက်ထာ၊ စော်ကားလောကဲ့အယ် သပေါက်ကား ခံနောထော်ကာ အခါလည်ဟာမ်း ထာဂါက်ထာ ကံကလန်ဟီမာ့။ 23အင်းမာညယ်ထာရီပ်သော် ပျော်လောကဲ့ ဖောက်ကဲ့အယ် ကားလောဟီးလိတ် မဟာအောမ်ကယ်လိုးငေါနော ရွှေမြို့တော်ဝါ နီမ်လုကား ဆုလာဒ်ကော ကြီးမားလောမာ့။ မယားမားလည် အင်းမာဟီမ်နာပ်ကာ့ ဘိုးဘေးဖူမ်ရီ ပရောဖက်ဖူမ်နယ် အင်းမာအတိုင်း အောမ်ဟီးရီကယ် ထာမာ့” ငေါကဲ့အယ် မိန့်နောမာ့။ 24အင်းညယ်ငေါဝမ်ရီ ချမ်းသာလော်ကာတီတ်ဆာလာပ် နီမ်ငေါ ဒုက္ခရောက်သောဟိကာ။ မဟာအောမ်ကယ်လိုးငေါနော နီမ်ငေါ ပြည့်စုံနော်ကာ ဘဝပါအာ လင်းဟီးမူရီကယ် ထာမာ့။ 25ရာအချိန်နယ် ကျေးကွန်းနယ် ရောက်ချီးမူကာကာ့ တီတ်ဆာလာပ်ကော ဒုက္ခရောက်သောဟိကာ။ မဟာအောင်ကယ်လိုးငေါနော ဟီမ်နာပ်ကော ရောက်ခေါပ်ချီးထော်ပ်ကားအချိန် ထုတ်အိကားသယ်မာ့။ ရာ့အချိန်ငါ နီးကာပ်ကယ်အယ် လင်းငါးကာ ဟီမ်နာပ်ကော ဒုက္ခရောက်သောဟိကာ။ မဟာအောမ်ကယ်လိုးငေါနော ဟီမ်နာပ်ကော ဝမ်းနည်းလောကဲ့အယ် ဟပ်ချီးထော်ပ်ကား။ 26တီတ်ဆာဖူမ်ငေါ နီမ်ငါအကြောင်းနယ် ချီးမွမ်းနောကဲ့ သပေါက်ချီးရာမ်းနော နီမ်ငေါ ဒုက္ခနောက်ကြုံနောဟီးထော်ပ်ကား။
မဟာအောမ်ကယ်လိုးငေါနော အင်းမာဟီမ်နာပ်ကာ့ ဘိုးဘေးလာပ်ရီ အယောင်ဆောင် ပရောဖက်ဖူမ်နယ် အင်းမာညယ်ချီးမွမ်းနောဟီးရီကယ် ထာမာ့။ 27“အင်းညယ်ငေါက်သော် ရာ သပ်ကဲ့လင်းမာပ်ကားနီမ်နယ် ငါငေါ့နာပ်။ ရန်သူလာပ်ကာ့ အပေါ်ဝါ မူမ်းဟီးလိတ်။ နီမ်နယ် ယူနီကာကာ့ တီတ်ဆာလာပ်သယ် ဟီမ်နာပ်ခနန်း ကလန်ငါလည် အောမ်ကဲ့အီဟီးလိတ်။ 28နီမ်နယ် စမ်းငါးကာ တီတ်ဆာလာပ်သယ်ရီး ဟီမ်နာပ်ပါအာ ကလန်ငါကာဖူမ် ထာရီကွန်းနယ် ဘုရားရှင်ပါအာ ဆုစိမ်ကဲ့ အီဟီးလိတ်။ နီမ်နယ် ရက်စက်သောကားကာ တီတ်ဆာလာပ်သယ်ရီး ဆုစိမ်ကဲ့အယ် အီရာမ်နိတ်။ 29ဟော်ဝါဟော်ဝါကော နီမ်ငါမန်းတစ်ဖက်သယ် သမ်းမန်းနော နောက်တစ်ဖက်သယ်ပါ သမ်းစီမ်းနိတ်။ ဟော်ဝါဟော်ဝါကော နီမ်ငါ့အပေါ်ထပ် ဆာမ်ဆူန်နယ် စိမ်မန်းနော နားကာ့ ဆာမ်ဆူန်နယ်ပါ အီရာမ်နိတ်။ 30နီမ်ပါအာ မဟာမဟာစိမ်ညီကားကာ တီတ်ဆာလာပ်ခနန်း အီရာမ်နိတ်။ ဟော်ဝါဟော်ဝါကော နီမ်ငါပစ္စည်းလည် လာပေးရာမ်းနော အင်းမာဟီမ်ပါအာအယ် စိမ်ဟာမ်စောမ်သာ့။ 31နီမ်နယ်ဆက်ဆံနော်စီမ်ကာပ်ကယ်ညယ် သမီပ်ကာအပေါ်ဝါ ဆက်ဆံနော်လိတ်။ 32နီမ်နယ် မူမ်းငါးကာ တီတ်ဆာလာပ်သယ်ဟာ မူမ်းမန်းနော ဘုရားရှင်ငေါ် နီမ်နယ်မညယ်ချီးမွမ်းနောရင်စောမ်ဟပ်ကားလိုး။ မဟာအောမ်ကယ်လိုးငေါနော ဒုစရိုက်အပြစ်သားဖူမ်ဟာမ် ဟီမ်နာပ်သယ် မူမ်းငါးကာ တီတ်ဆာလာပ်သယ် မူမ်းဟာမ်းဟာကယ် ထာမာ့။ 33နီမ်ငါ့အပေါ်ဝါ ကလန်ငါကာ တီတ်ဆာလာပ်သယ်ဟာ နီမ်ငေါပြန်နောကဲ့အယ် ကလန်ဟာမ်ကာငေါက်သော် ဘုရားရှင်ငေါ် နီမ်နယ် မညယ် ချီးမွမ်းနောရင်ဟပ်နိုး။ မဟာအောမ်ကယ်လိုးငေါနော ဒုစရိုက် အပြစ်သားလာပ်ချာန် အင်းမာညယ်အောမ်ရင်ကယ် ထာမာ့။ 34နီမ်ဟနန်း အီဟာမ်းကာ မသပ်ကား တီတ်ဆာလာပ်ခနန်းဟာ နီမ်လှာကမ်ကဲ့ အီရာမ်းနော ဘုရားရှင်ငေါ် နီမ်နယ်ချီးမွမ်းနော့ကာ မသာပ်ချီးကားနာန်။ ဒုစရိုက်အပြစ်သားလာပ်နိက် အီရာမ်ငါးကာ့ ပမာဏအတိုင်း ပြန်နောကဲ့အယ်လူဟာမ်းကွန်းနယ် အချန်းချန်း လှာကမ်ဟီးဟာမာ့။ 35နီမ်ငေါ ရန်သူလာပ်သယ် မေတ္တာအီကဲ့အယ် ဟီမ်နာပ်ခနန်း ကလန်ငါလည်ဟာ အောမ်ကဲ့အယ် အီဟီးလိတ်။ လူဟာမ်းတီမ် အမျှော်လော်ရယ် လှာကမ်ကဲ့ အီဟီးလိတ်။ နီမ် အင်းမာညယ် အောမ်မန်းနော ဘုရားရှင်ပါအာအယ် ဆုလာပ်ဖူမ် လူတင်းကဲ့အယ် တန်ခိုးကြီးလောဟန်ဆုံး ဘုရားရှင်ငါ ရှိတ်ဆာဖူမ် ထာဟိကာ။ မဟာအောမ်ကယ်လိုးငေါနော ဘုရားရှင်ငေါ် ကျေးဇူးအမီမ်းဟော်ဟာကားကာ့ ဟီမ်နာပ်နောက် အကလန်ငါကာ တီတ်ဆာလာပ်သယ်ရီး မေတ္တာ ပေးကားသယ်မာ့ ထာမာ့။ 36နီမ်ငါ အဝါဘုရားရှင်ငေါ် တီတ်ဆာတိုင်းနယ် မေတ္တာဂရုဏာပေးကယ်ညယ် နီမ်ရီး တီတ်ဆာတိုင်းနယ် မေတ္တာဂရုဏာ ပေးဟီးလိတ်” ငေါကဲ့အယ် မိန့်နောမာ့။ 37“အင်းမာ့ပြာန်နယ် တခြားတီတ်ဆာလာပ်သယ် စီရင်နောကားအောမ်မာ့၊ အင်းညယ်မားလည် ဘုရားရှင်စီရင်နောကားလည် နီမ်ခံနောထော်ပ်ကားယို။ သမီပ်သယ် ပြစ်တင်ဝေဖန်နောကားအောမ်ဟီရာ့၊ အင်းညယ်မားလည် ဘုရားရှင်အပြစ်တင်ဝေဖန်နောကားလည် နီမ်ခံနောထော်ပ်ကားယို။ သမီပ်သယ် ခွင့်လွှတ်သောကဲ့ အီဟီးလိတ်။ နီမ် အင်းမာညယ် အောမ်မန်းနော ဘုရားရှင်ရီ နီမ်နန်းခွင့်လွှတ်သောကဲ့ အိကား။ 38တခြားတီတ်ဆာလာပ်သယ် ပေးကမ်းနောလိတ်။ နီမ်ရီး လူဟာမ်းဟိကာ။ အင်းမာညယ် လူဟာမ်းဟီးကားအခါလည် နီမ်ငါ အိတ်နား သိက်သောဆာမ်ကယ်အယ် ခါလောစာပ်ရယ် လျှံနောဟူမ်စာပ်အာမ်ကွန်နယ် စာန်းကဲ့အယ် အီဟာမ်းဟိကာ။ နီမ်တခြား တီတ်ဆာလာပ်သယ် အီကနေ ဘုရားရှင်ငေါ် နီမ်ဟနန်း အီဟာမ်းကာ” ငေါကဲ့အယ် မိန့်နောမာ့။ 39စီးရာပ်သော် ကိုယ်တော်ကော ဟီမ်နာပ်သယ် ပုံဥပမာကြအာနောက်မိန့်နောကားကော “မီပ်တူ အယူပ်မူကားကာ တီတ်ဆာဟော်ဝါကော အခြားမီပ်တူအယူပ်မူကားကာဟီမ်နယ် ဦးဆောင်နောကဲ့အယ် လမ်းပြလောရင်နေး။ အင်းမာ ကယ်ဟောစလုံးငေါ ထွာမ်နားလက်ဆာမ်ရင်နာ့ယိုလေး။ 40ဆရာကာ ထက်သယ် သာလောကားကာတပည့်ငေါကဲ့အယ် အပို။ အင်းညယ်ငေါဝမ်ရီ အင်းမာတပည့်လည် ကလန်မယ် လေ့ကျင့်နောကဲ့အီရမ်းနော ဟီမ်ငေါ ဟီမ်ငါဆရာညယ် ထာရီပ်ကား။ 41နာန်ငါ မီပ်တူနားကာ ဖောမ်းတူနေကာ ဖိုက်ခေါက်သယ်ကော် လေးအအောင်စာန်ပါတ်ရယ်၊ နာန်ငါမိတ်ဆွေ မီပ်တူနားကာ ဖူန်မှုန့်နယ် မဟာအောမ်ကယ် ယူပ်မူထော်ကားတယ်။ 42နာန်ငါ့ မီပ်တူနားကာ ဖောမ်းတူနေငါကားကာ ဖိုက်ခေါက်သယ် အယူပ်မူရယ် ‘မိတ်ဆွေ၊ နာန်ငါမီပ်တူနားကာ့ ဖိုက်ခေါက်ဆဟာလည် ထုတ်သောကဲ့ အိနာပ်’ ငေါကဲ့အယ် မညယ် ငေါရင်နာန်ကားသယ်။ တီတ်ဆာကလန် ဟန်ဆောင်နောကားဟီမ်နာပ်၊ နီမ်ငါ မီပ်တူနားကာ့ ဖောမ်းတူနေကာ့ ဖိုက်ခေါက်သယ် အရာမ်ဆုံး လာဖိတ်အာမ်နိတ်။ အင်းညယ်မားလည် နာန်ငါ မိတ်ဆွေကာ့ မီပ်တူနားကာ့ ဖိုက်ခေါက်ဆဟာလည် လာပူကဲ့အယ် အီရင်ဟပ်ကား ထာမာ့” ငေါကဲ့အယ် မိန့်နောမာ့။ 43“ကလန်ငါကာ့ တွန်ငေါ် အကလန်ငါကာ့ ရှီစ်ရှီလည် အရှီရင်ကယ်ညယ် အကလန်ငါကာ့ တွန်ငေါ် ကလန်ငါကာ့ ရှီစ်ရှီလည် ရှီရင်ဟပ်ကားယို။ 44ရှီစ်ရှီလည် ယူကဲ့အယ် ဖောမ်းတွန်အကြောင်းနယ် ငေါရင်နာ့။ မဟာအောမ်ကယ်လိုးငေါနော စူပ်ခါးတွန်ပါအာအယ် ဆငြီမ်းရှီလည် ကူမ်ကဲ့အလူရင်ကယ်ညယ် ချုံပုတ်ပါအာအယ်ရား စပျစ်ရှီလည် ကူမ်ကဲ့လူရင်နိုး။ 45အင်းမာတိုင်းမန်း စိတ်ကလန်ငါကာ့ တီတ်ဆာကော ဟီမ်နာပ်ကာ့စိတ်နား ကလန်ငါကာဖူမ်ဟာ ငါကယ်မာ့ ကလန်ငါကာဖူမ်နယ်ဟာ အောမ်ဟာမာ့။ ဟီမ်ငါစိတ်နှလုံးနားအယ် ကလန်ငါကာ့အရာလည်ဟာ ထုတ်ဖော်လော်ဟာမာ့။ အကလန်ငါကာ့ စိတ်ငါကားကာ့ တီတ်ဆာကော ဟီမ်နာပ်ကာ့စိတ်နား အကလန်ငါဖူမ်ဟာ ငါကယ်မာ့ အကလန်ငါဖူမ်နယ်ဟာ အောမ်ဟာမာ့။ ဟီမ်နာပ် သပေါက်ကားဖူမ်ငေါ ဟီမ်နာပ်ကာ့ စိတ်နေသဘောထားလည် ပြလောမာ့။” 46အင်းမာနောက်သယ် ကိုယ်တော်ကော “နီမ်ငေါ ငါသပေါက်ကားကာလည် အသပ်ရယ် မဟာအောမ်ကယ် ငါလည် ‘အရှင်၊’ ‘အရှင်၊’ငေါကဲ့အယ် ကော်ဟီးထော်ကာသယ်။ 47ငါပါအာ လီကဲ့အယ် ငါကာတရားတော်ဖူမ်နယ် သပ်ကဲ့အယ် လိုက်နာလောကားကာ့ တီတ်ဆာကော မဟာနောက် တူလောမာ့ ငေါကားလည် ငါဆောမ်းဟပ်နာ့ပ်။ 48အင်းမာဟီမ်ငေါ ကာလည် ဆူစ်ကွန်းနယ် ထူစီးမားလည် သလောင်ဆီခံနောကား ကာစုတ်အား အုပ်မြစ်ချလောစီးမားလည် ကျဥ်းစာကားကာ့ တီတ်ဆာနောက်တူလောမာ့။ ဝေးတုန်းကဲ့အယ် ဝေးရောက်လက်ကား ခံနောထော်ဝမ်နော် အင်းမာကျဥ်းငေါ ကလန်မယ် စာပေးကားသယ်မာ့ ဆန်နောကားကာ့ မိုင်ကာ့အပေါ်ရယ် ကြံ့ကြံ့ခံနောရင်နာ့။ 49အင်းညယ်ငေါဝမ်ရီ ငါကာတရားတော်ဖူမ်နယ် သပ်စီးကဲ့အယ် အလိုက်နာလော်ကာကာ့ တီတ်ဆာဖူမ်ငေါ အုပ်မြစ် အချလောရယ် ကာစုတ်အားကျဥ်းစာကားနောက် တူလောမာ့။ ဝေးတုန်းကဲ့အယ် ဝေးရောက်လက်ကား ခံနောထော်ဝမ်နော် အင်းမာကျဥ်းငေါ ပြိုလောလက်ကဲ့အယ် လုံးဝရယ် ပျက်စီးလောဟူမ်မာန်ကား” ငေါကဲ့အယ် မိန့်နီမာ့။
Currently Selected:
Luke 6: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
