Luke 7
7
1ႎါည်းစဝ်ဖြားဟောည်ႇဟောတြား ပနံဝ်းဒဲႈတကူန်ရဝ်မာဂါင်ဂဲ အ်ုန်စွဟာဝ်းပွံတ် ပကီုင်းကပေရနောင်။ 2ဂေါႇတပဲ့အီအွံရ်ဆီုက်ရောမအူအီးa အီဂေါည်ပကီုင်းဒီန် ကဝ်ပ်ုန်ညှူမ် ကဝ်ပ်ုန်ဘိူန်းအ်ုန်တနောႈဒါင်းနီန် ဆဝ်းဖိူဝ်ကံပ်နှေရ်နံင်ယံမ်း။ 3ခိင်အီအွံရ်ဆီုက်နီန် ယိူဝ်းဒေတငါဝ်းဘည်မိုႈ စဝ်ဖြား အ်ုန်စီပ္လေႈ တိုအီးဒါင်းခြိူဝ်းမျိုးဇူးကဲမံင်ခ္လ ဟာဝ်းပါင်းစဝ်ဖြား ကနာည်ခေါခါႇတပဲ့အ်ုန်ကျ။ 4ကဲမာ်ဒေဲႈက္လာင်းတစဝ်ဖြား “အီအွံရ်ဆီုက်နီန် အ်ုန်မိုႈအီမှိူမ်ဘိူန်း ပ်ုန်ကဇောည်တမည်း စဝ်ဖြားယေရှုယာ့်။ 5ဂေါႇမိုႈအ်ုန်ရံက်ဇာဝ်း ခြိူဝ်းမျိုးယဲ အီရေဲန်လှူကျောင်ဓမ္မာယုင်မာ် မိုႈအ်ုန်ယာ့်။” 6ဟောည်ႇဒီန် စဝ်ဖြားဟည်စွတောပ်ဟာဝ်းကဲ ခိင်ရောတ်ကဒံတ်ပဂါင်အီအွံရ်ဆီုက်ဒီန် အ်ုန်စီပ္လေႈဟာဝ်းတအီးအ်ုန်ကဲ က္လာင်းတစဝ်ဖြား “စဝ်ဖြား ဂေါႇမိုႈအာဝ်တာန်စဝ်ဖြားစွရောတ်ပဂါင်နီန် မည်ခါမ်ယာ့်နူန်း စွရောတ်စာ်မ်း။ 7ဆဲႈဒီန် တပဲ့မာ် အာဝ်တာန်စိဟာဝ်းရောတ်စာ်မ်း ပစဝ်ဖြား။ ဆာ်စဝ်ဖြားဒဲႈလိူည်အမိင် ခေါခါႇအ်ုန် နံင်ဟည်ကျယာ့်။ 8တိုပြီမ်အောမာ် ဂေါႇမိုႈအောဂေါည်ခြူမ် တိုအီးဒါင်း၊ အီဂေါည်ရခြူမ်အောမာ် မိူဝ်ႈဘိုးကောန်ဆီုက်ကဲပစိူဝ်း။ ဆာ်အောဒါႈတကောန်ဆီုက်အောကဲ ‘ဟာဝ်း’ မာ် ကဲဘ်ုပ်ဟာဝ်း ဆာ်ဒါႈ ‘ဒေဲႈ’ မာ် ကဲဘ်ုပ်ဒေဲႈယာ့်။ ဆာ်ဒါႈတတပဲ့အောကဲ ရေဲန်လှေနီန်မာ် ကဲဘ်ုပ်ရေဲန်။” 9စဝ်ဖြားဟည်အာမ်း ခိင်ယိူဝ်းအ်ုန်တတငါဝ်းကြောႈလှေဒီန် အ်ုန်ကပံတ်တိူရ်ႈ ကဲအီတောပ်ဒေဲႈရဘံန်းကဲဒီန် အ်ုန်ဒါႈ “အောနံင်က္လာင်းတပဲ ခေဲင်အရာပ်ခြိူဝ်းမျိုးအစ္စရေးနီန် အောညှံမ်တိူမ်ယိူဝ်းမ တိုအီးညှူမ်ဒါင်း ကံပ်ဘာည်းနီန်။” 10ခိင်ႎီရ်ရောတ်တိုအီး ပ်ုန်ပ္လေႈအီအွံရ်ဆီုက်ဒီန် ရောတ်တဂါင် ကဲယိူဝ်းပွံတ် အီရေဲန်ဇီုင်းဒီန် ခေါခေါခါႇခါႇ။ 11ဘာည်းဆငည်းဘံန်း ခိင်စဝ်ဖြားကဲတပဲ့ စွရောတ်စာ်မ်း ပကီုင်းအီဇီုဝ်နာဣန၊ ကူန်ရဝ်မာဂါင်ကဲမာ် တောပ်ဒေဲႈဒိုႇ ရဘံန်းစဝ်ဖြား။ 12ခိင်ရောတ်ကဲတပ္လိုႈဒါင်းကီုင်း မိူဝ်ႈတိုအီးအူခမို ဒါရကွံတ်ကွံတ်တိုအီးယံမ်းအူအီး လေႈနှာရိူဝ်ႇကီုင်း ကနာည်နံင်ဟာဝ်းတိုက်။ ကဝ်အီယံမ်းနီန် အ်ုန်မိုႈကောန်ယာကမာည်းအူအီး တိုအီးဂေါည်ခေဲင်ကီုင်းမာ် ဟာဝ်းတိုန်းဒိုႇတောပ်အ်ုန်။ 13ခိင်ယိူဝ်းစဝ်ဖြားယေရှုနီန် တယာကမာည်းဒီန် အ်ုန်ဟည်ကေႎ အ်ုန်စီဒါႈ “မည်ယာမ်း။” 14ဟောည်ႇဒီန် စဝ်ဖြားယေရှုစီစွဟာဝ်းရီမ်း ကော်မ်တိုအီးယံမ်းဒီန် ဒါတည်းအ်ုန်စီႇ၊ ကညာအီကွံတ်တိုအီးယံမ်းကဲဒီန်မာ် ဇံင်းဒဲႈတစဝ်ဖြားယေရှု၊ စဝ်ဖြားယေရှုစီဒါႈ “ကောန်ဒဲႇ အောနံင်က္လာင်းတမည်း။ ယိူဝ်ႇပွံတ်။” 15ဟောည်ႇဒီန် ကောန်ဒဲႇကဝ်အီယံမ်းဒီန်မာ် ယိူဝ်ႇ၊ ဇူႈပွံတ်ဒေကြောႈ။ စဝ်ဖြားယေရှုမာ် အာပ်ဒဲႈပွံတ် ကောန်ဒဲႇဒီန် တမာအ်ုန်။ 16တိုအီးဂဲမာ် ဟည်အာမ်းဒိုႇ “ကဲစီဒါႈ အာရိယာတိုအီးမှိူမ်အူပါး ဟည်ရောတ်ဒေဲႈကနာည်အယ်ယာ့်။ စဝ်ဖြားဟည်တိူရ်ႈမေန်းဒံန်ခြဲ ဒဲႈတအယ်ယာ့်” ႎါည်းဟောည်ႇဒါႈကဲဘည်ဒီန် ကဲစီတိူဝ်ႈကနေဲႈပွံတ်ဂုင်တော်စဝ်ဖြား။ 17ဂုင်ဆဒါင်အီကဆီုဝ်ကဆဲင် တောပ်စဝ်ဖြားမာ် ဟည်ဘ္လီုက်လှူပ်ဒိုႇ ခေဲင်ကပီုန်ယုဒ ကာည်း အရာပ်အရာအီကဒံတ်ဒီဒီန်။ 18ႎါည်းတပဲ့တော်တာဆြာယောဟာန်ကဲနီန် က္လာင်းအ်ုန်တငါဝ်း ဘည်မိုႈဘည်ဘာည်း ပါ်ဒိုႇဒိုည်ႇ စီပဲန်အ်ုန်တောႇတပဲ့အ်ုန်ကဲအာရ်အီး ဆူည်ႇဂါရ်ဟာဝ်းဆမွံတ်စဝ်ဖြားယေရှုဒါႈ 19ကဲပ္လေႈဟာဝ်း တစဝ်ဖြား ကနည်နံင်ဆမွံတ် မိုႈတ “စဝ်ဖြားမိုႈလာ့်အဆျှီန်မေရှိယ ပ်ုန်ဒါ့ရဲ့ယဲ? ဆာ်အာဝ်မိုႈ ယဲနံင်ဘ်ုပ်ရဲ့ဘိုး အီးဟံရ်?” 20ခိင်ဟောည်ႇရောတ်ကဲ တစဝ်ဖြား ကဲစီက္လာင်းဒါႈ “ဆြာခါမ်ဒဲႈဘည်ညှူမ် တာဆြာယောဟာန် ပ္လေႈဒဲႈယဲရောတ်ဆမွံတ် ‘တစဝ်ဖြားယေရှုဒါႈ စဝ်ဖြားယေရှုမိုႈကဝ်အီနံင်စွရောတ်ဒေဲႈ? ဆာ်အာဝ်မိုႈ ယဲနံင်ဘ်ုပ်ရဲ့ထဲင်ဘိုး အီဟံရ်?’” 21ခိင်ဒီန် စဝ်ဖြားစီဒါႈ အောရေဲန်ဒဲႈ ကဲအီဆဝ်ဖိူမ်ကဲနီန် ဂဲန်၊ အောခြောႈႎီုန်တိုအာဝ်ကျအာဝ်န တအီကတူႈတိုအာဝ်ကျအာဝ်နလီပ်ဒေဲႈခေဲင်တို၊ ကဲအီငါည်အံမ်မာ် အောရေဲန်ဒဲႈကဲႎီရ်ဘိူန်းဒေတိူရ်ႈ။ 22စဝ်ဖြားစီဒါႈတတပဲ့တော်ယောဟာန်ကဲဒီန် “ႎီရ်က္လာင်းပ်ုန်ယိူဝ်းပဲ တဆြာယောဟာန်။ တိုအီးငါည်အံမ်ကဲ ဟည်ႎီရ်ယိူဝ်းဒေတိူရ်ႈ။ တည်းဇိူင်ကဲအီအာဝ်ရဲင်အာဝ်ဘ္လောမ်ကဲဒိူန်မာ် ဟည်ဘယ်ဒိုႇဒေယိူဝ်ႇဟာဝ်း။ ကဲအီကတူႈ ရောဂါတူတ်မာ် ဟည်ဂဲန်ဒိုႇ။ ကဲအီဟျာ့်ကအာဝ်းကဲဒိူန်မာ် ဟည်ႎီရ်ယိူဝ်းဒိုႇဒေတငါဝ်း။ ကဲအီယံမ်းမာ် ဟည်ႎီရ်အီမ်းဒိုည်ႇယာ့်။ ကဲအီဖ္လါန်းကဲဒိူန်မာ် ဟည်ယိူဝ်းဒေတငါဝ်း ဆဒါင်မှိူမ် မံင်ဂလာအီမှိူမ်။ 23စဝ်ဖြားနံင်ဒဲႈ မံင်ဂလာကျ မံင်ဂလာနတကဲအီအာဝ်ဆံင်ခံတ်အော။” 24ႎါည်းဟောည်ႇႎီရ်တပဲ့ယောဟာန်ကဲဒီန် စဝ်ဖြားယေရှုစီဟောဘည်မိုႈယောဟာန် တကူန်ရဝ်မာဂါင်ဂဲ “ပဲဟာဝ်းခေဲင်ဘြည်ကန္တာရ ဆေမိုႈပ်ုန်အာန်းပဲတဟာဝ်းတိူရ်ႈ? မိုႈပဲဆိင်တိူရ်ႈ အီချှူပ်ဒါဂြူကယံရ်ႈ။ 25တိုအီးချှူပ်ဒါဂြူကယံရ်ႈ ဒါဂြိုခြီရ်ကံပ်နိုက်တတိုဒီန် နံင်ယိူဝ်းလိူည်ခေဲင်ဟောဟော်ခံမ်း။ 26ဆာ်အာဝ်မိုႈ ဆေပဲဆိင်ယိူဝ်း ပဲစီလေႈနှာရိူဝ်ႇ။ မိုႈပဲဆိင်ယိူဝ်း အာရိယာတိုအီးမှိူမ်တိုအီးန? ငျားအေ့။ ယောဟာန်နီန် အ်ုန်မျြံ တ်မှယ်ဒိုရ် အာရိယာတိုအီးမှိူမ်ကဲယာ့်။ 27အရိယာတိုအီးမှိူမ် အိုရ်ဆီုင်အာည်ႇနီန် ကိက်အူန်းဘည်မိုႈယောဟာန်ဒါႈ စဝ်ဖြား ဒါႈအူန်း မေရှိယဘည်နီန်။ ‘အာည်ႇပ္လေႈအောတမည်း အောနံင်ပ္လေႈဟာဝ်းတိုအီးအော ရအာည်ႇ။ အ်ုန်နံင်ဘြဲဆားဒဲႈ ရဒေင်မည်းယာ့်။’ 28အောနံင်က္လာင်းပဲတငါဝ်း တေဲင်ကံမ်ဖာဒါင်းနီန် တိုအီးမျြံ တ်မှယ်ယောဟာန် အဆေမာ်ညှံမ်ပျေဲႈစိ။ မိုႈလိူည် ခေဲင်ဆာဆနာတော်စဝ်ဖြား ကံပ်ဒါႈလိူည်အာဝ်ပဲန်ဆေမာ် အ်ုန်မျြံ တ်မှယ်ဒိုရ် ယောဟာန်။” 29ဇူႈပွံတ် ကဲအီကဲပ်ကောက် မောကံပ်ရောတ်ပွံတ်တိုအီးဂဲ ဂေါႇမိုႈကဲခါမ်လာည်းဘည်ညှူမ် တဆြာယောဟာန် ခိင်ကဲယိူဝ်းဒေတငါဝ်း ကြောႈလှေနီန် မိုႈစဝ်ဖြားရံပ်ခါမ် ဘည်ဆီုဝ်ရိုအ်ုန်ယာ့်။ 30မိုႈလိူည် ဖာရိရှဲဂဲ ကာည်း ဆြာဆမားကျာမ်းဂဲနီန် အာဝ်တောပ်ဘည်တဂေန်းစဝ်ဖြား ဆံင်ခံတ် ကနာည်နံင်စူပ်ခေဲင်အိုမ် တိူဝ်ႈမံင်ဂလာ ခါမ်လာည်းဘည်ညှူမ် တယောဟာန်။ 31ဟောည်ႇဒီန် “စဝ်ဖြားစီဆီုပ်ဒါႈဘိုး ပဲနံပ်လာ့်ဆေပဲနှေရ်၊ တိုအီးတဇားမှောပဲနှေရ် 32‘အီကံပ်ဂံရ်မာ် ပဲအာဝ်ကာ။ ယဲကံပ်ယာမ်းဒါ ဒါႈဆချံင်မာ် ပဲအာဝ်ယာမ်း’ ပဲနှေရ်လိူည် ကောန်ဒဲႇလည်ပြိုႈလည်ရျံင်ဒါႈကြောႈ ခေဲင်က္လာႈ။ 33ယောဟာန်နီန် ပ်ုန်ဟောမ်မာ်အာဝ်ဟောမ်၊ အိုမ်ပ္လေကဘီရာတ်အီနံင်ပဲန်မဝ်းလိူည် အ်ုန်အာဝ်တျံင် ပဲစီက္လာင်းဒါႈ ‘ယောဟာန်မိုႈတိုအီးကတူႈ ခံင်တိုအာဝ်ကျအာဝ်နလီပ်။’ 34ခိင်ကောန်စဝ်ဖြားဟောမ်ပ်ုန်ဟောမ် ပဲဒါႈဘိုး ‘တိုအီးနီန် အ်ုန်မိုႈတိုအီး ပဲန်ဘဝ်ကီုက်ဘဝ်ဂေါ တောပ်တိုအီးကဲပ်ရူရ်ႈဂဲ ကာည်း တိုအီးရေဲန်အီုင်ဂ္လံတ်ကဲ။’ 35မိုႈလိူည် ဆာ်မိုႈကောန်စဝ်ဖြားခည်းခည်း နံင်လှံန်ကဘ္လောႈအူန်း ပ်ုန်ရေဲန်ယာည်းယောဟာန် တနောႈကဲ။” 36ဟောည်ႇဒီန် ဖာရိရှဲအူအီး အ်ုန်ဖိက်ပါင်း စဝ်ဖြားဒေဲႈဟောမ်ပေါမ်မှိူဝ် ပဂါင်အ်ုန်။ ဂေါႇဘည်ဒီန် စဝ်ဖြားစီစွရောတ်အံက် တေဲင်ပဒဲန် ကနာည်နံင်ဟောမ်ပ်ုန်ဟောမ်။ 37ခေဲင်ကီုင်းဒီန် အ်ုန်မိူဝ်ႈကောန်အီပ်ုန်အူအီး လူည်ႇခေါပ်ပြာႇမိူဝ်ႈအီုင်ဂ္လံတ်ဒါင်း ဂေါႇမိုႈအ်ုန်ယိူဝ်းတငါဝ်း မိုႈတစဝ်ဖြားအံက်ဟောမ်ပ်ုန်ဟောမ် ခေဲင်ဂါင်ဖာရိရှဲ စီပဲန်တိူဝ်ႈအ်ုန်ဟာဝ်း အိုမ်ပျြံင်အူရ်ႈငှူရ် မိူဝ်ႈငေါႈခံန် အူကဘဲဝ်ႏ ပဂါင်ဒီန်။ 38ဟောည်ႇဒီန် အ်ုန်စီဟာဝ်းဇံင်းရဘံန်းစဝ်ဖြား ယာမ်းဒါအိုမ်ငါည်အ်ုန် ပါည်းဇိူင်စဝ်ဖြား ဒါဟုကိင်အ်ုန် ခူတ်ခေါႈဇိူင်စဝ်ဖြားဒီန်။ ဟောည်ႇဒီန် အ်ုန်ခြီတ်ပွံတ်ဇိူင် ခ္လီန်ပွံတ် အိုမ်ပျြံင်အူရ်ႈငှူရ်အ်ုန်ဒီန် တဇိူင်စဝ်ဖြား။ 39ခိင်ဒီန် ဖာရိရှဲ ကဝ်အီဖိက်ပါင်းစဝ်ဖြားနီန်စီယိူဝ်း “အ်ုန်စီတဂေန်းဒါႈ ဆာ်တိုအီးအူအီးနီန်မိုႈ အာရိယာတိုအီးမှိူမ်အခည်း အ်ုန်လိုအေ့နံပ် ဆေကောန်အီပ်ုန်နူးမိုႈ။ ဘည်မိုႈအ်ုန်တကောန်အီပ်ုန်အာဝ်ကျ အာဝ်နမာ် လိုအေ့နံပ်။” 40စဝ်ဖြားမာ် ဒါႈတရှိမုင် “ရှိမုင်၊ အောမိူဝ်ႈပ်ုန်နံင်က္လာင်းတမည်း အူလှေ” ရှိမုင်စီဒါႈ “က္လာင်းစဝ်ဖြား။ စဝ်ဖြားစီဒါႈ” 41“တိုအီးအာရ်အီး ကစုဒေရံမ်ရိူန်း တတိုအီးအူအီး၊ အူအီးစီရံမ် ဒေနာရီဒင်္ဂါးဖံန်ပယာႈb၊ အူအီးစီရံမ် ဒင်္ဂါးဒေနရီဖံန်ကိူရ်။ 42ဂေါႇမိုႈကဲအာဝ်ဘယ်ဒေႎျံ တ် ကညာနှီကဝ်ပ်ုန်ရံမ်ကဲဒီန် စီဒါႈ ‘ပါရ်အာဝ်လိုယာ့်ဒေႎျံ တ် ရိူန်းပ်ုန်ရံမ်အူန်းပါရ်ဒိူန်’ ခိင်ဒါႈအ်ုန်တဂါရ်ဘည်ဒီန် နောႈကဝ်နံင်ပျောလှိူဝ်း?” 43ရှိမုင်စီဒါႈ “ကဝ်အီရံမ်ဂီုန်းဒီန် နံင်ပျောလာ်ဒါ တာင်ကေးစူး။” ႎါည်းဟောည်ႇဒါႈစဝ်ဖြား “ငျားဘည်ဒါႈမည်းဒီန်ယာ့်” 44အ်ုန်စီကပံတ်ကဒါႇ ကောန်အီပ်ုန်ဒီန် ဒှုါတရှိမုင် “မည်းယိူဝ်းလာ့် ကောန်အီပ်ုန်နီန်။ ခိင်အောစွရောတ်ပဂါင်မည်း မည်းဘိူည်အာဝ်ဒဲႈလိူည် အိုမ်ကနာည်နံင်ပါည်းအောတဇိူင်မာ် အ်ုန်ဒါအိုမ်ငါည်အ်ုန်ပါည်း ဒါဘိုးဟုကိင်အ်ုန် ခူတ်ခေါႈဇိူင်အော။ 45ခိင်ရောတ်အော မည်းဘိူည်အာဝ်ခြီတ်လာ်ဒါ ရံပ်ရိုႈအောမာ် ကောန်အီပ်ုန်နီန် အ်ုန်ခြီတ်ကစံပ်ကစံပ်ပွံတ်ဇိူင်အော။ 46မည်းဘိူည်အာဝ်ဒါ အိုမ်ပျြံင်တာန်လူန် ခ္လီန်းတကိင်အောမာ် ကောန်အီပ်ုန်နီန် အ်ုန်ဒါပွံတ် အိုမ်ပျြံင်အူရ်ႈငှူရ်အီမိူဝ်ႈငေါႈခံန် ခ္လီန်းတဇိူင်အော။ 47ဂေါႇဘည်ဒီန် ဘည်ကတူႈအ်ုန်တ ပ္လိုတ်ခွါင်းဒဲႈ အီုင်ဂ္လံတ်ဒါင်းအ်ုန်နီန် မိုႈဂေါႇမေတ္တာတြားအုင်ရံက်အ်ုန် ဒါင်းဇာဝ်း။” 48ဟောည်ႇဒီန် စဝ်ဖြားစီဒါႈ တကောန်အီပ်ုန်ဒီန် “အီုင်ဂ္လံတ်ပ်ုန်လူည်ႇမည်းပါ်ဒိုႇဒိုည်ႇ ဟည်ပ္လိုတ်ႎါင်းခွါင်းဒဲႈဒိုႇယာ့်အေ့။” 49ခိင်ဒီန် ကဲအီအံက်တောပ်စဝ်ဖြား စီလည်ကဘိူဝ်ႇဒါႈ “ကံပ်ဒါႈပွံတ် နံင်ပ္လိုတ်ခွါင်းဒဲႈ အီုင်ဂ္လံတ်ပ်ုန်လူည်ႇဒီန် တိုအီးအူအီးနီန် အဆေအ်ုန်မိုႈ?” 50စဝ်ဖြားစီဒါႈ တကောန်အီပ်ုန်ဒီန် “မိုႈပ်ုန်ညှူမ်မည်း ႎီရ်ကဇောည်ဒဲႈတမည်း။ ဂေါႇဘည်ဒီန် ဟာဝ်းလောတ်လောတ်လာပ်လာပ်မည်းဒါအေ့။”
Currently Selected:
Luke 7: stpv-rv
Highlight
Share
Copy
Want to have your highlights saved across all your devices? Sign up or sign in
This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
