Luke 20
20
1အငြီးကုဒီ့ ကိုယ်တော်ယေရှုအွယ့် ဟိုဖီး လူထုဖုန်းတရာ နောင် မင်္ဂလာစတင်ခို ဗိမာန်တော်ကု။ ထွို့မဲ့ ပုရောဟိတ်ဖုန်း၊ ကျမ်ဒါးဆရာဖုန်း နောင် ဂျူးခေါင်းဆောင်ဖုန်း တွိုလေးကာထွို့ 2"ဟိုဖီတရာဖုန်းနောင် ဝေဖီစတင်ခိုဖုန်း ဗိမာန်တော်ကုဒွို နားမိုးနောင် အခွင်အာဏာဟနာ မေဟလဲ့ အခွင်အာဏာအွယ့်ဘာ လမာဖီအပ်စေးကန်းနား" တစီ့ကာ ကိုယ်တော်နိန်းအွယ့်။ 3ထွို့မဲ့ ကိုယ်တော်အွယ့် "ငါးအီ တစီ့နားကတာ အဘား၊ နားက့ဖရေကာလုဲင်။ 4ငွတ်သျှီမင်္ဂလာဆရာယောဟန်ဒီ့ လမာဖီအပ်စေကန်းအာ အခွင်အာဏာ ဖီကငွတ်ဖီသျှီမင်္ဂလာ။ ဗွယ်ဖရာဖီစေးကန်းခွင်နောဝ်။မေဟလဲ့ ပလူးအပလားပလား ဖီအပ်စေးကန်းနောဝ်" တစီ့နိန်းအွယ့်။ 5ထွို့မဲ့အာကာ ချင်ချင် တင်ပင်လိုကာ"ဗွယ်ဖရာဆောင့် က့မေဖရေနိန်းအွယ့် ဘာဟနာ နားက့လီယွမ်အန်ကာဟ ယောဟန် အာအီဒေါင့်ချာက့နိန်းအွယ့်။ 6ဒေါင့်မာလဲ့ မေဒေါင့် ပလူးအပလားပလားဖီလဲ့၊ လူထုပရိသတ်ဖုန်းအွယ့် ယွမ်အန်လိုကာ ယောဟန်ဒွို ပျန့်အရိယာဆူတော်ကောင်အပလားအွယ့်မဲ့ အီနက်စီ့ဒါက့ နောင်လုံဖုန်း ဒေါင့်လိုကားနိန်းအွယ့်။ 7အွယ့်မဲ့ အာကာအွယ့် လာမာဖီစေကန်းယောဟန် ဖီကဖီ ငွတ်သျှီမင်္ဂလာအခွင်အရေဒွို အာကာသိဟငြင်းလိုကာဒါ့နိန်းအွယ့်။ 8ထွို့မဲ့ ကိုယ်တော်အွယ့် "ငါးဒွိုလဲ့ နောင်အခွင်အာဏာဟနာထွို့မိုးတာနိန်းဒွို ဒွို ငါးလီဖရေဟာ နားက့ဟာ" မိန့်နိန်းအွယ့်။ 9ထွို့မဲ့ ကိုယ်တော်အွယ့် မိန့်ဖီလူထု တတိုက်တွိုင်အဘာ။ "ပလူးအပလားအွယ့် စူ့ထွို့စပျစ်ခြန့်အခြန့်ထွို့ အာအွယ့် ခပ့်စေးကန်း ပလူးအိုပွိုင်းခြန့််အွယ့်မာထွို့ စစွာ့ထန်ငြီးတာ။ 10ထွိုင်တွိုထွို့ စပျစ်သာခိန်း အာအွယ့် ကြွလေးစွမ်းအပလားထွို့ အန်ချန့်လေချွော် အာကလထွိုက်ဝေစုဖုန်း။ ဒေါင့်မာလဲ့ ပလူးစူ့စပျစ်စာဖုန်းအွယ့် တွယ့်လိုကာစွမ်းအွယ့်ပလားထွို့ ဖီဟတစွို့စွို့ထွို့မဲ့ ဝါစွာ့ထန်လိုကာ။ 11ဒါ့အလိုင် ခြန့်ဗွယ်အွယ့် ကြွထိုင်းဒါ့စွမ်းဒါ့အပလား။ ဒေါင့်မားလဲ့ ပလူးစူ့စပျစ်စာဖုန်းအွယ့် တွယ့်ထိုင်လိုကာဒါ့ ပလူးအွယ့်ပလား။ အာကာအွယ့် မိုးလိုကာပလူးအွယ့်ပလား ဖီးကလ တကာတ့ နောင် ယာစာ့ဖုန်းထွို့ ဖီဟ တစွို့စွို့ထွို့မဲ့ ဝါစွာ့ထိုင်လိုကာဒါ့။ 12ဒါ့အလိုင် ခြန့်ဗွယ်အွယ့် ဖီကြွလေးဒါ့ စွမ်းအန်းတတွမ့်ကုပလားအွယ့်လဲ့ အာကာအွယ့် တွယ်လိုကာပလူးအွယ့်ပလား ဗွမ့်နောင် စွမ်းအကီဟိုထွို့ ကြွကျိန်းချာဒါ့။ 13ထွို့မဲ့ ခြန့်ဗွယ်အွယ့် "ငါအီမိုးဘာ နိန်းမာ။ ငါးအီကြွလေး ငါးကရက်ဘာဒါ ငါးဖုခု။အာကာအွယ့် မေရိုသေလဲ့ ပရိုသေဒါ" ဒေါင့်တိုး အာနန်နိန်းအွယ့်ထွို့ ကြွလေအာဖုခု။ 14ဒေါင့်မာလဲ့ ပလူးစူ့စပျစ်စာဖုန်း ထွိုင်သျှီထွို အာဖုခုထွို့ 'ပလူးဒွိုးပလားဒွို မေတွို့ဒါ့အငြီ့ခါ့ အီပျန့်ပလူးလအမွေ။ အာအီလဒါ အမွေဖုန်း ဖီကပျန့်ကေ့ က့ဥစ္စာတာ မိုးစီ့လိုကာကေ့အာနယ်' အာကာချင်ချင် တင်ပင်လိုကာနိန်းအွယ့်ထွို့ 15ပလူးစူ့စပျစ်စာဖုန်းအွယ့် ကျွိုထန်လိုကာခြန့်ဗွယ်အွယ့်ပလားဖုခု စပျစ်ခြန်ခုနောင်ထွို့ မိုးစီ့လိုကာကေ့။ မေပျန့်နိန်းအွယ့်အွယ့် ခြန့်ဗွယ်ဒွို အီမိုပလူးအွယ့်ဟိုဖုန်း နိန်းမာ။ 16"ခြန့်ဗွယ်အွယ့် လေးထွို့အီးလေမိုးစီ့ စပျစ်စူ့စာဖုန်း ။ မေထွို့ ခြန့်အွယ့် အီးဖီးအပ်ကေ့ ပလူးလငါ့ကျွော့်ကု "မိန့်နိန်းအွယ့်။ ပလူးကဟွမ့်ဘာစာဖုန်းလဲ့" တပျန့်ဒွိုးဘာ ကျန်းပျန့်မားမာမာ" ဒေါင့်ကာနိန်းအွယ့်။ 17ဒေါင့်မာလဲ့ ကိုယ်တော်အွယ့် ဟွိုင့်ကြိုင်အာကာထွို့ "ကျမ်းကုဒီ့ 'ပလူးတေးတာစာဖုန်း ကပယ်စေးကန်းဒါ လုံဒီ့ ပျန့်တို တန်ဖိုအဒူစွက်။' ဒေါင့်ကဒါအဓိပ္ပာယ်အွယ့်ဘာဒီ့ ဘာသဒေါင့် တဟနာ။ 18ပလူးကလင်တေးဒါ လုံအွယ့်ဘားလောင်စာဖုန်းအွယ့် အီးတကာကာဘာ ပိန်ကွို့ကွို့။ လုံအွယ့်မာလဲ့ မေလင်တေးပလူးအပလာပလားလောင်အွယ့် ပလူးအွယ့်ပလားလဲ့ အီဖွမ်နွမ်တွို့" မိန့်နိန်းအွယ့်။ 19ကောကနာဒါစာ ပရောဟိတ်ဖုန်း၊ ကျမ်ဒါဆရာဖုန်းအွယ့် သိလိုကာ ကိုယ်တော် ဘာသဒေါင့် အာကာအွယ့်မဲ့ မိန်းနောင် တတိုက်တွိုင်အွယ့်ဘာအွယ့်ကြားမဲ့ တေးတွို့အွယ့်ခါ့ခါ့ အာကာဘာသယွူထွို့ ကျန်းလိုကားကိုယ်တော်လဲ့ အာကာစကန်လိုကာ လူထုပရိသတ်ဖုန်း။ 20အွယ့်ကြားမဲ့ အာကာအွယ့်အိုပွိုင်းကွင်လိုကာအပျက် ကိုယ်တော်ငိုဖုန်းကုထွို့ ဖီကကျန်းကိုယ်တော်ထွို့အပ်ဒါ ခွမ့်ခမ်းကျွော့်ကုတာ အန်ကြွလေးကာ သူလျှိုဆူတော်ယောင်ဆောင်ဖုန်း။ 21သူလျှိုအွယ့်ဟိုအွယ့် "ဆရာ၊ ဆရာဒွို ဟိုစွမ်မှန်ကန်တိုတာထွို့ ဖီလွို့ဟ လမားမားအရေထွို့၊ စွမ့်ဖီ ဗွယ်ဖရာ ကလေ့စစ်မှန် ညီတိုနောင်သမ္မာတရာဖုန်းဒွို က့အိုသိတို။ 22က့ဒွို့ဆက်အခွန် ရောမကန်မင်စုံဗွယ်ဆောင့်ဒွို ညီနဲ့နောင် တရာတော်၊ မေဟလဲ့ ညီဟနောဝ်" လျှောက်ဒင်ကာနိန်းအွယ့်။ 23ကိုယ်တော်အွယ့် အိုသိ ပလူးအွယ့်ဟို ပရိယာယ်ထွို့ 24နေငါး ရောမကွမ့်ဗီလုဲင်။ အွယ့်ကုလောင် ပါစို့လမာရုပ်နောင် လမာနျန်း" တစီ့ပလူးအွယ့်ဟိုနိန်းအွယ့်။ ပလူးအွယ့်ဟိုအွယ့် "ရောမကန်မင်စုံဗွယ် ဆီဇာနျန်း နောင် အာရုပ်တို" ဖရေကာနိန်းအွယ့်။ 25ထွို့မဲ့ ကိုယ်တော်အွယ့် "တာကဆိုင်နောင်ဆီဇာလဲ့ ဆက်ဆီဇာ ထွို့ တာကဆိုင်နောင် ဗွယ်ဖရာလဲ့ ဆက်လိုကာဗွယ်ဖရာလုဲင်" မိန့်နိန်းအွယ့်။ 26ပလူးအွယ့်ဟိုအွယ့် ကွင်လိုကာကိုယ်တော်တမား ပလူးပရိသတ်မေငါ့ လီမို့ဟ ကာဟ ဟွမ့်ဆန်လိုကာ ကိုယ်တော်တဖရေဖုန်းထွို့ အိုယင်တစ်လိုကာတာ။ 27အွယ့်ကုပါအွယ့် ပလူးလီယွမ်အန်ဟ ပလူးစီ့ထွို့ ပြန်မွမ်ထန်ချာဒါ ပလူးကဟောင့်ဒါ ဇဒ္ဒုကဲ ပိန်ပလားပလားအွယ့် ရီ့ဘို့လေးကာ ကိုယ်တော်ဆောင့်ထွို့ 28"ဆရာ၊ မောရှေစည်းကမ်းကျမ်ကုဒီ့ 'ပလူးမာ့အိုစာအပလားအွယ့် ဖုဖုန်းမေလီအိုဟထွို့ စစီ့ကေ့အွယ့် ကောကအိုကေ့စာ မယ်မုဲင်မွော်အွယ့် အန်နီဘာ အာပွော်ခု။ အာကာ ကအန်လွူလင်ဒါ ဖုခုအကီစွက်ပလားအွယ့် သတ်မှတ်ဖီဘာနောင် ကစီ့ကေ့ဒါ အာဝေခုဖုခု' တျန်စေကန်းနိန်းအွယ့်။ 29မေနိန်းအွယ့်အွယ့် အလုဲင်းကု တပွော်ဝေ အိုးအန်းတနွို့ထွို့ အဒူစွက်ပလားအွယ့် တိုးယွမ်းတိုးပါးတိုလဲ့၊ အာဖုဖုန်း အိုဟထွို့ စစီ့ကေ့။ 30ဖုခုအန်းတငြီ့ကူပလားအွယ့် အန်းနီပမွော်အွယ့်ပလားထွို့လဲ့ ဖူဖုန်းလိအိုဟထွို့ စစီ့ကေ့ဒါ့။ 31အန်းတတွမ့်ကုပလားအွယ့်လဲ့ ဗွမ့်ဗွမ့်ဘို့နောင်အွယ့်။ ဗွမ့်ဗွမ့်နိန်းအွယ့် တပွော်ဝေအန်းတနျို့အွယ့် အန်နီကာမယ်မုဲင်မွော်အွယ့်ပလားထွို့ စီလိုကာကေ့။ 32ကန်စာ့စွက်အွယ့် ပမွော်အွယ့်လဲ့ စီ့ကိုနေနေ။ 33မေပျန့်နိန်းအွယ့် ပမွော်အွယ့်ပလားအွယ့် အန်းနီဘာလူးတွို့နောင် တပွော်ဝေ အန်းတနျို့အွယ်ကြားမဲ့ ဗွယ်ဖရာဒွို မေပြန်မိုးထွိုင်ချားဒါ့ အာကာတစီ့ကုခါ့ ပမွော်အွယ့်ပလားအွယ့် အီပျန့်လမာမာ့" တစီ့လျှောက်ကာ နိန်းအွယ့်။ 34ထွို့မဲ့ ကိုယ်တော်အွယ့် "ကမ်ဖာဒွိုးဘားကု ကအိုဒါ ပလူးဖုန်းဒွို့ အိုနောင်အန်နီလိုကာ။ 35ဒေါင့်မာလဲ့ အနာဂတ်ဖဝကုဒွို ပလူးကထွိုက်ဒါ အိုတစီ့ကုထွို့ ပြန်မွမ့်ချာစာတာအွယ့် ဗွမ့်နောင်တအန်နီဖုန်း လီအိုဒွမ့် တစီ့လဲ့ လီအိုဒွမ်ဟာ။ 36အာကာအွယ့် အီပျန့်ထန်ကာ ဗွမ့်နောင် လွှော်လီစီ့ဒါဟဒွမ့်ဖုန်း။ အာကာအွယ့် ပျန့််ပလား ခံဘာ အိုတစီ့ကုထွို့ ပြန်မွမ်းချာဒါစာအွယ့်ကြားမဲ့ အာကာဒွို ပျန့်တို ဗွယ်ဖရာဖု။ 37မီးအိုကု တွိုင်ကျုံးအကြောင်ကုဒီ့ မောရှေအွယ့် 'ဗွယ်ဖရာဒီ့ ပျန့်အာဗြဟံ၊ဣဇက်၊ယာကုပ်ကာဖရာ'အိုနေကြိုင်စေကန်း။ အွယ့်ကြားမဲ့ နေစေးကန်း တို ပလူးစီ့ဖုန်း မိုးမွမ်ထန်ချာဒါတိုဟနေ။ 38နောင်တာကနေဒါဒွို ဗွယ်ဖရာဒီ့ လီပျန့်ဘားဟာ ပလူးစီ့ဖုန်း ဖရာဟာ။ ပျန့်တို ပလူးမွမ့်ဖုန်း ဖရာတို။ ဘသာဒေါင့်အွယ့် ပလူးကျွမ်းပလားပလားဒီ့ အီးမွမ့်ကာဘို့ဒေါင် ဗွယ်ဖရာတအိုလူအတွိုင်" မိန့်နိန်းအွယ့်။ 39ထွို့မဲ့ ကျမ်ဒါဆရာ ပိန်ပလားပလားဖုန်းအွယ့် "ဗွယ် အဖရေဒွို အိုမေတို" လျှောက်လေကားနိန်းအွယ့်။ 40တေးတွို့အွယ့် လမား တစီ့လျှောက်ကာဗွမ်ကာဒွမ်း ကိုယ်တော် တာတစီ့တချုဲင် နောင်နိန်းအွယ့်။ 41ထွို့မဲ့ ကိုယ်တော်အွယ့် " ကွက်တဟနာ ဒေါင့်လိုကာ ဗွယ်ကယ်ဆယ် မေရှိယဒွို ပျန့်ခွမ့်ခမ်းဒါဝိဒ်ဖုခု။ 42ဆာလံကျမ်းကုဒီ့ ဒါဝိဒ်ခွမ့်နန်တိုးအွယ့် "ဗွယ်ဖရာဒီ့ 43'တွိုတွို့ ငါးအီချစေကန်း နားရန်ဆူဖုန်းနားခင်ယာလား အေ့နောင် ခုံဒင်ခင် အိုနန်းငါးပန်ချို့ဒိုင့်လုဲင်'" ဒေါင့်ငါးဗွယ်နိန်းအွယ့်။ 44ဒါဝိဒ်အွယ့် 'အာဗွယ်' ဒေါင် ဗွယ်ကယ်ဆယ်မေရှိယ အွယ့်ကြားမဲ့ ဗွယ်ကယ်ဆယ် မေရှိယဒွို့ မိုးနိန်းမာ ပျန့်ဒါ ဒါဝိဒ်ဖုခု" မိန့်နိန်းအွယ့်။ 45ကိုယ်တော်အွယ့် လူထုပရိသတ်ဖုန်း အိုနားလိုကာခါ့ ဒေါင့်တပည်ဖုန်း 46"ဒင်စတိထွို့ ရှောင်လိုကာ ကျမ်ဒါဆရာဖုန်းလုဲင်။ အာကာဒွို့ မေစထန့်ကကလေ့လဲ့ အိုတို့ကာဒါနောင် ကန်ကျိန်းထွော့်ခုနောင့်ဖုန်း။ ဘာသလ ပလားအန်ဒင်ရေထွို့ ကြိုစွမ့်ကာ ကန်စီ့ကုထွို့ ဓမ္မာရုံကုလဲ့ ချွော်လိုကာ ခမ်းလန်မေငါ့စွက်ကု။ ပွဲကုဖုန်းလဲ့ နွူးနန်းလိုကာ ခုံအခိုစွက်ကု။ 47ဆျန်နွိုင်ကာ မယ်မုဲင်မွော်ဖုန်းယွမ်ထွို့ ဆူတောင်တာခါ့လဲ့ မိုးနန်ဆူတောင်ထွော့်ဒါတာ။ ပဂ္ဂိုလ်ဒွိုးဟိုဒွို ပျန့်တို ပလူးအီခံဘာ ဖီအပျက်ဒူစာဖုန်း ကိုယ်တော်ဖီစတိမိန့်ကွင်နိန်းအွယ့်။
Currently Selected:
Luke 20: ltpv-rv
Highlight
Share
Copy
Want to have your highlights saved across all your devices? Sign up or sign in
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
