Luke 6
6
1ဥပုသ်နိန့် တနိန့်မာ ကိုယ်တော်ယေရှုနန့် တပည့်တော်တိက စပါးခင်းတိကို ဖြတ်လို့ လားရေခါ တပည့်တော်တိက စပါးတိကို ဆွတ်ပြီးကေ အခွံတိကို လက်နန့်ပွတ်လို့ ဆန်စိတိကို စားကတ်လီရေ။ 2ယေခါ ဖာရိရှဲတစ်ချို့က ကိုယ်တော်ယေရှု၏တပည်တော်တိကို “သင်ရို့ ဥပုသ်နိန့်မာ ခွင့်မပြုထားရေအရာတိကို ဇာအတွက်နန့် လုပ်နီကတ်လဲ” လို့ ပြောကတ်လီရေ။ 3ကိုယ်တော်ယေရှုက “ဘုရင်ဒါဝိဒ်နန့် သူ၏နောက်လိုက်တိက ဝမ်းဆာရေအခါ သူဇာတိလုပ်ခလဲဆိုစွာကို ကျမ်းစာထဲမာ သင်ရို့ မဖတ်ဖူးကတ်လား။ 4ဘုရင်ဒါဝိဒ်က ဘုရားသျှင်၏တဲတော်ထဲကိုဝင်ဗျာလ် ပုရောဟိတ်တိရာ စားခွင့်ဟိရေ ဘုရားသျှင်ကို ကပ်လှူထားရေ ပေါင်းမုန်ကို ယူစားပြီး သူ့နောက်လိုက်တိကိုလည်း ပီးခပါရေ” လို့ မိန့်တော်မူလီရေ။ 5ယေပြီးကေ “လူ့သားတော်ဖြစ်တေ ငါက ဥပုသ်နိန့်၏အသျှင်သခင် ဖြစ်တေ” လို့ မိန့်လီရေ။ 6အရာဥပုသ်နိန့် တနိန့်မာ ကိုယ်တော်က ဓမ္မာရုံမာ ဟောပြောသွန်သင်နီစိုင် ယင်းနီရာမာ ညာဖက်လက်သီနီသူ တစ်ယောက်ဟိနီလီရေ။ 7ဖာရိရှဲနန့် ကျမ်းတတ်ဆရာတစ်ချို့က ဥပုသ်နိန့်မာ တစ်ယောက်ယောက်ကို အနာရောဂါပျောက်ကင်း စီကေ စွပ်စွဲဖို့အတွက် အကြောင်းပြချက် ရှာတွိ့နိုင်ဖို့ ကိုယ်တော်ကို အနီးကပ် စောင့်ကြည့်နီကတ်ပါရေ။ 8ယေတွက်နန့် ယင်းသူရို့ ဇာပိုင်စဉ်းစားနီစွာကို သိရေအတွက်နန့် ကိုယ်တော်က ယင်းညာဖက်လက်သီနီသူကို “လူတိအားလုံးရှိ့မာ ထရပ်လိုက်ပါ” လို့ မိန့်တော်မူလီရေ။ ယေခါ ယင်းလူကလည်း ထရပ်လိုက်လီရေ။ 9ယေပြီးကေ ကိုယ်တော်ယေရှုက “သင်ရို့ကို ငါတစ်ခု မိန်းမေ။ ဥပုသ်နိန့်မာ ကောင်းစွာကိုလုပ်ခြင်းနန့် မကောင်းစွာကိုလုပ်ခြင်း ယေမှမဟုတ် တစ်ယောက်ယောက်၏အသက်ကို ကယ်တင်ခြင်းနန့် သတ်ခြင်းမာ ဇာက ပညတ်တော်နန့်ညီလဲ” လို့ မိန်းတော်မူပါရေ။ 10ယေပြီးကေ ကိုယ်တော်က ဘေးပတ်ပတ်လည်ဟိလူတိကို သိုင်းဝိုင်းလို့ လှည့်ကြည့်ပနာ ညာဖက်လက်သီနီသူကို “သင့်၏လက်ကို ဆန့်လိုက်ပါ” လို့ မိန့်တော်မူလီရေ။ ယင်းလူက လက်ကို ဆန့်လိုက်စွာနန့် သူ့လက်စွာ နဂိုအတိုင်း ကောင်းလားပါရေ။ 11ယေခါ ဖာရိရှဲတိနန့် ကျမ်းတတ်ဆရာတိက မာန်ပါကတ်ပြီးကေ ကိုယ်တော်ယေရှုကို ဇာပိုင် လုပ်ရဖို့ ဆိုစွာကို အချင်းချင်း တိုင်ပင်ကတ်လီရေ။ 12တနိန့်မာ ကိုယ်တော်ယေရှုက ဆုတောင်းဖို့ တောင်ထက်ကိုလားဗျာလ် တညဉ့်လုံး ဘုရားသျှင်ဘားမာ ဘုရားဝတ်ပြုဆုတောင်းနီလီရေ။ 13မိုးလင်းရေခါ ကိုယ်တော်ယေရှုက သူ၏တပည့်တော်တိကို သူ့ဘားကိုခေါ်လိုက်ပြီးကေ ယင်းသူရို့အထဲက တစ်ဆယ့်နှစ်ယောက်ကို ရွီးချယ်ဗျာလ် သာဝကလို့ ခေါ်တော်မူပါရေ။ 14ယင်းသာဝကတိမာ ပေတရုလို့ ကိုယ်တော် နာမယ်ပီးထားရေ ရှိမုန်နန့် သူ၏ညီ အန္ဒြေ၊ ယာကုပ်၊ ယောဟန်၊ ဖိလိပ္ပု၊ ဗာသောလမဲ၊ 15မဿဲ၊ သောမ၊ အာလဖဲ၏သား ယာကုပ်၊ မျိုးသျှစ်ပုဂ္ဂိုလ်လို့ ခေါ်ရေရှိမုန်၊ 16ယာကုပ်၏သား ယုဒနန့် နောက်ခါ ကိုယ်တော်ယေရှုကို သစ္စာဖောက်ဖို့လူ ယုဒရှကာရုတ်ရို့တိ ဖြစ်ကတ်ပါရေ။ 17ယေပြီးကေ ကိုယ်တော်က သာဝကတိနန့်တတူ တောင်ထက်က ကြွလာပနာ မြီပြန့်မာ ရပ်တော်မူလီရေ။ ယင်းနီရာမာ တခြားတပည့်တော်တိ နန့်တတူ ယုဒပြည်နန့် ဂျေရုဆလင်မြို့မှလည်းကောင်း၊ ပင်လယ်ကမ်းခြီဟိ တုရုနန့် ဇိဒုန်မြို့ မှလည်းကောင်း လာရေလူအများကြီးဟိနီလီရေ။ 18သူရို့က ကိုယ်တော်၏ဟောပြောသွန်သင်ချက်တိကို နာယူဖို့နန့် မိမိရို့၏အနာရောဂါတိ ပျောက်ကင်းဖို့အတွက် လာကတ်စွာဖြစ်ပါရေ။ မကောင်းဆိုးဝါးအပူးခံနီရရေလူတိလည်း နဂိုမူလအတိုင်း ဖြစ်လားကတ်လီရေ။ 19ကိုယ်တော်မာ အနာရောဂါအားလုံးကို ကောင်းစီရေတန်ခိုးဟိရေအတွက်နန့် လူတိုင်းကလည်း ကိုယ်တော်ယေရှုကို တို့ဖို့ကြိုးစားကတ်လီရေ။ 20ယေပြီးကေ ကိုယ်တော်ယေရှုက တပည့်တော်တိဘက်ကိုလှည့်ကြည့်ပြီးကေ သူရို့ကို “အဂု ဆင်းရဲချို့တဲ့နီရေ သင်ရို့က မင်္ဂလာဟိကတ်ပါရေ။ ဇာတွက်နန့်ဆိုကေ ဘုရားသျှင်၏သာသနာတော်ကလည်း သင်ရို့အတွက်ဖြစ်တေ။ 21အဂု ဆာလောင်နီရေ သင်ရို့က မင်္ဂလာဟိကတ်ပါ။ ဇာတွက်နန့်ဆိုကေ ဘုရားသျှင်က သင်ရို့ကို ကျေနပ်အောင်အထိ ပြည့်ဝအောင်စားကတ်ရလိမ့်မေ။ အဂု ငိုနီရေသင်ရို့က မင်္ဂလာဟိကတ်ပါရေ။ ဇာတွက်နန့်ဆိုကေ ဘုရားသျှင်က သင်ရို့ကို ရယ်စီလိမ့်မေ။ 22လူ့သားတော်ကို ယုံကြည်ရေအတွက်နန့် သင်ရို့က မုန်းစွာကို ခံရရေခါ၊ သင်ရို့က အပယ်ခံရပြီးကေ မထီလေးစားပြောစွာ ခံရရေခါ သင်ရို့က မကောင်းဆိုးဝါးလို့ခေါ်စွာကို ခံရရေအခါ သင်ရို့က မင်္ဂလာဟိကတ်ပါရေ။ 23ရှိ့အယင်ကပင် ယင်းသူရို့၏ဖိုးဖီးရို့ကလည်း ပရောဖက်တိကို ယင်းနည်းတူ ပြုလုပ်ခရေအတွက်နန့် ယင်းပိုင်ဖြစ်လာကေ ဝမ်းသာအားရ ကကတ်ပါ။ ဇာတွက်နန့်ဆိုကေ ရွှီမြို့တော်မာ သင်ရို့ရဟိဖို့ ဆုလာဘ်က ကြီးမားရေအတွက်နန့် ဖြစ်ပါရေ” လို့ မိန့်တော်မူပါရေ။ 24အရာ ကိုယ်တော်က “ယေကေလည်း သူကြွီတိ၊ သင်ရို့က ကောင်းမွန်ရေဘဝနန့် နီခရစွာဖြစ်လို့ သင်ရို့မာဂါး ဒုက္ခရောက်ကတ်လိမ့်မေ။ 25အဂုခါ ဝအောင်စားလို့နီရရေ သင်ရို့က ဒုက္ခရောက်ကတ်လိမ့်မေ။ ဇာတွက်နန့်ဆိုကေ သင်ရို့ ဆာလောင်ငတ်မွတ်ဖို့အတွက်နန့် ဖြစ်တေ။ အဂုခါ ရယ်နီရေသင်ရို့က သင်ရို့ ဒုက္ခရောက်ကတ်လိမ့်မေ။ ဇာတွက်နန့်ဆိုကေ သင်ရို့ ဝမ်းနည်းပက်လက်ငိုကတ်ရဖို့အတွက်နန့် ဖြစ်တေ။ 26လူအများရို့က သင်ရို့အကြောင်းကို အမွန်းတင်လို့ ပြောနီကေ သင်ရို့ ဒုက္ခတွိ့ကတ်ရလိမ့်မေ။ ဇာတွက်နန့်ဆိုကေ ယင်းသင်ရို့၏ဖိုးဖီးတိကလည်း အကွန်ဆောင်ပရောဖက်ရို့ကို ယင်းပိုင်အမွန်းတင်လို့ ပြောခရေအတွက်နန့် ဖြစ်တေ” လို့ မိန့်တော်မူပါရေ။ 27ကိုယ်တော်က ဆက်ဗျာလ် “ယေနန့် အဂုနာယူနီကတ်တေ သင်ရို့ကို ငါ ပြောမေ။ သင်ရို့ ရန်သူတိကိုလည်း မေတ္တာထားကတ်ပါ။ သင်ရို့ကို မုန်းနီသူတိကိုလည်း ကောင်းကျိုးကို လုပ်ပီးလိုက်ပါ။ 28သင်ရို့ကို ကျိန်သူတိကိုလည်း ဘုရားသျှင် ကောင်းချီးမင်္ဂလာပီးဖို့ တောင်းလျှောက်ကတ်ပါ။ သင်ရို့ကို နှိပ်စက်သူတိကိုလည်း ဆုတောင်းပီးကတ်ပါ။ 29တစ်ယောက်ယောက်က သင့်ပါးတစ်ဖက်ကို သတ်ကေ အရာပါးတစ်ဖက်ကိုပါ လှည့်ပီးလိုက်ပါ။ တစ်ယောက်ယောက်က သင့် ကိုယ်ရုံကို တောင်းကေ သင့်အထဲဝတ်အင်္ကျီကိုပါပီးလိုက်ပါ။ 30သင့်ဘားက တစ်ခုခုတောင်းလာသူတိုင်းကို ပီးကမ်းလိုက်ပါ။ တစ်ယောက်ယောက်က သင်ပိုင်ဆိုင်ရေပစ္စည်းတိကို ယူထားကေ ယင်းသူ့ဘားက ပြန်လို့မတောင်းပါကေ့။ 31သူတစ်ပါးက မိမိကို ဆက်ဆံစီချင်ရေအတိုင်း တစ်ခြားသူတိကိုလည်း ဆက်ဆံပီးပါ။ 32သင်ရို့ကို မေတ္တာထားသူကိုရာ မေတ္တာထားနီကေ ဘုရားသျှင်က ယင်းအရာအတွက် သင့်ကို ကောင်းချီးမင်္ဂလာ ပီးနိုင်ဖို့လား။ အပြစ်ဒုစရိုက်သမားတိကတောင် သူရို့ကိုသျှစ်ရေလူကို သျှစ်ခင်တတ်ပါရေ။ 33သင့်ဘားမာ ကောင်းပီးရေလူတိကိုရာ သင်ကပြန်လို့ကောင်းပီးကေ ဘုရားသျှင်က သင်ရို့ကို ကောင်းချီးမင်္ဂလာ ပီးနိုင်ဖို့လား။ အပြစ်ဒုစရိုက်သမားတိတောင် ယင်းပိုင် လုပ်နိုင်ပါရေ။ 34သင်ရို့ ပြန်လို့ရဖို့ မျှော်လင့်ထားသူကိုရာ ချီးကေ ဘုရားသျှင်က သင်ရို့ကို ကောင်းချီးမင်္ဂလာ ပီးနိုင်ဖို့လား။ အပြစ်ဒုစရိုက်သမားတိကတောင် ချီးရေပမာဏအတိုင်း ပြန်ရဖို့ သူရို့ အချင်းချင်း ချီးကတ်ပါရေ။ 35ယေကေလည်း သင်ရို့က ရန်သူတိကို မေတ္တာထားဗျာလ် သူရို့အတွက် ကောင်းကျိုးလုပ်ကတ်ပါ။ တစ်ခုကိုလေ့ပြန်လို့ရဟိဖို့ မမျှော်ကိုးဘဲ ချီးပီးကတ်ပါ။ ယင်းပိုင်လုပ်ကေ သင်ရို့က ကြီးရေဆုလာဘ်ကိုရဟိဖို့ဖြစ်ပြီးကေ အမြင့်မြတ်ဆုံးဘုရားသျှင်၏သားသမီးတိ ဖြစ်လာကတ်လိမ့်မေ။ ဇာတွက်နန့်ဆိုကေ ဘုရားသျှင်က ကျေးဇူးမသိတတ်ရေ လူတိနန့် ဆိုးယုတ်တေလူတိကိုတောင် သနားကြင်နာရေ အတွက်နန့်ဖြစ်တေ။ 36သင်ရို့၏အဖဘုရားသျှင်က မေတ္တာကရုဏာတော်နန့်ပြည့်စုံရေပိုင် သင်ရို့ကလည်း မေတ္တာကရုဏာနန့်ပြည့်စုံကတ်ပါ” လို့ မိန့်တော်မူပါရေ။ 37ယေပြီးကေ ကိုယ်တော်က ဆက်ပြီးကေ “တစ်ခြားလူတိကို စီရင်စွာတိ မလုပ်ပါကေ့၊ ယေမှရာ သင်ရို့ကို ဘုရားသျှင်စီရင်လိမ့်မေ မဟုတ်ပါ။ သူတစ်ပါးကို အပြစ်တင်စွာ မလုပ်ကတ်ပါကေ့၊ ယေမှရာ သင်ရို့ကို ဘုရားသျှင် အပြစ်တင်လိမ့်မေ မဟုတ်ပါ။ သူတစ်ပါးကို ခွင့်ရွှတ်ကတ်ပါ၊ ယေမှရာ ဘုရားသျှင်ကလည်း သင်ရို့ကို ခွင့်ရွှတ်ပီးပါလိမ့်မေ။ 38တစ်ခြားသူတိကို ပီးကမ်းပါ။ ယင်းပိုင်လုပ်ကေ သင်ရို့ကိုလည်း ပီးကမ်းလိမ့်မေ။ သင်ရို့၏အိပ်ထဲကို ဖိပနာလှုပ်ပနာ ပပုံးပြည့်အောင်ထည့်စွာကို ခံရလိမ့်မေ။ သင်ရို့ တစ်ခြားလူတိကို ပီးရေပမာဏအတိုင်း ဘုရားသျှင်က သင်ရို့ကို ပြန်လို့ပီးစွာခံရပါလိမ့်မေ” လို့ မိန့်တော်မူပါရေ။ 39ယေပြီးကေ ကိုယ်တော်က ယင်းသူရို့ကို ပုံဥပမာတစ်ခုနန့် မိန့်တော်မူလီရေ။ ကိုယ်တော်က “မျက်ကန်း တစ်ယောက်က အရာမျက်ကန်း တစ်ယောက်ကို ရှိ့က လမ်းပြနိုင်ဖို့လား။ ယင်းနှစ်ယောက်စလုံး ဂျောက်ထဲကို ပြုတ်ကျလားဖို့ မဟုတ်လား။ 40ဆရာထက်ပိုလို့ သာရေတပည့်မဟိ။ ယေကေလည်း အပြည့်အဝ သင်ယူတတ်မြောက်ရေ တပည့်တိုင်း သူရို့၏ဆရာပိုင် ဖြစ်လာကတ်ပါလိမ့်မေ။ 41သင်ရို့က သင်ရို့မိတ်ဆွီ၏မျက်စိထဲက သဲမှုန့်သျှေကို မြင်ပြီး သင်ရို့မျက်စိထဲက သစ်တုံးလောက်အမှုန့်ကို သတိမထားမိကတ်ပါ။ 42သင်ရို့က သင်ရို့၏မျက်စိထဲက သစ်တုံးလောက်အမှုန့်ကိုမမြင်ဘဲ၊ သင်ရို့၏မိတ်ဆွီကို ‘မိတ်ဆွီ၊ သင့်မျက်စိထဲက သဲမှုန့်သျှေကို ထုတ်ပီးပါမေ’ လို့ ဇာပိုင်ပြောလို့ရနိုင်ဖို့လဲ။ သူတော်ကောင်းအကွန်ဆောင်နီရေလူတိ၊ သင်ရို့မျက်စိထဲက သစ်တုံးလောက်အမှုန့်ကို အယင်ထုတ်ပစ်ပါ။ ယေမှရာ သင်ရို့က သင်ရို့၏မိတ်ဆွီ၏မျက်စိထဲက သဲမှုန့်သျှေကို ထုတ်ပီးဖို့ သင်ရို့ ယှင်းယှင်းလင်းလင်း မြင်ရပါလိမ့်မေ” လို့ မိန့်တော်မူလီရေ။ 43ကိုယ်တော်က ဆက်ပြီးကေ “ကောင်းရေအပင်က မကောင်းစွာအသီးကို မသီးရေပိုင် မကောင်းရေအပင်ကလည်း ကောင်းစွာအသီးကို သီးဖို့မဟုတ်ပါ။ 44အသီးကို ကြည့်ဗျာလ် အပင်အကြောင်းကို သိနိုင်ပါရေ။ ဆူးပင်တိက သဖန်းသီးတိကို ဆွတ်လို့မရနိုင်ရေပိုင် ခြုံပုတ်တိကလည်း စပျစ်သီးတိကို ဆွတ်လို့ မရနိုင်ပါ။ 45ယင်းနည်းတူ ကောင်းရေလူတိက သူရို့၏စိတ်နှလုံးထဲမာ ကောင်းရေအရာတိဟိလို့ ကောင်းရေအရာတိကို ပြုလုပ်ကတ်ပါရေ။ မကောင်းရေလူတိက သူရို့၏စိတ်နှလုံးထဲမာ မကောင်းရေအရာတိဟိလို့ မကောင်းရေအရာကိုရာ ပြုလုပ်ကတ်ပါရေ။ ယေတွက်နန့် လူတိနှုတ်ကထွက်ရေအရာတိက သူရို့၏စိတ်နှလုံးထဲမာ ဟိရေအရာတိ ထွက်လာစွာ ဖြစ်တေ” လို့ မိန့်တော်မူပါရေ။ 46ယေပြီးကေ ကိုယ်တော်ယေရှုက ဆက်ပြီးကေ “သင်ရို့က ငါ၏စကားကို နားမထောင်ဘဲ ဇာအတွက်နန့် ငါ့ကို ‘အသျှင်၊ အသျှင်’ လို့ ခေါ်နီကတ်လဲ။ 47ငါဘားကိုလာပြီးကေ ငါ့တရားတော်တိကို နာယူပနာ လိုက်နာကျင့်ကြံရေလူက ဇာပိုင်လူနန့်တူရေဆိုစွာကို သင်ရို့ကို ငါ ပြောပြမေ။ 48ယင်းလူက မြီကိုအနက်ကြီးတူးဗျာလ် ကျောက်တိနန့်အုတ်မြစ်ချထားရေ အိမ်ဆောက်ရေလူနန့် တူပါရေ။ ရီကြီးလာရေခါ ထိုအိမ်ကို လှိုင်းတိဘုတ်ကေလည်း ယင်းအိမ်စွာ ကောင်းအောင်အုပ်မြစ်ချထားရေအတွက်နန့် လှုပ်ခါမှုမဘဲ နောင်းနီလိမ့်မေ။ 49ယေတွက်နန့် ငါ၏တရားတော်တိကို နားထောင်ပြီးကေ မလိုက်နာမကျင့်ကြံရေလူကအုတ်မြစ်မချဘဲ မြီကြီးထက်မာ အိမ်ဆောက်ရေလူနန့် တူပါရေ။ ရီကြီးလာဗျာလ် ယင်းအိမ်ကို လှိုင်းတိဘုတ်လာရေအခါ ချက်ချင်းပြိုလားပနာ အားလုံးပျက်စီးလားလိမ့်မေ” လို့ မိန့်တော်မူလီရေ။
Currently Selected:
Luke 6: ntpv-rv
Highlight
Share
Copy
Want to have your highlights saved across all your devices? Sign up or sign in
This translation of the Northern Rakhine Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
