Luke 1
1
1လေးစားလောထော်ကာကာ့ သော်ဖိလု၊ အလေကာ့ ကြာပ်ကြား ဘုရားရှင်အောမ်မီကားဖူမ်နယ် 2အစားဦးမားအယ်ဟာမ် ကိုယ်တိုင်ယူပ်မူဟီးရီကာကာ့ ဘုရားရှင်ငါ နှုတ်ကပါတ်တော်လည် အမှုတော်ဆောင်နောကားတီတ်ဆာဖူမ်ငေါ အလေလည် ငေါဟီးရီကာအတိုင်း တီတ်ဆာဖူမ်ငေါ အလေပါအာ ရေးလောဟီးရီမာ့။ 3အင်းသယ်မာ့ အစားဦးမားအယ်ဟာမ် ထာရီကား အကြောင်းအရာဖူမ်အားလုံးနယ် အလေကော် ကလန်မယ် လေးအောမ်ကဲ့အယ် လေ့လာလော်စီမာလည် နီမ်ပါအာ အင်းကာညယ် အစီအစဉ်တကျရယ် ရေးလောဝမ်းနော ပိုင်နောမာ့ ငေါကဲ့အယ် ယူဆလောပါတ်နာ့။ 4အင်းညယ်မားလည် နီမ် ဆောမ်နီမူကားကာ အကြောင်းအရာဖူမ်အားလုံးငေါ မှန်နောမာ့ငေါကားအကြောင်းနယ် မီမ်းဟော်ဟိကာ ထာမာ့။ 5ယုဒပြည်လည် ဟေရုဒ်မင်းကြီး အုပ်ချုပ်သောကားကာ အချိန်နယ် ဇာခရိကော်ကားကာ ဂျူးပုရောဟိတ်ကော အဘိယရယ် ကော်ကားကာ ပုရောဟိတ်bကာ့ အဖွဲ့ဝင်ဟော်ဝါ ထာမာ့။ ဟီမ်ငါအိက် ဧလိရှဗက်ရီး အာရုန် ငေါကားကာ ပထမဆုံး အစ္စရေးလူမျိုးပုရောဟိတ် မျိုးရိုးပါအာအယ် ဆာပ်လီကားဟီမ် ထာမာ့။ 6ဇာခရိနောက် ဧလိရှဗက်ကော ဘုရားရှင်ငါ ပညတ်တော်ဖူမ်နယ် အမှားအပေါ်ရယ် လိုက်နာလော်ဟီကယ်မာ့ ဘုရားရှင်ငါ မန်းနားကော ဖြောင့်မတ်cသောကားကာ တီတ်ဆာဖူမ် ထာမာ့။ 7အင်းညယ်ငေါဝမ်ရီး ဟီမ်နာပ်ပါအာ ရှိတ်ဆာအပေါ်ဟီယို။ မဟာအောမ်ကယ်လိုးငေါနော ဧလိရှဗက်ကော ရှိတ်ဆာအဟဲရင်ညယ် လင်းကဲ့အယ် ဟီမ်နာပ်ကယ်ဟောစလုံးရီး အောက်ဆော်တင်းကဲ့အယ် လင်းဟူမ်မာန်ကယ်ထာမာ့။ 8ရာပ်အာလည် ဇာခရိကော ဘုရားရှင်ငါမန်းနား ပုရောဟိတ်တာဝန်နယ် အောမ်ကဲ့အယ် လင်းမာ့။ မဟာအောမ်ကယ်လိုးငေါနော ဟီမ်ငါအဖွဲ့ကော ဗိမာန်တော်နား ဘုရားရှင်ငါ အမှုတော်လည် အောမ်တီမ် အလှည့်ထုတ်အီကယ် ထာမာ့။ 9ဘုရားရှင်ငါ ဗိမာန်တော်နား အမွှေးနံ့သာဖူမ်နောက် သာပ်ကဲ့အယ် ပူဇော်လောတီမ် ပုရောဟိတ်သာပ်ကာ့ ဓလေ့ထုံးစံအတိုင်းရယ် မဲနောပ်ကယ်အယ် ရွေးချယ်လော်မာလည် ဇာခရိကော ရွေးချယ်လော်ကာ ခံနောထော်မာ့။ 10အင်းသယ်မာ့ ဇာခရိကော ဗိမာန်တော်နား အမွှေးနံ့သာဖူမ် သာပ်ကဲ့အယ် ပူဇော်လောကဲ့လင်းငါးကာ အချိန်နယ် တီတ်ဆာဖူမ်ငေါ ဗိမာန်တော်ဝါမ်းငါး ဆုစိမ်ကဲ့အယ် လင်းမာပ်ချီးမာ့။ 11အင်းမာနောက်သယ် ဘုရားရှင် သာပ်လီကားကာ ဟမန်းdငေါ ဇာခရိ အမွှေးနံ့သာဖူမ် သာပ်ကဲ့လင်းငါးကာ ပလ္လင်ငါလက်ယာဘက်လာ ဇာခရိလည် စာပ်ကဲ့အယ် လင်းစာပ်ရယ် ကိုယ်ထင်ပြလောကဲ့အယ် လင်းမီမာ့။ 12ဇာခရိကော ဟမန်းနယ် ယူပ်မူဝမ်စန်းနော ဟီမ်ငေါကစာပ်တင်ကယ်အယ် ဆန်နောကဲ့လင်းမာ့။ 13အင်းညယ်ငေါဝမ်ရီ ဟမန်းငေါဟီမ်နယ် “ကစာပ်အာ့ ဇာခရိ။ မဟာအောမ်ကယ်လိုးငေါနော နာန် ဆုစိမ်ငါးအသံနယ် ဘုရားရှင်ငေါ်သာပ်မူမာ့။ နာန်ငါအိက် ဧလိရှဗက်ကော နာန်နန်း ဆာဟော်ဝါ ဟဲကဲ့အိကား။ နာန်ငေါ ဟီမ်နယ် ယောဟန် ငေါကဲ့အယ် နံမယ်အီထော်ပ်ကား။ 14အင်းမာဆဟာ ဟဲရီကယ်မာ့ နီမ်ငေါ တအား ဆကောက်ချီကယ်ညယ် အခြားတီတ်ဆာလာပ်ရီး ဆကောက်ချီမုကား။ 15မဟာအောမ်ကယ်လိုးငေါနော ယောဟန်ငေါ် ဘုရားရှင်ငါမန်းနား ကြီးမြတ်သောကားကာဟီမ် ထာရီပ်ကား။ ဟီမ်ငေါ တိုက်မာဟာမ်း စပျစ်ဝိုင်နောက် အရက်သေစာဖူမ်နယ် အူညာပ်ခပ်ကားယို။ ဟီမ်အဟဲကြီစ်သယ်ဟာမ်း ဉာဏ်အလင်းတော်eကော် ဟီမ်နောက်တူတူ ငါကဲ့လင်းဟပ်ကာ။ 16ဟီမ်ငေါ နံတင်းငါးကာ အစ္စရေးလူမျိုးဖူမ်နယ် အပြစ်ဒုစရိုက်ပါအာအယ် နောင်တသံဝေဂ လူစီမ်းကဲ့အယ် ဟီမ်နာပ်ကာ အရှင်ထာကာကာ့ ဘုရားရှင်ငါဘက်လာ မန်းဟေစီမ်ကာ။ 17ယောဟန်ငေါ် ပရောဖက်fဧလိယညယ် အခွင့်အာဏာနောက် တန်ခိုးဖူမ် ငါကဲ့အယ် အရှင်ငါ ရှေ့တော်ပြေးgထာရီပ်ကား။ ဟီမ်ငေါ အော်ပ်ဝါလာပ်နောက် ရှိတ်ဆာလာပ်ကာ စိတ်နှလုံးဖူမ်နယ် ပြန်နောကဲ့အယ် သင့်မြတ်သောစီမ်းကဲ့အယ် အနာခံနောကား ဟီမ်နာပ်သယ်ရီး ဘုရားရှင်ငေါ် ဖြောင့်မတ်သောကားတီတ်ဆာလာပ်သယ် အီကားကာ အသိပညာလမ်းပါအာ လမ်းပြလောကဲ့အယ် အိကား။ စီးရာပ်သော် တီတ်ဆာလာပ်ကော အရှင်ကြွလီရာမ်နော် အရာမ်သင့် ထာကယ်အယ် လင်းဟိကာ” ငေါကဲ့အယ် သပေါက်မာ့။ 18အင်းမာနောက်သယ် ဇာခရိကော ဟမန်းနယ် “အင်းမာညယ် ထာရီပ်ကား ငေါကားကာလည် ငါဆူကော မညယ် မီမ်းဟော်ရင်ဟပ်ကားသယ်။ မဟာအောမ်ကယ်လိုးငေါနော ငါဆူနောက် ငါဆူကာအိက်ရောကော အောက်ဆော်တင်းဟူမ်ပါပ်သယ်မာ့” ငေါကဲ့အယ် ပြန်နောကဲ့အယ် သပေါက်ထာမ်းမာ့။ 19အင်းမာချိန်နယ် ဟမန်းညီး ဟီမ်နယ် “ငါကော ဘုရားရှင်ငါမန်းနား ခစားလောထော်ကာကာ့ ဂါဗြေလ ထာမာ့။ ပျော်လောမီးကားကာ အင်းကာသတင်းကလန်နယ် နာန်နယ်ဆောမ်းတီမ် ဘုရားရှင်ငေါ် ငါလည်သာပ်လီကား။ 20အင်းညယ်ငေါဝမ်ရီ ငါသပေါက်ကားလည် နာန်ယုံနိုသယ်မာ့ အင်းကာ အဖြစ်အပျက်ဖူမ် အထာဟော်ပ်ကာ့အချိန်ထိ နာန်ငေါ အသပေါက်ခါစောမ်ရယ် ဆွံ့အ လောကဲ့အယ် လင်းဟပ်ကာ။ မဟာအောမ်ကယ်လိုးငေါနော ငါသပေါက်ကားဖူမ်ငေါ အချိန်ထုတ်ပီပ်သော် ထာရီပ်ကား” ငေါကဲ့အယ် ငေါမာ့။ 21ဇာခရိနောက် ဟမန်းနာပ်ကော် ဗိမာန်တော်hနား သပေါက်ကဲ့လင်းငါး အချိန်နယ် ဗိမာန်တော်ဝါမ်းငါး ငါကားကာ တီတ်ဆာလာပ်ကော ဇာခရိလည် လေးကဲ့လင်းဟီးမာ့။ ဟီမ်နာပ်ကော ဗိမာန်တော်နား ဇာခရိမဟာအောမ်ကယ် မာပ်မာပ်ရယ် လင်းမာ့ငေါကားလည် အန်းနောကဲ့လင်းဟီးမာ့။ 22ဇာခရိ ဗိမာန်တော်နားအယ် ပူရီကားကာ့ အချိန်နယ် မဟာဟာမ်းအသပေါက်ခါရယ် လင်းကယ် ဗိမာန်တော်နား ငါကဲ့လင်းမားလည် ဇာခရိကော ထူးဆန်းနောကားကာ မဟာမဟာလည် ယူပ်မူရီမာ့ ငေါကဲ့အယ် တီတ်ဆာလာပ်ကော နားလည်လော်ဟီရာမ်မာ့။ မဟာအောမ်ကယ်လိုးငေါနော ဇာခရိကော ထော်သာနောက်ချာ အမှုအရာပြလောကဲ့အယ် လင်းမီကယ်အယ် ဆက်သောကဲ့အယ် အသပေါက်ရင်ညယ် လင်းကယ်မာ့ ထာမာ့။ 23အင်းမာနောက်သယ် ဇာခရိကော ဗိမာန်တော်နား ပုရောဟိတ်အမှုဖူမ်နယ် အောမ်စီးရာမ်စန်နော် ဟီမ်ငါကျဥ်းမာ လာမ်ဟာမ်းမာ့။ 24အချိန်မာပ်အာမ်စန်းနော ဇာခရိကာအိက် ဧလိရှဗက်ကော ပူစ်ကာမ်ရီကဲ့အယ် ဟီမ်ငေါ ငါးလ မာပ်အာမ်ကွန်းနယ်အထိ တီတ်ဆာလာပ်ကာ ကြာပ်ကြား လာမ်ညာပ်အို။ 25ဟီမ်ငေါ “အရှင်ငေါ် ငါနန်း ပူစ်ကာမ် ငါးကာလည် ခွင့်ပြုလောကဲ့အယ် အီီရပ်။ ဟီမ်ငါ အလိုတော်နောက် တီတ်ဆာလာပ်ကာ အထင်သေးလောပါအာအယ် လော့ပ်တော်စီမ်ပါပ့်”ငေါကဲအယ် ဟီမ်နောက်ဟီမ် သပေါက်မာ့။ 26ဧလိရှဗက် ပူစ်ကာမ်ငါးကာ ခြောက်လထုတ်အီကား အချိန်ငါ ဘုရားရှင်ငေါ် ဟမန်းဂါဗြေလလည် ဂါလိလဲပြည်ပါအာမာ့ နာဇရက်မြို့ဝါ သာပ်လီကဲ့အယ် 27မာရိရယ် ကော်ကားကာ့ မာန်ညာ ဟော်ဝါပါအာ လာမ်ကဲ့အယ် သတင်းစကား ငေါရီစီမ်မာ့။ မာရိကော ဘုရင်ဒါဝိဒ် မျိုးရိုးပါအာအယ် ဆာပ်လီကားကာ ယောသပ်နောက် နာမ်ဖာပ် သာမ်ပေးကားဟီမ်ထာမာ့။ 28ဟမန်းငေါ မာရိလည် နှုတ်ဆက်သောကဲ့အယ် “ဘုရားရှင်ငေါ် နာန်နန်း မီပ်မန်းအီကယ်မာ့ နာန်နောက်တူတူ ငါကဲ့အယ် လင်းပီပ်” ငေါကဲ့အယ်ဆောမ်းနာ့။ 29အင်းညယ်ငေါဝမ်ညီ မာရိကော အင်းမာလည် သပ်မူဝမ်စန်းနော စိတ်ရှုပ်သောတင်းကဲ့အယ် ဟမန်းသပေါက်ကားဖူမ်ငေါ မဟာလည်ငေါကာပ်ကာ ငေါကားကာလည် တွေးလောကဲ့လင်းမာ့။ 30စီးရာပ်သော် ဟမန်းငေါဟီမ်နယ် “ကစာပ်အာ့ မာရိ၊ ဘုရားရှင်ငေါ် နာန်နယ် မီပ်မန်းအီရီရာမ်း။ 31နာန်ငေါပူစ်ကာမ်ကဲ့အယ် ဆာဟော်ဝါ ဟဲထော်ပ်ကား။ အင်းမာ ဆာကာ့နံမယ်လည် ယေရှုငေါကဲ့အယ် အီထော်ပ်ကား။ 32ဟီမ်ငေါ ကြီးမြတ်သောကားကာဟီမ် ထာရီကဲ့အယ် တန်ခိုးကြီးလောဟန်ဆုံး ဘုရားရှင်ငါ ဆာငေါကဲ့အယ် ကော်ကား ခံနောထော်ပ်ကား။ ဘုရားရှင်ထာကာကာ့ အရှင်ငေါ် ဟီမ်နယ်ဟီမ်ငါ ဘိုးဘေးဘုရင်ဒါဝိဒ်ညယ် ဟီမ်ငါလူမျိုးလာပ်သယ် အုပ်ချုပ်သောရင်ငါကာ အခွင့်နယ်အိကား။ 33ဟီမ်ငေါ ယာကုပ်ကာ မျိုးနွယ်ထာကာကာ့ အစ္စရေးလူမျိုးဖူမ်နယ် ထာဝရအုပ်စိုးလောကဲ့အယ် ဟီမ်ငါ အုပ်ချုပ်မှုကော တိုက်မာဟာမ်း ပျက်သုန်းနာန်ကားဟီပ်ယို” ငေါကဲ့အယ် သပေါက်မာ့။ 34အင်းမာအချိန်ငါ မာရိကော “ငါဆူကော မာန်ညာ ဟော်ဝါထာကယ်မာ့ အင်းမာညယ်ကော မညယ်ထာရင်နာန်ကားသယ်” ငေါကဲ့အယ် ဟမန်းနယ် သပေါက်ထာမ်းမာ့။ 35ဟမန်းရီး “ဉာဏ်အလင်းတော်ကော် နာန်ပါအာ ဆာပ်လီကဲ့အယ် တန်ခိုးကြီးလောဟန်ဆုံး ဘုရားရှင်ငါ တန်ခိုးတော်ရီ နာန်ပါအာ ငါကဲ့အယ် လင်းဟပ်ကာ။ အင်းသယ် နာန်ဟဲရီပ်ကား ဆဟာကော ဘုရားရှင်ငါ မြင့်မြတ်သောကား ဆာငေါကဲ့အယ် ကော်ကား ခံနောထော်ပ်ကား။ 36နာန်ငါဆွေမျိုး ဧလိရှဗက်ကော အောက်ဆော်ဝါပ်သယ်မာ့ တီတ်ဆာလာပ်ကော ဆာလူရင်နိုး ငေါကဲ့အယ် မသာပ်ချီးရား ရာပူစ်ကာမ်ကဲ့လင်းငါး ခြောက်လငါဝမ်း။ 37မဟာအောမ်ကယ်လိုးငေါနော ဘုရားရှင် အအောမ်ရင်ငါး မဟာဟာမ်း အပို” ငေါကဲ့အယ် ငေါမာ့။ 38အင်းမာချိန်နယ်မာရိကော “ငါဆူကော ဘုရားရှင်ငါအစေခံဟော်ဝါ ထာမာ့။ ငါဆူကော ဘုရားရှင်ငါအလိုတော်အတိုင်း ထာစီမ်နိက်”ငေါကဲ့အယ် ငေါမာ့ အင်းမာနောက်သယ် ဟမန်းရီး မာရိပါအာအယ် လာမ်ဟာမ်းမာ့။ 39အမာပ်ကြီစ်သယ် မာရိကော အရာမ်သင့်ပြာန်နောကဲ့အယ် ဇာခရိ လင်းငါးကာ့ ယုဒပြည်ပါအာမာ့ တောင်ပေါ်မြို့တစ်မြို့ပါအာ ကစက်ကစက်လာမ်မာ့။ 40အင်းမာနေရားထုတ်အာစန်းနော ဟီမ်ငေါ ဇာခရိကာကျဥ်းမား ဆာမ်ကဲ့အယ် ဇာခရိကာအိက်ထာကာကာ့ ဧလိရှဗက်သယ်နှုတ်ဆက်သောမာ့။ 41မာရိနှုတ်ဆက်သောကားကာ့လည် ဧလိရှဗက် သာပ်မူမာ့သာပ်မူချာန်း ဟီမ်ငါပူစ်နားကာ့ အယ်ဟာဆဟာကော မဟက်ကဲ့အယ် ဉာဏ်အလင်းတော်ကာ တန်ခိုးတော်ကော် ဧလိရှဗက်ပါအာ ငါရီမာ့။ 42မာရိလည် “နန်ငေါ အခြား ယာပ်ရှီလာပ်ကာထက် ပိုလောကဲ့အယ် ကံကလန်ကယ်အယ် နာန်ဟဲရီပ်ကားကာ ဆာရီး ကံကလန်တင်မာ့။ 43အင်းညယ်ငေါဝမ်ရီ အရှင်ငါ အမေကော ငါဆူပါအာ ထုတ်အီကားအခွင့်ကလန်နယ် မဟာအောမ်ကယ် ငါဆူ ခံစားလောမူကာသယ်။ 44နာန် နှုတ်ဆက်သောကားအသံနယ် သာပ်မူမာ့သာပ်မူချာန်း ငါဆူကာ ပူစ်နားကာ့ အယ်ဟာဆဟာကော ပျော်လောတင်းကဲ့အယ် မဟက်နာ့။ 45ဘုရားရှင်ပါအာကာ့ သတင်းစကားကော အမှန်ထာရီပ်ကား ငေါကဲ့အယ် နာန်ယုံကြည်လောကယ်မာ့ နာန်ငေါ ကံကလန်တင်နာ့” ငေါကဲ့အယ် ကလူပ်ကဲ့သပေါက်မာ့။ 46အင်းမာနောက်သယ် မာရိရီး “ငါဆူကော ဘုရားရှင်ငါ ဂုဏ်ကျေးဇူးလည် ချီးမွမ်းနောမာ့ ဆွမ်။ 47ငါဆူကာ စိတ်ဝိညာဉ်ငေါ် ကယ်တင်ရှင်ထာကာကာ့ ဘုရားရှင်ပါအာ အားလူကဲ့အယ် ပျော်လောသမ်မာ့ ဆွမ်။ 48မဟာအောမ်ကယ်လိုးငေါနော ငါဆူကော ဘုရားရှင်ငါ နိမ့်ကျလောကားကာ့ အစေခံ ထာမာငေါရီး ဘုရားရှင်ငေါ် ငါဆူလည် မပ်ကဲ့အယ် လင်းငါးအပို။ ရာ့အချိန်အယ် စားလောကဲ့အယ် မျိုးဆက်တိုင်းပါအာမာ့ တီတ်ဆာဖူမ်ငေါ ငါဆူလည် ကံကလန်ငါဟီမ် ငေါကဲ့အယ် ငေါဟိကာ။ 49မဟာအောမ်ကယ်လိုးငေါနော တန်ခိုးကြီးလောကားကာ ဘုရားရှင်ငေါ် ငါဆူနန်း ကလန်ငါကာ အရာဖူမ်နယ်ထုတ်အီစီမ်းမာ့။ ဘုရားရှင်ငါ နာမတော်ကော် မြင့်မြတ်iသောမာ့။ 50ခေတ်အဆက်ဆက်လား ဘုရားရှင်ငေါ် ဟီမ်နယ် ရိုသေလောကားဟီမ်နာပ်သယ် အမြဲတမ်းရယ် စာန်ကယ်အယ် ကြင်နာလောကဲ့အီမာ့။ 51ဘုရားရှင်ငေါ် မာန်မာနထောင်လွှားလောကားကာ တီတ်ဆာလာပ်သယ် ဟီမ်ငါတန်ခိုးနောက်
နှိမ့်ချလောဟာကွန်နယ် အောမ်ကဲ့အယ်အီမာ့။ 52ဘုရားရှင်ငေါ် အာဏာနောက် အုပ်စိုးလောကားကာ့ တီတ်ဆာလာပ်သယ် ဟီမ်နာပ်ကာ့ ပလ္လင်စုတ်အားအယ် တူန်းလက်ကဲ့အယ်
နိမ့်ချလောဟာကာကာ့ တီတ်ဆာလာပ်သယ်ကော အရေးပါလောကားကာ့ တီတ်ဆာဖူမ် ထာရီစီမ်းကာ။ 53ဘုရားရှင်ငေါ် ရောက်ခေါပ်ကဲ့ငတ်သောကဲ့အယ် လင်းငါးကာ တီတ်ဆာလာပ်သယ် ကလန်ငါကာဖူမ်နယ် အီမာ့ငေါရီး
ဆွာမ်းငါးကာ့ တီတ်ဆာလာပ်သယ်ကော မဟာဟာမ်း အအီရယ် သာပ်လာမ်မာ့။ 5454-55 ဘုရားရှင်ငေါ် အလေကာဘိုးဘေးထာကာကာ့ အာဗြဟံနောက် ဟီမ်ငါမျိုးရိုစဉ်ဆက်ဖူမ်နယ် ထာဝရရယ် မဟာဂရုဏာ ပေးကဲ့အိကား ငေါကဲ့အယ် ကတိတော် အီပေးရီမာ့။ ရာအချိန်နယ် ဘုရားရှင်ငေါ် ဟီမ်ငါ ကတိတော်လည် တွေးလူကဲ့လင်းမာ့။ အင်းသယ်မာ့ ဘုရားရှင်ငေါ် ဟီမ်ငါအစေခံ ထာကာကာ့ အစ္စရေးလူမျိုးဖူမ်နယ် ကူညီမားစားလောရီပ်” ငေါကဲ့အယ် ဘုရားရှင်နယ် ချီးမွမ်းနောမာ့။ 55ဘုရားရှင်ငေါ် ငါဆူကာ ဘိုးဘေးဖူမ်ထာကာကာ့ အာဗြဟံငါ မျိုးရိုးစဥ်ဆက် ဖူမ်နယ် ကတိအီပေးကယ်ညယ် အစဥ်ထာဝရ စောင့်ရှောက်သောမာ့ “ငေါကဲ့အယ် ဘုရားရှင်ငါ ဂုဏ်တော်လည် ချီးမွမ်းနောမာ့။ 56အင်းမာနောက်သယ် မာရိကော ဧလိရှဗက်နောက် ဆွန်းဆသားတူတူလင်းမောက်စီးကဲ့အယ် ဟီမ်ငါကျဥ်းမာ လာမ်ဟာမ်းမာ့။ 57စီးရာပ်သော် ဧလိရှဗက်ကောဆာဟဲတီမ် အချိန်ထုတ်အီစန်းနော ဟီမ်ငေါဆာဟော်လောဝါ ဟော်ဝါလည်ဟဲရီမာ့။ 58ဧလိရှဗက်ကာ ကျဥ်းဖာန်ကျဥ်းဟက်ဖူမ်နောက် ဆွေမျိုးဖူမ်ငေါ် ဧလိရှဗက်ပါအာ ဘုရားရှင်ငေါ် မဟာဂရုဏာကြီးမားလောမာ့ ငေါကားကာလည် မီမ်းဟော်ဟီကယ်မာ့ ဟီမ်နောက်တူတူ ပျော်လောဟီးမူမာ့။ 59အယ်ဟာ ဟဲစီးကဲ့အယ် ရှစ်ရာပ်သား မာန်းရာပ်သယ် အရေဖျားလှီးမင်္ဂလာj အောမ်တီမ် တီတ်ဆာလာပ် ထုတ်ချီးရီမာလည်ဟီမ်နာပ်ကော အယ်ဟာဆဟာကာ နံမယ်လည် ဟီမ်ငါအဝါကာ နံမယ်အတိုင်းညယ် ဇာခရိငေါကဲ့အယ် နံမယ်အီဟီးကာပ်မာ့။ 60အင်းညယ်ငေါဝမ်ညီ အမေထာကာကာ့ဟီမ်ငေါ “အင်းညယ်ဟီပ်ယို အင်းကာ ဆဟာကာနံမယ်လည် ယောဟန် ငေါကဲ့အယ် ကော်ဟီးထော်ပ်ကား” ရယ် သပေါက်မာ့။ 61အင်းမာဟီမ်နာပ်ကော ဟီမ်နယ် “နာန်ငါမျိုးရိုးပါအာကော် အင်းမာညယ် နံမယ်အပို” ငေါကဲ့အယ် ငေါဟီးမာ့။ 62အင်းသယ် ဟီမ်နာပ်ကော ဆဟာကာ့အဝါထာကာ ဇာခရိလည် ထော်သာနောက် အမူအရာ အောမ်ကဲ့အယ် မညယ်နံမယ် အီကာပ်ကားသယ် ငေါကဲ့အယ် စီမ်ညူဟီးမာ့။ 63အင်းမာချိန်နယ် ဇာခရိကော ကျောက်သင်ပုန်းပါတ်အာလည် စိမ်ကဲ့အယ် ဟီမ်ငါ ဆာကာ့နံမယ်လည် ယောဟန်ထာမာ့ ငေါကဲ့အယ် ရေးလာမ်ကယ်မာ့ ယူပ်မူကာ တီတ်ဆာဖူမ်ငေါ အန်းနောကဲ့လင်းဟီးဟူမ်မာန်မာ့။ 64အင်းမာနောက်သယ် ဇာခရိကော ချက်ချင်း သပေါက်ထေရင်ကဲ့အယ် ဘုရားရှင်နယ် ချီးမွမ်းနောမာ့။ 65ကျဥ်းဖာန်ကျဥ်းဟက်သာပ်ကော် အင်းမာအဖြစ်အပျက်ဖူမ်နယ် ယူပ်မူဝမ်စန်းနော ကစာပ်ကယ်အယ် လင်းဟီးရာမ်မာ့။ အင်းမာသတင်းရီး ယုဒပြည်တောင်ပေါ်ဒေသထုတ်ကွန်းနယ် ပျံ့နောတင်းမာန်မာ့။ 66အင်းမာသတင်းနယ် သာပ်မူကားကာ့ တီတ်ဆာဖူမ်ငေါ “အင်းကာဆဟာကော တုန်းပီပ်သော် မညယ်ကာ့တီတ်ဆာ ထာရီပ်ကားသယ်” ငေါကဲ့အယ် ဟီမ်နာပ်ကာ စိတ်နှလုံးငါးဟာ သပေါက်ကဲ့လင်းဟီးမာ့။ မဟာအောမ်ကယ်လိုးငေါနော ဘုရားရှင်ငါ တန်ခိုးတော်ရီ ဆဟာနောက်တူတူ ငါကဲ့လင်းကယ် ထာမာ့။ 67အင်းမာနောက်သယ် ဉာဏ်အလင်းတော်ကော် ဇာခရိနောက်တူတူ ငါကဲ့အယ် ဘုရားရှင်ငါအစား သတင်းစကားလည် ဟောလောကားကော 68“အစ္စရေးလူမျိုးလာပ်ကာ့ အရှင်ထာကာကာ့ ဘုရားရှင်နယ် ချီးမွမ်းနောမာ့။ ဟီမ်ငေါ ဟီမ်ငါတီတ်ဆာလာပ်သယ် လော်ပ်သော်စီမ်တီမ် ကြွလီကာရာမ်။ 69ဘုရားရှင်ငေါ် ဟီမ်ငါအစေခံ ထာကာကာ့ ဘုရင်ဒါဝိဒ်ပါအာအယ် ဆာပ်လီကားကာ့ တန်ခိုးအာဏာ ကြီးမားလောကားကာ ကယ်တင်ရှင်နယ် အလေဆူအားလုံးဟနန် အီပေးရီပ်။ 70မယားမားအယ် ဘုရားရှင်ငေါ် မြင့်မြတ်သောကားကာ ပရောဖက်ဖူမ်နယ် မိန့်နီကယ်ညယ် 71အင်းကာ့ တန်ခိုးကြီးမားလောကားကာ ကယ်တင်ရှင်ငေါ အလေဆူလာပ်ကာ့ ရန်သူလာပ်နောက် အလေဆူလာပ်သယ် ယူနီကာကာ့ဟီမ်နာပ်ဖူမ်ငါ့ ထော်ဝါးအယ် ကယ်တင်နောပ်ကာ။ 72ဘုရားရှင်ငေါ် အလေဆူလာပ်ကာ ဘိုးဘေးလာပ်သယ် ဟီမ်ငါမဟာဂရုဏာမေတ္တာလည် ပြလော့ကာ ငေါကဲ့အယ်နောက် ဟီမ်အီပေးရီကာကာ့ မြင့်မြတ်သောကားကာ သဘောတူညီမှုလည်ရာ တွေးလူကဲ့အယ် လင်းဟပ်ကာ ငေါကဲ့အယ် မိန့်နီမာ့။ 73ဘုရားရှင်ငေါ် အလေကာ ဘိုးဘေးထာကာကာ့ အာဗြဟံlနယ် အီပေးရီကာ ကတိအတိုင်းညယ် 74အလေလည် ရန်သူလာပ်ကာ ထော်ဝါးအယ် ကယ်တင်နောကဲ့အယ် အလေရီ ကစာပ်တီမ်အပေါ်ရယ် ဘုရားရှင်ငါ အမှုတော်လည် အောမ်ရင်ဟပ်ကား ထာမာ့။ 75အင်းသယ် အလေရီ ဘုရားရှင်ငါမန်းနား ကျန်နောကား ဘဝလည် မြင့်မြတ်သောကား ဖြောင့်မတ်သောကားဖူမ်နောက် အသက်ဆိုင်းကနေ လင်းဟပ်ကာ” ငေါကဲ့အယ် ငေါမာ့။ 76စီးရာပ်သော် ဇာခရိကော ဟီမ်ငါဆဟာလည် “ငါကာဆာ၊ တန်ခိုးကြီးလောဟန်ဆုံး ဘုရားရှင်ငါ ပရောဖက်ရယ် ကော်ဟိကာထာကယ်အယ် အရှင်ငါမန်းနား လာမ်ဖာန်းကဲ့အယ် အရှင်ငါ လမ်းနယ် ကြိုလောကဲ့အယ် ပြင်ဆင်နောကဲ့အယ် အိကားကာဟီမ်ညီး ထာရီပ်ကား။ 77ဘုရားရှင်ငေါ် တီတ်ဆာလာပ်ကာ ဒုစရိုက်အပြစ်ဖူမ်နယ် ခွင့်လွှတ်သောကဲ့အယ် ကယ်တင်နောပ်ကာအခွင့်နယ်ရီအိကား ငေါကားလည် နာန်ငေါတီတ်ဆာလာပ်သယ်ရီး ဟောလောထော်ပ်ကား။ 78မဟာအောမ်ကယ်လိုးငေါနော အလေကာ့ ဘုရားရှင်ငါ မဟာဂရုဏာမေတ္တာတော်ကြောင့်နယ် ရွှေမြို့တော်mပါအာမာ့ မေရှိယကော အလေပါအာ လီကဲ့အယ် 79ထာမ်းပါအာ ထုတ်ကဲ့လင်းငါး တီတ်ဆာလာပ်နောက်
ရှီးကားနောက် ထံဟပ်ကား ဟီမ်နာပ်ခနန်း ကူညီလောကဲ့အယ် အိကား။
ဟီမ်ငေါ အလေလည် ငြီမ်းချမ်းနောကားကာ ဘဝပါအာ လမ်းပြလောကဲ့အယ် ဆာပ်ခပ်ကား” ငေါကဲ့အယ် ဆောမ်းမာ့။ 80ရာလည် ယောဟန်ငေါ် တုန်းညီကနေ ဉာဏ်ပညာနောက် ပြည့်စုံနော်ကာဟီမ် ထာရီမာ့။ ဘုရားရှင်ငေါ် ဟီမ်နယ် အစ္စရေးလူမျိုးလာပ်ကာ့မန်းနား အမှုတော်လည် စားလောကဲ့အယ် အောမ်စီမ်းကာပ်ကာအချိန် အထုတ်ကြီစ်သယ် တီတ်ဆာလာပ် အပေါ်ကာကာ့ ပေါက်ခါသာတုန်းငါး သမ်ရောက်ညာပ်ကဲ့လင်းမီမာ့။
Currently Selected:
Luke 1: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kanan Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
