Luke 7
7
1အောင်းကွန်းတောင်းလုန် လောင်(ဝ်)ပြားဆောန်ပြားရောင့်(ဝ်)ကော်လော့် စောင့်ယေရှုန ပေါက်မှိန်းကပေရနောင်ကော်ဝိုက်။ 2ရာမှိန်းဟောန့် ဖုကောန်းဆစ်မှိန်းရောမကော်နိမ်ရောင်းဝိုက်။ ရာမွန်း အောင်းမွန်းချဉ်းနယ်အားကိုး တပဲ့ကော်နိမ်ရောင်းဝိုက်။ ခဟိုက်လ ခိုင့်နောင်(ဝ်)ဆီ လာကော့်သိုင်းကော်ဝိုက်။ 3ဖုကောန်းဆစ်ဟောန့်လ အကြောင်းစောင့်ယေရှု နယ့်ဟဉ်းကော်လော့် အောင်းအမျိုးခေါင်းဆောင်ဂျူးမောင်းဖောင်လေ ပွယ်ကော်ရာစောင့်ယေရှုဆီ အောင်းခမွန်း တော်ပေါနယ့်ရား အောင်းမွန်းစောင့် ဟကွာပမ်းမားကော်ဝိုက်။ 4ခေါင်းဆောင်ဟောန့်လေန ကွာရာမွန်းစောင့်ဆီ ဟပေါနယ့်စွယ်အောင်းမွန်း ကွာတန်ပြားကော်ဝိုက်။ ခေါင်းဆောင်ဟောန့်လေန "ဖုကောန်းဆစ်ဟိုက်လ အောင်းမောစောင့်ကယ်န ခမ်သင့်စောင့်။ 5မွန်းန အောင်းကွန်းအမျိုးဟောဟောက်ဆီ စလပ်ဆောင်နိမ်ကော့် တောင့်ဆီ မွန်းလှူမားအွန်"ဆီ တန်ပြားကော်ဝိုက်။" 6ကောပ့်နယ့်ညော့ စောင့်ယေရှုလ တောင်းမနော်တောင်း ကြွမားကော်ဝိုက်။ တောင်းဟုန်းဖုကောန်းဆစ်ဟောန့်တောင်း မကောင့်(ဝ်)၊ မကိုင်းအင် ထီန်မားကော်လော့် ဖုကောန်းဆစ်ဟောန့်န အောင်းတကော့်မွန်းမောင်းဖောင် ပွယ်ဆီ အောင်းမွန်းစောင့် "မောစောင့်လ အတွိုက်ကောတောင်း ဒုက္ခခမ်ဆီ ပီကြွမား ဟုန်းကောခလ မောစောင့်ဟပေါနယ့်ကြွမား ရာကောခ တောင်းမောစောင့်တောင်း မတန်စောင့်။" 7နောင်နယ့်မကား "ရာမောစောင့် ကောဟပေါနယ့်ကွာခေါက်(ပ်)ကော့် တောင်းကောတောင်း မတန်ခ။ မောစောင့် ဟောင့်(ဝ်)အမိန့်အင်တောင်း ခကောလ ရောဂါဟိုင်ပဲ့စောင့်။ 8ခတောင့်ကောကော့် စစ်သားလေ မကျေးမလေမစော်ရောင်းဆီ မနော်ကော့် နောင်ကောဝါညော့ နယ့်ဟေစောင်း(မ်)ဟင်း။ ကောလ အောင်းစစ်သားကော်နိမ် 'ကွာ' ဆီ ဟောင်ပေါဝါကော် မွန်းနယ့်ကွာ။ နောက်လောင်နော့် အောင်းစစ်သားကော်နိမ် 'မား'ဆီ ဟောင်ပေါဝါကော် မွန်းနယ့်မား။ ကောလ အောင်းခကောလေ 'အောင်းထိုင့်ဟေ'ဆီ ပေါဝါကော် မနော်နယ့်ဟေစောင့်။ 9အောင်းဝါနောင်နယ့်လ မွန်းစောင့်နယ့်ဟဉ်းကော်လော့် အမ်းအားကြီးဆီ အောင်းစောင်း(မ်)မားခလောင်မွန်း ကွန်းတောင်းလုန်န "ကောခဝါအောင်းမဆူလ ရာမှိန်းအစ္စရေးဟောန့် နောင်နယ့်ပွန့်အောင်းယွန်(မ်) မဟောန်ကော်(ဝ်)အွန်"ဆီ ဝါကော်ဝိုက်။ 10ကွန်းအောင်းဖုကောန်းဆစ်ပွယ်ကော်လေ ထိန်ပေါက်ဟုန်းကော်လော့် ခဖုကောန်းဆစ်လ အူနီးကော်ဝါလ မနော်နယ့်ဟောန်ဟင်းကော်ဝိုက်။ 11နောက်လောင်ဝမ်းနိမ်လော့် မွန်းစောင့်ယေရှုကော့် တောင်းတပဲ့မွန်းတောင်း ကြွကော်ရာမှိန်းနာဣနကော်လော့် ကွန်းတောင်းလုန်ကော့် စောင်း(မ်)ဟင်းကော်ဝိုက်။ 12အစောင် စောင့်ယေရှုလ ရာခန့်ဟဉ်း(မ်)နာ့ဆွတ်တူးမှိန်းထီန်ကော်လော့် စအလောင်းကွန်းသိုင်းကော်နိမ် ကွန်းကမ်ဖောင်လေန လာတဖောင်(န်)ဆီ တောင်းထန်းစန်တောင်း ဟမ်အောက်မားရာခနောက်မှိန်းဟင်းကော်ဝိုက်။ ကွန်းသိုင်းဟောန့်န ပေးလုစိုင်းမယ်ဟန့်ကော်နိမ်အင်ဆီ ကွန်းအူရာမှိန်းဟောန့်လေကော့် တောင်းမယ်ဟန့်တောင်း စောင်း(မ်)ဆုန်ဟင်းကော်ဝိုက်။ 13မွန်းစောင့်လ ဟောန်အောင်းမယ်ဟန့်ဟောန့်ကော်လော့် အိုက်အီနူကော်ညော့ "ပီဟိုင့်"ဆီ ဝါကော်ဝိုက်။ 14နောင်လောင်နော့် မွန်းစောင့်ကော့် အောင်းကွန်းလေဟမ်မား ရာခန့်ကွန်းသိုင်းဟောန့် ကွာစူးဆီ အောင်းထန်းစန် တောင်းမေးမွန်းစောင့်တောင်း ထိကော်ဝိုက်။ မေနယ့်လော့် ကွန်းစောင့်ဟမ်ထန်းစန်လေကော့် ရပ်ဟောင့်(ဝ်)ဆီ မွန်းစောင့်ကော့် "လအောင်အင် အောင်းမောကောတဝါ လု"ဆီ ဝါကော်ဝိုက်။ 15နောင်နယ့်ဆီ စောင့်ယေရှုဝါကော်လော့် ချရှ်ချန်းကော့်စိုင်းအောင်းသိုင်းဟောန့်န နှောင်ဆီ တန့်ခွမ်းမားကော်ဝိုက်။ နယ့်ရောင့်(ဝ်) မွန်းစောင့်လ အောင်းကော့်စိုင်းဟောန့် အပ်ပေါက် ရာမယ်မွန်းကော်ဝိုက်။ 16ကွန်းတောင်းလုန်ကော့် အမ်းဟင်းအောဟင်းဆီ ချီးမွမ်းဂုဏ်တော်စောင့်ဖလားဟင်းကော်ဝိုက်။ မနော်လေကော့် "ခနောဝ်ကြားဟော ကွန်းပညာရောင်းပရောဖက်ပါးနိမ် ပေါ်မားကော်။ စောင့်ဖလားလ အောင်းကွန်းမွန်းလေ တွဲမားကော်"ဆီ ဝါဟင်းကော်ဝိုက်။ 17နောက်လောင်နော့် အောင်းမွန်းစောင့်ဟေမား သတင်းဟိုင့်လေန ရာမှိန်းယုဒတောင်းလုန်တောင်း မန့်အောင်းကောင့်(ဝ်)လေပါ ပျံ့ကော်ဝိုက်။ 18နောက်လောင်နော့် တပဲ့ရေနှစ်မင်္ဂလာဆရာယောဟန်လေကော့် အကြောင်းစောင့်ယေရှုလေတောင်းလုန် အောင်းစယောဟန် လောင်(ဝ်)ပြားဟင်းကော်လော့် မွန်းန အောင်းတပဲ့မွန်းဆောင်(န်)ကော့် ဟောင့်ကော်ဝိုက်။ 19ယောဟန်န အောင်းတပဲ့ဟောန့်ဆောင်(န်)ကော့် "မောစောင့်လ စောင့်ဖလားအောင်းတကြွမားလေး၊ နယ့်ပေါမစော် စောင့်ဖလားအောင်းတန်းတီပါးနိမ် ဟောတနယ့်ထအွန်လေး"ဆီ ဟပေါနယ့်ကွာထန်(မ်) အောင်းမနော် ပွယ်ကော်ရာစောင့်ယေရှုကော်ဝိုက်။ 20ကွန်းဟောန့်လေကော့် ရာစောင့်ယေရှု ထီန်ဟင်းမားကော်လော့် "ရေနှစ်မင်္ဂလာ ဆရာယောဟန်လ ရာမောစောင့်ပွယ်ဆီ အောင်းစဟော မောစောင့်န စောင့်အောင်းတကြွမားလေး နယ့်ပေါမစော် တနယ့်ထအောင်းတန်းတီပါးနိမ်အွန်လေး"ဆီ ကွာထန်(မ်)ဟင်းအောင်းမွန်းစောင့်"ဆီ ထန်(မ်)ဟင်းကော်ဝိုက်။ 21မေနယ့်လော့် မွန်းစောင့်ယေရှုန အောင်းကွန်းမအူနီးလေ ရားဟောင့်(ဝ်)ဆီ ဆီမေအောင်းကွန်းဖီမနီးပူးလေကော့် အောင်းဖီမနီးလေ ဟော့်အောက်ဆီမကား မွန်းန အောင်းကွန်းဟွေတားမဟောန်လေကော့် ဟွေတားဟဟောန်ပေါက်မားကော်ဝိုက်။ 22နောက်လောင်နော့် မွန်းစောင့်ကော့် အောင်းတပဲ့ယောဟန်လေ "အောင်းမဆူနယ့်ဟောန်လေတောင်းလုန် အောင်းစယောဟန် ကွာလောင်(ဝ်)ပြားကော်။ ကွန်းဟွေတားမဟောန်လေကော့် ဟောန်မားကော်၊ ကွန်းမေးလေတဉ်းလေမနီးကော့် ပိုင်းပဲ့မားကော်၊ ကွန်းပေးအနာလေကော့် ဟိုင်ဟင်းကော်၊ ကွန်းပဉ်ဟူမနယ့်ဟဉ်းလေကော့် နယ့်ဟဉ်းမားကော်၊ ကွန်းသိုင်းလေကော့် ခွန်းပေါက်ဟင်းမားကော်၊ ကွန်းဖန်လေကော့် သတင်းအောင်းနီး နယ့်ဟဉ်းမားကော်။ 23အောင်းကောဟေလေတောင်းလုန် အောင်းကွန်းမဆန့်ကျင် စောင့်ဖလားန မင်္ဂလာအောင်းနီးလေ တဟောင့်(ဝ်)"ဆီ ဝါကော်ဝိုက်။ 24တပဲ့ယောဟန်လေ ပေါက်ကွာကော်ရောင့်(ဝ်) မွန်းစောင့်လ အောင်းကွန်းဖွန်လေတောင်းလုန် အကြောင်းယောဟန် လောင်(ဝ်)ပြားကော်လ "မဆူလေ ကွာခနောဝ်ထိန်လုန်ဆီ ကွာတွဲအောင်းဖော။ နောင်ဖလုမ်းညော့ အောင်းဟေစောင်း(မ်) အောင်းတိန့်မိုင့်အော့ဆွန်လေလေး။ 25မဆူလေန အောက်ခနောက်ဆီ ခဟောန်အောင်းဖောဟင်း၊ ခဟောန်အောင်းစ ကွန်းနွန်ဆေဖအောင်းနီးလေလေး၊ အောင်းခေါန်နောက် ဆေနီးဖနီးနွန်ဆီ ကွန်းခမ်စည်းစိမ်လေန ခနောဝ်ဟော်စောင့်ခွန်ဟော်ခမ်းနဲဟော် တနယ့်ဟောန်ဟော။ 26မဆူအောက်ခနောက်ဆီ ခခေါက်(ပ်)အောင်းကွန်းနောင်နူး။ ခခေါက်(ပ်)အောင်းပညာရောင်းပရောဖက်လေး။ စော်ကျဉ်းနော့်။ ကောခဝါအောင်းမဆူလ မွန်းန နောင်ပညာရောင်းပရောဖက်လေမကား ပေးကွန်းမြတ်။ 27ခနောဝ်လိကျမ်းဟိုက် အကြောင်းယောဟန်ပြားဝိုက်လ "ကော၊ စောင့်ဖလားန ခွန်တန်းအောင်းလုစိုင်းကောတနယ့်ကွာ ရာခနာ့လေန အဆင်သင့်ဟပေါပေး နောင်ကွန်းကောစောင့်(ဝ်)ကော်ကော်နိမ်ညော့ ကောတပွယ်ကော်"ဆီ ပေးဝိုက်။ 28အောင်းစမဆူ ကော်တဝါ။ ဆာဆီယောဟန်အောင်းမြတ် ခနေကမ္ဘာဟိုက် ကော့်နိမ်ကော့် မလိမ့်အွန်။ တော်နယ့် ခနောဝ်သာသနာစောင့်ဖလားန ကွန်းအောင်းချဉ်းအရေးမပါလ ဆာဆီယောဟန်မကားမြတ်ဝိုက်"ဆီ ဝါကော်ဝိုက်။ 29ခနောဝ်ကွန်းစောင့်ထောင်(မ်)ခွမ်းစောင့်ယေရှုလေန ရာယောဟန်ခမ်ရေနှစ်မင်္ဂလာမားဆီ အောင်းခွမ်းစောင့်ဖလား ကွန်းစောင်း(မ်)ဟေန ကွန်းကျေ(ပ်)ကာလေကော့်ပါဝိုက်။ 30တော်နယ့် ဖာရိရှဲလေတောင်း ကွန်းကျမ်းစမ်လေန အောင်းခွမ်းစောင့်ဖလား ဟပေါထောင်(မ်)တောင်း ဟပေါနယ့်ခမ်ရေနှစ်မင်္ဂလာ ရာယောဟန်န ကွန်းမခဟေဟင်းဝိုက်။ 31နောက်လောင်နော့် မွန်းစောင့်ဆက်ဆီဝါလ "မဆူလေန တောင်းအဟောင်းတောင်းတူ၊ ပေးကွန်းနောင်နူးလေ"ဆီ ဟောင်ပေါဝါ 32ရာခနောဝ်ဈေးနှောင်ဆီ နောင်လအောင်ဆေးလေညော့" ဟော မော်တေမ်းချမ်းလေကော့် မဆူမကဟင်း၊ ဟော ဟိုင့်ပြားကော့် မဆူမဟိုင့်ဟင်း"ဆီ တောင်းဝါဟင်းတောင်း တူဝိုက်။ 33ရေနှစ်မင်္ဂလာဆရာယောဟန်လ ခေါင်ကျဉ်းလေမကျဉ်း၊ အောင်းစန်မူးဝိုင်လေကော့် မဆို့ဆီ ပေါအောက်ခရီးလော့် မဆူလေန "ယောဟန်လ ဖီမနီးပူးကော်"ဆီ တဝါဟင်းနော့်။ 34တော်နယ့် လူ့သားတော်လ နောင်ပွန်ဆီ ခေါင်ကျဉ်းလေကျဉ်းဆီ ဟောင်ပေါအောက်ခရီးကော့် မဆူလေန "စောင့်ယေရှုလ ကွန်းကျဉ်းရောင်(ဝ်)၊ ကွန်းကျေ(ပ်)ငွန်း၊ ကွန်းမနီးလေတောင်း ပေးလကော့်ဟင်း" ဆီ တဝါဟင်း။ 35တော်နယ့် ခွန်တန်းစောင့်ဖလား စော်ဝါလ တွဲအောင်းကွန်းစောင်း(မ်)ဟေလေဆီ ဟုပဲ့။ 36ဖာရိရှဲကော်နိမ်လ ရာဟုန်းမွန်း အောင်းစောင့်ယေရှု ဟမားကျဉ်းခေါင့်(ဝ်)မားခမ်ဆီ ပန်းကော်ဝိုက်။ ကောပ့်နယ့်ညော့ မွန်းစောင့်လ ရာဟုန်းဖာရိရှဲဟောန့်ကွာဆီ စကွာကျဉ်းခေါင့်(ဝ်) ကွာနှောင်ရာစားပွဲကော်ဝိုက်။ 37ရာမှိန်းဟောန့် ကော့်ယဉ်းအပြစ်ရောင်းကော်နိမ်လ ခါအောင်းမွန်းစောင့်ဆီ ရာဟောန့် ထီန်မားကော်ဝိုက်။ မွန်းလ အောင်းခေါန်နှောက် တောင့်(ဝ်)နမ့်ဟောမ်တောင့်(ဝ်)နိမ် ဆေ့မားဝိုက်။ နယ့်ရောင့်(ဝ်) မွန်းလ ခလောင်စောင့်ယေရှု မားဆီ မားစိန်ကော်ဝိုက်။ 38နောက်လောင်နော့် ကော့်ယဉ်းအပြစ်ရောင်းလ စောဝ်မအူနီးဆီ ဟိုင့်ကော်ညော့ နမ့်တားမွန်းလ ရာတဉ်းမွန်းစောင့် ဟယမ်းကော်ညော့ တောင်းခေါင်ဟိုမွန်းတောင်း တော်ပေါဟိုင့် စေ့ဟောင့်(ဝ်)ကော်ဝိုက်။ အောင်းတဉ်းမွန်းစောင့် ကော့်ယဉ်းလ နွုမ်းဆီ တောင်းနမ့်ဟောမ်တောင်း တားဟောင့်(ဝ်)ကော်ဝိုက်။ 39ဖာရိရှဲအောင်းပန်းမား အောင်းစအောင်းမွန်းစောင့်န ဟောန်အောင်းအကြောင်းဟိုင့်ကော်လော့် "ကွန်းဟိုက်လ ပရောဖက်ကွန်းပညာရောင်း ဟောင်ပေါစော် ကွန်းထိအောင်းမွန်းလ ပေးကော့်ယဉ်းနောင်နူးဝါ တနယ့်ဟုဝိုက်။ ကော့်ယဉ်းမနီးဝါလ တနယ့်ဟု"ဆီ ခနောဝ်စောဝ်မွန်း တွေးကော်ဝိုက်။ 40မွန်းစောင့်ကော့် အောင်းဖာရိရှဲ "ရှိမုန် ကောခဝါခွမ်းကမ်းနိမ် အောင်းစမော"ဆီ ဝါကော်ရောင့်(ဝ်) ရှိမုန်လ "စောင့်၊ ခဝါအဟောင်း၊ ဝါမားခ"ဆီ ဝါပေါက်ကော်ဝိုက်။ 41မွန်းစောင့်ကော့် "ရာကွန်းကူ့ငွန်းကော်နိမ်နာ့ ကွန်းဆောင်(န်)ကော့် မားကူ့ငွန်းဟင်းဝိုက်။ ကော်နိမ်လ ငွန်းဟာ့ပတ်၊ အောင်းကျန်ကော်နိမ်လ ငွန်းဟာ့ဆစ်(ပ်) အကြွေးတန်ကော်ဝိုက်။ 42မနော်လေ အောင်းစောင့်အကြွေးဟိုက် မဆိုင့်ပဲ့ညော့ စောင့်အကြွေးလ အကြွေးမဆူဆောင်(န်)ကော့် ပီစဆိုင့်ကော့်ဆီ ဟောင်ပေါဝါ အောင်းစောင့်အကြွေးဟိုက် ဖောချဉ်းကျေးဇူးတနယ့်တန်"ဆီ အောင်းဖာရိရှဲ ထန်(မ်)ကော်ဝိုက်။ 43ရှိမုန်လ "အထန်ကောပေါလော့် ကွန်းအကြွေးကူ့ ချဉ်းနမ်လ ချဉ်းကျေးဇူးတနယ့်တန်"ဆီ ဝါကော်ဝိုက်။ စောင့်ယေရှုကော့် "အောင်းမောဝါ စော်ကျဉ်းနော့်"ဆီ ဝါပေါက်ကော်ဝိုက်။ 44မွန်းစောင့်လ ပါ့ကော့်ယဉ်းဟောန့် လှည့်တွဲဆီ အောင်းရှိမုန် "မော အောင်းမွန်းဟေအလေးအွန်လေး။ ကောထီန်မားရာဟုန်းမောလ မော အောင်းစဆွတ်တဉ်းကော နမ့်အင်ကိုးမဟောင့်(ဝ်)မား။ တော်နယ့် ကော့်ယဉ်းလ အောင်းတဉ်းကော တောင်းနမ့်တားမွန်းတောင်း ဆွတ်ဆီ တော်ပေါဟိုင့် တောင်းခေါင်ဟိုမွန်းတောင်း စေ့မားဟောင့်(ဝ်)ကော်။ 45မောလ မေကောကြွမား နွုမ်းဆီမဟတ်(ပ်)ထ။ ကော့်ယဉ်းဟိုက်လ အောင်းတဉ်းကော အဆက်မပြတ်နွုမ်း။ 46မောလ အောင်းဟိုကော တောင်းသံလွင်ဆီတောင်း မတားဟောင့်(ဝ်)မားမေကော့် မွန်းန အောင်းခေါန်ရောင်(ဝ်)နမ့်ဟောမ်တောင်း အောင်းတဉ်းကော တားမားဟောင့်(ဝ်)ကော်။ 47ကောပ့်နယ့်ညော့ အောင်းမောကောခဝါလ "အောင်းအပြစ်ကော့်ယဉ်းဟိုင့်လေတောင်းလုန် အောင်းခွင့်လွတ်နယ့်ခမ်ညော့ မွန်းန မကျေးလေမစော် ဟောက်ဝိုက်။ တော်နယ်ကော့် အပြစ်စောင်နိန်အင် ကွန်းနယ့်ခမ်အောင်းခွင့်လွတ်န စောင်နိန်နဲဟော် တဟောက်ဟော"ဆီ ဝါကော်ဝိုက်။ 48နယ့်ရောင့်(ဝ်) မွန်းစောင့်လ အောင်းကော့်ယဉ်းဟောန့် "အပြစ်မောတောင်းလုန် ကောခွင့်လွတ်ကော်"ဆီ ဝါကော်ဝိုက်။ 49မေနယ့်လော့် စောင့်ချိုက်မောင်းဖောင်လေကော့် "အောင်းအပြစ်လေကိုးသကော့် ခွင့်လွတ်ပဲ့ဝါလ ဖော"ဆီ မနော်အချန်းချန်း ဝေဖန်ဟင်းကော်ဝိုက်။ 50တော်နယ့် မွန်းစောင့်ယေရှုကော့် အောင်းကော့်ယဉ်းဟောန့် "မော ယွန်(မ်)အောင်းကောညော့ စောင့်ဖလားန အောင်းစမော ကယ်ကော်။ မောငြိမ်းငြိမ်းချမ်းချမ်း ကွာဆီနွိုက်ကော်"ဆီ ဝါကော်ဝိုက်။
Currently Selected:
Luke 7: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
