Luke 22
22
1ပသခါဖို့ယ်ဟော့သတ် တဆေးမဲ့မူးရ်ဖို့ယ် တိုင်မ်ဟာင်ဆတ် အချဲ။ 2ပုရောဟိတ်ဒေါမ့်ရ်အောကောလ်အတ်သပ် ကျမ်းစီနန့်သတ် မာချ်ထော်ရ်အောကောလတ် မာနုချောရတ် ဒေါရာသပ်အပ်သလိုက် ကိုယ်တော်ယေရှုရတ် ဟိုနိကျာ ဂိုရိယတ်နန့် မာရာဖိုရီဗျိုး ဘူသည့်ဂေါရတ်ရ်။ 3သိုဘာဇေ သာဝကဘာရောဇောနောမားသတ် အဆတ်သပ် ယုဒရှကာရုတ်ရ် ဂါမားသတ် မာရ်နတ် ဂို့လေ။ 4ယုဒရှကာရုတ်ယေး ပုရောဟိတ်ဒေါမ့်ရ်အောကောလ် ဗိမာန်တော်ရ် အရာရှိအောကောလောရ်အတ်ရေ ဇာယေးနန့် ကိုယ်တော်ယေရှုရတ် အိသေးရာရ်အာ့သော်မားသတ် ကိမ်ဂို့ရိ သည်ယာဖိုရီဗျိုးသတ်အဲယူ(န်) အိသေးရာရ်ဖောင့်ကတ် ဗျတ်ဆာနာဂေါ်ရတ်ရ်။ 5အိသေးရာယိုး ကုချီအို့ယေးနန့် ယုဒရတ် တန်ညာသည်ဗျာလိုက် ရာဇီဂိုကျဲ။ 6ယုဒယိုး ရာဇီဂိုကျဲရရ် မာနုချ်ဘီချိနော်သကတ်သတ် တိုင်မော်မားသတ် ကိုယ်တော်ယေရှုရတ် ဒို့ရိဘတ်လိုက် စိုည်ရိုယေး။ 7သိုဘာဇေ တဆေးမဲ့မူးရ်ဖို့ယောသည်န်ဟောသပ် ပသခါဖို့ယောလိုက် ဘတ်ရစောလောရေ ပူဇာဖော်ရေသတ် သည်န်အိဘေအချဲ။ 8အပ်သလိုက် ကိုယ်တော်ယေ ပေတရုရတ်သတ် ယောဟန်ရတ် "ပသခါဖို့ယောရေ အာင်ရဖောင့်ကတ် ဟားဗျတ်လိုက် ဇာယေးနန့် သိုယာရ်ဂေါရ်ဂို့ယ်" ဟိုးယ် အော်ဒလ်ဂို့ကျဲ။ 9အိသေးရာယိုး "ကိုယ်တော်၊ အာင်ရရတ် ဟော်ရတ် သိုယာရ်ဂိုသို့ သည့်သို့ဟောရ်" ဘို့လိ ဖော်စောရ်လို့ယေး။ 10ကိုယ်တော်ယေ "သော်ရ တောမ့်နောမားသတ် ဂို့လိလေ ဖာနိရ်ဂေါရလို့ယ် အယတ်သပ် မာနုချ်အို့ဂို့ လော်သာဘီ အိသေး ဂို့လိဗျိုးသေ ဂေါရောမားသေ ဇိုက်စ်။ 11သို့ယတ်နန့် ဂေါရောရ်မာနုချောရတ် "အာင်ရရ် ကိုယ်တော်ယေ အိဘေရ် သဘီအောကောလို့ယ် ပသခါဖို့ယ် ဘတ်ယာလတ်ရ်ဟားနား ဟားဗျိုးသေ အခန်းရတ် ဒါဟိုက်သောဟိုးယ် သော်သူးန် ဖော်စောရ်ဂို့သို့ဟို့ယေး" ဘို့လိ ဟိုသို့ဟိုးယေး။" 12အန်းစောလော်သ် ဂေါရောရ်ဂီရောဆတ် သော်ရရတ် အူဝါရေဒါကီနီယေးနန့် ဒေါမ့်ရ်အခန်းအတ်ခါးန် ဒါဟဗျိုး။ အဲအခန်းအိယားနော်မားသတ် သိုယာရ်ဂိုရိစ်" ဟိုးယ် အော်ဒလ်ဂို့ကျဲ။ 13သိုဘာဇေ ပေတရုအတ်သပ် ယောဟန်သာရ နေလီဇာယတ်နန့် ကိုယ်တော် ဟိုယေးသတ် အဲနိကျ ဒေကဲရရ် ပသခါဖို့ယောရေ ဂင်ဂို့ရိ အောသောသေ သိုယာရ်ဂိုကျဲ။ 14ဟားဗျတ်လိုက် တိုင်မ်အချဲရရ် ကိုယ်တော်ယေ သဘီအောကောလောရ်ဖောင့်ကတ် ခုံမော်မားးသတ် ဘိုချဲ။ 15သိုဘာဇေ ကိုယ်တော်ယေ အိသေးရာရတ် "အိုင့် ဟော်ချ်ထော်ဖာယေးနန့် နိုမိုသေ အေပသခါဖို့ယောရေ သော်ရရ်ဖောင့်ကတ် ဟားဗျတ်လိုက် သော်ရောလာဂေရ်။ 16သော်ရရတ် အာင်သူးန် ဟိုသို့ဟောသတ်၊ ဘောဂဝင့်နန့် ပသခါဖို့ယောသူ(န်)လို့သီး စဂိုရိ အောကောလောရ်ဖီစား သော်(န်)ဇာငှာ၊ မာနုချ်ဘေကူးနောရတ် အုပ်စိုးဂိုရိဘို့သတ်တိုင်မ် နော်ဝင်ဗျိုးသတ်အဲသို့သည်န်ဝါးန် ပသခါဖို့ယ် အာရ်ဘာရ် နာဟားဗျိုး" ဟိုးယ် အော်ဒလ်ဂို့ကျဲ။ 17သိုဘာဇေ ကိုယ်တော်ယေ ဂေါ်လောချောရတ် လိုယေးနန့် ဘောဂဝင့်နောရ် ဂူနော်ရတ် ချီးမွမ်းဂိုရိ "အေဝိုင်ဂေါ်လောချောရတ် လိုယေးနန့် ဘော်ရော်ဂိုရိ ဟား။ 18သော်ရရတ် အိုင့် ဟိုသည့်သတ်၊ အိုင့် ဘောဂဝင့်နောရ် ချားချော်(န်) နိုနီလီဗျိုးသတ် အဲသို့သည်န်ဝါးန် စပျစ်သီးသူးန်အို့ယေးသေ ရော်ချောရတ် နာဟားယိုးမ်" ဘို့လိ ဟိုယေး။ 19သိုဘာဇေ ပေါ်မူးရတ် လိုယေးနန့် ဘောဂဝင့်နောရ် ဂူနော်ရတ် ချီးမွမ်းဂိုရိ စိရိယတ်နန် သဘီအောကောလောရတ် သည် "အေပေါ်မူးအေယူးန် သော်ရလိုက် သည်ယိသည့် အာင့်ရ် ဂါ အို့ယေ။ အာင့်ရတ် မော်နော်သ်ဂိုရိယတ်နန့် ဟိုက်စ်" ဟိုးယ် အော်ဒလ်ဂို့ကျဲ။ 20အဲနိကျ ဟားယေးနန် ကိုယ်တော်ယေ ဂေါ်လောချောရတ် သို့ရိယတ်နန် "အေစပျစ်ရည် အာင့်ရ် ရော်သော်ရတ် ဟိုယိသည့်။ အေရော်သော်အေယူးန် သော်ရရ်အူဝါရေ အိုင့် ဒိုက်လိသည် ပဋိညာဉ် နော်ဝင်ယိုး အို့ယေ။ 21သို့ အာင့်ရတ် အာင့်ရ် ချိုးသူးရောရ် အာ့သော်မားသတ် သည်ဗျိုသတ်အိသေး အာင့်ရ်ဖောင့်ကတ် ဟားရ်။ 22မာနုချောရ်ဖွာသပ် ဘောဂဝင့်နန့် ဇေနီကျာဂေါ်ရတ် အဲနိကျအို့လေယိုး မာနုချောရ်ဖွာရတ် ဒေါ်ဝရှီးဂေါရတ်သပ် အိသေးလိုက်သော ဘီရှိ ဒူကိုးအို့ဗျိုး" ဟိုးယ် အော်ဒလ်ဂို့ကျဲ။ 23အန်းစောလော်သ် သဘီအောကောလတ် အာင်ရရ်အတ်ရေ ဟော်နန် အဲနိကျဂိုသို့စသတ်ဟိုးယ် အတ်ဇော်နော်သူးန် အတ်ဇော်နန် ဖော်စောရ်ဂေါရတ်ရ်။ 24သိုဘာဇေ သဘီအောကောလတ် အိသေးရာရ်ဘိသောရတ် ဟော်နန် အောကောလောရ်ဒေါမ့်ရ်ဘို့လိ ဟိုဗျတ်လိုက် ဖာရဖားရိသတ်ရ်။ 25အပ်သလိုက် ကိုယ်တော်ယေ "ဒတ်ချောသာ့အောကောလောရ် ရာဇာအောကောလတ် အိသေးရာရ် ဒတ်ချောရ် မာနုချ်အောကောလောရ်အူဝါရေ အူးခူးမ်လို့ယ် အုပ်ချုပ်ဂိုရိလေးယိုး အဲအူးခူးမ်အာ့ဆတ်သေ အိသေးရာ အိသေးရာရ်ဂူးန် အိသေးရာ ဘေကူးနောလိုက်ဂင်ဂေါ်ရတ်သပ်ဟိုးယ် ဒိုက်ကိုဟိုယ် အိသေးရာရတ် ဂင်မ်ဆောသာ့ရ်ဘို့လိ ဟိုသိုက်သို့ သည်သိုဟောယ်။ 26သိုယ် သော်ရ အိသေးရာဒိခါးန် နော်ဝင့်ယတ်နန့်၊ သော်ရရ်ဘိသောရတ် အရေးပါစော်အိသေး အောကောလောရ်ဂူရာဒိခါးန် အို့ယေးနန် ဆောသာ့ရ်အို့ယေးသေအိသေး ဂို့ရောဒိခါးန် နီဆာသာဂိုရိ သက်ခဖို့ရိဘို။ 27ခုံမော်မားသတ် ဟားဗျတ်လိုက် ဘို့ယ်ရိုးယေးသတ် အိသေးလို့ယ် ဟားနားအောကော်လ် သိုယာရ်ဂေါ်ရတ်သပ် အိသေးရာရ်အတ်ရေ ဟော်နန် ဘီရှိ ဒေါမ့်ရ်။ ခုံမော်မားသတ် ဘို့ယ်ရိုးယေးသတ်အိသေး ဘီရှိ ဒေါမ့်သတ် နနား။ သို့ အိုင့် သော်ရရ်အတ်ရေ ဟားနားဖားနီ သိုယာရ်ဂိုရိသည့်သိ အိသေးဒိခါ(န်)။ 28သော်ရ အာင့်ရတ် ဟိုနို့သည့်န် ဖတ်လိုက်နောဇော်စ်။ ဒူကောသ်ဖို့ရိလေးယိုး သော်ရ အာင့်ရ်ဖောင့်ကတ် သိုက်ကျောသေမာနုချ်အောကောလ် အို့ယော်စ်။ 29အာင့်ရ် ဘာဖေ အိဘေရ် ချားချော်နော်ရတ် အာင့်ရတ် သည်ယေးသတ်အဲနိကျ အာင့်ရ် ချားချော်နော်ရတ်ယိုး သော်ရရတ် သည်ယေးနန့် 30သော်ရ အာင့်ရ် ချားချော်နော်မားသတ် အာင့်ရ် ခုံမော်မားသတ် ဘိုယေးနန့် ဟိုက်သရိဘီ။ သို့ယတ်နန့် သော်ရ အာချောနောမားသတ် ဘိုယေးနန့် အစ္စရေးဇာသီ ဘာရောဇာ့သီးရတ် အုပ်ချုပ်ဂိုရိသက်ရိဘိ။ 31"ရှိမုန်၊ ရှိမုန်၊ ဖူးနော၊ ချချားယေး ဒက်နောရေ တိုက်ကျလို့ယ် စိရဂေါရတ်သေ အဲနိကျ မာရ်နတ်ယိုး သော်ရ ဘေကူးနောရတ် စမ်းသပ်ဂိုရိဘတ်လိုက် စရ်။ 32ရှိမုန်၊ သော်ရ်ဘီချက်သ် နော်ဝင့်ဇတ်ဖားန် သော်လိုက် အိုင့် ဘော်ကုဇိရ်။ အာင့်ရ်အတ်ရေ သူယ်အာဘိသည့်အန်းသေ သော်ရ်ဘိုက်အို့ယေးသေ သဘီအာရ်ဂုနောရတ်ယိုး ဘီချက်သ်အာရော သော်ရောအောဖားန် ဂိုရိစ်" ဟိုးယ် အော်ဒလ်ဂို့ကျဲ။ 33အန်းစောလော်သ် ပေတရုယေး ကိုယ်တော်ရတ် "ကိုယ်တော်၊ ဇံယားလောသ်အို့လေးယိုး၊ မော်ရော်(န်)အို့လေးယိုး ကိုယ်တော်ရ်ဖောင့်ကတ် ဇာဗျာလိုက် အိုင့် သိုယာရ်အစိ" ဟိုးယ် လျှောက်ဂိုကျဲ။ 34အန်းစောလော်သ် ကိုယ်တော်ယေ "ပေတရု၊ သော်ရတ် အိုင့် ဟို့ယ်။ အာဇီယာ ကူရဘာခ်နိုသည်သေး သူယ် အာင့်ရတ် နိုစီနိဘို့လိ သိမ်ဘာရ် ဟိုဘိ" ဟိုးယ် အော်ဒလ်ဂို့ကျဲ။ 35သိုဘာဇေ ကိုယ်တော်ယေ သဘီအောကောလောရတ် "အိုင့် သော်ရရတ် တန်ညာ၊ ဘတ်ခ်အတ်သပ် ချန်ထောလ်လောရတ်သို့ နိုလိုယ်သို့ ဟိုးယေးနန့် ဒီရယိသည့်အန်းသေ သော်ရသူးန် ကေစုအတ်ခါးန် အို့ယေးသေ အဆတ်နား" ဘို့လိ ဖော်စောရ်လို့ယေးရရ် သဘီအောကောလတ် "နိုက်" ဟိုးယ် ချောက်ဂိုကျဲ။ 36အန်းသေ ကိုယ်တော်ယေ "ယာအို့လေး တန်ညာရ်ဘတ်ခ် သကိလေ လော်။ ဟော်ရော်ရ်ဘတ်ကိုး လော်။ သော်ရသူးန် ဓါနာသကိလေး ဟော်ရ်ဟိုးသုနောရတ် ဘေဆီယတ်နန့် ဓါ ကီနီစ်။ 37သော်ရရတ် အိုင့် ဟိုသည့်သတ်၊ 'အိသေး ဒူချ်သော်ဘိုလီ ဟိုဗျိုးသတ်' ဟိုးယ် ကျမ်းစာမားသတ် အာင့်ရ်ဟော်သရတ် ဒါဟိုက်အဲကျဲသတ်အဲနိကျ အောသောသေ ဖူရစ်အာဗျိုးသတ်အပ်သလိုက် အို့ယေ" ဟိုးယ် အော်ဒလ်ဂို့ကျဲ။ 38အန်းသေ သဘီအောကောလတ် "ကိုယ်တော်၊ ဆော။ အာင်ရသူးန် ဓါဒူယားန် အဆတ်" ဟိုးယ် လျှောက်ဂိုကျဲရရ် ကိုယ်တော်ယေ "အို့ယေ" ဘို့လိဟိုးယ် အော်ဒလ်ဂို့ကျဲ။ 39သိုဘာဇေ ကိုယ်တော်ယေ ဂေါ်ရတ်သပ်အဲနိကျ သံလွင်မူရမားသတ် ဇာယေး။ သဘီအောကောလို့ ကိုယ်တော်ရ် ဖီစောသည့် အယတ်ရ်။ 40အဲဇာငှာမားသတ် ဖိုစဲရရ် ကိုယ်တော်ယေ သဘီအောကောလောရတ် "မော်(န်)ဖိရတ်ဖာ(န်) ဂေါ်ရတ်သပ်အဲယူးနော်မားသတ် နိုဖိုရီဘတ်လိုက် ဘောဂဝင့်နောသူ(န်) ဘော်ရ်ကူးစ်" ဟိုးယ် အော်ဒလ်ဂို့ကျဲ။ 41သိုဘာဇေ ကိုယ်တော်ယေ အိသေးရာရ်ဒ့ဟောသူ(န်) အေကီနိဂို့ရိ ဒူရေး ဇိုက် ဒူးထောက်ဂိုရိ 42"အဘ၊ အာင့်သူးန် အို့ဗျိုးသေ အေဘီရှိဟောရက်ပ်အဲယူ(န်) ဘာဖ်ဘောဂဝင့်နောသူ(န်) လာဂီလေး အို့သို့နိုသည်ယိုး။ သို့ ဘာဖ်ဘောဂဝင့်နောသူ(န်) ဂိုသို့ဟောသတ် အဲနိကျ ဂေါ်ရော။ အာင့်ရ် ဟော်သဒိခါးန် နိုဂိုကျိုး" ဟိုးယ် ဘော်ရ်ကူးဇဲ။ 43အန်းစောလော်မားသတ် ချောရ်ဂေါသူ(န်) ချောဒတ်ဖောသာ့အို့ဂို အယတ်နန့် ကိုယ်တော်ရတ် ဘော်လ်သည်ယေး။ 44ကိုယ်တော်ယေ ဘီရှိဟော်ချ်ထော်ဖာယေးနန့် ဂင်ဂို့ရိ ဘော်ရ်ကူးဇတ်ရရ် ကိုယ်တော်သူးန် ဖိုကျဲသတ် ဂါ့မောရ်ဖောရာအောကောလ် ရော်သော်ဒိခါးန်ဂို့ရိ မေရီမားသတ် ဖိုကျဲ။ 45ကိုယ်တော်ယေ အဲနိကျ ဘော်ရ်ကူးဇိယတ်နန့် သဘီအောကောလောရ်အတ်ရေ အချဲရရ် သဘီအောကောလတ် အောရော့(န်)လားဂိ ဂုမန်းသိုးကျဲသေ ဒေခဲရရ် 46ကိုယ်တော်ယေ သဘီအောကောလောရတ် "ကပ်လိုက် ဂုန်းဇိုက်ရိုးယောသေ။ အူရိ မိုင်ရှဲ မော်(န်)ဖိရတ်ဖာ(န်) ဂေါ်ရတ်သပ် အဲယုနော်မားသတ် နိုဖိုရီဘတ်လိုက် ဘော်ရ်ကူးစ်" ဘို့လိ အာဘာရ် အော်ဒလ်ဂို့ကျဲ။ 47ကိုယ်တော် အဲနိကျ အော်ဒလ်ဂေါရတ်သတ် အန်းစောလော်မားသတ် မာနုချောရ်ဒိုက်အို့ဂို့ ကိုယ်တော်ရ်အတ်ရေ အချဲ။ အဲမာနုချ်အဲယုနော်ရတ် သာဝကဘာရောဇောနောရ်ဘိသောရတ်သူ(န်) အတ်ဇော်(န်) ယုဒယေး ဒါကီအိုက်နဲသတ်။ ယုဒယေး ကိုယ်တော်ရတ် အဖွားသည့်ဘတ်လိုက် ဒ့ဟောသ်အယတ်ရ်။ 48ကိုယ်တော်ယေ အိသေးရေ "သူယ် မာနုချောရ်ဖွာရတ် အဖွားသည့် ချိုးသူးရောရ် အာ့သော်မားသတ် သည်ဘီသည့်နား" ဘို့လိ ဖော်စောရ်လို့ယေး။ 49သဘီအတ်ဇောနန့် အဲယူ(န်)ဒေခဲရရ် "ကိုယ်တော်၊ အာင်ရ အိသေရရတ် ဓါလိုယ် ဇော်သောဂေါရဖို့ရိဗျိုးနား" ဘို့လိ ဖော်စောရ်ဂို့ကျဲ။ 50သိုဘာဇေ ပုရောဟိတ်ဒေါမ့်ရောရ် ဂို့ရ်အတ်ဇောနောရတ် ဓါရ်ခူပ်မိုက်ကျဲရရ် ဒိုင်ဒ့ဟောသည့်ရ် ဟာနော်မားသတ်ဖိုရီ စိရိဂိယိုယ်။ 51ကိုယ်တော်ယေ "အေသူးရ်လို့ယ် သိယာ" ဟိုးယ် အော်ဒလ်သည့် အိုစိရိဂီယိုးသေ ဂို့ရောရ် ဟာနော်ရတ် အာ့သေဘာဇာ့ယတ်နန့် အောသောသေဂိုရိသည့်ယေး။ 52သိုဘာဇေ ကိုယ်တော်ယေ အိသေးရေ ဒို့ရိဘတ်လိုက်အချဲသတ် ပုရောဟိတ်ဒေါမ်ရ်အောကောလ်၊ ဗိမာန်တော်အစောင့်အောကောလ် ဂျူးဆောသာ့ရ် အောကောလော်ရတ် "သော်ရ အာင့်ရတ် ဒါဟိုက်သော်ရတ် သောရောသေအဲနိကျ လာရိ၊ ဓါအောကောလ် ဒို့ရိယတ်နန် ကပ်လိုက် အချောသတ်။ 53အိုင့် ဖိုသည့်န် ဗိမာန်တော်မားသတ် သက်ကိသည်အန်းစောလော်မားသတ် သော်ရ ကပ်လိုက် အာင့်ရတ် နော်သောရော်သတ်။ သို့ အဲတိုင်မ်အီဘဲ သော်ရရ် တိုင်မ်အို့ယေးနန့် မာရ်နတ်ယိုး အိသဲရ်ချောဂေါရတ်သေအဲယူ(န်) ဂိုရိဗျရ် တိုင်မ်မို့အို့ယေ" ဟိုးယ် အော်ဒလ်ဂို့ကျဲ။ 54သိုဘာဇေ အိသေးရာ ကိုယ်တော်ရတ် ဒို့ရိယတ်နန် ပုရောဟိတ် အောကောလောရ်ဒေါမ့်ရ်ဂို့ရ် ဂေါရောမားသေ ဒါကီနီယေးရရ် ပေတရုယေး ဒူရေးသူးန် ဖီစောသည့် ဇာယေး။ 55ဘိရာရ်ဘိသောရတ် မာနုချ်ဟိုးသူးနဲ ဝိုင်းဂိုရိ ဘိုယေးနန့် အို(န်)ဖော်ဝသတ်အတ်ရေ ပေတရုယေး အိသေးရာရ် ဘိသောရတ် ဘိုချဲ။ 56သိုဘာဇေ စိုရီမာယာဖွာအတ်ဇော်နန် ပေတရု ဘို့ယ်ရိုးယေးသတ် ဒေခဲရရ် အိသေးရေ ဒါဟိုက်သည့်ယတ်နန့် "အီသေယိုး ဒို့ရီလိုက်ကျဲသေ ယေရှုလို့ယ် အတ်ဒိုက်ယောရ်" ဘို့လိ ဟိုယေး။ 57အန်းစောလော်သ် ပေတရုယေး "မာယာဖွာ၊ အိုင့် အိသေးရေ နိုစီနိ" ဘို့လိ ဟိုယေး။ 58အရ်ကီနိ ဒေရီအို့ယေးနန့် မာနုချ်အတ်ဇောနန့် ပေတရုရတ် ဒေခဲမောသောရ် "သူယိုး အိသေးရာရ် ဘိသောရတ် အတ်ဇော်(န်)" ဘို့လိ ဟိုယေး။ သိုယ် ပေတရုယေး "အိုင့် အိသေးရာရ် ဒိုက်ယောရ် မာနုချ်နောယ်" ဘို့လိ အာဘာရိုး ဟိုယေး။ 59အာဘာရ် အတ်ဂင့်ထားအာ့နိခ် ဒေရီအို့ယေးနန့် အာရ်ဇော်နန် "အီသေယိုး ဂါလိလဲရ်အို့ယေးနန် ယေရှုလို့ယ်ဖောင့်ကတ် အစိလ်သည့် ဟားထိအောယ်" ဘို့လိ ဟိုယေး။ 60သို့ယတ်နန့် ပေတရုယေး "သူယ်ဟောသတ်အဲယူ(န်) အိုင့် ဟိုနားဖားရိ" ဟိုးယ် အဘာရ်ငြင်းဂိုကျဲ။ အဲနိကျ ဟိုယေးသတ် တိုင်မော်မားသတ် ကူရဘာခ်သည်ယေး။ 61အန်းစောလော်မားသတ် ကိုယ်တော်ယေ ပေတရုရတ် ဖိရိဆိုက်ယေ။ ပေတရုယေး ကိုယ်တော်အော်ဒလ်ဂို့ကျဲသတ် "အာဇီယာ ကူရဘာခ်နိုသည်သေး အာင့်ရတ် သူယ် နိုစီနိဘို့လိ သိမ်ဘာရ် ဟိုဘိ" ဟိုယေးသတ် ဟော်သအဲယူ(န်) မော်နော်သ် အူထေးရရ် 62ဘာရတ်နေလီယတ်နန့် အတ်နနား ဟာင်သတ်ရ်။ 63ယေရှုရတ် စိုည်ရိုယေးသတ်အိသေးရာ ကိုယ်တော်ရတ် သတ်ချတ်ရာဇ်ယတ်နန့် ဖီရာသတ်ရ်။ 64နိုသည်ကိဘတ်လိုက် ကိုယ်တော်ရ် စူဂေါရတ် ဟော်ရ်လိုယ် မော်ရစ်အဲရိ "သော်ရတ် ဟော်နန်မာရေသတ်အဲယူ(န်) ဟော" ဘို့လိ ဟိုယေးနန့် 65ဟော်သော်ဒီလာဂိုရိ ကိုယ်တော်ရတ် ဟော်ချ်ထော်သည်ယေးနန့် ဘေဂျော်သာဂိုရိ ဟောရ်။ 66ဖောရ်ဖိုက်ထေရရ် ပုရောဟိတ်ဒေါမ့်ရ်အောကောလ်၊ ကျမ်းစီနန့်သတ် မာချ်ထော်ရ်အောကောလ် ဂျူးဇာသီဒေါမ့်ရ်အောကောလတ် ဘီဆာရော်မားသတ် ကိုယ်တော်သူးန် ဖော်စောရ်ဂေါရတ်ရ်။ အိသေးရာ ကိုယ်တော်ရတ် 67"သူယ် အူဖာရ်ဂေါ်ရတ်သပ် မေရှိယနား၊ အာင်ရရတ် ဟော" ဘို့လိ ဟိုယေး။ ကိုယ်တော်ယေ "အော့ယ်ဘို့လိ အိုင့်ဟိုလေးယိုး သော်ရ အာင့်ရတ် ဘီချက်သ် နို့ဂို့ရိဘိ။ 68အူဖာရ်ဂေါ်ရတ်သပ် မေရှိယရ် ဟော်သ သော်ရရတ် အိုင့်ဖော်စောရ်ဂို့ရိလေးယိုး သော်ရ ဖြေနိုဂိုရိဘိ။ 69သို့ ယာလိုသီ မာနုချောရ်ဖွာယေ တန်ခိုးတော်၊ ဂုဏ်တော်အနန္တလို့ယ် ဖူရာယေးသတ် ဘာဖ်ဘောဂဝင့်နောရ် ဒိုင်ဒ့ဟောသည့် ဘိုယေးနန့် အုပ်စိုးဂိုရိဗျိုးသတ်အို့ယေ" ဟိုးယ် အော်ဒလ်ဂို့ကျဲ။ 70အန်းစောလော်မားသတ် အိသေးရာဘေကူးနဲ "အဲနိကျအို့လေ သူယ် ဘောဂဝင့်နောရ် ဖွာနား" ဘို့လိ ဟိုယေးရရ် ကိုယ်တော်ယေ "သော်ရ ဟိုဘိသည့်အဲနိကျ အိုင့်အို့ယိ" ဟိုးယ် ပြန်လို့ အော်ဒလ်ဂို့ကျဲ။ 71အန်းစောလော်သ် အိသေးရာယိုး "အာင်ရ နီဇေဘာဇေ အိသဲရ်ဂါလော်သူးန် အဲဟော်သအဲယုနော်ရတ် ဖူးနီ အိသေးရေ ချားကိသည့်ဗျတ်လိုက် အာရ်ကေစုသက်သေ နာလှဂိဘို့" ဘို့လိ ဟိုယေး။
Currently Selected:
Luke 22: mtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Marmagyi Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
