Luke 14
14
1ဥပုသ်မာန်းရာတ်ရအာမှါခ့်ခါ ကိုယ်တော်ယေရှုကား ဖာရိရှဲဟလာန်းစါတ်ကျေမ်းဘေ ယုတ်တင်တေယုတ်ကူညယ် လာန်မှါခ့်ခါ သမီဆအားလုံးကား ကိုယ်တော်ယေရှုတေ ဆတီးပဲဘန်းယူနင်းကြီးမှာ။ 2အန်ဘင်းနာဘေ သဟူးတေတာတေ အွန်ဘင်းရောဂါ ထှာနင်းဘင်းသမီဆာဟော်ဝါကား ကိုယ်တော်ယေရှုမန်းဘေ ငှါနင်းမှာ။ 3ဖာရိရှဲတာတ်ယောက် ကျမ်းပေါ့ပင်းအိုးဆကြီးတာတ်တေ ကိုယ်တော်ကား "ဥပုသ်မာန်းရာတ်ပေ ကမာရောဂါတေဒေ ကုသအီဘင်းနာကား ပညတ်တော်ယောက် ညီသလဲ၊ အညီသရားရယ်" ညယ်စိန်ယူမှာ။ 4အန်နိမ်စါန်းငှေါဒီ အန်တာတ်ကား ဟမန်ကစဲ ပြန်သော အသပေါက်ခါန်းကြီးဘင်းအတွာတ် ကိုယ်တော်ကား အန်ဘင်းဆိတ်တေ သဟူးယောက်ထိသဘန်း ရောဂါကုသအီစီးဘန်းနာ ဟိန်တေ ပြန်သဘန်းတာတ်ခါန်းငါန်မှာ။ 5စီးမှါခ့်ခါ ကိုယ်တော်ယေရှုကား အန်ဘင်းဆိတ်တာတ်တေ "ဟနိမ်ဆာထာကာတ်ထှာ၊ မုတ်ထာကာတ်ထှာ၊ ဝဲရဟွန်နောင်းဘေအက်နာန်ဘန်းကား ဥပုသ်မာန်းရာတ်စါန်းထှာနင်းဒီးဒါး ချတ်ချန်း တွန်းဟယ်ကြီးကူအချီနော်" ညယ်မိန့်တော်မူသမှာ။ 6အန်နိမ်စါန်းငှေါဒီ အန်ဘင်းဆိတ်တာတ်ကား ဟမာန်ကစဲ ပြန်သောအငှေါဟာန်းရန်နား။ 7စီးမှါခ့်ခါ ဖိတ်သလား ခံသထှာဘင်းဆိတ်တာတ်ကား ယုတ်ကူညယ် မဲဟန်ဘင်းနေရာဘေထုံးဘန်း ယုတ်တင်အွန်ဘန်းနင်းကြီးဘင်းနာတေ ကတုံန်မှါခ့်ခါ ကိုယ်တော်ကား အန်ဘင်းဆိတ်တာတ်တေ ပုံဥပမာစားနူယောက် မိန့်သဘင်းနာကား 8"ဟော်ဝါ ဟော်ဝါကား နာန်တေ မာန်းဂလာပွဲဖိတ်သမှါခ့်ခါ မဲမှာငှေါဘင်းနေရာဘေ အထုံးကြီးဆာ။ ဟမာန်တွာတ်ငှေါဘန်းသာငှေါ အန်ဘင်းပွဲဘေ နာန်ထာပ် ပိုသောအရေးပါသဘင်းဆိတ်တေရီးဒါး ဖိတ်သဘန်းပဲဟာမှာ။ 9အန်ဘင်းဆိတ်ထုတ်အီဘန်းကား နာန်တေဖိတ်သပဲဘင်းဆိတ်ကား 'နာန်နေရာတေ အန်ဘင်းဆိတ်နင်းအီရာန်' ညယ်နာန်တေ ငှေါရီမှါခ့်ခါ နာန်ကား မန်းကတန်ဘန်း ဟလိန်းဘေငှါဘင်း နေရာတစ်နေရာဘေ ထုံးငါန်ထှာကူ။ 10အန်နိမ်စါန်းငှေါဒီ ဟနိမ်ကား မာန်းဂလာပွဲပါလာန်မှါခ့်ခါ ဟလိန်းဘင်းဘေထုံးဘန်းကား နာန်တေ ဖိတ်သပဲဘင်းဆိတ်ကား "ပဟာန်း၊ အဘင်းထာပ်မဲဘင်းမန်းဘင်းနေရာဘေဒီဘန်းထုံးရီ' ညယ်ဒီဘန်း ငှေါရီဘင်းအတွာတ် နာန်ကား တခြားနန်တာတ်မန်းဘေ ဂုဏ်လာဒင်မဲကူ။ 11ကိုယ်ကောတ်ကိုကာ ချီးမြှောက်သဘင်းဆိတ်ကား နှိမ့်ချခံသထှာဘန်း၊ ကိုယ်ကောက်ကိုယ်ကာ နှိမ့်ချသဘင်းဆိတ်ကား ချီးမြှောက်သလားခံသထှာကူ" ညယ်မိန့်တော်မူသမှာ။ 12ပန်းနူ ကိုယ်တော်ကား ဟိန်တေဖိတ်သဘင်းဆိတ်တေ "နာန်ကား ဧည့်ခံပွဲအွန်မှါခ့်ခါ နာန်မိတ်ဆွေတေ၊ မိသားစုတေ၊ ဆွေမျိုးတေယောက် ဆွာမ်းဘင်းကျေမ်းပိုက်တာတ်တေ၌ဆာ အကော်ဆာ။ နာန်အာနိမ်အွန်ဘန်းကား အန်ဘင်းဆိတ်တာတ်ကား နာန်တေ ပန်းနူကော်ဘန်းနောပ့်ခါန်းကြီးကူ။ 13အန်ဘင်းအစား နာန်ကား ပွဲအွန်မှါခ့်ခါ ဆာန်းရဲဆာတေ၊ အသန်စွမ်းသဘင်းဆိတ်တာတ်၊ လေဖြတ်သနင်းဘင်းဆိတ်တာတ်၊ မိတ်တူရှီအကတုံန်ဟာဘင်းတာတ်တေဒေ ဖိတ်သကြီး။ 14အန်တာတ်ကား နာန်နင်းအီဟာန်း ကြီးကပန်းလားအချီယား။ အန်နိမ်စါန်းငှေါဒီ သမီဆာမလဲတေ ရှီးလားဟက်စားဟာန်းရီမှါခ့်ခါ ဘုရားရှာန်ကား နာန်တေ ကောင်းကြီးတေအီကူ" ညယ်မိန့်တော်မူသမှာ။ 15အန်နိမ် မိန့်သဘင်းတေ သက်ပူဘင်း ကိုယ်တော်ယောက်အတူ စားပွဲဘေထုံးဘန်း ယုတ်ပန်းနင်းဘင်း နန်တေနောင်းဟက် ဟော်ဝါကား "ဘုရားရှာန်ဘင်းသာသနာတော်နောင်းဘေ ထုံးဘန်း ပွဲဘေယုတ်လားလူဘင်းဆိတ်ကား ကောင်းကြီးမာန်းဂလာတေ ခံစားသလူဘင်းဆိတ်ထှာမှာ" ညယ်ငှေါမှာ။ 16ကိုယ်တော်ကား အန်ဘင်းဆိတ်တေ "သမီဆာဟော်ဝါကား ပွဲအွန်ဒင် နန်ကလောင်းတုံန်းတေ ဖိတ်သမှာ။ 17ပွဲထုတ်မှါခ့်ခါ ဖိတ်သပဲဘင်းဆိတ်တာတ်ပါ အစေခံဟော်ဝါတေတာတ်ပန်း 'အကုန်လုံးအဆာန်တာန့်ထှာနင်းဘန်း၊ ကြွသကြီး' ညယ်ငှေါစိန်းယုတ်မှါခ့်ခါ 18နန်တာတ်ကား ဟော်ဝါစီးဟော်ဝါ အကြောင်းအမျိုးမျိုးကာဘန်း ငြာမ်းသကြီးမှာ။ ပထမဟော်ဝါကား 'ငါလပါးတစ်ကွာပ်မှီးပဲဘင်းအတွာတ် လာန်ဘန်းယူဝါထှာကူ။ ငါတေခွာမ်းအီယုတ်' ညယ်ငှေါမှာ။ 19အနားဟော်ဝါရီးဒါး 'ငါကားမုတ်ရှစ်နူမီးပဲဘင်းအတွာတ် လာန်ဘန်း စမ်းသပ်သထှာယုတ်ကူ။ ငါတေခွာမ်းအီယုတ်' ညယ်ငှေါမှာ။ 20အနားဟော်ဝါရီးဒါး "ငါကား အရာတ်မားဆာ အိမ်ထောင်ထောင်ဘင်းအတွာတ် အဒီရန်နား" ညယ်ငှေါမှာ။ 21အန်၌မှါခ့်ခါ အစေခံရီးဒါး အန်ဘင်းအကြောင်းတေဒေ ဟိန်အဆိတ်တေ ငှေါကာမှါခ့်ခါ ကျေမ်းဆိတ်ရီးဒါး အကြီးကျယ်ဒေါသပူဘန်း ဟိန်အစေခံတေ 'မြို့နောင်းဘင်းလမ်းကြိုလမ်းကြားဟက် ဆာန်းရဲဆားတာတ်၊ အသန်စွမ်းသဘင်းဆိတ်တာတ်၊ လေဖြတ်သနင်းဘင်းဆိတ်တာတ်၊ မိတ်တူရှီအကတုံန်ဘင်းဆိတ်တာတ်တေဒေ မြန်မြန်လာန်ဘန်း ကော်ကြီးရီ' ညယ်စိန်းယုတ်အာန်မှာ။ 22အန်ဘင်းအစေခံ ထုတ်ခါန်းရီမှါခ့်ခါ 'အရှာန်အွန်စိန်းယုတ်ပင်းအတိုင်းအွန်စီးဘန်း။ အနိမ်စါန်းငှေါဒီ သမီဆာကလောင်းတုံန်းအတွာတ် နေရာလွောပ်သလားတေငှါယုတ်မှာ' ညယ်ငှေါဘင်းအတွာတ် 23ဟိန်အဆိတ်ကား 'အန်နိမ်ငှေါဘန်းကာ လမ်းမတုံန်းတေယောက် လမ်းရှရှာတေပါလာန်ဘန်း အန်ဘင်းနာဘေငှါဘင်း သမီဆာတေဒေ ကျေမ်းပါကော်ရီ။ အား၌မားဆာ ငါကျေမ်းဘေ သမီဆတေဖိန်းရာန်ကလား။ 24အရာန်ဖိတ်သပဲဘင်း ဆိတ်တာတ်ဒီဘန်းကား ငါနောပ့်ပင်းယုတ်တင် အူတင်တေဒေ အစစ်ဆာစဲ မြည်းသကြီးလူကလားအချီရား' ညယ်ဟိန်အစေခံတေ ငှေါမှာ" ညယ်မိန့်တော်မူသမှာ။ 25စီးမှါခ့်ခါ သမီဆာကလောင်းတုံန်းကား ကိုယ်တော်ယောက်အတူတူ ဒီရာတ်ကြီးဘင်းအတွာတ် ကိုယ်တော်ကား လှည့်သဘန်း အန်တာတ်တေ 26"ဟနိမ်ကား နာန်အမယ်၊ အဝါ၊ ဆာ၊ အိတ်၊ နရှီ၊ အမူးတေ၌ဆာအချီ ဟနိမ်ကိုယ်တိုင်ထာတ် ငါတေ ပိုသော အမစ်ရန်ဘန်းကာ ငါတပယ့်အထှာရန်နား။ 27ဟနိမ်ဘင်းတာပ်ပါးကပ်ပင်းတိုင်ဒေ ကိုယ်တိုင်ဖဲဘန်းနာ ငါယောက်အတူတူ အဒီယာတ်ရန်ဘန်းရီဒါး ငါတပယ့်အထှာရန်နား။ 28ဟနိမ်နောင်းဟက် ဟော်ဝါကား မျှော်စင်ဟုတ်အာတေ စာကူငှေါဘန်းကာ အန်ဘင်းမျှော်စါန်စီးကွန်းစာဒင်အတွာတ် ဆွန်ကူဘင်းဖူးကား ကွန်းကူအကွန်းနား မိန်းရှာတ်ခါဒင် အရာန်အတွာတ်သညယ် နင်းကလားအချီရား။ 29အာနိမ်အတွာတ်သညယ် မျှော်စါန်တေ စာဘန်းကား စီးကွန်းအစာရန်ငှါနင်းကူ။ အန်ဘင်းတေ ကတုံန်ဘင်းဆိတ်တာတ်ရီးဒါး ဟိန်တေ 30'အဘင်းဆိတ်တာတ်ကား မျှော်စါန်တေ အစအွန်ရန်သည်ဒါး စီးကွန်းကားအအွန်ရန်နား' ညယ်ငှေါဘန်း ကဲ့ရဲ့သကြီးကူ။ 31အန်နိမ် ရှာန်းပလာန်ဟော်ဝါဘေ စစ်သည်အင်အား တစ်သောင်းငှါဘန်းနာ စစ်သည်အင်အား နှစ်သောင်းငှါဘင်း ရှန်းပလာန်ကား တိုက်သကူညယ်ဒီဘန်းကာ အားနည်းသဘင်းရှာန်းပလာန်ကား ဟိန်အကြံအီဘင်းဆိတ်တာတ်ရောက်အရာန် အတူတူထုံးဘန်း အန်တာတ်ကား စစ်သည်အင်အား တစ်သောင်းဆယောက် တခြားရှာန်းပလာန်ဘင်း စစ်သည်နှစ်သောင်းတေ ဟာနယ်နားကွန်း တိုက်သထှာကူငှေါဘင်းနာတေ စဉ်းစားသကြီးထှာကူ။ 32အန်နိမ်နားကွန်း အတိုက်သရန်ဘင်းတေ တွေးသပတ်ပန်းကား အန်ဘင်းရှာန်းပလာန်ကား ဟိန်ဘင်း သံတမန်တာတ်တေ တခြားရှာန်းပလာန်ကား လမ်းစာဘေငှါနင်းမှါခ့်ခါ တာတ်ပန်း စစ်ပြေငြိမ်းအေးသလူဘင်းတူးတေ ကမ်းလှမ်းသထှာကူ။ 33အာနိမ်ညယ် ဟနိမ်ရီးဒါး ဟနိမ်ပိုင်ဒဘင်းနာတေဒေ အစွန့်ဒရန်ဘင်းဆိတ်တာတ်ကား ငါတပယ့်အထှာရန်နား။" 34'စွန်ကား မဲမှာ။ အာနိမ်စါန်းငှေါဒီ ဆွန်းဟာဘင်း အရသာကယာရန်ဘန်းကား ပြန်သဘန်း ဆွန်းဟာန်းရီကွန်း ဟာနိမ်အွန်ဟာန်းကူတေ။ 35အန်ဘင်းစွန်ကား ကာအတွာတ်သော်လည်းကောင်း၊ မြေဩဇာအတွာတ်သော်လည်းကောင်း အသုံးအဆာန်ဘန်းဘင်းအတွာတ် ပြာန်ပါဘေ တက်လားခံသထှာကူ။ ကနားငှါဘင်းဆိတ်တာတ် အာရုံစိုက်သဘန်း သက်ကြီး" ညယ်မိန့်တော်မူသမှာ။
Currently Selected:
Luke 14: ktpv-rv
Highlight
Share
Copy
Want to have your highlights saved across all your devices? Sign up or sign in
This translation of the Kadu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
