YouVersion Logo
Search Icon

Luke 12

12
1အင်းမာချိန်ငါ နံတင်းငါးကာ တီတ်ဆာပရိသတ်ဖူမ်ငေါ် စုလောဟီးကဲ့အယ် ဟော်ဝါနောက်ဟော်ဝါ ကောင်ကလယ်ကယ်အယ် လင်းဟပ်စာပ်အာမ်ကွန်းနယ် လင်းဟီးမာ့။ ကိုယ်တော်ကော တပည့်လာပ်သယ် ပထမဆုံးမိန့်နောကားကော “ဖာရိရှဲလာပ်ကာ့ တဆေးaညယ် တီတ်ဆာကလန် ဟန်ဆောင်နောကားလည် ‌လေးအောမ်ကဲ့အယ် ရှောင်နောဟီးလိတ်။ 2ပီးကူစ်ပေကယ်အယ် လူကားအရာငေါကဲ့အယ် အပို။ အင်းမာဖူမ်ငေါ တစ်ချိန်ချိန်ငါ ပေါ်လီထော်ပ်ကားကမာမ်း ထာမာ့။ 3အင်းသယ် နီမ် နာန်ကြည်အချိန်နယ် သပေါက်ကားဖူမ်နယ် နိတ်ခူ အချိန်နယ် တီတ်ဆာဖူမ်အားလုံး မီမ်းဟော်ဟိကာ။ ကဖာန်အော်ပ်ပီပ်သော ပေးကားကာ အခန်းနား ဆီရှင်းရှင်းဟာ သပေါက်ကားဖူမ်ငေါ ကျဥ်းခေါင်မိုးစုတ်အား တီတ်ဆာဖူမ်အားလုံး သာပ်မူကွန်းနယ် ရမ်းကဲ့သပေါက်ကားဖူမ် ထာရီပ်ကား” ငေါကဲ့အယ် မိန့်နောမာ့။ 4အင်းမာနောက်သယ် ကိုယ်တော်ကော “ငါကာ မိတ်ဆွေဖူမ်၊ နီမ်နယ် ငါငေါကာပ်ကာကော် နီမ်ငေါ တီတ်ဆာလာပ်သယ် ကစာပ်တီမ် လိုလော်ဝို။ မဟာအောမ်ကယ်လိုးငေါနော ဟီမ်နာပ်ကော နီမ်ငါ ခန္ဓာကိုယ်လည် ကတ်ရှိကာပန်းနယ် အခြားမဟာဟာမ်း အောမ်ရင်နိုး။ 5အင်းညယ်ငေါဝမ်ရီ နီမ် ကစာပ်ထော်ပ်ကားဟီမ်ငေါ ဘုရားရှင်တစ်ပါးလည်ဟာထာမာ့။ ဘုရားရှင်ငေါ် နီမ်ငါ အသက်သယ် လာစာမ်းဟာအဟီပ်ရယ် ငရဲပါအာရီ ဆာပ်ရင်ငါးကာ့ အာဏာငါကားကာ့ဟီမ်ထာမာ့။ အင်းသယ် ဘုရားရှင်နယ်ဟာ ကစာပ်ချီလိတ်။ 6အူစီစ်ဆာနူစ်နူ ဟာမာလည် အဿရိဒင်္ဂါးbကယ်ပါတ်နောက် ငဟေကာယိုလေး။ အင်းညယ်ငေါဝမ်ရီ ဘုရားရှင်ငေါ် အူစီစ်ဆာ နူဝါဟာလည်ဟာမ်း တန်ဖိုးပေးမာ့။ 7နာန်ငါ ဟလာမ်းဟူပ်ပါအာကာ့ ဟောမနိတ်သားငါမာ ငေါကားကာလည်ရား ဘုရားရှင် မီမ်းဟော်မာ့။ အင်းသယ် ကစာပ်ချီရာပ်။ နီမ်ငေါ အူစီစ်ဆာနူစ်နူဖူမ်ထက်သယ် အဖိုးထိုက်သောဟီးမာ့” ငေါကဲ့အယ် မိန့်နောမာ့။ 8အင်းမာနောက်သယ် ကိုယ်တော်ကော “နီမ်နယ် ငါငေါနာပ်၊ ငါကာ တပည့်တော်အဖြစ် တီတ်ဆာလာပ်ကာ့မန်းနား ဝန်ခံနောကားဟီမ်နာပ်သယ် တီတ်ဆာကာ့ဆာကော ဘုရားရှင်နောက် ဟမန်းနာပ်ကာ့ မန်းနား အင်းမာဟီမ်နာပ်ကော ငါကာ့ တပည့်ထာမာ့ ငေါကားလည် ဝန်ခံနောပ်ကာ။ 9အင်းညယ်ငေါဝမ်ရီ ငါလည် တီတ်ဆာလာပ်ကာ့မန်းနား ညာမ်းပယ်လော်ကာဟီမ်နာပ်ကော ဘုရားရှင်နောက် ဟမန်းနာပ်ကာ မန်းနား ငါညာမ်းပယ်လော်ကာ ခံနောထော်ပ်ကား။ 10တီတ်ဆာကာ့ဆာလည် ပြစ်မှားလောကဲ့အယ် သပေါက်ကားဟီမ်ငေါ အပြစ်ခွင့်လွှတ်သောကား ခံနောထော်ပ်ကားဟာမ်းငေါရီး ဉာဏ်အလင်းတော်လည် ပြစ်မှားလောဝမ်းနော အပြစ်ခွင့်လွှတ်သောကား ခံနောထော်ပ်ကား ဟီပ်ယို။ 11နီမ်နယ် ဓမ္မာရုံဖူမ်၊ အကြီးအကဲဖူမ်နောက် အုပ်ချုပ်သောကားဟီမ်နာပ်ကာ့ မန်းနား စီရင်နောတီမ် ကော်ကားခံနောထော်ဝမ်နော် ကိုယ်ကာနောက်ကို ကာကွယ်လောတီမ် မညယ်သပေါက်ထာမ်းထော်ပ်ကား ငေါကားကာလည် စိုးရိမ်နော်ဟီရာ့ပ်။ 12မဟာအောမ်ကယ်လိုးငေါနော အင်းမာအချိန် နာရီလည် နီမ် မညယ်ငေါထော်ပ်ကား ငေါကားလည် ဉာဏ်အလင်းတော်ကော် ဆောမ်နောကဲ့အယ် အိကား” ငေါကဲ့အယ် မိန့်နောမာ့။ 13အင်းမာနောက်သယ် တီတ်ဆာပရိသတ်တုန်းပါအာမာ့ ဟော်ဝါကော “ဆရာ၊ အဝါကော အလေနန်း ချန်နောပေးရီကာကာ့ အမွေဖူမ်နယ် ခွဲဝေလော်ကယ်အယ် အီတီမ် ငါဆူကာ အန်းချန်နယ် မိန့်နောကဲ့အယ် အီစာန်းဆွမ်” ငေါကဲ့အယ် ကိုယ်တော်လည် လျှောက်တင်နော်မာ့။ 14အင်းမာချိန်နယ် ကိုယ်တော်ကော “မိတ်ဆွေ၊ ငါလည် တရားသူကြီးအဖြစ်ချာန်း ထာဂါက်ထာ၊ နာန်နောက် နာန်ငါအန်းချန်ငါ ကြာပ်ကြား အမွေခွဲလောကဲ့အယ် အီတီမ်အခွင့်အာဏာလည်ဟာမ်း ထာဂါက်ထာ ဟင်အီပေးကားသယ်” ငေါကဲ့အယ် ပြန်နောကဲ့ မိန့်နောဟာမ်းမာ့။ 15အင်းမာနောက်သယ် ကိုယ်တော်ကော တီတ်ဆာလာပ်သယ် “မဟာနန်းဟာမ်း လောဘကြီးလောဟီးရာပ်။ မဟာအောမ်ကယ်လိုးငေါနော နီမ်ငါဘဝတန်ဖိုးကော နီမ်ပိုင်နောကား ဥစ္စာပစ္စည်းဖူမ် ဆွာမ်းပါအာ မူတည်လောကား ဟီပ်ယို” ငေါကဲ့အယ် မိန့်နာန်မာ့။ 16အင်းမာနောက်သယ် ကိုယ်တော်ယေရှုကော တီတ်ဆာ ပရိသတ်ဖူမ်နယ် ပုံဥပမာကြအာနောက် မိန့်နောကားကော “တစ်ခါလည် သူဌေးဟော်ဝါကာ့ လက်ပါးပါအာ ရှီစ်ရှီပရှီပူကား တအားကလန် တင်ကယ်မာ့ 17ဟီမ်ငေါ ‘ငါကာ့ ရှီစ်ရှီပရှီဖူမ်နယ် သိုလှောင်နောပေးတီမ် နေရာအပေါ်ကယ်မာ့ မညယ်အောမ်ထော်ပ်ကားသယ်’ ငေါကဲ့အယ် တွေးလောမာ။ 18အင်းမာနောက်သယ် ဟီမ်ငေါ ‘ငါမညယ် အောမ်ထော်ပ်ကား ငေါကားလည် မီမ်းဟော်ဝါပ်။ ငါကာ့ ကတောမ်းဖူမ်နယ် လာဖြိုတ်သောကဲ့အယ် ပိုလောကဲ့ဟူပ်တုန်းတင်းငါးကာ့ ကတောမ်းနယ် စာကဲ့အယ် ငါကာရှီစ်ရှီပရှီဖူမ်နောက် အခြားကလန်ငါကာ့အရာဖူမ်နယ် အင်းမာကတောမ်းနား သိမ်းနောပေ့ကာ။ 19အင်းညယ်ငေါက်သော် ငါပါအာ နောက်ထပ်နှစ်ပေါင်းများစွာ ထုတ်ကွန်းနယ် လုံလောက်သောကားကာ့ ကလန်ငါအရာဖူမ် ငါဝါပ်သယ်မာ့ ရာ့အယ် စားလောကဲ့အယ် ငါကော ရောက်အာမ်အူဝါမ်၊ အနားယူလာမ်ညယ် ပျော်ပျော်ရယ် လင်းကိုက်ပန်း’ ငေါကဲ့အယ် တွေးလောမာ့။ 20အင်းညယ်ငေါဝမ်ရီ ဘုရားရှင်ငေါ် အင်းမာဟီမ်နယ် ‘နာန်ငေါ မိုက်မဲလောကား တီတ်ဆာ၊ ယေနာန်ကြည်ဟာ နာန်ရှီးထော်ပ်ကား။ နာန်စုလောပေးကား အရာမှန်သမျှဖူမ်ငေါ် တခြားတီတ်ဆာပါအာ ထုတ်အာထော်ပ်ကား’ ငေါကဲ့အယ် မိန့်နောမာ့။ 21အင်းမာနောက်သယ် ကိုယ်တော်ကော အင်းကာကော ကိုယ်နန်းဟာ ပစ္စည်းဥစ္စာဖူမ် စုဆောင်းနောပေးကဲ့အယ် ဘုရားရှင်နယ် အမှုတော်ဆောင်နောတီမ် ကိုယ်ကာ ပစ္စည်းဥစ္စာလည် အသုံးနောရင်ငါ တီတ်ဆာလာပ် ကြုံနောထော်ပ်ကားကာ အရာဖူမ်ထာမာ့” ငေါကဲ့အယ် ပုံဥပမာလည် လာတော့ပ်လာမ်မာ့။ 22အင်းမာနောက်သယ် ကိုယ်တော်ယေရှုကော ဟီမ်ငါတပည့်လာပ်သယ် “အင်းသယ်နီမ်နယ် ငါငေါကာပ်ကာကော်၊ နီမ် အသက်ဆိုင်းတီမ် မဟာလည် ရောက်ထော်ပ်ကား၊ မဟာလည် ဖူမ်ထော်ပ်ကားဖူမ်နယ် ပူပင်နောဟီးရာ့။ 23မဟာအောမ်ကယ်လိုးငေါနော နီမ်ငါအသက်ကော အစာထက်သယ် အရေးကြီးလောဟန်ကယ်ညယ် နီမ်ငါခန္ဓာကိုယ်ရီး အဝတ်ထက်သယ် အရေးကြီးလောဟန်မာ့။ 24ဪဟား နူစ်နူလာပ်သယ် ယူဟီးလိတ်။ ဟီမ်နာပ်ကော စေါက်ရီး စေါက်ချီယို၊ အလှပ်ရယ် လင်းငါးပြာန်နယ် ရှီစ်ရှီပရှီဖူမ်နယ် သိုလှောင်နောတီမ် အခန်းနောက် ကတောမ်းရီး အပို။ အင်းမာညယ်ကိုဟာမ်း ဘုရားရှင်ငေါ် ဟီမ်နာပ်သယ် အီနောပ်ပေးမာ့။ ဘုရားရှင်ဟနန်း နီမ်ငေါ နူစ်နူဖူမ်ထက်သယ် ပိုလောကဲ့အယ် တန်ဖိုးကြီးလောမာ့။ 25စိုးရိမ်ပူပန်နောကဲ့အယ် လင်းငါးကော နီမ်ငါ အသက်သယ် တစ်နာရီဟာမ်း ပိုလောကဲ့အယ် စုတ်စီမ်းငိုး။ 26နီမ်ငေါ သေးငယ်လော်ကာကာ့ အမှုကိစ္စလည်ဟာမ် အတတ်ရင်ဟီရန်နော် အခြားအမှုကိစ္စဖူမ်နယ် မဟာအောမ်ကယ် စိုးရိမ်နော်ဟီကာသယ်။ 27ပေါက်ခါငါကားကာ့ ပါပါးဖူမ်နယ်ဟာ ယူဟီးလိတ်။ ဟီမ်နာပ်ကော အလုပ်ရီးအောမ်မို၊ ဟန်ဆူန်ရီး ဆူမ်းဟီးယိုး။ အင်းညယ်ငေါဝမ်ရီ နီမ်နယ် ငါငေါကာပ်ကာကော် တအားဆွာမ်းတင်းငါးကာ့ ဘုရင်ကြီး ရှောလမုန်ငါ အဝတ်ဖူမ်ဟာမ် ပေါက်ခါကာ့ ပါပါးဖူမ်ညယ် ကလန်မို။ 28အို ယုံကြည်မှုနည်း လောကား ဟီမ်နာပ်၊ ဘုရားရှင်ငေါ် ယေမာပ်အာ ပါးကဲ့အယ် နောက်သယ်ကာ မာန်းရာပ်သယ် ဝမ်ပေါ့ဒ်လား သက်ဆာမ်ငါ ခံနောထော်ပ်ကားကာ့ လိပ်စာပ်တွန်ဖူမ်နယ်ဟာမ်း ကလန်ကွန်နယ် ဖန်ဆင်းနောကဲ့ အီပေးရာမ်းနော နီမ်လိုလောကား အဝတ်ဖူမ်နယ် ပိုလောကဲ့အယ် အိကားယိုလေး။ 29နီမ်ငေါ မဟာလည် ရောက်ခပ်ကား၊ မဟာလည် အူဟပ်ကား ငေါကဲ့အယ် စဉ်းစားလောကဲ့အယ် လင်းဟီးရာ့။ အင်းမာ့ဖူမ်ဟနန်း စိုးရိမ်နော်ဟီရာ့။ 30ဘုရားရှင်နယ် အမီမ်းဟော်ကာဟီမ်နာပ်နိက် အမြဲအင်းကာညယ် စိုးရိမ်နော်ဟီထော်မာ့။ အင်းညယ်ငေါဝမ်ရီ နီမ်ငါ အဝါဘုရားရှင်ငေါ် နီမ်လိုအပ်‌သောကားဖူမ်နယ် မီမ်းဟော်မာ့။ 31အင်းသယ် ဘုရားရှင်ငါ သာသနာတော်နန်း အာရုံစိုက်သောဟီးလိတ်။ အင်းညယ်မားလည် နီမ်လိုအပ်သောကားကာ အရာမှန်သမျှလည် ဘုရားရှင်ငေါ် အီဟပ်ကား” ငေါကဲ့အယ် မိန့်နောမာ့။ 32အင်းမာနောက်သယ် ကိုယ်တော်ယေရှုကော “သိုးသာမ်းဆဟာc၊ ကစာပ်ချီရာ့ မဟာအောမ်ကယ်လိုးငေါနော အဝါဘုရားရှင်ငေါ် နီမ်ဟနန်း ဟီမ်ငါ သာသနာတော်လည် ပျော်လောစာပ်ရယ် အိကား ထာမာ့။ 33ငငါကားကာ့ ဥစ္စာဖူမ်နယ် ငဟေကယ်အယ် အပေါ်ဟာကားကာ့ ဟီမ်နာပ်ခနန်း ဖူး လှူလောဟီးလိတ်။ အမူး(စ်)ရင် အကာမ်ဟာကားကာ့ အိတ်ဖူမ် အောမ်ကဲ့အယ် နီမ်ငါ ဥစ္စာရတနာဖူမ်နယ် သူခိုးဖူမ် အထုတ်ရင်၊ ကတောင်ဆဟာဖူမ် အဖျက်စီးလောရင်ငါကာ့ ရွှေမြို့တော်ဝါမာ့ ဘဏ္ဍာတိုက်ပါအာ သိမ်းဆည်းလောဟီးလိတ်။ 34မဟာအောမ်ကယ်လိုးငေါနော နီမ်ငါ စိတ်နှလုံးဖူမ်ရီ နီမ်ငါ ဥစ္စာရတနာ ငါကားကာ့ နေရားဟာ ထုတ်ချီးဟာကယ် ထာမာ့” ငေါကဲ့အယ် မိန့်နောမာ့။ 35ကိုယ်တော်ကော ဆက်သောကဲ့အယ် တပည့်တော်လာပ်သယ် “နီမ်ငေါ ဖောက်ကမ်dနယ် ကြင်ကွန်နယ် ဟော်ပ်ကဲ့အယ် မီးအိမ်နယ် သာပ်ကဲ့အယ် မင်္ဂလာဆောင်ပွဲပါအာအယ် သခင်လီဟာမ်းကာ အချိန်နယ် လေးကဲ့အယ် လင်းငါးကာ အစေခံညယ် အရာမ်သင့် လေးဟီးလိတ်။ 36အင်းညယ်မားလည် သခင် လီဟာမ်းကဲ့အယ် ကဖာန်နယ် ခေါက်သောရီပ်သော် ချက်ချင်းယုတ်ကဲ့အယ် အောက်ကဲ့အီရင်ဟပ်ကား ထာမာ့။ 37သခင်လီဟာမ်းငါး အချိန်နယ် သတိနောက် လေးကဲ့အယ် လင်းငါး အစေခံဖူမ်ငေါ ကံကလန်မာ့။ နီမ်နယ် ငါအမှန်ငေါထော်ဝမ်နော် သခင်ငေါ် ဟီမ်ကိုယ်တိုင် ဖောက်ကမ်နယ် ဟော်ပ်ကဲ့အယ် အင်းမာအစေခံဖူမ်နယ် စားပွဲပါအာ ထောင်းစီမ်းကဲ့အယ် ရောက်တီမ်အူတီမ်ဖူမ် အီနောပ်ခပ်ကာ။ 38သခင်ငေါ် ဇခေါင်ချိန်နယ်ဟာမ်း ထာဂါက်ထာ၊ စမီစ်အပူဟော်ပ်ကာအချိန်နယ် ဟာမ်းထာဂါက်ထာ လီဟာမ်းငါးအချိန်နယ် အရာမ်သင့်လေးကဲ့လင်းဟီးကားကာ အစေခံဖူမ်နယ် ယူပ်မူဝမ်းနော အင်းမာအစေခံနာပ်ကော ကံကလန်ဟီတင်ဟပ်ကာ ငေါကဲ့အယ် မိန့်နောမာ့။ 39ကိုယ်တော်ကော တပည့်တော်လာပ်သယ် နောက်သယ်ကာပ်ဝါ ပုံဥပမာကြအာနောက် မိန့်နောကားကော သူခိုးကော မဟာချိန်နယ် လိကားငေါကားလည် ကြိုလောကဲ့မီမ်းဟော်ဝမ်နော် ကျဥ်းရှိတ်ကော် သတိနောက် ထက်ကဲ့အယ် လင်းကယ်မာ့ သူခိုးကော ဟီမ်ငါကျဥ်းမား ဆာမ်ကဲ့အယ် မဟာလည်ဟာမ်း ကူစ်ကဲ့အယ် လုကားယို။ 40အင်းသယ် မဟာချိန်ဟာမ်း ထာဂါက်ထာ အရာမ်သင့်ထာကယ် လင်းဟီးလိတ်။ မဟာအောမ်ကယ်လိုးငေါနော တီတ်ဆာကာ့ဆာကော နီမ်အမသာပ်ပေကာ အချိန်နယ်ဟာ ပြန်နောကဲ့ ကြွဟေပ်ကား ထာမာ့” ငေါကဲ့အယ် မိန့်နောမာ့။ 41အင်းမာချိန်နယ် ပေတရုကော ကိုယ်တော်လည် “အရှင်၊ အင်းကာ ပုံဥပမာကော် အလေဆူလာပ်ခနန်းဟာ မိန့်နောကားနာန်၊ တီတ်ဆာတိုင်းဟနန် မိန့်နောကားနာန်” ငေါကဲ့အယ် လျှောက်တင်နာန်မာ့။ 42အင်းမာချိန်နယ် ကိုယ်တော်ယေရှုကော “ကျဉ်းရှိတ်သာပ်ခနန်း အချိန်မှန် ရောက်တီမ် ပြာန်နောကဲ့အီတီမ် သခင်ခန့်အပ်သောပေးကားကာ ဉာဏ်ပညာနောက် ပြည့်စုံနော်ကယ်အယ် သစ္စာငါကား အစေခံငေါ ဟင်သယ်။ 43သခင်လီဟာမ်းငါး အချိန်နယ် အလုပ်အောမ်ကဲ့လင်းငါးကာ့ အစေခံနယ် ယူပ်မူဝမ်းနော အင်းမာအစေခံငေါ ကံကလန်ဟပ်ကား။ 44နီမ်နယ် ငါငေါကားကော၊ သခင်ငေါ် အင်းမာအစေခံနယ် ဟီမ်ငါ ဥစ္စာပစ္စည်း ငါကားကာဖူမ်နယ်ရီး အပ်သောကဲ့အယ် လေးအောမ်စီမ်းကာ။ 45အင်းညယ်ငေါဝမ်ရီ အင်းမာအစေခံငေါ ‘ငါကာ့သခင် ထုတ်ထေပ်ကား ဟီပ်ခူအူမ်း’ ရယ် တွေးလောကဲ့အယ် အခြားအစေခံ ဟော်လောဝါဖူမ်၊ ယာပ်ရှီဖူမ်အားလုံးနယ် သမ်းကလည်ညာပ်ကယ်အယ် ရောက်အာမ်အူဝါမ် မူးယစ်သောကဲ့ လင်းမန်းနော။ 46အင်းမာအစေခံ အမသာပ်ပေကာကာ့ အချိန်နယ် သခင်ထုတ်ထေရာမ်နော် ဟီမ်နယ် အားကြီစ်ရယ် ပြစ်ဒဏ်နယ်အီကား ခံနောထော်ကယ်အယ် သစ္စာအပေါ်ကာဟီမ်နာပ်နောက် တူတူ လင်းစီမ်းကာ။ 47သခင်ငါ အလိုလည် မီမ်းဟော်စာပ်သယ် ပြင်ဆင်နောပေးကားအပေါ် အင်းညယ်အဟီပ်ရီ သခင်ငါ အလိုအတိုင်းရယ် အအောမ်ပေရယ် လင်းငါးကာ့ အစေခံငေါ အားကြီစ်ရယ် အပြစ်အီကား ခံနောထော်ပ်ကား။ 48အင်းညယ်ငေါဝမ်ရီ သခင်ငါ အလိုလည် အမီမ်းဟော်ရယ် အပြစ်အောမ်ပါတ်ကား အစေခံငေါ နည်းနည်းဟာ အပြစ်အီကား ခံနောထော်ပ်ကား။ ဆုကျေးဇူး နည်းကြီစ်ရယ် ခံစားလောထော်ကာ ဟီမ်ငေါ နည်းကြီစ်ရယ် အီဟာမ်းငါး ခံနောထော်ပ်ကား။ ပိုလောကဲ့အယ် ယုံကြည်အပ်နှံနော်ကာဖူမ်နယ် နည်းကြီစ်ရယ် လူပေးကားဟီမ်ငေါ နည်းကြီစ်ရယ်စိမ်ငါး ခံနောထော်ပ်ကား။” 49“ငါကော အင်းကာ့ လောကလည် ဝမ်(န)ဟူစီမ်းတီမ် လီကား ထာမာ့။ အင်းကာနေရား ဝမ်(န)ဟူစီးကား ထာတီမ်ဟာမ်း ငါအလိုငါမာ့။ 50အင်းညယ်ငေါဝမ်ရီ အမာပ်စာပ်ရယ် ငါကော ပြင်းထန်နော်ကာ ဒုက္ခဝေဒနာနောက် ရှီးကား ငေါကားကာ ဝေးငဟူပ်ကာမင်္ဂလာလည် ခံနောထော်ပ်ကား။ အင်းမာ့ဖူမ် အစီးကြီစ်ကာချိန်ထိ ငါကောဆက်သောကဲ့ စိတ်ဒုက္ခရောက်သောထော်ပ်ခူမ်း။ 51ငါကော အင်းကာ့လောကားလည် ငြီမ်းချမ်းရေး လာရီကား မသပ်ချီးကားလေး။ လုံးဝဟာမ်း ဟီပ်ယို။ ငါလီကားကော တီတ်ဆာလာပ်သယ် ခွဲခြားလောတီမ် ထာမာ့။ 52မဟာအောမ်ကယ်လိုးငေါနော ရာ့အယ် စားလောကဲ့အယ် တီတ်ဆာငါးယောက်ငါကား မိသားစုဖူမ်ပါအာ ကယ်ဟောကော တစ်ဖက်၊ ဆွန်းဟောကော တစ်ဖက် ဟော်ဝါနောက်ဟော်ဝါ အချန်းချန်း ဆန့်ကျင်နောဟိကာ။ 53အဝါနောက် ဆာ၊ အမေနောက် ရှိတ်၊ နီနောက်နန်း အချန်းချန်း ဆန့်ကျင်ဟိကာ” ငေါကဲ့အယ် မိန့်နောမာ့။ 54စီးရာပ်သော် ကိုယ်တော်ယေရှုကော တီတ်ဆာဖူမ်နယ် “နီမ်ငေါ အနောက်အရပ်လာ ထာမ်းတင်းငါးကာ့ ဟလာမ်းဟီပ်ဖူမ် ဟေရီကားလည် ယူပ်မူဝမ်းနော ဟလာမ်းဝေးကိုက်ပန်း ငေါကဲ့အယ် ချက်ချင်း သပေါက်ချီးဟာမာ့။ အင်းမာအတိုင်းရီး ထာရီဟာမာ့။ 55တောင်လေတိုက်သောရီပ်သော် ရာသီဥတု ကားနိုက်ပန်းငေါကဲ့အယ် နီမ်ငေါဟီးဟာမာ့။ နီမ်ငေါကားတိုင်းရီး ထာရီဟာမာ့။ 56တီတ်ဆာကလန် ဟန်ဆောင်နောကားဟီမ်နာပ်၊ နီမ်ငေါ ဟမောက်နောက် ကာလည် ယူကဲ့အယ် ရာသီဥတု ခန့်မှန်းနောဟီးဟာမာ့ငေါရီး ရာ လက်ရှိအချိန်ငါ ဖြစ်ပျက်သောကဲ့အယ် လင်းငါးကာ့ အမှုကိစ္စဖူမ်ငါ အဓိပ္ပာယ်လည် မဟာအောမ်ကယ် နားအလည်လော်ဟီရင်ငါသယ်။ 57မှန်ကန်နောကားအရာဖူမ်နယ် အောမ်တီမ် ကိုယ်နောက်ကိုယ် မဟာအောမ်ကယ် အဆုံးဖြတ်သောရင်ငါသယ်။ 58ဟော်ဝါဟော်ဝါကော နာန်နယ် တရားစွဲလောဝမ်းနော တရားရုံးအထုတ်ကြီစ် လမ်းမှား ဖြေရှင်းနောရင်ကွန်နယ် အောမ်နိတ်။ အင်းညယ်အဟီပ်ပန်နော် တရားသူကြီးကော နာန်နယ် ဒုစရိုက်အပြစ်ငါမာ့ ငေါကဲ့အယ် သတ်မှတ်သောစီးရာပ်သော် ထောင်မှူးပါအာ အပ်သောကဲ့အယ် နာန်နယ် ထောင်ငါး စာန်းငါမ်ကား။ 59နီမ်နယ် ငါ ငေါထော်ပ်ကားငေါက်သော် နာန်အီထော်ပ်ကား အကြွေးဖူမ်အကုန်လုံး အအီနိက်ဆီ အင်းမထောင်ငါးအယ် နာန်ပူဟာမ်းမုကားယို” ငေါကဲ့အယ် မိန့်နောမာ့။

Currently Selected:

Luke 12: ktpv-rv

Highlight

Share

Copy

None

Want to have your highlights saved across all your devices? Sign up or sign in