Luke 11
11
1ဝမ်းနိမ့်လော့် စောင့်ယေရှုရောန်းဆုရောင့်(ဝ်)ကော်လော့် တပဲ့မွန်းကော်နိမ်လ "စောင့်ယေရှု ယောဟန်လ အောင်းတပဲ့မွန်းလေ တနယ့်ရောန်းဆုနောင်နူးဝါလ နောင်ဆောန်ဟောင့်(ဝ်)ညော့ အောင်းဟောခကော့် ဆောန်ဟောင့်(ဝ်)အွန်"ဆီ ဝါကော်ဝိုက်။ 2ကောပ့်နယ့်ညော့ မွန်းစောင့်လ အောင်းမနော်လေ "မဆူဟောင်ပေါရောန်းဆုလော့် စောင့်ဖလားခ ကွန်းတောင်းလုန်န အောင်းမောစောင့် ရိုသေဟင်းစောင့်။ မောစောင့်ကြွမားဆီ အောင်းကွန်းရီကော့်စီ မားအုပ်စိုးဟောင့်(ဝ်)အွန်စောင့်။ 3အောင်းစတပဲ့ဟောခ ကူဝမ်းကူဝမ်း ခေါင်ကျဉ်းခေါင်ဝါ အောင်းဟောလိုလေန ဟောင့်(ဝ်)မားအိစောင့်။ 4ခနေတပဲ့ဟောခ ကွန်းဟေအပြစ်အောင်းဟောလေ နောင်ဟောခ ခွင့်လွတ်ဆီ၊ အောင်းအပြစ်ဟောခလေကော့် ခွင့်လွတ်အွန်စောင့်။ အောင်းဟောလေ အပြစ်တော်ပေါဟေ အောင်းလှည့်ဖြားလေကော့် ဆီးဟောင့်(ဝ်)အွန်ခဆီ ရောန်းဆုဟင်း"ဆီ ဝါကော်ဝိုက်။ 5နယ့်ရောင့်(ဝ်) မွန်းစောင့်လ ဆက်ဆီ "ရာခနောဝ်မဆူန ကော်နိမ်မကော်နိမ်လ လကော့်ကော်နိမ်ဟောင်ပေါရောင်း ကန်းခွန်းဖဖ ရာလကော့်ဟောန့် ကွာဆီ 6လကော့်ကော်နိမ် ထိန်မားဆီ စမွန်းကျဉ်း အဟောင်းမရောင်းကော့်ညော့ အောင်းစကော ခေါင့်(ဝ်)မွန်းဆမ်ဟွေ ကူဟောင့်(ဝ်)အိဆီ ဟောင်ပေါဝါ 7လကော့်မောလ "အောင်းကော ပီမားနှောက်ယှက်၊ နာ့ဆပ်တူးလေကော့် အတ်(ပ်)ရောင့်(ဝ်)ကော်၊ လအောင်ကောတောင်းကောကော့် ထီန်ခေါင့်(ဝ်)ခနောဝ်စနောင်းကော်၊ ကောလုဆီ မကွာဟေဟောင့်(ဝ်)ပဲ့"ဆီ တဝါမား။ 8အောင်းမဆူ ကောခဝါလ ကွန်းဟောန့်န မွန်းလ လကော့်မောမေကော့် လုဆီ အဟောင်းကော့် အောင်းတမားဟောင့်(ဝ်)မစော်။ တော်နယ် မောန အားမလျှော့ဆီ ဆက်ဆီဟောင်ပေါရောန်းနော့် မွန်းန ဆီမေစနွမ်းလုဆီ အောင်းမောလိုလေတောင်းလုန် တမားဟောင့်(ဝ်)ဝိုက်။ 9ကောပ့်နယ့်ညော့ အောင်းမဆူလေ ကောခဝါလ ကွာရောင်းဟင်း မဆူတနယ့်လက်ခမ်ကော့်၊ ကွန်းခါလ တခေါက်(ပ်)၊ အောင်းန့ာဆပ်တူးလေ ကွာခေါက်ဟင်း အောင်းကွန်းခေါက်န့ာဆပ်တူးလေကော့် တပူဟောင့်(ဝ်)။ 10ကွန်းရောန်းလ တနွိုက်၊ ကွန်းခါလ တခေါက်(ပ်)၊ အောင်းကွန်းခေါက်န့ာဆပ်တူးလေကော့် တပူဟောင့်(ဝ်)။ 11တော်နယ်ကော့် လအောင်မဆူလေ ဟောင်ရောန်းပါးကော့် ခနောဝ်မဆူ ပေါ်မယ်ထောန အစားပါ လာတဟောင့်(ဝ်)ငူးတိုးနိမ်။ 12လအောင်မဆူ ဟောင်ပေါရောန်းခိုင်ကိုင် ပေါ်မယ်ထောလာတဟောင့်(ဝ်) မိုင်းငေါလေ။ 13ကောပ်နယ့်ညော့ မဆူလေန ပေးကွန်းမနီးမေကော့် အောင်းလအောင်မဆူ အောင်းနီးအောင်းငမ်းလေ ပေါစမ်ဟောင့်(ဝ်) စောင့်ဖလားအောင်းရာနိဗ္ဗာန်လ အောင်းကွန်းရောန်း အောင်းဖောကော့်ခရောင့်(ဝ်) ဉာဏ်မွန်းစောင့်လေ ဟပေါနယ့်ဟောင့်(ဝ်) အဆင့်သင့်ကော့်ဝိုက်။ 14ဟာနိမ်လော့် မွန်းစောင့်ယေရှုကော့် အောင်းကွန်းကော်နိမ် ခွမ်းတော်ပေါမတန့်ပဲ့ အောင်းဟေဝိုက် အောင်းဖီမနီး ဟော့်အောက်ကော်ဝိုက်။ နောက်လောင်နော့် ဖီမနီးအောက်ကော်ရောင့်(ဝ်) ကွန်းဟောန့်တန့်ခွမ်းမားကော်လော့် ကွန်းတောင်းလုန် အမ်းဟင်းကော်ဝိုက်။ 15တော်နယ် ကွန်းအောင်းကမ်ဖောင်လ "ကွန်းဟိုက်လ ဆီမေစောင့်ခွန်ဟော်ခမ်းဖီမနီး တောင်းအစွမ်းဗေလဇေဗုလတောင်း အောင်းဖီမနီးဟိုက် ဟော့်အောက်တနယ့်ပေးဆီ "ဝါဟင်းကော်ဝိုက်။ 16ကွန်းအောင်းတန်းတီလေကော့် အောင်းစောင့်ယေရှု ဆီမေစောင့်ဖလား အောင်းနွိုက်ဝိုက် အခွင့်အာဏာလေ ခဟပြားသက်သေညော့ ဆီမေစောင့်ဖလား နိမိတ်လက္ခဏာတူးနိမ် ပြားနူဆီ ဝါဟင်းဝိုက်။ 17မွန်းစောင့်လ ကွန်းဟိုက်လေ ထန်နောင်နူးဝါလဟုညော့ အောင်းမနော် "ခနောဝ်မှိန်းမှိန်းနိမ်လ ကွန်းလေ စောဝ်ပေါမတူဟင်းပေါဝါလော့် နောင်နူးတကွာပေးပဲ့ မှိန်းဟိုက်လ အောင်းတပျတ်နဲဟော်ဆဲ။ နောင်နယ့်ညော့ စောင့်ဟုန်းလေကော့် အချန်းချန်း ပေါပေးရန်ဟင်းလေလာ့် ဟုန်းဟိုက် တပျတ်နဲဟော်ဆဲ။ 18တော်နယ်ကော့် မာရ်နတ်လေန မနော်အချန်းချန်း ပေါမတဲတော်ဟင်း နောက်လောင်နော့် မှိန်းမနော် ဟေနောင်နူးဆီ တဟေပဲ့။ အစောင် ကောကော့် အစွမ်းဗေလဇေဗုလတောင်း ဟော့်ဝေအောင်းဖီမနီးလေဆီ မဆူဝါဟင်း။ 19တော်နယ် ကောလ အစွမ်းမွန်းတောင်း ဟောင်ပေါဟော့်ဝေအောင်းဖီမနီးပေါလော့် တပဲ့မဆူလေန ဆွန်းအစွမ်းဖောဆီ အောင်းဖီနီး ဟော့်ဝေနောင်နူး။ ကွန်းဟိုက်လေန တဆုံးဖြတ်ဟောင့်(ဝ်) အောင်းစမော။ 20တော်နယ်ကော့် ကောလ အစွမ်းစောင့်ဖလားလေတောင်းဆွန်းဆီ အောင်းဖီမနီး ပေါဟော့်အောက်ပေါဝါလော့် ရာမဆူ သာသနာစောင့်ဖလား ထီန်ရောင့်(ဝ်)ကော်ဝါလ ဝါဆီနွိုက်ကော်။ 21ကွန်းတိုးရောင်(ဝ်)ကော်နိမ်လ မွန်းကိုယ်တိုင် ကမ်းလတ်နတ်ဆီ အောင်းဟုန်းမွန်း စောင့်ရှောက်ပဲ့ညော့ အောင်းမွန်းပိုင်တောင်းလုန် လုံခြုံဝိုက်။ 22တော်နယ်ကော့် ဆာဆီမွန်း အောင်းတိုးရောင်(ဝ်)လ မားဆီ ဟောင်မားပဲ့အောင်းမွန်းကော် အောင်းကွန်းဟိုက်အားကိုး အောင်းလတ်နတ်လေ တဆဉ်းကော်ဆီ အောင်းစပွန်လေကော့် အောင်းမွန်းအောင်း(ဝ်)မားဟိုက် တမိုင်ဟောင့်(ဝ်)ဝိုက်။ 23တော်နယ်ကော့် မဆူလေန ပါ့ကောပေါမအူ ကွန်းဆန့်ကျင်အောင်းကောကျဉ်းနော့်။ တောင်းကောတောင်းစူးဆီ ကွန်းမအူလေန တပေးအောင်းဖော်အောင်းမွန်းဟင်းဝိုက်။ 24ဖီမနီးလ ဆီမေကွန်းအောင်းမွန်းပူးလ အောက်ဆီ ဖြတ်အောင်းကန္တာရဆီ စောင်း(မ်)ခါအောင်းစဆောင်း(ဝ်) နေရာတီနိမ်ကော်ဝိုက်။ တော်နယ်ကော့် စဆောင်း(ဝ်) နေရာတီနိမ်ကိုးသကော့် ခါမဟောန်ညော့ "ရာဟုန်းကောအောက်မားနဲဟော် ကောတပေါက်ကော့်"ဆီ ဝါဆီ ပေါက်ကွာကော်ဝိုက်။ 25မွန်းထီန်ပေါက်မားလော့် ရာဟုန်းဟောန့်န တောင်းရူးပေါက်တောင်း နောင်ပေါက်ဝေဝိုက်ညော့ သန့်ရှင်းဆီ ကွန်းအူမရောင်းဝါလ မွန်းနယ့်ခေါက်(ပ်)ကော်ဝိုက်။ 26မေနယ့်လော့် ဖီမနီးဟိုက်ကော့် ဆာဆီမွန်း အောင်းဖီချဉ်းမနီးစေတိုး ဟောင့်မားကော်ဝိုက်။ မနော်လေတောင်းလုန် မားစူးရာကွန်းဟောန့်ဆီ အူဟင်းကော်လော့် ကွန်းဟောန့်ကော့် နောင်မေစောင့်မကား ပေးထိုင့်မားကော်ဝိုက်"ဆီ ဝါကော်ဝိုက်။ 27မွန်းစောင့်ယေရှုကော့် တကြားဝါအောင်းကွန်းဖွန်လ ကော့်ယဉ်းကော်နိမ်လ "ကော့်ယဉ်းအောင်းဟေလိမ့်မား အောင်းမောစောင့်လ ကွန်းချဉ်းမင်္ဂလာရောင်း"ဆီ ဝါကော်ဝိုက်။ 28မေနယ့်လော့် မွန်းစောင့်လ "ခွမ်းဟိုက်လ စော်ကျဉ်းနော့်။ တော်နယ်ကော့် ကွန်းထောင်(မ်)တလားတော်စောင့်ဖလားဆီ ကွန်းဟေစောင်း(မ်)နဲဟော် ဆာဆီမင်္ဂလာအောင်းနီးအောင်းငမ်းလေ အစောင်တနယ့်ခံစား"ဆီ ဝါကော်ဝိုက်။ 29ဖွန်ကွန်းလေန အောင်းစောင့်ယေရှု တကြားဝိုင်းဟောက်(ပ်)ဝိုက်လ မွန်းစောင့်လ "ကွန်းခေတ်အစောင်လေန ပေးကွန်းမနီးလေဆီ၊ မဆူလေန ဆီမေစောင့်ဖလား ဟပေါပြားနိမိတ် ရောန်းဟင်း၊ တော်နယ်ကော့် အဖြစ်အပျက်ယောနလ အောင်းပြားနိမိတ်လက္ခဏာအောင်းမဆူကျဉ်းနော့်။ 30အောင်းကွန်းမှိန်းနိနေဝေလေ အဖြစ်အပျက်ယောနလ နောင်ပြားနိမိတ်ဝိုက်ညော့ လူ့သားတော်ကော့် အောင်းကွန်းခေတ်အစောင်လေ တပြားနိမိတ်ဟောင့်(ဝ်)ဝိုက်။ 31အချီန်စီရင်တလားထီန်ကော်လော့် မှိန်းရှေဘစောင့်ခွန်ဟော်ခမ်းမယ်(ဘုရင်မ) တောင်းမဆူတောင်း ရင်ဆိုင်ဆီ တဆွဲတလားအောင်း မဆူကော့်။ စောင့်ခွန်ဟော်ခမ်းမယ်(ဘုရင်မ)ဟိုက်လ ခထောင်(မ်)အောင်းခွမ်းကွန်းပညာရောင်းရှောလမုန်ညော့ ဆီမေမိုင်လေမကျေးလေ အောင်းကိုင်းန ပိုင်းတဉ်းဆီမားဝိုက်။ 32ကွန်းမှိန်းနိနေဝေလေန အောင်းစမဆူ တဆွဲတလားဝိုက်။ မနော်လေန ကောပ့်အောင်းယောနဆောန်လေညော့ နောင်တနွိုက်ရောင့်(ဝ်) အောင်းစောင့်ဖလားဝိုင်(ယ်)ကော်ဝိုက်။ နေရာဟိုက်လ ဆာဆီယောန ကွန်းမြတ်ကော်နိမ်ထီန်မားကော်"ဆီ ဝါကော်ဝိုက်။ 33မွန်းစောင့်န "ကလောက်ဖိုင်း အောင်းဆီမီးစပ်ဝိုက်လ ဖောကော့် မလောက်ဆိဉ်ဟင်း ခတောင့်မွန်းကော့် မဝိုင့်ဟင်း။ ကွန်းခေါင့်(ဝ်)ခနောဝ်ဟုန်းမား ဟပေါနွိုက် အောင်းလိမ်း ရာမီးတိုင်နဲဟော် တချိဝိုက်ဟော။ 34ဟွေတားမဆူလေလန အောင်းတိုးမဆူ နောင်ကလောက်ဖိုင်းညော့ဝိုက်။ ဟွေတားမဆူဟောင်ပေါနီး အောင်းမဆူလိုအောင်းလိမ်းလေ တနွိုက်ဆီ၊ တော်နယ် ဟွေတားဟောင်ပေါမနီး အောင်းလိမ်းမရောင်းကော့်ဆီ တပေးနမ်းမိမိကော့်ဝိုက်။ 35ကော့ပ်နယ့်ညော့ ရာမော အောင်းလိမ်း(ဟွေတား) ဟောင်ပေါရောင်း ဟပေါမပေးအောင်းနပ်ဆိဉ် သေသေချာချာဟေဟင်း။ 36နယ့်ပေါမစော် ရာမောလ အောင်းလိမ်းဟောင်ပေါရောင်း အောင်းအနော်ကော့် နမ်းမိမိမပေးဆီ ကလောက်ဖိုင်းလ အောင်းလိမ်းမွန်း ခနေမော နောင်လိမ်းညော့ နေရာတိုင်းကော့် လိမ်းတွန်တွန်တပေးမား"ဆီ လောင်(ဝ်)ပြားကော်ဝိုက်။ 37နောင်နယ့်ဆီလောင်(ဝ်)ရောင့်(ဝ်) ဖာရိရှဲကော်နိမ်လ အောင်းစောင့်ယေရှု ခေါင့်(ဝ်)မားခမ် ဟမားကျဉ်းဆီ ရာဟုန်းမွန်း ပန်းကော်ဝိုက်။ 38မွန်းစောင့်ကော့် ရာဟုန်းကွန်းဟောန့် ကြွကော်ရောင့်(ဝ်) ခေါင့်(ဝ်)ကော်ဆီ ကွာနှောင်ရာစားပွဲကော်ဝိုက်။ မွန်းစောင့်လ ခေါင့်(ဝ်)မကျဉ်းခွေတ် မေးမဆွတ်ဆီ ကွာနှောင်ရာစားပွဲညော့ ဖာရှိရှဲဟောန့်လ အိုက်အမ်းကော်ဝိုက်။ 39ကောပ့်နယ့်ညော့ မွန်းစောင့်ကော့် အောင်းမနော်လေ "ဖာရိရှဲမဆူလေန ခနောက်ပန်းကန်နဲဟော်လန့်ဟော ခနောဝ်စောဝ်မဆူလေန အောင်းမနီးမငမ်းလေ၊ လောဖားလေ ရောင်းဟင်းဆီ အိုက်ပတ်ဆတ်ဝိုက်။ 40ကွန်းမနီးလေ စောင့်ဖလားလ ခနောဝ်၊ ခနောက် တောင်းဆောင်(န်)ပါ့ ဖန်စန်းဟောင့်(ဝ်)မား။ 41မဆူလ အောင်းရောင်းရာမဆူလေ ဟောင်ပေါဟောင့်(ဝ်)အောင်းကွန်းဖန်လေလော့် အောင်းရောင်းတောင်းလုန်န အောင်းစမဆူ တသန့်ရှင်း။ 42ဖာရိရှဲလေ မဆူလေန နယ့်ခေါက်(ပ်)တောင်းဒုက္ခကော်၊ မဆူလေ အောင်းစစောင့်ဖလား စားဆီဆွုန်မဆူအောက်မားလေ နောင်ရွက်အဉ်း(မ်)ချဉ်းလေ၊ မတ်မိုက်၊ မတ်တောက်လေကော့် ဟိုပွန်မွန်းဆစ်(ပ်)နိမ်လ ပွန်နိမ်နဲဟော် မဆူလှူဟင်း။ တော်နယ်ကော့် မဆူလေန အောင်းကွန်းလေကော့် လိဉ်ဆီ အောင်းစောင့်ဖလားကော့် မခဝိုင်(ယ်)ဟင်း။ မဆူလေန အောင်းစောင့်ဖလား ဟိုပုံမွန်းဆစ်(ပ်)နိမ်လ ပုံနိမ်နယ့်ဟော်လှူဆီ၊ အောင်းကွန်းမန်းတီလေကော့် တလားမျှမျှတတဝိုက်ဆီ တနယ့်အီနူဟင်း။ 43ဖာရိရှဲလေ၊ မဆူလေန နယ့်ခေါက်(ပ်)ဒုက္ခကော်။ ရာစလပ်လေကော့် မဆူလေ အောင်းနယ့်နှောင်ထိုင်ခုံခနာ့လေနယ့်ဟော် မဆူအောင်း(ဝ်)ဟော။ ခနောဝ်ဈေးလေကော့် အောင်းကွန်းလေဟပ်နဲဟော် မဆူကြိုက်ဟော။ 44တော်နယ် မဆူနယ့်ခေါက်(ပ်)ဒုက္ခကော်၊ မဆူလေန တောင်းချန်းချိန်းဂူ အောင်းမှတ်ဝိုက်မရောင်းတောင်း တူ။ ကွန်းလေန နောင်ချန်းချိန်းမရောင်းညော့ မဟုဟောန်ဆီ ပိုင်းခနေဟိုက်ဟင်း"ဆီ ဝါကော်ဝိုက်။ 45နောက်လောင်နော့် ကွန်းကျမ်းစမ်ကော်နိမ်လ "ဆရာ၊ မောစောင့်ဝါနောင်နယ့်လ စော်ကားအောင်းဟောကျဉ်းနော့"ဆီ ဝါကော်ဝိုက်။ 46မေနယ့်လော့် စောင့်ယေရှုကော့် "ဆရာအောင်းကျမ်းစမ်လေ မဆူနဲ့ခေါက်(ပ်)တောင်းဒုက္ခတောင်းကော်။ မဆူလေန အောင်းကွန်းလေ ပုတ်အောင်းနောက်လေ ဟဟပ်ဟင်း။ တော်နယ်ကော့် မဆူလေန အောင်းကွန်းဟောန့်လေဟမ်မားလေ တောင်းပိုင်းမေးအင်တောင်းကိုးကော့် မဆူမကွာထိ မကွာစွယ်ဟင်း။ 47မဆူလေန ပေးကွန်းမနီးလေ။ အကြောင်းန မေတန်ဟာ အောင်းပူလဉ်မဆူရာလဉ်မဆူလေ အောင်း(ဝ်)သိုင်းမား အောင်းပရောဖက်ပညာရောင်းလေ ဟပေါမှတ်ပဲ့ မဆူနယ့်ဟေဂူလေမစော်လေး။ 48နောင်နယ့်ဆီ မဆူဟေလ အောင်းပူလဉ်မဆူရာလဉ်မဆူ ဟေမားလေန စော်ဆီ မဆူထန်ညော့။ နဲ့ပေါမစော် မဆူလေန အောင်းကွန်းအောင်း(ဝ်)သိုင်းပရောဖက်ပညာရောင်းလေ ဟပေါမှတ် ဂူလေ အောင်းတဟေဟောင့်(ဝ်)မစော်။ 49ကောပ့်နယ့်တောင်း စောင့်ဖလားလ တောင်းဉာဏ်အလင်းတော်တောင်း အကြောင်းအောင်းမနော်ဟေအောင်းမနီးလေ လောင်(ဝ်)ပြားဟောင့်(ဝ်)ကော်လ "ရာမဆူ ကွန်းပရောဖက်ပညာရောင်းတောင်း အောင်းတပဲ့စောင့်ဖလားလေ တပွယ်ကော်။ တော်နယ်ကော့် မဆူလေန အောင်းပရောဖက်တောင်း အောင်းတပဲ့စောင့်ဖလားမောင်းဖောင် အောင်း(ဝ်)သိုင်းဆီ အောင်းမောင်းဖောင်လေကော့် မဆူလေ တနိစတ်ဟင်း"ဆီ ဝါကော်ဝိုက်။ 50ကွန်းခေတ်အစောင်တောင်းလုန်န အောင်းပညာရောင်းပရောဖက်လေ ဆီမေကမ္ဘာအစပွန့်နော့် အောင်း(ဝ်)သိုင်းဟင်းမားညော့ အပြစ်ရောင်းဝိုက်ရောင့်(ဝ်)ကော်။ 51ခနောဝ်ပညာရောင်းကွန်းနီးဟောန့်န လုစိုင်းအားဒံ ဆီမေအာဗေလစဆီ တကြားဗိမာန်တော်တောင်းတကြားယဇ်ပလန် အောင်းပွန်အောင်း(ဝ်)သိုင်းအောင်းနယ့်ခမ် ပရောဖက်ပညာရောင်း တော်ဇာခရိပွန့် ပေးမားဝိုက်။ ကောပ့်နယ့်ညော့ အောင်းထိုင့်တောင်းလုန် အမျိုးကွန်းမဆူလေ တနယ့်ခမ်အပြစ်လေဝါလ အောင်းတဲ့တဲ့ကော့်ကျဉ်းနော့်ဝိုက်။ 52ကွန်းကျမ်းစမ်လေ မဆူလေန စောဝ်မနီးမငမ်းလေ အိုက်နမ်မားကော်။ ဟေဟောင်းဆီဝါလ မဆူလေ အောင်းတောင်းစောင့်ဖလားတောင်းဆိုင် အောင်းဘဏ်တိုက်အောင်းဟုအောင်းဟောန်လ ခါတ်စော့ဝိုက်ဟင်း။ အောင်းဟုအောင်းဟောန်လေကော့် ဆိဉ်းဝိုက်ဟင်း။ အောင်းမဆူတောင်းမဆူကော့် မခေါင့်(ဝ်)၊ အောင်းကွန်းအောင်းကျန်လေကော့် မဟခေါင့်(ဝ်)ဟင်း"ဆီ ဝါကော်ဝိုက်။ 53နောင်နယ့်ဆီ ဝါရောင့်(ဝ်)ကော်လော့် စောင့်ယေရှုန ဆီမေဟောန့် အောက်ကွာကော်ဝိုက်။ နောက်လောင်နော့် ဆရာကွန်းကျမ်းစမ်လေးတောင်း ဖာရိရှဲလေန ခနေမွန်းစောင့် ဝါအပြစ်ဟင်းဆီ အောင်းမွန်းစောင့် တောင်းအကြောင်းလေမကျေးမလေးမစော် အောင်းဆိုင် မေးခွန်းလေ ထန်(မ်)ဟင်းကော်ဝိုက်။ 54မနော်လေန ခနောဝ်မွန်းစောင့်ယေရှုတန့်န အောင်းဖစ်ကမ်းနိမ်မကမ်းနိမ် ဟောင်ပေါပါ အပြစ်တန်ဆီ ဟပေါနယ့်စွပ်စွဲအောင်းစောင့်ယေရှုဆီ ထဟင်းဝိုက်။
Currently Selected:
Luke 11: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the TaiLaing Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
