Luke 9
9
1ဟောည်ႇဒီန် စဝ်ဖြားစီတောႇကစု သာဝကဂဲ အူကိူရ်လေႈအာရ်အီးဒီန် အာပ်ဒဲႈတဂိုးအာဏာ ကနာည်နံင်ဘယ်ဒေ ပ်ုန်ဟြာည်ရောဂါကာည်း ခြောႈလေႈတိုအာဝ်ကျအာဝ်နကဲဒီန်။ 2ဟောည်ႇဒီန် စဝ်ဖြားဟည်ပ္လေႈကဲဟာဝ်းဟော ဘည်မိုႈဆာဆနာတော်စဝ်ဖြား။ 3စဝ်ဖြားစီဒါႈ “ခံင်အီနံင်တောပ်တိုပဲ မည်တိူဝ်ႈဟာဝ်းဆေ။ မည်တိူဝ်ႈဟာဝ်း ဂြိုန်း၊ ကပျာဝ်း၊ ပ်ုန်ဟောမ်၊ ရိူန်း၊ ဂြူလှိူဝ်းဂဲကဲဒီန်။ 4ဂါင်အီနံင်ရဲ့ရံပ်ရိုႈပဲ အာဝ်ဒါႈမိုႈဂါင်အဆေ ဂေါည်ဟာဝ်း ဂါပဲအာဝ်ႎီရ်ဒါႇအရာပ်ဒီန်။ 5ဆာ်အာဝ်မိူဝ်ႈအီရဲ့ရံပ်ရိုႈပဲ ဘာည်းလိူည်ဒဲႈအူန်းဆဒိတဂဲa တခြာႈကဘူႈတဇိူင် ခိင်လည်လေႈဟာဝ်းပဲ ဒါႇအရာပ်ဒီန်။” 6တပဲ့ကဲဒီန်မာ် လည်လေႈဟာဝ်းဒါႇစဝ်ဖြား ဟာဝ်းဟောဆဒါင်မှိူမ်မံင်ဂလာ တောန်အရာပ်တောန်ကဒါႇ၊ ဆနံမ်ပ်ုန်ဟြာည်ဒဲႈ ရောဂါ ကဲအီဆဝ်ဖိူဝ်ကဲဒီန်။ 7ဟောခံမ်းဟေရုဒ်နီန် အ်ုန်ဟည်နောႈကီန်း ခိင်ဟောည်ႇယိူဝ်းအ်ုန်တငါဝ်း ထာန်ဘည်ရေဲန်စဝ်ဖြား။ ဂေါႇမိုႈ မံင်အီမာ်ဒါႈ “ဆြာခါမ်ဒဲႈဘည်ညှူမ် တာဆြာယောဟာန် ဟည်ႎီရ်အီမ်းဒေဲႈ” 8မံင်အီးမာ်ဒါႈ “အာရိယာတိုအီးမှိူမ် ဧလိယ ဟည်ႎီရ်စွရောတ်စာ်မ်း” မံင်အီးမာ်ဒါႈ “ခေဲင်အာရိယာတိုအီးမှိူမ် အိုရ်ဆီုင်အာည်ႇနီန် ဟည်ႎီရ်အီမ်းဒေဲႈ” ဂဲကဲနီန်ယာ့်။ 9ခိင်ဒီန် ဟေရုဒ်စီဒါႈ “မိုႈအောဟည်ဆူည်ႇ ကဲက္လကိင်ယောဟာန်။ ဆဒါင်ပ်ုန်ယိူဝ်းတငါဝ်း ကဇေန်နီန်နီန် အဆေအ်ုန်မိုႈ ဟောည်ႇဒီန် နောႈဖိူမ်ဆိင်ယိူဝ်းအ်ုန်တစဝ်ဖြားမာ် ဟည်ဒါင်းခည်းခည်း။” 10ခိင်ႎီရ်ရောတ်သာဝကကဲနီန် ကဲဟည်ဟြာင်းပ်ုန်ရေဲန်ဒေဲႈဂဲ တစဝ်ဖြား။ ဟောည်ႇဒီန် စဝ်ဖြားစီစွဟာဝ်းဂဲ ပရဝ်ဗက်ဇဲဒ။ 11ဂေါႇမိုႈအီယိူဝ်းဒေတငါဝ်း ဘည်မိုႈဘည်ဘာည်းကဲဒီန် စီပဲန်အီးတောပ်ဟာဝ်းဒိုည်ႇရဘံန်း စဝ်ဖြား။ 12ဟည်ရောတ်စူန်မှိူဝ် သာဝကအူကိူရ်လေႈအာရ်အီးကဲဒီန် စီရောတ်ဒေဲႈတစဝ်ဖြား “စဝ်ဖြား၊ ဂေါႇမိုႈအရာပ်နီန် မိုႈအရာပ်ဂေါည်ဆငါည်၊ အာဝ်မိူဝ်ႈတိုအီး တိုန်းႎီရ်ပဲတ်တိုအီးကဲနီန် ပရဝ်ကဒံတ်ကစံမ်ပနီန်။ ကဲနံင်လို ဒီအီတ် ကာည်း ပ်ုန်ဟောမ်ပ်ုန်ဒါ။” 13စဝ်ဖြားစီဒါႈ “ဒဲႈပ်ုန်ဟောမ်တကဲ အူမျိုးအူလှေ” သာဝကကဲစီဒါႈ “တအယ်မိူဝ်ႈလိူည် ကဘဒဲႇဖံန်လှေ ကာည်း ကားအာရ်တို။ ဆာ်အယ်ဒါႈနံင်ဟျံင်တိုအီးဂဲနီန် ပည်ဒိုႇဒိုည်ႇ နံင်လိုဟာဝ်းဇိူရ်ႈ ပ်ုန်ဟောမ်ကဲနီန် ပက္လာႈ။” 14ဖုင်တိုအီးဒီန် ကောန်အီမာည်းဂေါည်ပွံတ် တိုအီးကပံတ် ဖံန်ဟြဲင်။ စဝ်ဖြားစီဒါႈ တတပဲ့အ်ုန် “က္လာင်းကဲကကာႈတိုအီး ဖံန်ကိူရ်အူခမို အံက်ကစုအူဒီ” 15တပဲ့တော်အ်ုန်ဂဲမာ် ဆူည်ႇတိုအီးဂဲအံက် ဘည်ရဒေင်ဒီန်။ 16ဟောည်ႇဒီန် စဝ်ဖြားစီတိူဝ်ႈ ကဘဖံန်လှေဒီန် ကာည်း ကားအာရ်တိုဒီန် ငိူဝ်ႈတိူရ်ႈကာင်ဟာဝ် တိူဝ်ႈကနေဲႈဂုင်တော်စဝ်ဖြား ကကာႈကဘဖံန်လှေဒီန် ကာည်း ကားအာရ်တိုဒီန် ဒါႈယိူဝ်ႇတတပဲ့ ဆိင်ကဆာင်းတတိုအီးဂဲ။ 17ဆဲႈဒါႇတိုအီးဂဲဒီန် ဘိူန်းဒေဟောမ်ဖည်းမာ် တပဲ့တော်ကဲဒီန် ကဲပ်လိူည်ပ်ုန်လှိူဝ်း ပ်ုန်ဟောည်ႇဟောမ်မာ် ဘိူန်းနိုက်ဘိုး အာရ်ဆာ။ 18မိူဝ်ႈအငည်း ခိင်စဝ်ဖြားမှာန်းဆုအ်ုန်အူပါးအူပါး တပဲ့တော်ဂဲရောတ်ဒေဲႈ စဝ်ဖြားစီဆမွံတ် “ဆေတိုအီးဂဲ ဒါႈအောမိုႈ။” 19“မံင်အီးမာ်ဒါႈ စဝ်ဖြားမိုႈ ဆြာခါမ်ဒဲႈဘည်ညှူမ် တာဆြာယောဟာန်၊ နံင်မိုႈ ဧလိယမာ် ဒါႈ။ ကဲဒါႈထဲင်မိုႈ အာရိယာတိုအီးမှိူမ်အူပါး အီမ်းဒေဲႈ။” 20ခိင်ဒီန် စဝ်ဖြားစီဆမွံန် “ပဲလာ့်? အဆေပဲထာင်အောမိုႈ?” ပေတရုစီႎီရ်ပ္လါန် “ကိုတော်မိုႈမေရှိယ ပ်ုန်ပ္လေႈဒေဲႈစဝ်ဖြား။” 21စဝ်ဖြားမာ် ခြဲအူန်းကတီးကရီး ကနာည်နံင်အာဝ်ႎီရ်က္လာင်းတအီး။ 22ဟောည်ႇဒီန် စဝ်ဖြားစီဒါႈ တတပဲ့အ်ုန်ဂဲ “ခြိူဝ်းမျိုးဇူးအီဒါင်းဂဲ၊ ပုရောဟေက်ဂဲ ကာည်း ဆြာဆမားကျာမ်းဂဲ နံင်လီလာနဘာည်း တကောန်စဝ်ဖြား။ ကဲနံင်ဆံင်ခံတ်လာ်ဒါ ပျံမ်ယံမ်းအ်ုန်။ မိုႈလိူည် ဆငည်းအိုည် အဆာက်အ်ုန်နံင်ႎီရ်ဒေဲႈဘိုး။” 23ဟောည်ႇဒီန် စဝ်ဖြားဒါႈတကူန်ရဝ်မာဂါင်ဂဲ “တောန်အီဆိင်ပဲန် တပဲ့တော် တောပ်ရဘံန်းအောနီန် ဘ်ုပ်မိုႈတိုအီး ႎီုန်အကျိုးတိုပြီမ် ကွံတ်ရံင်က္လံပ်တည်း ဘယ်ဒေတောပ်ရဘံန်းအော တောန်ဆငည်း။ 24ကဲအီဆိင်ခြဲအဆာက်တိုပြီမ်ကဲဒိူန် နံင်ဘ်ုပ်ချှူမ်။ မိုႈလိူည် အဆေဆွံင်အဆာက်ကနာည်အောဒိူန် နံင်ကတူႈပ်ုန်ကဇောည်။ 25ပဲဆံမ်ဘိူန်းစံမ်ဒေ အူပ်ဘြောင် ကတာည်းကံမ်ဖာဒါင်းနီန်မာ် ဆာ်ဇိုဇာတ်ပဲလူလေဲဝ် ချှူမ်အဆာက် ဆေနံင်မိူဝ်ႈအကျိုး။ 26ဆာ်ပဲဆာည်းယောကနာည်အော ကောန်စဝ်ဖြားမာ် ခိင်ႎီရ်စွရောတ်အ်ုန်တောပ် ကန်ုမ်ဒေဝါမျြံတ်၊ ဘုင်တဂိုးစဝ်ဖြားကဲနီန် အ်ုန်နံင်ဆာည်းအူန်း ကနာည်ပဲ။ 27ဆာ်အောက္လာင်းအခည်းတပဲ ခေဲင်ပဲအီဇံင်းပနီန် မံင်ခ္လဒိူန် ဆာ်အာဝ်ယိူဝ်းတိူရ်ႈ ဆာဆနာတော်စဝ်ဖြား နံင်အာဝ်ယံမ်းမ။ 28ႎါည်းဟောည်ႇဟောအ်ုန်ဘည်ဒီန် လှေင်တာရ်ဆငည်း စဝ်ဖြားတောႇဒိူည်း ပေတရု၊ ယောဟာန်၊ ယာကုက်ကဲနီန် စွဟိုက်တေဲင်ဂေါင် ကနာည်နံင်မှာန်းဆု။ 29ခိင်စဝ်ဖြားမှာန်းဆု တိုပိုင်းအ်ုန်ဟည်ခ္လါည်း ဂါ်ႈဂြူမာ် လူည်ကဘူည်ႇဟာဝ်းပွံတ်။ 30ဟောည်ႇဒီန် မောရှေကာည်း ဧလိယ ရောတ်ဒေဲႈကတီုင် ကြောႈတောပ်စဝ်ဖြား။ 31ဖုင်တဂိုးဂဲ ဆီုင်ဂီုည်ဟိူဝ်ကတား ခေဲင်ကီုင်းဂျေရုဆလင် ဟည်က္လာင်းဒိုႇ ဘည်နံင်ဘ်ုပ်ခါမ် တယံမ်းစဝ်ဖြား။ 32မိုႈလိူည် ပေတရုကာည်း တပဲ့တော်အာရ်အီး ဟည်အီတ်ဆငဲႈပွံတ်ဒေ။ ခိင်ရဆိူရ်ႈကဲ ကဲဟည်ယိူဝ်းပွံတ်ဒေ ဂြူပ်စဝ်ဖြား ဘည်စေ့စုင် တဂိုးတော်စဝ်ဖြား။ ကဲယိူဝ်းဘိုး အာရိယာတိုအီးမှိူမ်ဂါရ်အာရ်ပါး အီကြောႈတစဝ်ဖြား။ 33ဟောည်ႇဒီန် ခိင်လည်လေႈဟာဝ်း မောရှေကာည်း ဧလိယဒီန် ပေတရုစီဒါႈ တစဝ်ဖြား “စဝ်ဖြား၊ အရာပ်နီန် မိုႈအရာပ်မှိူမ်ဂေါည် ဂေါႇဘည်ဒီန်ဆိင်ရေဲန်ဒဲႈ ရဂံင်ဂေါည်စဝ်ဖြားအူလှေ၊ ရဂံင်ကနာည်ဧလိယအူလှေ၊ ရဂံင်ဂေါည် ကနာည်မောရှေအူလှေ။” မိုႈလိူည် အ်ုန်အာဝ်နံပ်မ ပ်ုန်ဒါႈအ်ုန်။ 34ခိင်ဒါႈပေတရု၊ အီုင်အူႇဟည်ဘ္လီုက်လှူပ်ဒိုႇတေဲင်ကဲ အ်ုပ်ကဘိတ်ဒိုႇ ကဲမာ် ဟည်ယောဒိုႇ။ 35ခိင်ဒီန် ဟံမ်းအူလှေ ယိူဝ်ႇတအီုင်အူႇဒီန် ဒါႈ “အ်ုန်မိုႈကောန်အော၊ ပဲလိုတငါဝ်းကြောႈအ်ုန်။” 36ႎါည်းဟောည်ႇလေႈဟံမ်းဒီန် ပေတရု၊ ယောဟာန် ကာည်း ယာကုက်ကဲဒီန်မာ် ယိူဝ်းလိူည်ဒေဂြူပ် စဝ်ဖြားယေရှုအူပါး။ တအဆေမာ် ကဲအာဝ်က္လာင်း ဘည်မိုႈဘည်ဘာည်း ဘည်ယိူဝ်းဒေဲႈကဲ။ 37ဘာည်းဆငည်းဘံန်း စဝ်ဖြားကဲတပဲ့အ်ုန်ဂဲ ဟည်လေႈဒါႇတေဲင်ဂေါင်ဒီန် ကူန်ရဝ်မာဂါင်ကဲမာ် ရဲ့ဒေရံပ်ရိုႈ ကတူႈဂဲ။ 38ခေဲင်ကူန်ရဝ်မာဂါင်ကဲဒီန် အူအီး “စဝ်ဖြား၊ မှာန်းရာ့်စဝ်ဖြား ရေဲန်ဒဲႈဆဲ့ ကောန်အောချံမ်ဆာ။ 39အ်ုန်ကတူႈတိုအာဝ်ကျအာဝ်န ဂေါႇမိုႈလီပ်ဒေဲႈခေဲင်တို လာလီနဘာည်းတအ်ုန် အ်ုန်ရျံင် တိုပိုင်းအ်ုန်မာ်ကဘ်ုရ် ခေဲင်မိုည်ႇအ်ုန်မာ် လေႈဒိုႇဘူရ်ႈ။ တိုအာဝ်ကျအာဝ်နဒီန် ဒဲႈကီန်းဒဲႈနူန်းတတိုအ်ုန်။ တတိုအ်ုန်မာ် လေႈကီန်းခည်း။ 40အောကံပ်မှာန်းတပဲ့တော်စဝ်ဖြား ဒေဲႈခြောႈလေႈ တိုအာဝ်ကျအာဝ်နနီန်မာ် ကဲအာဝ်ဘယ်မဒေခြောႈလည်လေႈ။” 41ခိင်ဒီန် စဝ်ဖြားစီဒါႈ တတပဲ့တော်အ်ုန်ဂဲ “အို နောႈဖိူမ်ညှူမ်မာ်အာဝ်မိူဝ်ႈ၊ တိုအီးရေဲန်ကလူည်ႇရဒေင်ကဲနီန် ထာန်မှောအောနံင်ဘ်ုပ်ရဲတ်ဘိုးဒေ ဂေါည်ရူမ်တောပ်ပဲ” ဟောည်ႇဒီန် စဝ်ဖြားစီဒါႈ “တောႇဒေဲႈကောန်မည်း တအော။” 42ခိင်ဒေဲႈကောန်ဒဲႇဒီန် တိုအာဝ်ကျအာဝ်နကဲဒီန် လီပ်ဒေဲႈခေဲင်တိုအ်ုန် ပ်ုန်ရည်းပ်ုန်ကဘ်ုရ်တိုအ်ုန်။ စဝ်ဖြားဟည်ဟောည်ႇ ပနံဝ်းတိုအာဝ်အာဝ်ကျဒီန် ပ်ုန်ခေါခါႇဖါ်ႈကောန်ဒဲႇ အာပ်ႎီရ်ပွံတ် တကူန်အ်ုန်။ 43တိုအီးဂဲနီန်မာ် အာမ်းဒိုႇ ဂေါႇကဲဘိူန်းဒေဂြူပ် တဂိုးတော်စဝ်ဖြား။ ခိင်အာမ်းတိုအီးဂဲ တပဲ့ဘည်ပုင်ရံင်ရေဲန်စဝ်ဖြား ပည်ဒိုႇဒိုည်ႇ စဝ်ဖြားဟည်ဒါႈ 44“ဟံပ်နောႈဟံပ်ဖိူမ်ပဲ တငါဝ်း ပ်ုန်က္လာင်းအော။ ကောန်စဝ်ဖြားနံင်ကတူႈအီး အာပ်ခေဲင်တည်းရာန်ဆူယာ့်။” 45ဂေါႇမိုႈ ဒါအိုမ်ကြောႈအဓိပ္ပာယ်ပ်ုန်ဆိင်ဒါႈ နှာင်းအာဝ်လိူရ်ႈ တပဲ့တော်ဂဲမာ် အာဝ်လှံန်တနောႈ အာဝ်ကဘ္လောႈမတဖိူမ်ဂဲ။ မိုႈလိူည် ကနာည်နံင်ႎီရ်ဆမွံတ်မာ် ကဲအာဝ်ယမ။ 46ဟောည်ႇဒီန် တပဲ့တော်ကဲ ကထဴင်အဆေမိုႈ အီမျြံ တ်မှယ်ဒိုရ်ဂဲ။ 47မိုႈလိူည် ဂေါႇမိုႈစဝ်ဖြားနံပ်ကဲ ကထဴင် အ်ုန်စီဆူည်ႇကောန်ဒဲႇအူအီး ဇံင်းပြောအ်ုန် 48စီဒါႈတတပဲ့တော်အ်ုန်ကဲ “အဆေဘယ်ဒေ ရံပ်ခါမ်ကောန်ဒဲႇနီန် ကနာည်အော နံင်မိုႈအီဘယ်ဒေ ရံပ်ခါမ်အော။ အီရံပ်ခါမ်အောမာ် နံင်မိုႈလိူည်အီဘယ်ဒေ ရံပ်ခါမ် စဝ်ဖြား။ ခေဲင်ပဲ အဆေဘယ်ဒေ ပဇောႈတိုပြီမ် နံင်မိုႈအီမျြံ တ်မှယ်ဒိုရ်ယာ့်။” 49ဟောည်ႇဒီန် ယောဟာန်စီဒါႈ “စဝ်ဖြား၊ ယဲဟည်ယိူဝ်းဒေဲႈယာ့် ကဝ်အီဒါဇီုဝ်နာမ် စဝ်ဖြား ခြောႈလေႈတိုအာဝ်ကျအာဝ်နဒိူန်။ ဂေါႇမိုႈ အ်ုန်အာဝ်မိုႈတိုအီးတောပ်ဒေဲႈအယ် ယဲခြဲဒေဲႈအူန်း ကနာည်နှာင်းအ်ုန် အာဝ်ရေဲန်ဘည်နီန်” 50စဝ်ဖြားစီဒါႈ “မည်ခြဲအ်ုန်။ ကဲအီအာဝ်ဆံင်ခံတ်ပဲမိုႈ အီရံပ်ခါမ်ပ်ုန်ရေဲန်ပဲ။” 51ဟောည်ႇဒီန် ဂေါႇမိုႈအခိင်အာဝ်ကဒိုင်း ကနာည်နံင် ဒိူည်းဒေဲႈ ပကီုင်းဆျှိုည်တော် စီပဲန်စဝ်ဖြား ကဘြိူဝ်ႈပွံတ်နောႈအ်ုန် ကနာည်နံင်ဟာဝ်း ပကီုင်းဂျေရုဆလင်။ 52အ်ုန်ပ္လေႈပွံတ် စေတမာန်ဂဲ ဟာဝ်းပရဝ် ခြိူဝ်းရှမာရိရအာည်ႇ ကနာည်နံင်ဘြဲဆားအူန်း ကနာည်အ်ုန်။ 53မိုႈလိူည် ဂေါႇမိုႈစဝ်ဖြားဟံပ်နောႈဒါႈနံင်ဟာဝ်း ပကီုင်းဂျေရုဆလင် စီပဲန် တိုအီးရဝ်ရှမာရိကဲ အာဝ်ရံပ်ရိုႈမ စဝ်ဖြားယေရှု။ 54ယာကုက် ကာည်း ယောဟာန်ဟောည်ႇယိူဝ်း ဘည်ဘာည်းလှေနီန် ဂါရ်စီဒါႈ တစဝ်ဖြား “စဝ်ဖြား၊ နံင်လိုမှာန်းတကာင်ဟာဝ် ပ္လေႈငံရ်ပ်ုန်ကဆူမ်းပဲတ်ရဝ်ဂါင်ကဲ တောပ်ဘည်ရေဲန် အရိယာတိုအီးမှိုမ်အာည်ႇနီန် အ်ုန်အီမိုႈ ဧလိယ” 55စဝ်ဖြားစီကပံတ် ႎါည်းဟောည်ႇပနံဝ်းအ်ုန်တကဲ 56တိုအီးရဝ်ကဲဒီန်မာ် လည်လေႈဟာဝ်းဒိုႇ ပရဝ်အီဟံရ်။ 56ရဒေင်ဟာဝ်း စဝ်ဖြား ကာည်း တပဲ့တော်အ်ုန်ကဲ မိူဝ်ႈတိုအီးအူအီး ဒါႈတစ်ဖြား “စဝ်ဖြားစွရောတ်စာ်မ်း ဒီမှောမာ် အောနံင်တောပ်” 57စဝ်ဖြားစီဒါႈ “အအို့ဘြည်မာ် မိူဝ်ႈကတဝ်။ ဆီမ်းကဲမာ် မိူဝ်ႈ ရဟူန်။ မိုႈလိူည် ဆာ်မိုႈကောန်စဝ်ဖြား ကနာည်နံင်ပ္လေႈကိင်လိူည် အာဝ်မိူဝ်ႈ။” 58ဟောည်ႇဒီန် စဝ်ဖြားဟည်တောႇကဝ်အီဟံရ်ဒီန် ကနာည်နံင်တောပ်ဟာဝ်းကဲ တိုအီးအူအီးဒီန်စီဒါႈ “စဝ်ဖြား၊ ရဲ့ဘိူဝ်အောဟောည်ႇ ဆံင်ကျို တိုကူန်အော” 59စဝ်ဖြားစီဒါႈ “လီုင်းဝိညာဉ်နောႈကဲအီယံမ်းကဲဒိူန် ဆံင်ကျို တိုယံမ်းဒီန်။ စဝ်ဖြားစီဒါႈတအ်ုန် ဆာ်မိုႈမည်း လွံတ်မည်းဟောက္လာင်း ဘည်မိုႈဆာဆနာတော်စဝ်ဖြား။” 60မိူဝ်ႈဘိုးတိုအီးဟံရ်အူအီးမာ် ဒါႈ “စဝ်ဖြား၊ အောနံင်တောပ်ဟာဝ်း စဝ်ဖြား။ မိုႈလိူည် ခွါင်းဆဲ့အောႎီရ် ကယိူဝ်းတောပ်တိုအီးဂါင်ယဲ” 61စဝ်ဖြားစီဒါႈ “တိုအီးဘားဒါပ္လေရထည် ကပံတ်ႎီရ်တိူရ်ႈရဘံန်းနီန် နံင်အာဝ်လှေဲမ့်မ တဇီုင်းကာန်ဂီုင်နီန်။ ဘည်လိူည်ဒီန် ကဲအီတောပ်ဒါရဘံန်းအော ဆိင်ႎီရ်ဇူးဘိုး ဇိုဇာတ်ပြီမ်ကဲဒိူန်မာ် အာဝ်ကတာန်မ ဆာဆနာတော်တစဝ်ဖြား။” 62
Currently Selected:
Luke 9: stpv-rv
Highlight
Share
Copy
Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
