Luke 4
4
1အယ်းနွောဂ်မောင် ကွိုယ်တော်ယေရှုဟော် ညင်အလန်းတိုနောင့်အတူဆိတိုမူပွီး ဂျော်ဒန်မှဂ်ခေါ့နေ ပှန်လော်ရယ့်အခေါ် ညင်အလန်းတိုဦးဆွောင်ရယ့်အတောင်း တိုးကန်တော်ရော့နောင်း ကျို့တိုမူရယ်။ 2အယ်းနေယော်မောင် ကွိုယ်တော်ယေရှုဟော် မာရ်နတ်ယယ့် ဖျောယွောင်းဆွီးဆွောင်ခှန်းကွို ရတ်လေးဆာ ပတ်လုန်းခေါင်ယူတိုမူပွီး စော်အစောအစော်ကွိုမောင့် မစောပယ်းနေတိုမူရယ်။ အယ်းနေ့ရတ်မျော ကွိင်ဆိုးရယ့်အခေါ် ဆူဟော် ကော်တရော်မွဂ်လော်လေရယ်။ 3မာရ်နတ်ခေါ့ ကွိုယ်တော်ကွို “နန်ဟော် ဖရောဆောတိုမင်ယန် ဟော်ကွှောဂ်တုန်းကွို မွိဖှဂ်စေလွို့ အမိင့်ပေးလောဂ်ပေါ်” လွို့ဆွိုလေရယ်။ 4ဟော်ပေမယ့် ကွိုယ်တော်ယေရှုခေါ့ “လူဟော် အစောအစော်တခုထယ်းအတွနောင့် အဆဂ်ချန်နေခွမ် မဟွိဘူးလွို့ ကျောင်းစော်မောင် ဖိုပျော့ထောရယ်” လွို့ မိင့်တိုမူရယ်။ 5အယ်းယော်ပွီးယန် မာရ်နတ်ဟော် ကွိုယ်တော်ကွို ကော်တရော်မှင့်ရယ့်တွောင်ထိပိုကွိုခိုဆိုးပွီး ကဘော်ပိုမောင်ဆိရယ့် တင်းပှယ်အောလုန်းကွို တခနော့ခှန်းမောင်ပျော့လောဂ်ရယ်။ 6မာရ်နတ်ခေါ့ ကွိုယ်တော်ကွို “ငေါ့ကွို ပေးအောဂ်ထောရယ့် တခွိုးအော်နော်အောလုန်းနောင့် ကျွာဝို့ချောင်းဆော်မုရယ်ကွို ငေါ်ပေးခှန်ရယ့်လူကွိုပေးနောင်ရယ့်အတွ နန့်ကွိုငေါ်ပေးမယ်။ 7အယ်းယော်ကျွောင့် ငေါ့ကွို ချယ့်ခွိုးကွိုးကွာယန် ဟော်အယော်ရယ်အောလုန်းကွို နန့်ကွိုပေးမယ်” လွို့ဆွိုလေရယ်။ 8အယ်းအခေါ်မောင် ကွိုယ်တော်ယေရှုခေါ့ “နန့်ယယ့် အဆန်သခန်ဖှဂ်ရယ့် ဖရောဆန်တပေါထယ်းကွိုပယ်း ကွိုးကွာယော့မယ်၊ ဆူ့ယယ့်အမုတိုကွိုပယ်း ထောင်းဆွောင်ယော့မယ်လွို့ ကျောင်းစော်မောင် ဖိုပျော့ထောရယ်” လွို့ မာရ်နတ်ကွို ပှန်လည် ဖှေကျောလောဂ်ရယ်။ 9တဖန် မာရ်နတ်ဟော် ကွိုယ်တော်ကွို ဂျေရုဆလင်မွှို့မောင်ဆိရယ့် ဗိမာန်တိုယယ့် အမှင့်ဆုန်းနေယော်ကွိုခိုဆိုးပွီး “နန်ဟော် ဖရောဆောတိုမင်ယန် ဟော်နေယော်ခေါ့နေ ခွိင်ခှော့လောဂ်ပေါ်။ 10စော်ကျွောင့်လောဟန်ကော ဖရောဆန်ခေါ့ နန့်ကွိုစွောင့်ရွှောဂ်ဖွို့အတွ နတ်ဒေဝါရယ်ကွို မိင့်ထောခယ့်ရယ်လွို့ ကျောင်းစော်မောင် ဖိုပျော့ထောရယ့်အတွ နန့်ကွို ကော်ကွာလောဂ်မယ်။ 11နန့်ယယ့် ခှေထွောဂ်ရယ်ကွို ကွှောဂ်တုန်းရယ်နောင့် ထိပွီး မနော်ယော့အွောင် ဆူတွို့ယယ့် လဂ်ရယ်နောင့် မော့ထောလောဂ်မယ်” လွို့ ဆွိုလေရယ်။ 12အယ်းအခေါ် ကွိုယ်တော်ယေရှုခေါ့လယ်း “နန့်ယယ့် အဆန်ဖှဂ်ရယ့် ဖရောဆန်ကွို ဖျောယွောင်းဆွီးဆွောင်ခှန်း မလုတ်ဖွို့ ကျောင်းစော်မောင် ဖိုပျော့ထောရယ်” လွို့ပှန်လည်မိင့်ဆွိုလေရယ်။ 13မာရ်နတ်ဟော်လယ်း ကွိုယ်တော်ကွို အမျွိုးမျွိုးဖျောယွောင်းဆွီးဆွောင်ပွီးရယ့်အခေါ် ကွိုယ်တော်နောင်းခေါ့ ထွဆိုးပွီး နွောဂ်ထောဂ်အခွမ့်အခေါ်ကွောင်းကွို စွောင့်နေလေရယ်။ 14အယ်းနွောဂ်မောင် ကွိုယ်တော်ယေရှုဟော် ညင်အလန်းတိုယယ့် ဦးဆွောင်လောင်းပျော့မုနောင့် ဂါလိလဲပှယ်ကွိုပှန်လည်ကျို့တိုမူရယ်။ ဆူ့ယယ့် ဂုန်ဆတန်းတွို့ဟော်လယ်း ဂါလိလဲပှယ်အရောဂ်ဒေဆော့အနောင့် ယွောဂ်ဆိုးလေရယ်။ 15အယ်းနွောဂ်မောင် ကွိုယ်တော်ဟော် အယ်းအရောဂ်မောင်ဆိရယ့် ဓမ္မာရုန်မျောမောင်a တရောဟိုးလေယော် လူထုပရိတ်ဆတ်တွို့ခေါ့လယ်း ဆူ့ကွိုခှီးမွမ်းကျော့လေရယ်။ 16အယ်းအခေါ်မောင် ကွိုယ်တော်ယေရှုဟော် ဆူကျွီးပှင်းယော် အရောဂ်ဖှဂ်ရယ့် နာဇရက်မွှို့ကွို ပှန်လော်ရယ်။ ဥပုသ်နေ့မောင် ကွိုယ်တော်ဟော် ဓမ္မာရုန်ကွို ပုန်မန်ဆိုးနေကျော့အတောင်း ဆိုးယွောဂ်ပွီး အယ်းနေယော်မောင် ဆူဟော်ကျောင်းစော်ဖတ်ဖွို့မတ်နေလေရယ်။ 17အယ်းနွောဂ်မောင် ကွိုယ်တော်ကွို တယွောဂ်ယွောဂ်ခေါ့ ပရောဖက်ဟေရှာယယယ့် ကျောင်းစော်အုတ်ကွို ပေးလောဂ်ရယ့်အတွကျွောင့် ကျောင်းစော်မောင်ရယ်းဆောထောရယ့် ကျောင်းပိုဒ်ကွိုဖွမ့်ပွီးဖတ်လေရယ်။ 18“ဖရောဆန်ယယ့်ညင်အလန်းတိုဟော် ငေါ်နောင့်အတူ ဆိနေတိုမူရယ်။ စော်ကျွောင့်လောဟန်ကော ဆားရားဆောမျောအတွ မန်ဂလော်ဆတန်းကွောင်းကွို ဟိုးကျောဖွို့ ဖရောဆန်ခေါ့ ငေါ့ကွို ယွီးကွောဂ်ထောတိုမူပွီး ဖေါင်းဆီးခေါင်နေယော့ရယ့်ဆူရယ်ကွို လွဂ်မွှောဂ်ခှန်းယော့ဖွို့၊ မျစိမမျိုရယ့်ဆူရယ်ကွို မျိုစေဖွို့နောင့် ဒုက်ခေါ့ဆားရားခေါင်စောနေ ယော့ဆူမျောကွို လွဂ်မွှောဂ်ယော်ကွို ကာတန်ဖွို့နောင့် 19ဟော်အခှိင်ကော်လော့ဟော် ဖရောဆန်ခေါ့ ဆူ့ယယ့်လူမျွိုးတွို့ကွို ဖရောဆန်ယယ့်ကျွီးမောရယ့်မေတ္တော်ဂရုနော် တိုကွို ပျော့မယ့်အခှိင်ကော်လော့ကွိုကျေညော်ဖွို့ ငေါ့ကွိုစေခွှဂ်တို မူပီဖှဂ်ရယ့်အတွကျွောင့်ဖှဂ်ရယ်” ဆွိုပွီးဖှဂ်ရယ်။ 20အယ်းလွိုမျွိုးဖတ်ပွီးရယ့်နွောဂ်မောင် ကွိုယ်တော်ဟော် ကျောင်းစော်အုတ်ကွိုပိပွီး ဓမ္မာရုန်တော်ဝမ်ခေါင်ကွိုပေးပွီး ထောင်လောဂ်ရယ့်အခှိင်မောင် ဓမ္မာရုန်နောင်းခေါ့ လူအပွေါင်းတွို့ဟော်လယ်း ကွိုယ်တော်ကွို စူးစောဂ်ကျေ့နေကျော့ရယ်။ 21အယ်းနွောဂ်မောင် ကွိုယ်တော်ခေါ့ ဆူတွို့ကွို “ဟော်ကျောင်းပိုဒ်ရယ်ဟော် နန်တွို့ကျောနော်လောဂ်ယော့ရယ့်အတောင်းပယ်း ခုနေ့မောင် အမင်တကာဖှဂ်လော်ပီ” လွို့ မိင့်တိုမူရယ်။ 22လူအပွောင်းတွို့ဟော် ကွိုယ်တော်ကွိုခှီးကျူးဟိုးဆွိုကျော့ပွီး ကွိုယ်တော်ယယ့်ပစောဂ်ခေါ့ ထွလော်ရယ့် ခှိုရယ့်စကောမျောကွိုအောင့်အိုးကျော့ပွီး “ဟော်လူဟော် ယောသပ်ယယ့်ဆောမဟွိလော” လွို့ အခှန်းခှန်းဟိုးကျော့လေရယ်။ 23ကွိုယ်တော်ခေါ့လယ်း “ဆေးဆရော်ဟော် မိမိကွိုယ်ကွို အယန်ကုဖွို့လွိုရယ်ဆွိုရယ့် ဆွိုရွိုးစကောအတောင်း ကပေရနောင် မွှို့မောင် ငေါ်ပှုခယ့်ရယ့်အမုအယော်တွို့ကွို ကွိုယ့်နေရောဂ်မွှို့မောင် လယ်း လုတ်ဆွောင်ပေါ်လွို့ နန်တွို့ ငေါ့ကွိုဟိုးဆွိုကျော့လောဂ်မယ်။ 24အယ်းနွောဂ်မောင် ကွိုယ်တော်ခေါ့ဆဂ်လဂ်ပွီး ငေါ်အမင်ဟိုးယော့ယန် စော်ပရောဖက်ကွိုမဆွို မိမိနေရောဂ်မွှို့မောင်လဂ်မခေါင်ကျော့။ 25ငေါ်ထောဂ်ပွီး အမင်ဟိုးယော့ယန် ပရောဖက်ဧလိယလဂ်ထဂ် ဆုန်းနဂ်ခွားလွောဂ် မွိုးခွေါင်ရယ့်အတွ ငတ်မွဂ်ခွေါင်းပေါရယ့်ဒေါင်ကွို ခေါင်ခယ့်ယော့ရယ့်အခှိင်ခေါ့ အစ္စရယ်းပှယ်မောင် မွိဆွိုးမော့ရယ် အမျောကျွီးဆိခယ့်ရယ်။ 26ဟော်ပေမယ့် ဖရောဆန်ခေါ့ ဧလိယကွို အစ္စရယ်းမောင်ဆိရယ့် မွိဆွိုးမော့ရယ်နောင်းကွို ကူညီဖွို့မစေခွှဂ်ဝါးနောင့် အယ်းအစောဇိဒုန်မွှို့နောင်းခေါ့ ဇရတ္တမွှို့မောင်ဆိရယ့် ဂျူးလူမျွိုးမဟွိရယ့်လူမျွိုးချော မွိဆွိုးမော့တဦးနောင်းကွိုပယ်း ကူညီဖွို့စေခွှဂ်ခယ့်ရယ်။ 27အယ်းအတောင်းပဲ ပရောဖက်ဧလိရှဲခေတ်မောင်လယ်း အစ္စရယ်းလူမျွိုးရယ်ထားမောင် အနော်ကျွီးရိုးကော်ဆယ်အမျောကျွီးဆိခယ့်ရယ်။ ဟော်ပေမယ့် ဆူတွို့ထားခေါ့မောင့် ဆီးရီးယားပှယ်ဆောဖှဂ်ရယ့်နေမန်bလွို့ခိုရယ့် လူတဦးခေါ့လွားပွီး ဘဆူ့ကွိုမောင့်မပျွောဂ်ကန်းစေခယ့်ပေါ်” လွို့ မိင့်တိုမူရယ်။ 28ကွိုယ်တော်ဟိုးဆွိုရယ့်စကောကွို ကျော့ယော့ရယ့်အခေါ် ဓမ္မာရုန်ထားမောင်ဆိရယ့် လူထုပရိတ်ဆတ်တွို့ဟော် ကော်တရော်စိဆွိုးကျော့ရယ်အတွ 29ထော့ပွီး ကွိုယ်တော်ကွိုမွှို့ပှန်နောင်းမွောင်းထွိကျော့ပွီးယန် ချွောဂ်ကမ်းပေါပိုခေါ့နေတွမ်းခှော့ဖွို့ မွှို့တည်ဆိယော် တွောင်ထိစွမ်းနောင်း ခိုဆိုးကျော့လေရယ်။ 30အယ်းအခေါ်မောင် ကွိုယ်တော်ဟော် လူအုတ်ကျောထားခေါ့နေဖှဂ်ဆိုးပွီး ကျို့ဆိုးတိုမူရယ်။ 31အယ်းယော်ပွီးယန် ကွိုယ်တော်ဟော် ဂါလိလဲပှယ်မောင်ဆိရယ့် ကပေရနောင်မွှို့ကွိုဆိုးယွောဂ်ပွီး ဥပုသ်နေ့မောင် ဓမ္မာရုန်နောင်းလူအပွေါင်းတွို့ကွို ဟိုးကျောဆုန်းမော့လေရယ်။ 32ကွိုယ်တော်ဟော် တခွိုးအော်နော်နောင့်ဟိုးကျောဆုန်းမော့နေရယ့်အတွကျွောင့် လူတွို့ဟော် ဆူ့ယယ့်ဆုန်းမော့မုရယ်ကွို အောင့်အိုးခှီးမွမ်းကျော့လေရယ်။ 33အယ်းဓမ္မာရုန်ထားမောင် မကွောင်းဆွိုးဝါးပူးကောဂ်နေရယ့် လူတယွောဂ်ဆိလေရယ်။ အယ်းလူခေါ့ အဆောင်ကှာနောင့် 34“နာဇရက်မွှို့ဆောယေရှု၊ နန် ငေါ်တွို့ကွို စော်လုတ်ခှန်လော။ ငေါ်တွို့ကွို ဖျဂ်ဆီးဖွို့လော်သလော။ နန်စူလောဆွိုတော် ငေါ်ဆိဆရယ်။ နန်ဟော် ဖရောဆန်နောင်းခေါ့လော်ရယ့် ကျွီးမှဂ်ဆူဖှဂ်ရယ်” လွို့ အဆောင်ကှာနောင့်အိုဟဂ်ဟိုးဆွိုလေရယ်။ 35အယ်းအခေါ် ကွိုယ်တော်ယေရှုခေါ့ မကွောင်းဆွိုးဝါးကွို “တိတိနေပွီး ဆူ့နောင်းခေါ့နေ ထွဆိုးလောဂ်” လွို့အမိင့်ပေးလောဂ်တော်နောင့်တပျှောင်ထယ်း မကွောင်းဆွိုးဝါးဟော် အယ်းလူကွို လူမျောအလာမောင် မှေပှင်ပိုနောင်းလယ်းခှော့လောဂ်ပွီး မနော်စေဝါးနောင့် ထွဆိုးလေရယ်။ 36ဓမ္မာရုန်ခေါ့ လူအောလုန်းဟော်လယ်း အောင့်အိုးဆိုးကျော့ပွီး “အယ်းဟော်စလွိုစကောမျွိုးလော။ ဆူမွောင်းထွိလောဂ်တော်နောင့် မကွောင်းဆွိုးဝါးခေါ့ ထွဆိုးယော့ရယ့် အခွမ့်အော်နော်နောင့်တခွိုးရယ် ဆူ့နောင်းမောင် ဆိနေပေါ်လော” လွို့အခှန်းခှန်းဟိုးဆွိုနေကျော့ရယ်။ 37အယ်းနွောဂ်မောင် ကွိုယ်တော်ယယ့်ဂုဏ်ဆတန်းတွို့ဟော်လယ်း ပတ်ဝန်းကျင်ဒေဆော့တခွမ်လုန်းယွောဂ်ဆိုးလေတို့ရယ်။ 38ကွိုယ်တော်ဟော် ဓမ္မာရုန်ခေါ့နေ ထွဆိုးပွီး ရှိမုန်ဆွိုရယ့်လူယယ့်အိင်ကွို ကျို့ယွောဂ်တိုမူရယ့်အခှိင်မောင် ရှိမုန်ယယ့်ယွောဂ်ခမော့ဟော် အပှင်းကျွီးဖျောနော်နေလွို့ လူရယ်ဟော် ဆူ့ကွိုကုပေးဖွို့ ကွိုယ်တော်ကွို တွောင်းရွှောဂ်ကျော့လေရယ်။ 39အယ်းယော်ကျွောင့် ကွိုယ်တော်ဟော် ဆူ့အနီးနောင်းကွိုဆိုးပွီး အဖျောရိုးကော်ကွို ပျွောဂ်ကန်းစေဖွို့ အမိင့်ပေးလောဂ်တော်နောင့် ဆူဟော် ကျောင်းမော်ဆိုးလေရယ်။ ဆူဟော် ခှခှန်းထော့ပွီး ဆူတွို့ကွို ဧည့်ခေါင်လေရယ်။ 40နေဝမ်ခှိင်ယွောဂ်ရယ့်အခေါ် ရိုးကော်ဝီဆနော်အမျွိုးမျွိုး စွားကောဂ်နေရယ့် လူနော်အမျောတွို့ကွို ကွိုယ်တော်နောင်းကွို ခိုလော်ခယ့်ကျော့ယော် ဆူဟော် အယ်းလူနော်တဦးစီယယ့်ကွိုယ်ပိုမောင် လဂ်တိုကွိုတန်ပွီး ရိုးကောဝီဆနော်မျောကွို ပျွောဂ်ကန်းစေလေရယ်။ 41မကွောင်းဆွိုးဝါးတွို့ဟော်လယ်း လူနော်မျောရယ်နောင်းခေါ့ ထွလော်ကျော့ပွီး “နန်ဟော် ဖရောဆောတိုဖှဂ်ပေါ်ရယ်” လွို့အိုဟဂ်ကျော့ရယ်။ ကွိုယ်တော်ယေရှုဟော် ကာတန်ဆန်မေရှိယဖှဂ်တော်ကွို ဆူတွို့ ဆိဆနေလွို့ ကွိုယ်တော်ခေါ့ ဆူတွို့ကွို အယ်းလွိုမဟိုးကျော့ဖွို့ တောမှဂ်တိုမူရယ်။ 42နွောဂ်တနေ့ မွိုးလန်းရယ့်အခေါ် ကွိုယ်တော်ဟော် လူဆူမဆိရယ့်အရောဂ်နောင်း ကျို့တိုမူရယ်။ ဟော်ပေမယ့် လူထုခေါ့ လောဂ်ချော်ကျော့ပွီး တွိဆိုးရယ့်အခှိင်မောင် ငေါ်တွို့နောင်းခေါ့နေ ထွမဆိုးဖွို့ တွောင်းပန်ရွှောဂ်ထောကျော့လေရယ်။ 43ဟော်ပေမယ့် ကွိုယ်တော်ခေါ့ “ငေါ်ဟော် အချောမွှို့ရယ်မောင်လယ်း မန်ဂလော်ဆတန်းကွောင်းဖှဂ်ရယ့် ဖရောဆန်ယယ့်ဆော်ဆနော်တိုcအကျွောင်းကွို ဟိုးကျောယော့အုန်းမယ်။ အယ်းလွိုဟိုးကျောဖွို့အတွ ဖရောဆန်ခေါ့ ငေါ့ကွို စေခွှဂ်ခယ့်တော်ဖှဂ်ရယ်” လွို့ မိင့်တိုမူရယ်။ 44အယ်းအခေါ်မောင် ကွိုယ်တော်ယေရှုဟော် အယ်းနေယော်ခေါ့နေထွဆိုးပွီး ယုဒပှယ် တဝမ်းလုန်းမောင်ဆိရယ့် ဓမ္မာရုန်မျောမောင် ဆဂ်လဂ်ပွီးတရောဟိုးကျောနေခယ့်လေရယ်။
Currently Selected:
Luke 4: ttpv-rv
Highlight
Share
Copy
Want to have your highlights saved across all your devices? Sign up or sign in
This translation of the Taungyo Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
