Luke 2
2
1မေအချီန်ဟောန့်လော့် စောင့်ပိုင်မှိန်းရောမ စောင့်ခွန်ဟော်ဖိုင်ဩဂုတ္တုလ ကွန်းအူခတောင့်မှိန်းရောမအင်ပါယာလေတောင်းလုန် တနယ့်ကျေပ်အိမ်ထောင်စုစရန်းဆီ အမိန့်ထုမားဝိုက်။ 2နောင်နယ့်ဆီ မေအိမ်ထောင်စုစရန်း ပထမဆုံး စဆီကျေပ်န ကုရေနိလ ရာမှိန်းဆီးရီးယား ပေးစောင့်ခွန်ဟော်ငွန်းဝိုက်။ 3ကောပ့်နယ့်ညော့ ကွန်းတောင်းလုန်န ရာမှိန်းမန့်ပူလဉ်ရာလဉ်မနော်အူလေ ပေါက်ဆီ ဟပေါနယ့်ဟောင့်ဝ်အိမ်ထောင်စုစရန်း ကွာဟင်းကော်ဝိုက်။ 4ယောသပ်လ ဆီမေမှိန်းဂါလိလဲ ဆီမေမှိန်းနာဇရက် အောက်ကွာဆီ မှိန်းစောင့်ခွန်ဟော်ခမ်းဒါဝိဒ် တော်မှိန်းယုဒ မှိန်းဗက်လင်ပွန့် ဟပေါနယ့်ဟောင့်ဝ်အိမ်ထောင်စုစရန်း ကွာကော်ဝိုက်။ ဟေဟောင်းဆီပေါဝါလော့် မွန်းန ဆီမေအမျိုးစောင့်ခွန်ဟော်ခမ်းဒါဝိဒ် ပေးကွန်းအောင်းလုန်းမားကော်နိမ်ညော့ဝိုက်။ 5ယောသပ်န တောင်းမာရိတောင်း ဟပေါနယ့်ဟောင့်ဝ်အိမ်ထောင်စုစရန်းဆီ ကွာဟင်းကော်ဝိုက်။ ဟေဟောင်းဆီပေါဝါလော့် မာရိလ တောင်းမွန်းတောင်း စေ့စပ်ဝိုက်ဟင်းဆီ တောင့်ရောင်းညော့ဝိုက်။ 6တကြားမနော်ဆောင်န်ကော့် အူရာမှိန်းဗက်လင်ဟင်းလော့် မာရိလ အချီန်တလိမ့်လအောင် ထီန်မားကော်ဝိုက်။ 7နောက်လောင်နော့် မာရိန လုစိုင်းအောင်းပထမ လိမ့်မားကော်ဝိုက်။ မေအချီန်ဟောန့် အောင်းစမနော် ရာတီစနီးဆောင်းဝ် မရောင်းကော့်ညော့ မွန်းန အောင်းစလုစိုင်းမွန်း ဖာ့ချိအောင့်မ်တောင်းပတ်ဆီ ရာဟန်းငိုး ဝိုက်ဝိုင့်ကော်ဝိုက်။ 8မေခမ်ဟောန့်ညော့ ကွန်းလိန့်တိုးမောင်းဖောင်န ရာခန့်မှိန်းဗက်လင် ရာစာကျတ်လေ အောင်းတိုးမနော် ပေါင့်ဝ်ဆီ အူဟင်းဝိုက်။ 9မေနယ့်လော့် ဆီမေစောင့်ဖလားအောင်းမား ဖီဒေဝါပါးနိမ်လ ရာခနာ့မနော် ချရှ်ချန်း ပေါ်မားဆီ ရာခန့်ဟဉ်းမ်ကွန်းလိန့်တိုးလေ ကောပ့်အစွမ်းစောင့်ဖလားညော့ လိန်းတွန်တွန်ပေးမားဆီ ကွန်းလိန့်တိုးလေကော့် အိုက်နီးကိုးဟင်းကော်ဝိုက်။ 10တော်နယ်ကော့် ဖီဒေဝါလ အောင်းစမနော် “ပီကိုးဟင်း။ ကောလ အောင်းစကွန်းလေတောင်းလုန် အောင်းခနီးပျော်လုန် သတင်းနီးလေ အောင်းဝ်မားရာမဆူ။ 11ဝမ်းနယ့်ကန်းခမ် ရာမှိန်းစောင့်ခွန်ဟော်ခမ်းဒါဝိဒ် မေရှိယဆီအောင်းစေ အောင်းစောင့်ကယ် အတွမဆူ လိမ့်မားကော်။ 12အောင်းစမဆူ နိမိတ်လက္ခဏာလ ရာမှိန်းဗက်လင် အောင်းစမွန်း ဖာ့ချိအောင့်မ်တောင်းပတ်ဆီ ရာခနောဝ်ဟန်းငိုး အောင်းဆောင်ဝ်ခေါင့်ဝ်ဝိုက် အောင်းလအောင်အင် မဆူဟောင်ပေါဟောန် မဆူတဟုဟင်း အောင်းမေရှိယ” ဆီ ဝါကော်ဝိုက်။ 13ချရှ်ချန်း ဖီဒေဝါအောင်းတန်းတီလေန ဆီမေမှိန်းခမ်း လုန်းမားဆီ တောင်းဖီဒေဝါဟောန့်တောင်း အောင်းစောင့်ဖလား ချီးမွမ်းဟင်းကော်ဆီ 14“အောင်းရောင်းရာမှိန်းခမ်း အောင်းစောင့်ဖလား ဟောခချီးမွမ်းစောင့်။ အောင်းရောင်းခနေကမ္ဘာနောင်နဉ်း အောင်းစောင့်ဖလား ကွန်းကပ်ကွန်းဝိုင်ယ်လေတောင်းလုန် ဟငြိမ်းချမ်းသာယာအီ့အွန်” ဆီ ဝါကော်ကော်ဝိုက်။ 15နောက်လောင်နော့် ဖီဒေဝါလေန ရာမှိန်းခမ်း ကြွပေါက်ရောင့်ဝ်ကော်လော့် ကွန်းလိန့်တိုးလေန “ဆီမေဖီဒေဝါ အောင်းအဖြစ်ပျက်စောင့်ဖလားခဟဟုအောင်းစဟောလေ ပေါနယ့်ကွာတွဲ ကွာမှိန်းဗက်လင်ဟင်းစို့” ဆီ မနော်ချန်းချန်း တန့်ဟင်းဝါဟင်းကော်ဝိုက်။ 16ကောပ့်နယ့်ညော့ မနော်လေန ကွာကျန်ကျန်ဆီ ရာမာရိတောင်းယောသပ်ဟော်ဆောင်းဝ် ထီန်ကော်လော့် အောင်းယောသပ်တောင်းမာရိပါ အောင်းလအောင်အင်ခနောဝ်ဟန်းငိုးပါ ခေါက်ပ်ဟင်းကော်ဝိုက်။ 17ကွန်းစောင့်လိမ့်တိုးလေန အောင်းလအောင်အင် နယ့်ဟောန်ရာင့်ဝ်ကော်လော့် အောင်းစမနော် နောင်ဖီဒေဝါလေဝါမား အကြောင်းအောင်းတောင်းလအောင်အင်တောင်းအောင်းဆိုင်လေ အောင်းယောသပ်၊ အောင်းမာရိတောင်း အောင်းကွန်းထောင်မ်ခန့်ဟောန့်လေပါ လောင်ဝ်ပေါက်ဟင်းကော်ဝိုက်။ 18အကြောင်းကွန်းစောင့်လိမ့်တိုးလေဝါ ကွန်းစောင့်နယ့်ဟဉ်းလေကော့် အိုက်အမ်းဟင်းကော်ဝိုက်။ 19တော်နယ်ကော့်ကော့် မာရိလ အကြောင်းအောင်းပေးမားလေတောင်းလုန် ခနောဝ်စောဝ်မွန်း ယဉ်းဖန်ဆီ အောင်းဟောန့်လေန အဓိပ္ပါယ်နောင်နူးရောင်းဝါလ အကျင်မ်ကျင်မ် စဉ်းစားကော်ဝိုက်။ 20ကွန်းလိန့်တိုးလေန ပေါက်ကွာရာစာကျတ်ကော်ဆီ ကောပ်အောင်းမနော်နယ့်ဟောန်မားလေညော့ အောင်းစောင့်ဖလား အိုက်ချီးမွမ်းဟင်းကော်ဝိုက်။ ဟေဟောင်းဆီပေါဝါလော့် အောင်းဟောန့်လေန အောင်းစမနော် နောင်ဖီဒေဝါလေဝါမားညော့ ပေးမားအောင်းတဲ့တဲ့ကော်ညော့ဝိုက်။ 21နောက်လောင်နော့် ပက်ဝမ်းထိန့်ကော်လော့် အောင်းလအောင်အင် ဟပေါနယ့်ဟေအရေဖျားလှီးမင်္ဂလာ အချီန်ထီန်မားကော်လော့် မာရိတောင်းယောသပ်ဟော်လ အောင်းလအောင်အင် မေမာရိတောင့်မရောင်းအွန်ပွန့် နောင်ဖီဒေဝါဝါမားညော့ ယေရှုဆီ နာမယ်ဟောင့်ဝ်ဟင်းကော်ဝိုက်။ 22နောင်မောရှေပညတ်ကျမ်းလေပြားဝိုက်ညော့ အောင်းမာရိ ဝမ်းဟေမင်္ဂလာအောင်းသန့်စင်လေ ရောင့်ဝ်ကော်လော့် မာရိတောင်းယောသပ်ဟော်န အောင်းလအောင်အင်ယေရှု ဟပေါနယ့်အပ်ရာစောင့်ဖလား ဟောင့်ကွာရာမှိန်းဂျေရုဆလင်ဟင်းကော်ဝိုက်။ 23မနော်နယ့်ထီန်မားနောင်နယ့်လ ရာမောရှေပညတ်ကျမ်း နောင်ပြားဝိုက်ညော့ “ကော့်စိုင်းအင်အောင်းကော့်ရောင်ဝ်တိုင်း ဟပေါသန့်ရှင်း ရာစောင့်ဖလား တနယ့်အပ်” တောင်း 24“နုတ်တူ့ဆောင်န်တိုး (နယ့်ပေါမစော်) နုတ်ခိုအောင်းဆေးဆောင်န်တိုး တနယ့်ကပ်” ဆီ နောင်ပြားဝိုက်ညော့ ကပ်ဟင်းကော်ဝိုက်။ 25မေအချီန်ဟောန့် ရာမှိန်းဂျေရုဆလင် ရှုမောင်ဆီအောင်းစေ ကွန်းကော်နိမ်ရောင်းဝိုက်။ မွန်းန အောင်းစောင့်ဖလား ပေးကွန်းဝိုင်ယ်ကွန်းကပ်ဆီ ပေးကွန်းနီးကော်နိမ်ဝိုက်။ မွန်းန အောင်းကွန်းအစ္စရေးလေ ဟပေါနယ့်ကယ်ဆီ အောင်းစောင့်ဖလားပွယ်မား အောင်းမေရှိယ ပေးကွန်းထကော်နိမ်ညော့ ဉာဏ်အလင်းတော်လ ပြားတန်းဆီ 26အောင်းမွန်း “မောလ အောင်းမေရှိယ မနယ့်ဟောန်ဆီ တနယ့်သိုင်းမစော်” ဆီ မေစောင့်ပွန့် အနေဉာဏ်အလင်းတော်တောင်း ဝါမားရောင့်ဝ်ကော်ဝိုက်။ 27မာရိတောင်းယောသပ်ဟော်န အောင်းလအောင်အင်ယေရှု နောင်မောရှေပညတ်ကျမ်းပြားဝိုက်ညော့ ဟပေါနယ့်အပ်ဆီ တကြားဟောင့်မားခနောဝ်ဝမ်းဗိမာန်တော်လော့် ဉာဏ်အလင်းတော်န အောင်းစရှုမောင် ဟပေါနယ့်ခေါင့်ဝ်ခနောဝ်ဝမ်းဗိမာန်တော် ပြားတန်းဟောင့်ဝ်ကော်ဝိုက်။ 28နောက်လောင်နော့် ရှုမောင်န အောင်းလအောင်အင် တောင်းမေးမွန်းတောင်းအွမ့်ဆီ အောင်းစောင့်ဖလား နောင်နယ့်ဆီ ချီးမွမ်းကော်ဝိုက်။ 29“စောင့်ဖလား၊ နောင်ကတိတော်မောစောင့်ဟောင့်ဝ်ဝိုက်ညော့ အောင်းခမောစောင့် အောင်းကောခန အစောင် ဟူရိန်းစောဝ်ရိန်း အခွင့်အောင်းသိုင်း ဟောင့်ဝ်အီ့။ 30ဟေဟောင်းဆီပေါဝါလော့် အောင်းကွန်းတောင်းလုန် တော်ပေါနယ့်ကယ် အောင်းမောစောင့်ပွယ်မား အောင်းစောင့်ကယ် ကောကိုယ်တိုင် နယ့်ကြုံကော်။ 31ကွန်းတောင်းလုန်ကော့် အောင်းစကွန်းအောင်းမောစောင့်မဲဟောင့်ဝ်ဝိုက် အောင်းစမွန်းစောင့် တနယ့်ဟောန်ဟင်းကော့်။ 32မွန်းန အောင်းစကွန်းမှိန်းတန်းတီလေ အောင်းသပြားအောင်းစောင့်ဖလား ပေးနောင်အောင်းလိန်းဆီ အောင်းပေးကွန်းအမျိုးစောင့်ဖလား အောင်းစကွန်းအစ္စရေးလေ အောင်းလေးစားဟပေါနယ့်ခမ် ကွန်းတဟေဟောင့်ဝ်ကော့်ပေး” ဆီ ပေးဝိုက်။ 33မာရိတောင်းယောသပ်ဟော်န အောင်းရှုမောင်ဝါ အကြောင်းလအောင်အင်ယေရှု နယ့်ဟဉ်းဟင်းကော်လော့် အမ်းဟင်းကော်ဝိုက်။ 34နောက်လောင်နော့် ရှုမောင်န အောင်းမာရိတောင်းအောင်းယောသပ်ဟော် ဆုရောန်းဟောင့်ဝ်ဆီ အောင်းမာရိ “စောင့်ဖလားန အောင်းလအောင်မော ရာခနောဝ်ကြားကွန်းအစ္စရေးလေ ကွန်းအောင်းစောင့်ဖလားဟောင့်ဝ်အပြစ်တနယ့်ခမ်လေတောင်း အောင်းကွန်းအောင်းကယ်တနယ့်ခမ်လေ ဟပေါနယ့်ခွဲခြား လိတ်ဝိုက်ရောင့်ဝ်ကော်။ လအောင်ဟိုက်လ ဆီမေစောင့်ဖလား ပေးနိမိတ်လက္ခဏာတူးနိမ်မေကော့် ကွန်းတောင်းလုန်န အောင်းစမွန်း လက်မခမ်ဟင်း။ 35ကောပ့်နယ့်ညော့ အကြမ်အောင်းခနောဝ်စောဝ်ကွန်းလေကော့် တဟပေါ်အောက်မားဆီ နောင်မစ်ဆေမ်အောင်းဖိုင်လန်နိမ် ပေါက်ခေါင့်ဝ်ခနောဝ်မတ်စောဝ်မောကော်ညော့ မောကော့် အိုက်တနယ့်ခံစား” ဆီ ဝါကော်ဝိုက်။ 36ရာတီဟောန့် အောင်းပေးအမျိုးအာရှာ လုဆောင်ဝ်ဖနွေလ ကော့်ယဉ်းပရောဖက်အန္နကော်နိမ်ကော့် ရောင်းဝိုက်။ မွန်းန ထောင့်ဝ်ဖိုဆီ တောင်းပူလုန်မွန်းတောင်း စေပီးအင်ဟော် အူနွေ့ဟင်းမားဝိုက်။ နောက်လောင်နော့် ပူလုန်မွန်းန သိုင်းကော်ဝိုက်။ 37အစောင် မွန်းန ပေးမယ်ဟန့်ကော်နိမ်ဆီ အဆတ်ပက်ဆစ်ပ်ပိုင်းဆီ ရောင်းကော့်ဝိုက်။ မွန်းန ရာခနောဝ်ဝမ်းဗိမာန်တော် ကူမေ့လိုလို အူဆီ ကမ်းခမ်ပါ ကမ်းဝမ်းပါ အောင်းဝိုင်ယ်ဖလား အောင်းရောန်းဆုလေ၊ ရီဟာရီပန်း အောင်းကျဉ်းရှောင်ဆီ ပေါက်ဝ်ဥပုလေ ဟေဆီအူဝိုက်။ 38တကြားရှုမောင်တန့်ခွမ်းအောင်းမာရိတောင်း အောင်းယောသပ်ဟော်လ ကော့်ယဉ်းပရောပရောဖက်အန္နကော့် ရာတီဟောန့် ထီန်မားဆီ ဟောန်အောင်းလအောင်အင်ယေရှုကော်လော့် အောင်းစောင့်ဖလား ချီးမွမ်းကော်ဝိုက်။ နောက်လောင်နော့် အောင်းကွန်းရောင်းရာမှိန်းဂျေရုဆလင်တောင်း အောင်းကွန်းအစ္စရေးတန်းတီလေ တကယ်ဆီ အောင်းစောင့်ဖလားပွယ်မား အောင်းမေရှိယ အောင်းကွန်းစောင့်ထလေတောင်းလုန် အကြောင်းလအောင်အင်ယေရှု လောင်ဝ်ပြားကော်ဝိုက်။ 39နောက်လောင်နော့် မာရိတောင်းယောသပ်ဟော်လ ရာမောရှေပညတ်ကျမ်း နောင်ပြားဝိုက်ညော့ အောင်းခနီးခဟေလေ တော်ပေါကျေ ဟေဟောင့်ဝ်ရောင့်ဝ်ဆီ ရာမှိန်းမနော်အူ ရာမှိန်းဂါလိလဲ ပေါက်ကွာမှိန်းနာဇရက်ဟင်းကော်ဝိုက်။ 40လအောင်အင်ယေရှုရောင်ဝ်မားကော်လော့် ကျန်းမာရေးကော့်နီး၊ တောင်းဉာဏ်ပညာလေကော့်တေးမ်ဆီ ဆီမေစောင့်ဖလား အောင်းစောင့်ဖလားဟောင့်ဝ်နာ့ နယ့်ခံစားဝိုက်။ 41ကူပီးကူပီး ပေါ်မယ်လအောင်အင်ယေရှုလေန အောင်းစပသခါပွဲ ရာမှိန်းဂျေရုဆလင် ကွာဟင်းဝိုက်။ 42ကောပ့်နယ့်ညော့ စောင့်ယေရှု မေအရွယ်အဆတ်ဆစ်ပ်ဆောင်န်ရောင်းလ မနော်လေန အောင်းစပွဲပသခါ နောင်ကွာကောင့်ဝ်ကွာကောင်ဝ်ညော့ ကွာရာမှိန်းဂျေရုဆလင်ဟင်းကော်ဝိုက်။ 43ပွဲပသခါရောင့်ဝ်ကော်လော့် မာရိတောင်းယောသပ်ဟော်လ လအောင်အင်ယေရှု ကျန်ဝိုက်ရာမှိန်းဂျေရုဆလင်ကော်ဝါလ မဟုဟင်းဆီ ပေါက်ဟုန်းဟင်းကော်ဝိုက်။ 44ဟေဟောင်းဆီပေါဝါလော့် လအောင်အင်ယေရှုလ တောင်းမနော်တောင်း ခနောဝ်ကြားမွတ်ကွန်းအောက်ပိုင်းတန်းလေ ရောင်းဆီ ထန်ဟင်းဆီ တောင်းဝမ်းဝမ်း အောက်ပိုင်းတန်းဟင်းကော်ဝိုက်။ နောက်လောင်နော့် မနော်လေန အောင်းလအောင်အင်ယေရှု ခနောဝ်ပီနောင့်မနော်၊ ခနောဝ်တကော့်မနော်လေ စဆီ စောင်းမ်ခါဟင်းကော်ဝိုက်။ 45တော်နယ်ကော့် အောင်းစလအောင်ယေရှု မနော်ခါမဟောန်ကော့်လော့် ပေါက်ကွာရာမှိန်းဂျေရုဆလင်ဆီ ကွာခါဟင်းကော်ဝိုက်။ 46ဆမ်ဝမ်းဟူကော်မှ မနော်လေန အောင်းလအောင်အင်ယေရှု ရာခနောဝ်ဝမ်းဗိမာန်တော် ခနောဝ်ကြားဂျူးဘာသာရေးဆရာလေ နှောင်ဆီအူလ ခေါက်ပ်ဟင်းကော်ဝိုက်။ လအောင်အင်ယေရှုလ အောင်းဘာသာရေးဆရာဆောန်ပြားလေ ထောင်မ်ရောင့်ဝ်ကော်လော့် အောင်းစမနော် မေးခွန်းလေ ထန်မ်ပေါက်ဟွန်းကော်ဝိုက်။ 47ကွန်းနယ့်ဟဉ်းခွမ်းလအောင်အင်ယေရှုလေတောင်းလုန်ကော့် ကောပ့်အောင်းမွန်းဟုထောင်မ်ပဲ့တောင်း အောင်းမွန်းဝါပြားပေါက်ပဲ့လေညော့ အမ်းဟင်းကော်ဝိုက်။ 48မာရိတောင်းယောသပ်ဟော်န အောင်းလအောင်အင်ယေရှု ခေါက်ပ်ဟင်းကော်လော့် အမ်းဟင်းကော်ဝိုက်။ မယ်မွန်းလ “လုစိုင်း၊ ခနေဟော ဟေဟောင်းဆီ နယ့်ဟေနောင်နယ့်လ။ ကောတောင်းပေါ်မောလ ကြာပါဆီ နယ့်ခါအောင်းမောဟင်း” ဆီ ဝါကော်ဝိုက်။ 49မေနယ့်လော့် လအောင်အင်ယေရှုလ “ဟေဟောင်း နယ့်စောင်းမ်ခါအောင်းကောဟင်းန။ ကောတအူ ရာဟုန်းပေါ်ကောကျဉ်းနော့်ဝါလ မဟုဟင်းလေး” ဆီ ဝါပေါက်ကော်ဝိုက်။ 50တော်နယ်ကော့် မနော်လေန အောင်းလအောင်အင်မနော်ခဝါလ မဟုထောင်မ်ဟင်းဝိုက်။ 51နောက်လောင်နော့် လအောင်အင်ယေရှုလ တောင်းမာရိ တောင်းယောသပ်ဟော်တောင်း စောင်းမ်ပေါက်မှိန်းနာဇရက်မားကော်ဆီ အောင်းခွမ်းမနော်ကော့် ဆက်ဆီ စောင်းမ်ဟေကော်ဝိုက်။ တော်နယ် မယ်မွန်းန ကာအောင်းပေးမား အောင်းအကြောင်းဟောန့်လေတောင်းလုန် ခနောဝ်စောဝ်မွန်း ဆိဉ်းဝိုက်ဆီ စဉ်းစားကော်ဝိုက်။ 52နောက်လောင်နော့် စောင့်ယေရှုရောင်ဝ်မားကော်လော့် နောင်တိုးမွန်းရောင်ဝ်ညော့ ကျန်းမာရေးကော့် နီးဆီ ဉာဏ်ပညာလေကော့် စွန်မားကော်ဝိုက်။ မွန်းန အောင်းစောင့်ဖလားတောင်း အောင်းကွန်းလေဟောက်ကော့် နယ့်ခမ်ဝိုက်။
Currently Selected:
Luke 2: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
