Luke 13
13
1မေနဲ့လော့် ကွန်းမောင်းဖောင်လေန မားစူးရာစောင့်ယေရှုဆီ မေမဟူအွန်န ရာမှိန်းဂျေရုဆလင်ဟောန့် အောင်းစစ်သားလေအောင်း(ဝ်)သိုင်းမား အောင်းအကြောင်း ကွန်းဂါလိလဲမောင်းဖောင် လောင်(ဝ်)ပြားကော်ဝိုက်။ "ကွန်းဟောန့်န ရာဗိမာန်တော် တကြားမနော်ပူဇော်န စောင့်ခွန်ဟော်ခမ်းမပေးခွေတ်ပိလတ်တ အောင်းစစ်သားမွန်းလေ ဟောင့်(ဝ်)အမိန့်ဆီ ဟအောင်း(ဝ်)သိုင်းမား"ဆီ ဝါကော်ဝိုက်။ 2မေနယ့်လော့် မွန်းစောင့်လ "အောင်းစကွန်းဟောန့်လေန နောင်းကွန်းရောင်းရာဂါလိလဲမကား ဆာဆီပွန် အပြစ်ရောင်းညော့ နယ့်ပေးနောင်နယ့်လဆီ မဆူထန်ဟင်းလေး။" 3နောင်နယ့်ဆီမစော်။ အောင်းမဆူကောခဝါလ မဆူတောင်းလုန်န နောင်တဟောင်ပေါမနွိုက် နောင်နယ့်ကျဉ်းနော့် တနယ့်ပျတ်စီးဟင်း။ 4မေရှိလောင်မျှော်စင်ပြိုနာ့ ခနေကွန်းဆစ်(ပ်)ပက်ကော့်ဟောန့် ပြိုသိမ်းကော်ညော့ နယ့်သိုင်းဟင်းမား။ မနော်လေနာ့ နောင်ကွန်းဂျေရုဆလင်မကား အပြစ်နမ်ဆာညော့ဆီ မဆူထန်ဟင်းလေး။ 5နောင်နယ့် လုံးဝမစော်။ တော်နယ့် အောင်းမဆူ ကော်တဝါ မဆူလေန ဆီမေအပြစ်မဆူ နောင်တဟောင်ပေါမနွိုက်ဟင်း နောင်ဟောန့်လေညော့ တနယ့်သိုင်းဟင်း"ဆီ လောင်(ဝ်)ပြားကော်ဝိုက်။ 6မွန်းစောင့်လ အောင်းတပဲ့မွန်းလေ ပွန်အောင်းအနယ့် လောင်(ဝ်)ပြားကော်ဝိုက်။ "ရာကွန်းကော်နိမ်လ ဆွုန်စပျစ်ရောင်းဝိုက်။ ရာဆွုန်ဟောန့် တိန့်ဖနေတိန့်နိမ်ရောင်းဝိုက်။ ကူပီးကူပီး ကွန်းဟိုင့်လ လာမားကျဉ်းမတ်ဖနေဆီ ထီန်မားဝိုက်။ တော်နယ့် ရာတိန့်ဖနေလ မတ်နိမ်ကော့်မမတ်ဝိုက်။ 7ကောပ့်နဲ့ညော့ မွန်းနာ့ အောင်းစောင့်ဆွုန် "ဆီမေတိန့်ဖနေဟိုင့် မတ်မွန်းလေတမတ်ကျေ့ဆီ ကောထမားလ ဆမ်ပီးလုံးလုံး ရောင်းမားကော်။ တော်ဝမ်းနယ့်ပွန့် တိန့်ဟိုင့်လ မမတ်ဟင်းအွန်၊ အောင်းတိန့်ဟိုင့် တက်(ပ်)ဝေကော်။ ဟေဟောင်း ဟောင့်(ဝ်)နေရာနောင်နဉ်း အောင်းမွန်းန"ဆီ ဝါကော်ဝိုက်။ 8တော်နယ်ကော့် စောင့်ပေါက်(ဝ်)ဆွုန်ဟိုင့်လ "အောင်းတိန့်ဟိုင့်လေ တော်ပီးနာ့အင် ထာ့အွန်စောင့်။ ကော ရာဟဉ်း(မ်)တိန့်ဟိုင့်လေကွန်ဆီ အော်လေတောင်း တကွာဆောင်(ဝ်)အွန်စောင့်။ 9ပီးနာ့လော့် မတ်ဖနေလေ မတ်ပဲ့ကျဉ်းနော့်။ တော်နယ့် ဟောင်ပေါမမတ်ကော့် သတက်(ပ်)ဝေဟောစောင့်"ဆီ ဝါကော်"ဆီ လောင်(ဝ်)ပြားကော်ဝိုက်။ 10မေဝမ်းဥပုဝမ်းနိမ်န ရာစလပ်ဆောင်နိမ် မွန်းစောင့်ယေရှုန ဟောတလားဆီ အူဝိုက်။ 11ရာနေရာဟောန့် ဖီမနီးပူးဆီ ဆစ်(ပ်)ပက်ပီးဟူ ကော့်ယဉ်းအောင်းလောင်ကုံ ကော်နိမ်ရောင်းဝိုက်။ 12အောင်းကော့်ယဉ်းဟောန့် မွန်းစောင့်ဟောန်ကော်လော့် အောင်းစမွန်းဟောင့်ဆီ "ဆီမေအစောင်စ တဉ်းမော၊ မေးမောလေ နီးကော်"ဆီ ဝါကော်ရောင်(ဝ့်) 13အောင်းကော့်ယဉ်းဟောန့် တောင်းမေးမွန်းစောင့်တောင်း ထိကော်လော့် ချရှ်ချန်း လောင်အိုင့်မွန်း နောင်မားကော်ညော့ စိန်ဆီ အောင်းဂုဏ်တော်စောင့်ဖလားလေ ချီးမွမ်းကော်ဝိုက်။ 14တော်နယ်ကော့် ကွန်းပေါင့်(ဝ်)စလပ်ကော်နိမ်လ မေဝမ်းဥပုန အောင်းကော့်ယဉ်းကော်နိမ်ဟောန့် စောင့်ယေရှု ရားဟောင့်(ဝ်)ကော်ညော့ မနော်ခထားဟင်းဝိုက်။ ကောပ့်နဲ့ညော့ အောင်းကွန်းလေ "ပတ်နိမ်လ တောင်းဟုတ်ဝမ်း ဟောဟေလောင်ဟင်း။ မေဝမ်းနောင်နယ့်လေဟော် မားရားဟင်းမေ တော်နယ့် ဝမ်းဥပုနာ့ ပီမားရားဟင်း"ဆီ ဝါကော်ဝိုက်။ 15မွန်းစောင့်လ "ကွန်းယောင်ဆောင်ကွန်းနီးလေ ဝမ်းဥပုန အောင်းရောင်းရာမဆူ မြည်းလေ၊ ငိုးလေ ဆီမေဆိဉ်မနော် ပွယ်ဆီ နမ့်မအွယ်ဟင်းလေး။ 16ကော့်ယဉ်းဟိုင့်နာ့ ပေးလုဆောင်(ဝ်)အာဗြဟံမေကော့် ဆစ်(ပ်)ပက်ပီးလုံးလုံး အောင်းဖီမနီးပူးနယ့်ခမ်ဝိုက်။ အောင်းစကော့်ယဉ်းဟောန့် ဝမ်းဥပုန ဆီမေအောင်းဖီမနီးပူးဟိုင့်လေ မနယ့်ပွယ်ဟောင့်(ဝ်)လေး"ဆီ ဝါပေါက်ကော်ဝိုက်။ 17ခွမ်းမွန်းစောင့်လ အောင်းကွန်းခါဖစ်အောင်းမွန်းလေကော့် ဟနယ့်နီးအိုင်းဟင်းကော်ဝိုက်။ တော်နယ်ကော့် ကွန်းဖွန်တောင်းလုန်ကော့် ကောပ့်အောင်းထူးဆန်းဟိုင့် နယ့်ဟောန်ညော့ စွုမ်းဟင်းဝိုက်။ 18နောက်လောင်နော့် မွန်းစောင့်ကော့် "သာသနာတော်စောင့်ဖလားလ တောင်းအဟောင်းတောင်းတူ၊တနယ့်ပြား တောင်းအဟောင်းတောင်းပေါဝါလော့် 19ကွန်းကော်နိမ်လ အောင်းမက်ရောင်အောင်း(ဝ်)မားဆီ ရာခနောဝ်ဆွုန်မွန်း မားပူဝိုက်ကော်ဝိုက်။ ဆီမေမက်ရောင်ဟိုင့်လ ခို့မွန်းခါမွန်းလေ အောက်မားဆီ ပေးတိန့်ရောင်အောင်းရောင်(ဝ်)မားကော်လော့် နုတ်လေမားဆီး မားတယ်ဟမ်းဟင်းဝိုက်။ 20နောက်လောင်နော့် မွန်းစောင့်ကော့် "သာသနာတော်စောင့်ဖလားလ တနယ့်ပြားနောင်နူး။ 21အောင်းအနယ့်လ တောင်းတဆေး ဟေလောင်တောင်းတူ။ ကော့်ယဉ်းကော်နိမ်လ အောင်းတဆေးစောင်နိန်အောင်း(ဝ်)ဆီ ရာခေါင့်(ဝ်)မွန်းနမ်နမ်နာ့ ရောကော်လော့် ခေါင့်(ဝ်)မွန်းလေ ပေါင်းမားကော်"ဆီ လောင်(ဝ်)ပြားကော်ဝိုက်။ 22နောက်လောင်နော့် မွန်းစောင့်ယေရှုကော့် မှိန်းမန့်အောင်းရောင်းရာခွန်တန်းကွာ ဂျေရုဆလင်န အောင်းကွန်းလေတောင်းလုန် လောင်(ဝ်)ပြားဆောန်ပြားကော်ဝိုက်။ 23ကွန်းကော်နိမ်လ "စောင့်ယေရှု ကွန်းအောင်းကယ်တနယ့်ခမ်လေန စောင်နိန်အင်ဟော်လေး"ဆီ ထန်(မ်)ကော်ဝိုက်။ 24မွန်းစောင့်ကော့် "မဆူလ ရာနာ့ဆပ်တူးဟီ့(ပ်)ဟိုင့် ဟပေါနယ့်ခေါင့်(ဝ်) အိုက်တနယ့်ဟေဟင်း။ အောင်းမဆူကောခဝါလ ကွန်းလေကော့် ရာနေရာဟောန့် ဟပေါနယ့်ခေါင့်(ဝ်) တဟေဟင်း။ တော်နယ်ကော့် ကွန်းဟောန့်လေန အောင်းနာ့ဆတ်တူးဟောန့် တခေါင့်(ဝ်)ပဲ့မစော်။ 25စောင့်ဟုန်းန လုမားဆီ အောင်းနာ့ဆတ်တူး ဟောင်ပေါမားအပ်ကော် မဆူလ ဆီမေခနောက် စိန်ဆီ "စောင့်ဟုန်း နာ့ဆတ်တူးပူဟောင့်(ဝ်)အီ့ဆီ" တနယ့်ဝါ။ တော်နယ်ကော့် စောင့်ဟုန်းလ"မဆူဆီမေထောမားဝါလ ကောမဟု"ဆီ တဝါပေါက်မား။ 26မဆူကော့် "ဟောလေန တောင်းမောတောင်း ကျဉ်းနွေ့ဟင်းမားကောင်(ဝ်)။ မောစောင့်လ အောင်းဟော ရာနာ့ခွန်တန်း လောင်(ဝ်)ပြားမောက်ပြားမားကောင်(ဝ်) "ဆီ မဆူဝါမေကော့် 27မွန်းနာ့ "အောင်းမဆူ ကောတဝါ။ မဆူ ဆီမေထောမားဝါလ ကောမဟု အောင်းတဲ့တဲ့ကော့်။ ဆီမေကော အောက်ကော်။ မဆူလ ကွန်းအောင်းမနီးမငမ်းလေ"ဆီ တဝါမား။ 28ဟေဟောင်းဝါလ ခနောက်ဟုန်းလ ခနောဝ်သာသနာတော်စောင့်ဖလား အာဗြဟံ၊ ဣဇက်တောင်း ပရောဖက်ပညာရောင်းလေ မဆူနယ့်ခေါက်(ပ်)ကော်လော့် ဆာဆီတနယ့်ဟိုင့်ဟင်း။ အောင်းမွန်းဟော့်အောက် မဆူပေါနယ့်ခမ်ကော်လော့် ခနောဝ်စောဝ်ခနောဝ်ခေါမဆူပွန့် တနယ့်ဟိုင့်ဝိုက်။ 29တောင်းပါ့ခနာ့၊ တောင်းပါ့ခလောင်၊ တောင်းပါ့နဟောင်၊ တောင်းပါ့နစမ်း ကွန်းတောင်းလုန်န ခနောဝ်သာသနာစောင့်ဖလား အူနွေ့ဟင်းဆီ အောင်းချဉ်းနီးလေ တနယ့်ကျဉ်းဟင်း။ 30နယ့်ရောင့်(ဝ်) အစောင် ကွန်းအရေးမပါလေကော့် တပေးကွန်းအရေးပါမားကော့်၊ အစောင် ကွန်းအရေးပါလေကော့် တပေးအရေးမပါလေကော့်ဝါလ မှတ်ဝိုက်ဟင်း"ဆီ လောင်(ဝ်)ပြားကော်ဝိုက်။ 31မေနယ့်လော့် ရာစောင့်ယေရှု ဖာရိရှဲမောင်းဖောင်ထီန်မားဆီ "ဟေရုဒ်လ ခအောင်း(ဝ်)သိုင်း အောင်းမောစောင့်ဝိုက်။ ကောပ့်နောင့်နယ့်ညော့ ဆီမေဟိုင့်လ အောက်ကော်ရာအောင်းကိုင်းကော်"ဆီ ဝါဟင်းကော်ဝိုက်။ 32မွန်းစောင့်လ အောင်းကွန်းဟောန့်လေ "အောင်းမာနဉ်းဟောန့် ကွာဝါကော်၊ ကော ဝမ်းမဖုတောင်းဝမ်းနဲ့ အောင်းဖီမနီးမငမ်းလေ တဟော့်အောက်ဆီ အောင်းအနာရောဂါလေကော့် တဟာ့ဟိုင်၊ ဆမ်ဝမ်းဟောင်ပေါထိန့်ကော် အောင်းလောင်ကောလေ တဟရောင့်(ဝ်)။ 33တော်နယ့်ကော် ကောန ဝမ်းနယ့်၊ ဝမ်းမဖု ပေါရောင့်(ဝ်) ဝမ်းမဟေးလေန ပေးဝမ်းအောင်းကောတနယ့်အောက်ခရီးအွန်။ အကြောင်းန ပရောဖက်လ အောင်းမှိန်းဂျေရုဆလင်ဟောန့်နဲဟော် ရာတန်းတီ အောင်းတနယ့်သိုင်းဝါလ မရောင်းဝိုက်။ 34"ဂျေရုဆလင်၊ ဂျေရုဆလင်၊ မောန အောင်းပညာရောင်းကွန်းနီးလေကော့် အောင်း(ဝ်)သိုင်းဟင်းဆီ ဆီမေစောင့်ဖလားအောင်းပွယ်မား ဖီလေန တောင်းကောင့်ဟဉ်းတောင်း တဟွတ်ဟင်းဝိုက်။ ကိုင်မယ်လုန်လ အောင်းလအောင်မွန်းလေ တောင်းပီမွန်းတောင်းအုဆီ နောင်အောန်းအူဟောင့်(ဝ်)ညော့ ကောကော့် အောင်းစလအောင်မဆူလေ နီးနီးငမ်းငမ်း ခအောန်းအူဟောင့်(ဝ်)ညော့ ပေးဟာပေးဟာ ကောဟေမားမေကော့် မဆူ အောင်းကော မဟဟေဟင်း။ 35ဗိမာန်တော်မောန နောင်ကန္တာရညော့ ရိန်းစမ့်စမ့် ဟိုင့်ခေါင့်(ဝ်)ခေါင့်(ဝ်)ဆီ တပေးဝိုက်။ မောလ အောင်းကော တောင်းနာမယ်စောင့်ဖလားတောင်း စောင့်အောင်းကြွမားန မင်္ဂလာရောင်း"ဆီ တော်အချီန်ကောမဝါပွန့် အောင်းကော နောက်လောင်ဟာနိမ် အောင်းတနယ့်ခေါက်(ပ်)မစော်"ဆီ ဝါကော်ဝိုက်။
Currently Selected:
Luke 13: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
