Luke 8
8
1နောင်အကျင်လော့် မွန်းစောင့်ကော့် တောင်းတပဲ့မွန်းစောင့်ဆစ်(ပ်)ဆောင်(န်)ကော့်တောင်း မှိန်းမန့်တော်ပေါစောက်ကွာဆီ အကြောင်းသာသနာစောင့်ဖလား သတင်းအောင်းနီးလေ လောင်(ဝ်)ပြားကော်ဝိုက်။ 2နောင်လောင်နော့် အနာရောဂါဟပေါဟိုင်ဆီ အောင်းဖီမနီးပူးနယ့်ခမ်ဆီ တော်ပေါဟိုင် ကော့်ယဉ်းအောင်းမွန်းစောင့်ရားဟောင့်(ဝ်)မားလေကော့် စောင်း(မ်)ဟင်းမား တောင်းမွန်းစောင့်တောင်းကော်ဝိုက်။ ခနောဝ်မနော် ကွန်းနယ့်ခမ်ဖီမနီးစေတူးပူး ကွန်းမန့်မာဂဒလမာရိကော့်ပါဝိုက်။ 3နောက်လောင်နော့် ပရအရာရှိဟေရုဒ် ခုဇ ဟောဟန္န၊ ရှုရှန္နတောင်း အောင်းကျန်ကော့်ယဉ်းတောင်းလုန်န စရိတ်ဖော်စရိတ်မွန်းတောင်း ထောက်ပံ့ဟင်း အောင်းစောင့်ယေရှုတောင်း အောင်းတပဲ့မွန်း လေကော်ဝိုက်။ 4အောင်းရောင်းမှိန်းမန့်တောင်းလုန် ဖွန်ကွန်းလေကော့် စူးဟင်းဆီ စောင်း(မ်)ဟင်းမား ခလောင်စောင့်ယေရှုကော်ဝိုက်။ နောက်လောင်နော့် မွန်းစောင့်ကော့် အောင်းကွန်းဖွန် တောင်းပွန်ပုဒ်နိမ်တောင်း လောင်(ဝ်)ပြားကော်ဝိုက်။ 5"ကွန်းဟေနားကော်နိမ်လ ခနောဝ်လောက်နားမွန်း ဟပေါနယ့်ဝမ်ကာ့ အောက်ကော်ဝိုက်။ ကွန်းစောင့်နားဟောန့် ဝမ်းကာ့ကော်လော့် ကာ့အောင်းကမ့်ဖောင်လေန ချားတိုခနေခွန်တန်းကော်ဝိုက်။ အောင်းကာ့ဟိုင့်လေန ကွန်းလေ ရေ့(ပ်)ခွန့်ဆီ နုတ်လေကျဉ်းကော်ဝိုက်။ 6ကာ့အောင်းကမ့်ဖောင်ပေါဝါလော့် ချားတိုခနေ ကောင့်ဟဉ်ကော်ဆီ ပေးတိန့်မားကော်ဝိုက်။ တော်နယ့် နမ့်တော်ပေါအဉ်(မ်) မနွိုက်ညော့ သိုင်းပေါက်ဟွန်းကော်ဝိုက်။ 7အောင်းကန့်ဖောင်ပေါဝါလ ချားခေါင့်(ဝ်)ခနောဝ်ယွန်း(မ်)ကော်ဝိုက်။ တိန့်အောက်မားမေကော့် ယွန်း(မ်)ဟုမ်ဝိုက်ကော်ဝိုက်။ 8အောင်းကမ်ဖောင်ပေါဝါလ ချားတိုရာအော်နီးကော်လော့် တိန့်အောက်ဆီ ဆာဆီပေ အဆပတ်နိမ်ပွန့် မတ်မွန်းလေ မတ်ကော်ဝိုက်"ဆီ ဝါကော်ဝိုက်။ နောင်နယ့်ဆီမွန်းစောင့်ဝါရောင့်(ဝ်)ကော်လော့်" ကွန်းပဉ်ဟူပါလေ ကွန်းစန်ထောင်(မ်)လေ ထောင်(မ်)ဟင်း" ဆီ ဝါကော်ဝိုက်။ 9နောက်လောင်နော့် တပဲ့မွန်းစောင့်လေန အောင်းစောင့်ယေရှု "ပွန်ဟိုက်လ ခဝါအကြောင်းအဟောင်း"ဆီ ထန်(မ်)ဟင်းကော်ဝိုက်။ 10ကောပ့်နယ့်ညော့ စောင့်ယေရှုန "စောင့်ဖလားန အောင်းစမဆူ သာသနာစောင့်ဖလားအောင်းလျှို့ဝှက်ချက်န ဟပေါနယ့်ဟဉ်း အခွင့်လေဟောင့်(ဝ်)ဝိုက်ရောင့်(ဝ်)ကော်ဝိုက်။ တော်နယ်ကော့် ကွန်းမောင်ဖောင်လေန တွဲကော့်မဟောန်ပဲ့၊ နယ့်ဟဉ်းကော့် ဟပေါမဟုထောင်(မ်)ပဲ့ဟင်းညော့ ဟပေါဟုထောင်(မ်) အောင်းပွန်လေဆွန်းဆီ နယ့်ချန်းပြားအောင်းမနော်"ဆီ ဝါကော်ဝိုက်။ 11အောင်းဥပမာဟိုင့်ခဝါလ ဖောင်းခေါင့်(ဝ်)န နှုတ်ကပါတ်တော်စောင့်ဖလားဝိုက်။ 12ဖောင်းခေါင့်(ဝ်)အောင်းချားတိုရာနာ့ခွန်တန်းန အောင်းနှုတ်ကပါတ်တော်စောင့်ဖလားလေ နယ့်ဟဉ်းဆီ ခဝါဝိုက်။ တော်နယ်ကော့် မာရ်နတ်တ မားဆီ အောင်းမနော်ယွန်(မ်)လေ ဟပေါပျတ်ဆီ အောင်းကယ်ဟပေါမနယ့်ခမ် ဆီမေခနောဝ်စောဝ်မနော် အောင်းနှုတ်ကပတ်တော်စောင့်ဖလားလေ မားဆွဲအောက်ကော်ဝိုက်။ 13ဖောင်းခေါင့်(ဝ်)အောင်းချားတိုခနေကောင့်ဟဉ်ဝါလ အောင်းနှုတ်ကပတ်တော်စောင့်ဖလားလေ ချရှ်ချန်းနယ့်ဟဉ်းကော်လော့် စွုမ်းဆီ လက်ခမ်ကော်ဝိုက်။ တော်နယ်ကော့် ဟတ်မွန်းမကွန်း(မ်)လော့် ဟူဟူမခမ်ဝိုက်။ မနော်လ ရီအောင်းနဲဟော် လက်ခမ်ပဲ့ဟောဝိုက်။ ဘဝမနော် အောင်းယပ်လေ၊ အောင်းကြမ်းလေတောင်း ပေါခေါက်(ပ်)ကော်လော့် ချရှ်ချန်း တလားဟိုက်လေန ဟိုင်ကော်ဝိုက်။ 14ဖောင်းခေါင့်(ဝ်)အောင်းချားတိုခနောဝ်ယွန်း(မ်)ကော်ဝါလ အောင်းနှုတ်ကပက်တော်တလားလေ နယ့်ဟဉ်းလက်ခမ်မေကော့် အောင်းချမ်းသာ၊ အောင်းနယ့်အူနီးအူငမ်းလေန၊ လောဘလေနမ်ညော့ အောင်းနှုတ်ကပတ်တော်တလားလေ မေနောကော့် တော်ပေါနမ် မဟေဟင်းဝိုက်။ 15ဖောင်းခေါင့်(ဝ်)အောင်းချားတိုခနောဝ်းအော်နီးဝါလ အောင်းနှုတ်ကပတ်တော်တလားလေ နယ့်ဟဉ်းဆီ နီးနီးငမ်းငမ်း ခနောဝ်းစောဝ်းဝိုင့်ဝိုက်ဟင်းဝိုက်။ နောက်လောင်နော့် မနော်လ မောက်မွန်းမတ်မွန်းလေ မောက်ဟင်း၊ မတ်ဟင်းမားကော်ဝိုက်။ 16နောက်လောင်နော့် စောင့်ယေရှုန အောင်းကလောက်ဖိုင်းလ ဖိုင်းစပ်ဆီ တောင်းမွန်း(မ်)တောင်း နောင်ခုန့်(မ်)ဝိုင့်ကော့်ခရောင့်(ဝ်) ခတောင့်ကတန်ကော့်ခရောင့်(ဝ်) အောင်းဝိုင့်ကော့် မရောင်း။ အောင်းကလောက်ဖိုင်းလ ဟောင်တန်ဝိုက်ရာချိန်မွန်းဟော် ကွန်းခေါင့်(ဝ်)မားခနောဝ်ဟုန်းလေန တနယ့်ဟောန်အောင်းလိမ်းဝိုက်။ 17တော်ပေါမဟု အောင်းလောက်ဆိဉ်ဝိုက်ဝါလ မရောင်း။ လျှို့ဝှက်ချက်အောင်းမဟုပဲ့ဝါလ မရောင်း။ 18ကောပ့်နယ့်ညော့ အာရုံစိုက်ဆီ ထောင်(မ်)ဟင်း။ တူးနိမ်မစော်တူးနိမ် ကွန်းရောင်းလ ဆာဆီပေ အောင်းဟောင့်(ဝ်)တနယ့်ခမ်။ တော်နယ်ကော့် ရာကွန်းအဟောင်းမရောင်းလ ရောင်းဆီနယ့်ထန်ကော့် အောင်းရောင်းဆီနယ့်ထန်ဟိုက်လေ တနယ့်ဆွန်း(မ်)ဝိုက်"ဆီ ဝါကော်ဝိုက်။ 19ဝမ်းနိမ်လော့် မယ်မွန်းစောင့်တောင်း နောင့်စိုင်းမွန်းစောင့်လေန ဟပေါနယ့်ခေါက်(ပ်) အောင်းမွန်းစောင့်ဆီ မားဟင်းကော်ဝိုက်။ တော်နယ့် ဖွန်ကွန်းလေ နမ်အားကြီးကော်ညော့ ရာမွန်းစောင့် မထီန်ပဲ့ဟင်းဝိုက်။ 20ကောပ်နယ့်ညော့ ကွန်းကော်နိမ်လ အောင်းမွန်းစောင့် "မယ်မောစောင့်တောင်းနောင့်စိုင်းမောလေန ခခေါက်(ပ်)အောင်းမောစောင့်ညော့ ထဟင်းခနောက်ဟောန့်"ဆီ လောင်(ဝ်)ကော်ဝိုက်။ 21မေနယ့်လော့် မွန်းစောင့်လ "ကွန်းစောင့်စောင်း(မ်)ဟေ တလားစောင့်ဖလားလေတောင်းလုန်လ မယ်ကော၊ နောင့်စိုင်းကောစောင့်ကျဉ်းနော့်"ဆီ ဝါကော်ဝိုက်။ 22ဝမ်းနိမ်လော့် မွန်းစောင့်လ တောင်းတပဲ့မွန်းစောင့်လေတောင်း ခွန့်ခနေဟေးစင်းနိမ်ဆီ "ဟောဖြတ်အောင်းနောင်ဟိုင့်စို့"ဆီ ဝါကော်ဝိုက်။ ကောပ်နယ့်ညော့ မနော်လေန ဖြတ်ကွာ အောင်းနောင်ဟောန့်ကော်ဝိုက်။ 23မေမနော်ဖြတ်နောင်ဟောန့်လော့် မွန်းစောင့်ယေရှုန နွမ်းနောက်ကော်ခနေဟေးကော်ဝိုက်။ နောက်လောင်နော့် ချရှ်ချန်းလေမုန်တိုင်းပေးမားကော်လော့် ဟေးမနော် စဆီနေ့နမ့်ဆီ တောင်းအန္တရာယ်တောင်း နယ့်ခေါက်(ပ်)ကော်ဝိုက်။ 24ကောပ့်နယ့်ညော့ မနော်လ အောင်းစောင့်ယေရှု ပုတ်ဆီ "စောင့်၊ စောင့် ဟောတနယ့်နေ့နမ့်ကော့်"ဆီ ဝါကော်ဝိုက်။ မွန်းစောင့်ကော့် ဆီမေနွမ်းလ လုဆီ အောင်းလေမုန်တိုင်းတောင်းအောင်လိုင်းလုန်လေ ဟပေါရပ် ဟောင့်(ဝ်)အမိန့်ကော်ဝိုက်။ မေနယ့်လော့် လေမုန်တိုင်းတောင်းလိုင်းလုန်လေန ရပ်ဟင်းကော်ဝိုက်။ 25နောက်လောင်နော့် မွန်းစောင့်လ အောင်းတပဲ့မွန်းလေ "အောင်းမဆူယွန်(မ်)န အဟောင်း"ဆီ ထန်(မ်)ကော်ဝိုက်။ တော်နယ်ကော့် မနော်လေန အိုက်အမ်းဟင်းကော်ဝိုက်။ မနော်လေန "ကွန်းဟောန့်လ ဖောကျေ့" "လှိုင်းတောင်းလုမ်းလေကိုသကော့် နောင်မွန်းဝါညော့ နယ့်ဟေစောင်း(မ်)ဟင်း"ဆီ အချန်းချန်း ဝါဟင်းဝိုက်။ 26နောက်လောင်နော့် မွန်းစောင့်တောင်းတပဲ့မွန်းလေကော့် အောင်းနောင်ဂါလိလဲ ခမ့်ဆီ ထီန်မားရာဟဉ်းဖန်လာ ရာမှိန်းဂါရစကော်ဝိုက်။ 27မွန်းစောင့်လ စားမေခနေဟေး လုန်းမားကော်လော့် ရာမှိန်းဟောန့် ကွန်းဖီမနီးပူးကော်နိမ်လ ဟောန်အောင်းမွန်းစောင့်ကော်ဝိုက်။ မွန်းလ ရာဟုန်းကော့်မအူ ဆေဖကော့်မပါဆီ ရာခနောဝ်ချန်းချိန်းညော့ ကွာခွန့်ကွာလောင်ဝိုက်။ 28ကွန်းဟောန့်လ ဟောန်အောင်းမွန်းစောင့်ကော်လော့် ဟောင့်ဆီ ကွာခနာ့မွန်းစောင့်ဆီ ကွာတောင့်(ဝ်)ခေါင်(ဝ်)ကော်ဝိုက်။ မွန်လ "ဆီးမေနိဗ္ဗာန်န လုစိုင်းစောင့်ဖလား ယေရှု ရာကောမောအလိုအဟောင်းရောင်း၊ အောင်းကော ပီမားနိစတ်၊ အောင်းမော ကောကန်တောစောင့်"ဆီ ကြမ်းကြမ်းဝါကော်ဝိုက်။ 29ဟေဟောင်းဆီနယ့်ဝါနောင်နယ့်ဝါလပေါလော့် မွန်းစောင့်လ အောင်းဖီမနီးဟောန့် ဆီမေကွန်းဟောန့် ဟပေါအောက်မား ဝါကော်ညော့ဝိုက်။ အောင်းကွန်းဟိုက် ဖီမနီးဟောန့်လ အကျင်(မ်)ကျင်(မ်)နိစပ်ဝိုက်။ ကွန်းလေန အောင်းမေးမွန်း၊ တဉ်းမွန်းလေ တောင်းဆိုင်လိတ်လေတောင်း မောက်ဆီ ဝမ့်ဝိုက်ဟင်းမေကော့် မွန်းလ အောင်းဆိုင်လိတ်လေ ကျယ့်ဝေဆီ ရာကွန်းလေမရောင်းရာရိမ်းစမ့်စမ့်ပွန့် အောင်းဖီမနီးလေဟောင့် နယ့်ခမ်ကော်ဝိုက်။ 30စောင့်ယေရှုန အောင်းစမွန်း "နာမယ်မောစေဟောင်း"ဆီ ထန်(မ်)ကော်လော့် ကွန်းဟောန့်ကော့် "နာမယ်ကော ဖီအောင်းမနီးလေမကျေးလေမစော်အောင်းစူးဝိုက် လေဂေါင် "ဆီ ဝါပေါက်ကော်ဝိုက်။ 31ဖီမနီးလေကော့် အောင်းစောင့်ယေရှု "အောင်းဖီမနီးမငမ်းလေ အောင်းဟောင့်(ဝ်)အပြစ် ရာခနောဝ်ခွန်(မ်)လုမ်ဟောန့် ပီဆုန်အီ့အွန်"ဆီ ဝါပေါက်ကော်ဝိုက်။ 32မေနယ့်လော့် ဖွန်မူဖွန်နိမ်လ ခါကျဉ်းဟင်း ခနေနွဲဝိုက်။ ဖီမနီးဟောန့်လေန ခနောဝ်ဖွန်မူဟောန့် ဟပူးအီ့အောင်းဟောဆီ အောင်းမွန်းစောင့် တောင်းပန်ကော်ဝိုက်။ မွန်းစောင့်ကော့် ခွင့်ပြုဟောင့်(ဝ်)ကော်ဝိုက်။ 33နောက်လောင်နော့် ဖီမနီးဟောန့်လေကော့် စားမေကွန်းဟောန့်အောက်ဆီ ကွာစူးရာဖွန်မူဟင်းကော်ဝိုက်။ မေနဲ့လော့် ဖွန်မူကော့် ပိုင်စူးရာဖန်လာဟွေ့ဆွန်ဆီ ဝင့်တိုခနောဝ်ဟွေ့ဆီ နစ်နမ့်ဟင်းကော်ဝိုက်။ 34မေနယ့်လော့် စောင့်လိမ့်မူလေကော့် အောင်းမူဟောန့်လေ ပေးနောင်နယ့်လ မနော်ဟောန်ကော်လော့် ပိုင်ပေါက်ဆီ မှိန်းပါမန့်ပါမကျန် အောင်းသတင်းဟောန့် ကွာလောင်(ဝ်)ပြားကော်ဝိုက်။ 35ကွန်းလေကော့် ဟပေါနယ့်ဟောန် အောင်းအဖြစ်ပျက်ဟောန့် စားမေခနောဝ်မှိန်း အောက်ဟင်းမားဆီ ထီန်စူးမားရာစောင့်ယေရှုဟင်းကော်ဝိုက်။ မေနယ့်လော့် ကွန်းဖီမနီးပူးဆီ ဟိုင်ကော်လ ဆေလေဖလေနွန်ဆီ ခတောင့်တဉ်းမွန်းစောင့် နောင်ကွန်းနီးညော့ နှောင်ဆီအူလ မနော်ဟောန်ဟင်းကော်လော့် အမ်းဟင်းကော်ဝိုက်။ 36နယ့်ရောင့်(ဝ်) ကွန်းနယ့်ဟောန်အဖြစ်အပျက်ဟိုင့်တောင်းလုန်န ကွန်းဟောန့် ဆီမေအောင်းဖီမနီးပူးလ ဟိုင်ကော်ဝါလ လောင်(ဝ်)ပြားဟင်းဝိုက်။ 37ဆီးမေမှိန်းဂါရစ ကွန်းမားလေတောင်းလုန်န အိုက်ကိုးဟင်းကော်ညော့ အောင်းစောင့်ယေရှု ဆီမေမှိန်းဟောန့် ဟအောက်ကွာကော်ဆီ တောင်းပန်ဟင်းကော်ဝိုက်။ စောင့်ယေရှုတောင်း တပဲ့မွန်းစောင့်န ခွန့်ခနေဟေးဆီ စားမေမှိန်းဟောန့် အောက်မားကော်ဝိုက်။ 38ကွန်းဖီမနီးပူးဆီ ကွန်းအောင်းဟိုင်ကော်လ တောင်းမွန်းစောင့်တောင်း ခစောင်း(မ်)ဆီ ဝါကော်ဝိုက်။ မေနယ့်လော့် စောင့်ယေရှုလ အောင်းစမွန်း မဟစောင်း(မ်)ဆီ 39"စောင့်ဖလားလ ခနေမော အောင်းနီးလေ ဟေဟောင့်(ဝ်)မားနောင်နူးဝါလ အောင်းစောင့်ဟုန်းမဆူတောင်း အောင်းကွန်းတောင်းလုန် ကွာလောင်(ဝ်)ပြားကော်"ဆီ ဆောင်ဝိုက်ကော်ဝိုက်။ နောက်လောင်နော့် ကွန်းဟောန့်လ မှိန်းတော်ပေါစောက် ကွာဆီ အောင်းအဖြစ်ပျက်ဟိုင့်လေ လောင်(ဝ်)ပြားကော်ဝိုက်။ 40နောက်လောင်နော့် စောင့်ယေရှုန ကြွပေါက်ပါ့နောင်ဖတ်ပေါန့်ကော်လော့် ကွန်းဖွန်အောင်းထထလေန ဟပ်ထဟင်းကော်ဝိုက်။ 41ကွန်းယုဒ စောင့်ပေါက်စလပ် ကော့်စိုင်းကော်နိမ်လ ခနာ့စောင့်ယေရှု တောင့်(ဝ်)ခေါင်(ဝ်)ဆီ နှောင်ကော်ဝိုက်။ နာမယ်မွန်းလ ယာဣရုဝိုက်။ မွန်းလ အောင်းစောင့်ယေရှု ဟကြွမားရာဟုန်းမွန်းဆီ ပန်းကော်ဝိုက်။ 42ဟေဟောင်းဝါလ ရာမွန်း အဆတ်ဆစ်(ပ်)ဆောင်(န်)ပီး အောင်းသကောင့်(ဝ်)သိုင်း လုဆောင်(ဝ်)ကော်နိမ်ရောင်းဝိုက်။ မွန်းလ ပေးလုဆောင်(ဝ်)ယာဣရု ကော်နိမ်ဝိုက်။ စောင့်ယေရှုကော့် ကြွကော်ရာဟုန်းမနော်လော့် ရာနာ့ခွန်တန်း ဖွန်ကွန်းလေကော့် တောင်းမွန်းစောင့်တောင်း စောင်း(မ်)ဟင်းမားကော်ဝိုက်။ 43ခနောဝ်ကွန်းဖွန်ဟောန့်လ ကော့်ယဉ်းကော်နိမ် ပေးရောဂါနေ့လေ့ထောန်လ ဆစ်(ပ်)ဆောင်(န်)ပီးရောင်းကော့်ဝိုက်။ ကော့်ယဉ်းဟောန့်လ ရာမွန်း ကာအောင်းရောင်း ငွန်းလေခမ်ဆွန်း(မ်)ဆီ ရားရာစောင့်ထိုးရာ့လေကော့် စောင့်ထိုးရာ့ထောကော့် တော်ပေါဟိုင် မရားပဲ့ဝိုက်။ 44ကော့်ယဉ်းဟောန့်ကော့် ခလောင်စောင့်ယေရှု တော်ပေါထီန်ကွာဆီ ထိအောင်းဆေ့လုန်စောင့်ယေရှုကော်လော့် ချရှ်ချန်း ရောဂါမွန်း အောင်းနေ့လေ့ထောန်လ ရပ်ကော်ဝိုက်။ 45စောင့်ယေရှုကော့် "ဖောထိမား အောင်းကောလ"ဆီ ထန်(မ်)ကော်လော့် ဖွန်ကွန်းလေန အောင်းမောစောင့် ဟောမထိစောင့်ဆီ ဝါပေါက်ဟင်းကော်ဝိုက်။ မေနယ့်လော့် ကွန်းဖွန်လေန ဟီးတော်ဟင်းဆီအူညော့ ပေတရုလ "စောင့်ယေရှု ရာခန့်ဟဉ်းမောစောင့်လ ဖွန်ကွန်းလေ တေး(မ်)ဟောဆီ ဟီးတော်ဟင်း"ဆီ ဝါပေါက်ကော်ဝိုက်။ 46တော်နယ့် စောင့်ယေရှုလ "ကော်နိမ်မကော်နိမ် ထိမားအောင်းကော ဟေဟောင်းဝါလ ဆီမေကော အစွမ်းလေ အောက်ကော်ဆီ ကောနယ့်ခံစား"ဆီ ဝါပေါက်ကော်ဝိုက်။ 47ကော့်ယဉ်းဟောန့်ကော့် မအူပဲ့ကော့်ဆီ ရာခနာ့စောင့်ယေရှု တောင့်(ဝ်)ခေါင်(ဝ်)ဆီ မွန်းထိကော်နွေ့ဆပ် ရောဂါမွန်း ချရှ်ချန်းကော့် ဟိုင်ကော်ဆီ အောင်းကွန်းတောင်းလုန် လော်(ဝ်)ပြားကော်ဝိုက်။ 48မွန်းစောင့်ကော့် အောင်းကော့်ယဉ်းဟိုက် "အစောင် မောနီးကော်လ ကောပ့်မောယွန်(မ်)ညော့ စောင့်ဖလားလ အောင်းစမော ဟငြိမ်းချမ်းကော်"ဆီ ဝါကော်ဝိုက်။ 49တကြားမွန်းစောင့်ဝါနောင်နယ့်ညော့ ဆီမေရာဟုန်းယာဣရုလ ကွန်းကော်နိမ်ထီန်မားဆီ "လုဆောင်(ဝ်)မောစောင့်လ သိုင်းကော်စောင့်၊ အောင်းစစောင့် ပီကွာနှောက်ယှက်ကော့်"ဆီ အောင်းယာဣရု မားဝါကော်ဝိုက်။ 50စောင့်ယေရှုကော့် နယ့်ဟဉ်းခွမ်းဟောန့်ကော်လော့် ယာဣရု "မောပီကြာပါ၊ အောင်းစောင့်ဖလားနဲဟော်ယွန်(မ်) လုဆောင်(ဝ်)မော တနီးပေါက်မား"ဆီ ဝါကော်ဝိုက်။ 51မွန်းစောင့်ကော့် မေခေါင့်(ဝ်)ဟုန်းယာဣရုလ ပေတရု၊ ယောဟန်၊ ယာကုပ်တောင်း ပေါ်မယ်လအောင်လေနဲဟော် အောင်းကျန်အောင်းဖော မဟခေါင့်(ဝ်)ဝိုက်။ 52ကွန်းတောင်းလုန်ကော့် လအောင်ဟောန့် သိုင်းကော်ဆီ ဟိုင့်ဟင်းကော်ဝိုက်။ တော်နယ်ကော့် စောင့်ယေရှုလ "လအောင်ဟိုင့် မသိုင်းအွန်၊ မွန်းနောင်းနောက်ကော်"ဆီ ဝါကော်လော့် 53ကွန်းလေကော့် အောင်းမွန်းစောင့် မားအောဝ်မောဝ်ဟင်းကော်ဝိုက်။ ဟေဟောင်းဝါလ ကော့်ယဉ်းဟောန့်သိုင်းကော်ဝါလ မနော်ဟုဝိုက်ညော့ဝိုက်။ 54စောင့်ယေရှုန အောင်းမေးကွန်းသိုင်းဟောန့် ကမ်းဆီ "ကော့်ယဉ်း လုပဲ့ကော့်"ဆီ ဝါကော်ဝိုက်။ 55မေနယ့်လော့် လအောင်ဟောန့်ကော့် ချရှ်ချန်းအဆတ်ခေါင့်(ဝ်)ပေါက်မားဆီ လုဆီနှောင်ကော်ဝိုက်။ စောင့်ယေရှုကော့် အောင်းပေါ်မယ်လအောင်ဟိုင့် ခေါင်ကျဉ်းလိမ့်ကော်အွန်ဆီ ဝါကော်ဝိုက်။ 56ပေါ်မယ်လအောင်ဟောန့်ကော့် အမ်းဟင်းကော်ဝိုက်။ တော်နယ်ကော့် မွန်းစောင့်န အောင်းအဖြစ်ပျက်ဟိုက်လ အောင်းဖောကော့် ပီလောင်(ဝ်)ပေါက်ဆီ ဆောင်ဝိုက်ကော်ဝိုက်။
Currently Selected:
Luke 8: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
