Luke 23
23
1စီးမှါခ့်ခါ တရားလွှတ်တော်ဘေ စုသဘင်းသမီဆာတာတ်ကား ကိုယ်တော်ယေရှုတေ ရောမရှာန်းပလာန်ပိလတ်ပါ ကော်လာန်ပဲကြီးဘန်း 2"အဘင်းဆိတ်ကား တိုင်းသူပြေဆားတာတ်တေ ဟိန်ကောက်ဟိန် မေရှိယညယ်ကော်ဘင်း ရှာန်းပလာန်ဟော်ဝါထှာမှာညယ် ပက်သဘန်းငှေါဘန်းနာ ဧကရာဇ်ရှာန်းပလာန်တေ အခွန်အအီဒင် တားသနင်းဘင်းနာတေ အလေကတုံန်ရီမှာ" ညယ်ပိလတ်ရှာန်ပလာန်မန်းဘေ ကိုယ်တော်တေ စွပ်စွဲသကြီးမှာ။ 3အန်၌မှါခ့်ခါ ပိလတ်ရှာန်းပလာန်ကား ကိုယ်တော်ယေရှုတေ "နာန်ကား ဂျူးသမီဆာတာတ်ပင်း ရှာန်းပလာန်ချီလဲ" ညယ်စိန်ယူဘင်းအတွာတ် ကိုယ်တော်ကား "နာန်ငှေါဘင်းအတိုင်း ထှာမှာ" ညယ်ငှေါဟာန်းရာန်မှာ။ 4ပိလတ်ရှာန်းပလာန်ကား ဂျူးပုရောဟိတ်ဟလာန်းစာတ်တာတ်ယောက် သမီဆာတာတ်ပါလှည့်သောဘန်း "အဘင်းဆိတ်ပေ အပြစ်ရီးအကတုံန်ဝါး" ညယ်ငှေါဒီဒါး 5အန်တာတ်အကုန်လုံးကား "အဘင်းဆိတ်ကား ဂါလိလဲဟက်စသဘန်း သမီဆာတာတ်တေ ကပြောင်းကပြန်ထှာကွန်း အွန်နီဘင်းကား အရာတ်အဘင်းနေရာဘေရီး ဒီဘန်းအွန်နင်းမှာ" ညယ်ငှေါကြီးမှာ။ 6အန်နိမ်ငှေါနင်းဘင်းနာတေ ပိလတ်ရှာန်းပလာန်သက်ပူမှါခ့်ခါ "အဘင်းသမီဆာကား ဂါလိလဲနယ်ဆားရဲ" ညယ်စိန်ယူဘန်း 7ဟေရုဒ်အုပ်ချုပ်သဘင်း ဂါလိလဲဟက်ငှေါဘင်းတေ မိန်းရှာတ်ခါမှါခ့်ခါ အန်ကားအချိန်ဘေ ဂျေရုဆလင်ဘေ ထုတ်နင်းဘင်း ရှာန်းပလာန် ဟေရုဒ်ပါ ကိုယ်တော်ယေရှုတေ ဆာတ်အာန်မှာ။ 8ဟေရုဒ်ကား ကိုယ်တော်ယေရှုအကြောင်းတေ သက်ပူဘန်း ကတုံန်ကာတ်ပင်းကား မှါတ်နင်းဘင်းအတွာတ် ကိုယ်တော်တေ ကတုံန်မှါခ့်ခါ အကြီးကျယ်မွန်းမှာ။ ဟိန်ကား ကိုယ်တော်ယေရှု အွန်ဘင်း အံ့ဩသထာတ်စားနူစားနာတေ ကတုံန်လူကွန်း ဒဲနင်းမှာ။ 9အမှာတွာတ် ဟေရုဒ်ရှာန်းပလာန်ကား ကိုယ်တော်တေ မေးခွန်းတေကလောင်းတုံန်းစိန်ယူဒီဒါး ကိုယ်တော်ကား ဟမာန်ကစဲအဖြေသဝါး။ 10စီးမှါခ့်ခါ ပုရောဟိတ်တုံန်းတာတ်ယောက် ကျမ်းကျိန်းပေါ့ပင်း အိုးဆကြီးတာတ်ကား စပ်ပန်းနာ ကိုယ်တော်ဒေ အကြီးကျယ် စွပ်စွဲသကြီးမှာ။ 11ဟေရုဒ်ရှာန်းပလာန်ယောက် ဟိန်ရဲမက်တာတ်ကား ကိုယ်တော်တေ နီးကြီးဘန်း ကိုယ်တော်တေ တန်ဖိုးတုံန်းဘင်းတော်ဒင်တေ တော်စိန်းဘန်းနာ ပိလတ်ရှာန်းပလာန်ပါ ဆာတ်ခါန်းရာန်မှာ။ 12ဟေရုဒ်ရှာန်းပလာန်ယောက် ပိလတ်ရှာန်းပလာန်တာတ်ကား ဟလိန်းပါမှါခ့်ခါ ရန်သူတေထှာကြီးဒီဒါး အန်ဘင်းမန်းရာတ်ပေ မိတ်ဆွေတေထှာကြီးရာန်မှာ။ 13ပိလတ်ရှာန်းပလာန်ကား ဂျူးပုရောဟိတ်တုံန်းတာတ်၊ ဂျူးဘာသာရေးဟလာမ်းစါတ်တာတ်ယောက် သမီဆာကလောင်းတုံန်းတေဒေ စုသစိန်းဘန်း 14"အဘင်းဆိတ်ကား သမီဆတေဒေဆတူးကွန်း အွန်ဘင်းဆိတ်ညယ် ငှေါဘန်း ဟနိမ်ငါပါ ကော်ကြီးရီဘင်းအတွာတ် ဟနိမ်မန်းဘေ ငါဟိန်တေစစ်ဆေးသဒီဒါး ဟနိမ်ငှေါနိမ် အပြစ်တေအွန်ပဲဘင်းနာတေ အကတုံန်ငှါး။ 15ဟေရုဒ်ရှာန်းပလာန်ရီဒါး ဟိန်တေ အပြစ်သန်ဘန်းအကတုံန်ဘင်းအတွာတ် ဟိန်တေ ဟမာန်အပြစ်စဲအအီညယ် ငါပါပြန်သပန်းဆာတ်ခါန်းရီမှာ။ အဘင်းဆိတ်ကား ရှီးကွန်းအပြစ်အီထှာကူဘင်း အပြစ်စားနူဆဲ အွန်ပဲဘင်း အဘိုဝါးငှေါဘင်း ထာန်ရှားသမှာ။ 16အမှာတွာတ် ဟိန်တေ ကြိမ်ဒဏ်အီဘန်း တာတ်နာတ်ကူ" ညယ်ငှေါမှာ။ 17ပိလတ်ကား အန်နိမ်ငှေါထှာဘင်းကား ပွဲတော်မာန်းရာတ်ပေ လွှတ်မြောက်သဘင်း အခွါမ့်တေအီထှာဘင်း ထုံးစံအတွာတ်ထှာမှာ။ 18အန်နိမ်စါန်းငှေါဒီ သမီဆာတာတ်ကား "ဟိန်တေ သာန်းရှီဘန်း ဗာရဗ္ဗတေတာတ်အီ" ညယ်တစ်ညီတည်း ဟာတ်ပန်းတောင်းဆိုသကြီးမှာ။ 19အရာတ် ဗာရဗ္ဗကား မြို့နောင်းဘေထှာရီဘင်း ပုန်ကန်သဘင်းမှုယောက် သမီဆာသာန်းရှီးဘင်းအမှုတေဒေ ကျူးလွန်သဘင်းဆိတ်ထှာဘင်းအတွာတ် အကျဉ်းထောင်နောင်းဘေ အက်ပန်းနင်းမှာ။ 20ပိလတ်ရှာန်းပလာန်ကား ကိုယ်တော်ယေရှုတေ တာတ်အီကာတ်ပင်းအတွာတ် သမီဆာတာတ်ယောက် ဘာသာရေးဟလာန်းစာတ်တုံန်းတေဒေ ပန်းနူစိန်ယူဟာန်းမှာ။ 21အန်နိမ်စါန်းငှေါဒီ အန်တာတ်ကား "ဟိန်တေ တာပ်ပါးကပ်ပင်းတိုင်စေါက်ပေ တာန်းဒါန်။ ဟိန်တေ တာပ်ပါးကပ်ပင်းတိုင်စောက်ပေ တာန်ဒါန်" ညယ်ဆာတ်သဘန်း ငှေါနင်းကြီးမှာ။ 22အန်၌မှါခ့်ခါ ပိလတ်ရှာန်းပလာန်ကား "ဟိန်ကား ဟမာန်အမျိုးအပြစ်တေ အွန်ပတ်နီဒေ။ ဟိန်တေ ရှီးဘင်းဒဏ်အီလောက်သကွန်း အပြစ်တေ ငါအကတုံန်ငှါး။ အမှာတွာတ် ဟိန်တေ ဆုံးမသဘန်း တာတ်နာန်ကူ" ညယ် တတိယအကြိမ် ထပ်သဘန်း ငှေါရာန်မှာ။ 23အန်နိမ်စါန်းငှေါဒီ သမီဆာပရိတ်သပ်တာတ်ရီးဒါး ကိုယ်တော်ယေရှုတေ ရှီးဘင်းဒဏ်အီဒင်အတွာတ် အကြီးကျယ်ဟာတ်ပန်းနင်းကြီးမှာ။ 24အဆုံးဘေကား သမီဆာပရိတ်သတ်တာတ် တောင်းဆိုသဘင်းအတိုင်း ပိလတ်ရှာန်းပလာန်ရီး လိုက်လျောတာန်ဘန်း 25ဟိန်ကား သမီဆာပရိတ်သတ်တာတ် တာတ်စိန်းကာတ်ပင်း ပုန်ကန်သဘင်းယောက် သမီဆာသာန်းရှီးဘင်းအမှုတေ ကျူးလွန်သဘန်း အကျဉ်းထောင်နောင်းဘေ အက်နင်းဘင်းဆိတ် ရာဇဝတ်ဆား ဗာရဗ္ဗတေ တာတ်အီရာန်ဘန်း ကိုယ်တော်ယေရှုတေ အန်တာတ်အွန်စိန်းကာတ်ပင်းအတိုင်း အွန်ဒင် အန်တာတ်ပါ အပ်တာန်မှာ။ 26ရဲမက်တာတ်ကား ကိုယ်တော်တေ ကော်လာန်ပဲမှါခ့်ခါ ကုရေနေမြို့အရပ်ဟက် ရှိမုန်ကော်ဘင်းဆိတ်ကား လပါးဟက် ဒီဟာန်းဘင်းနာတေ ကတုံန်မှါခ့်ခါ ဟိန်တေ ရင်ဘန်း ကိုယ်တော်ဟလိန်းဟက် တာပ်ပါးကပ်ပင်းတိုင်တေ ဖဲဘန်း ဒီရာတ်စိန်းယုတ်မှာ။ 27သမီဆာကလောင်းတုံန်းတာတ်ယောက် ကိုယ်တော်အတွာတ် ရင်ဘတ်တေထုသဘန်း ဟပ်နင်းကြီးဘင်း အီးရှီတာတ်ရီးဒါး ကိုယ်တော်ဟလိန်းဟက် ဒီယာတ်ကြီးမှာ။ 28ကိုယ်တော်ကား အန်ဘင်းသမီဆာတာတ်ပါ လှည့်သဘန်း "ဂျေရုဆလင်ဟက် အီးရှီတာတ်၊ ငါအတွာတ် အဟပ်ကြီးဆာ။ ဟနိမ်အတွာတ် ဟနိမ်ဆာ ဆအိတ်တေ အတွာတ်၌ဆာဟပ်ကြီး။ 29'မြုံသနင်းဘင်းအီးရှီ၊ ပုတ်အကာန်ပတ်ပင်းပုတ်ယောက် စုတ်ရှီအတိုက်သပတ်ပင်း အီးရှီတာတ်၌ ကံမဲလား' ညယ် သမီဆာတာတ်ကား ငှေါကြီးကူဘင်းမန်းရာတ်တေ ထုတ်အီကူ။ 30အန်၌မှါခ့်ခါ သမီဆာတာတ်ကား ကယာတေဒေ 'အလေစောက်ပါပြိုသအက်ဆွန်နာန်' ညယ် ငှေါကြီးဘန်း ကယာရှာတေရီဒါး 'အလေတေ အွပ်ပန်းပဲရာန်' ညယ် ငှေါကြီးကူ။ 31စိမ်းစိုသဘင်းဖွန်းကလွုန်တေနိမ် အပြစ်အဘိုဘင်း ငါစောက်ပေဆဲ အန်နိမ်ဆိုးရွားသဘင်းတေ ထှာနင်းဘန်းကာ ကူးစာတ်ပင်း ဖွန်းကလွုန်တေနိမ် အပြစ်ဆားတေထှာကြီးဘင်း ဟနိမ်စောက်ပေ ဟာနိယ်ထုတ် ပိုသော ထှာရီကူးတေ" ညယ် မိန့်သမှာ။ 32တခြားရာဇဝတ်ဆား ကလိန်းဟူးရီးဒါး ကိုယ်တော်ယောက်အတူတူ သာန်းရှီးဒင် ကော်ဒီဘဲမှာ။ 33ဟလာမ်းအုတ်ခွန် ညယ်ကော်ဘင်း ကယာစေါက်ပေထုတ်မှါခ့်ခါ ကိုယ်တော်တေ တာပ်ပါးကပ်ပင်းတိုင်စောက်ပေ တာန်သဘန်း ဆိန်ကလာတ်သာန်းနာန်မှာ။ ကိုယ်တော်ဘင်း ပယ်အာစီဘေ အပြစ်ဆားကလိန်းဟူးတေရီဒါး ကိုယ်တော်ညာပါဟော်ဝါ၊ ဘယ်ပါဟော်ဝါ ကားစင်တာန်သပန်း ဆိန်ကလာတ်ယောက်သာန်းနာန်မှာ။ 34အန်၌မှါခ့်ခါ ကိုယ်တော်ကား "အဝါဘုရား၊ အန်တာတ်ကား အန်တာတ်အွန်နင်းဘင်းနာတေ အမိန်းရှာတ်ခါကြီးဘင်းအတွာတ် အန်တာတ်တေ ခွာမ်းလွှတ်သအီယုတ်" ညယ်ဆုစိန်မှာ။ ရဲမက်တာတ်ကား ကိုယ်တော်ဆာန်ဆုန်တေဒေ အလောင်းအစားအွန်ဘန်း မံဘန်းလာကြီးမှာ။ 35သမီဆာကလောင်းတုံန်းကား စပ်ပန်း ယူနင်းကြီးမှါခ့်ခါ အကြီးအကဲတာတ်ကား ကိုယ်တော်ယေရှုတေ နီးဘန်း "ဟိန်ကား သမီတေဒေ ကယ်တာန်ဒီမှာ။ အန်နိမ်အချီ ဟိန်ကားဘုရားရှာန် မယ်ပဲဘင်း မေရှိယ ထှာဘန်းကား ဟိန်ကောတ်ဟိန်ကာ ကယ်တာန်သစိန်း" ညယ်ငှေါကြီးမှာ။ 36ရဲမက်တာတ်ရီးဒါး ကိုယ်တော်တေ လှောင်ပြောင်သကြီးဘန်း ချည်းဘင်းစပျစ်ဝလဲတေဒေ တိုက်သဘန်း 37"နာန်ကား ဂျူးသမီဆာတာတ်ပင်းရှာန်းပလာန် ချီဘန်းကား ကိုယ်ကောတ်ကိုယ်ကာ ကယ်တာန်တာန်" ညယ်ငှေါကြီးမှာ။ 38ကိုယ်တော်ဟလာမ်းစောက်ပေရီး 'အဘင်းဆိတ်ကား ဂျူးတာတ်ရှာန်းပလာန်' ညယ် ကဗ္ဗည်းရေးသပဲဘင်းဆိုင်းဘုတ်တေ ဝယ်ပဲမှာ။ 39တာပ်ပါးကပ်ပင်းတိုင်စောက်ပေ ဝယ်ပဲဘင်း ရာဇဝတ်ဆား ဟော်ဝါကား ကိုယ်တော်တေ "နာန်ကား မေရှိယထှာဘန်းကား ကိုယ်ကာတ်ကိုကာကယ်တာန်သဘန်း အလေတေရီဒါး ကယ်သောအီ" ညယ်ကဲ့ရဲ့သဘန်းငှေါမှာ။ 40အန်နိမ်စါန်းငှေါဒီ နောက်ရာဇဝတ်ဆားဟော်ဝါကား အန်ဘင်းဆိတ်တေ "နာန်ကားအဘင်းဆိတ်နိမ် ပြစ်ဒဏ်ခံသနင်းထှာဘင်းဆဲ ဘုရားရှာန်တေ အစါတ်နွန်းရဲ။ 41အလေကား အပြစ်အွန်ပတ်ပင်းအတွာတ် အပြစ်ခံသထှာဘင်းနာ ထိုက်တန်သမှာ။ အန်နိမ်စါန်းငှေါဒီ အဘင်းဆိတ်ကား ဟာဘင်းအပြစ်စဲ အအွန်နီယား" ညယ်ငှေါမှာ။ 42စီးမှါခ့်ခါ ဟိန်ကား ဆက်သပန်း ကိုယ်တော်တေ "နာန်ကား ရှာန်းပလာန်ဟော်ဝါနိမ် အုပ်စိုးသကူညယ်ဒီမှါခ့်ခါ ငါတေဆတီးလူ" ညယ်လျှောက်တာန်သမှာ။ 43အန်၌မှါခ့်ခါ ကိုယ်တော်ယေရှုကား "နာန်တေ ငါချီလားငှေါကူ။ နာန်ကား အယာတ်မှါတ်မာန်းရာတ်ပေ ငါယောက်အတူတူ ပရဒိသုဘုံဘေငှါနင်းကူ" ညယ်ကတိအီမှာ။ 44အန်ဘင်းအချိန်ကား မွန်းတည့်သဘင်းအချိန်ထှာနင်းဒီဒါး ညနေသုံးနာရီထုတ်ကွန်း ကမ္ဘာဟုတ်အာလုံးဘင်း ဟမုခ်ကား ထာန်းနင်းမှာ။ 45မိတ်အရောင်ကား ကယာရာန်ဘန်း ဗိမာန်တော်နောင်းဘေငှါဘင်း အမြင့်မြတ်ဆုံးနေရာတေ အွပ်ပဲဘင်း ကန့်လန့်ကာတုံန်းကား ပယ်အာစီဆိုက်အာမ်မှာ။ 46ကိုယ်တော်ရီးဒါး ဆကလားဝါတ်ဆလာပ်တုံန်းယောက် "အဝါဘုရားရှာန်သဟူးနောင်းဘေ ငါဝိညာဉ်တေအပ်သမှာ" ညယ်ငှေါစီးမှါခ့်ခါ အဆာတ်ပူဝါမ်မှာ။ 47အဘင်းထှာဘင်းတေကတုံန်ဘင်း ရောမတပ်မှူးကား ဘုရားရှာန်ဂုဏ်တော်တေ ချီးမွမ်းသဘန်း "အဘင်းဆိတ်ကား သမီဆာမလဲထှာမှာ" ညယ်ငှေါမှာ။ 48အဘင်းအကတုံန်အပ်သဘင်း မြင်ကွင်းတေ ယူဒင် ဒီကြီးဘင်း သမီဆာပရိတ်သတ်တာတ်ကား ကိုယ်တော်အဖြစ်တေ ကတုံန်မှါခ့်ခါ အဆေင်ပိုက်ကူနိမ် ခံစားသထှာဘန်း ကိုယ်ကျေမ်း ငါကျေမ်းပါလာန်ဟာန်းကြီးမှာ။ 49အန်နိမ်စါန်းငှေါဒီ ကိုယ်တော်ယေရှုယောက် ဟိန်မိတ်ဆွေတေ၊ ဆွေမျိုးသားချင်းတေ၊ ဂါလိလဲဟက်ဒီယာတ်ဘင်း အီရှီတာတ်ကား လမ်းစာလာဟက် စပ်ပန်း ယူနင်းကြီးမှာ။ 50အန်ကားအချိန်ဘေ ယုဒပြေ အရိမဿဲအရပ်ခက် ယောသပ် ကော်ဘင်းဆိတ် ဟော်ဝါငှါမှာ။ ဟိန်ကား သမီဆာမလဲဟော်ဝါထှာဘန်း ဂျူးလွှတ်တော် အဖွဲ့ဝင် ဟော်ဝါရီးထှာမှာ။ 51ဟိန်ကား ကိုယ်တော်ယေရှုတေ သာန်းရှီးဒင် အွန်ကြီးရီဘင်း တခြားလွှတ်တော်အဖွဲ့ဝင်တေဘင်း ဆုံးဖြတ်ချက်ယောက် အွန်နီဘင်းနာတေဒေ သဘောအတူဒီရား။ အန်ဘင်းအပြာန် အဘင်းကမ္ဘာစောက်ပါ ဘုရားရှာန်ဘင်း သာသနာတော် ထုတ်အီကွန်းအတွာတ် လိုလားသနင်းဘင်းဆိတ်ရီးထှာမှာ။ 52ဟိန်ကား ကိုယ်တော်အလောင်းတေ သင်္ဂြိုလ်သဒင် ပိလတ်ရှာန်းပလာန်ဘေစိန်မှါခ့်ခါ ပိလတ်ရီးဒါး ခွါမ့်အီရာန်မှာ။ 53အမှာတွာတ်ဟိန်ကား ကိုယ်တော်လာန်တေ တာပ်ပါးကပ်ပင်း တိုင်စေါက်ဟက် ချသဘန်း မဲဘင်းပိတ်ယောက်ပတ်တာန်မှာ။ စီးမှါခ့်ခါ လုံးကရှီတုံန်းတေ ထွာမ်းသပဲဘင်း ဟာဟမဲဆဲ အပဲလူနွန်းဘင်း ဆာန်းကျိုင်းဂူ နယားနောင်းဘေ ကိုယ်တော်လာန်တေ မလဲကလဲ ပဲမှာ။ 54အန်ဘင်းမာန်းရာတ်ကား ပြာန်ဆာန်သထှာဘင်း မာန်းရာတ်ထှာဘန်း ဥပုသ်မါန်းရာတ်ယောက် ထံဘင်းအချိန်ထှာမှာ။ 55ဂါလိလဲဟက် ကိုယ်တော်ယောက်အတူတူ ဒီရာတ်ပင်းအီးရှီတာတ်ကား ဆာန်းကျိုင်းဂူတေလည်းကောင်း ကိုယ်တော်လာန်တေ ပဲဘင်းနာတေလည်းကောင်း ကတုံန်ကြီးမှာ။ 56စီးမှါခ့်ခါ အန်တာတ်ကား ကျေမ်းပါလာန်ဟာမ်းဘန်း ကိုယ်တော်တေ ပူဇော်သဒင် တွန်းဘင်းဆလောတေယောက် အမွှေးနံ့သာတေဒေအရန်သင့် အွန်ပဲမှာ။ အန်နိမ်စါန်းငှေါဒီ အန်တာတ်ကား ပညတ်တော်ဘေကာပဲဘင်းအတိုင်း ဥပုသ်မာန်းရာတ်ပေ အနားလာကြီးမှာ။
Currently Selected:
Luke 23: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
