Luke 19
19
1ထွို့မဲ့ ကိုယ်တော်ယေရှုအွယ့် ဖြတ်ယေရိခေါဝိန်းထွို့ ကြွလေး။ 2ဝိန်းအွယ့်ဝိန်းကု ပလူးနျန်းဇက္ခဲ အိုအပလား။ အာဒီ ပျန့်တခွန်ကောက် တာဝန်ခံ အပလားထွို့ ပျန့်သဌေဒူအပလား။ 3အာအွယ့် ကိုယ်တော်ယေရှုဒွို ပျန့်လမာ အာဘသသျှီအွယ့်ကြားမဲ့ အာကြိုစာဟွိုင့်လဲ့ အာနမ်ဖွို့အွယ့်ကြားမဲ့ ပွမ်းပလူးထွို့ အာသျီဒါဟ။ 4ကွက်အွယ့်မဲ့ အာအွယ့် ဖီကသျှီကိုယ်တော်တာ တထွူ့လေးကီမေငါ့ထွို့ ထန်အိုတာ တယွူမွိုင်လောင်အမွိုင်ကု။ 5ကိုယ်တော်အွယ့် ထွိုင်တွိုထွို့ ခမ်းလန်းအွယ့်ကုပါး ဟွိုင့်ခလွို့ထန်ထွို့ "ဇက္ခဲ၊ လင်းမွိုင်မွိုင်ချန်းလုဲင်။ ဟန်ငြီးလိုင်း ငါးအီးအိုတည် နားယွမ်းကု" မိန့်လေနိန်းအွယ့်။ 6အွယ့်မဲ့ ဇက္ခဲအွယ့် အိုတွိုင်းမွိုင်လောင် လင်းလင်မွိုင်မွိုင်ထွို့ ကြိုကိုယ်တော်ယေရှု နောင် တဟွမ့်ခို။ 7ပလူးကသျှီဒါ အကြောင်ခရားအွယ့်ဟို ကားကအိုအွယ့် "ကိုယ်တော်ဒွို အီလေးပလူးမိုးတလီခိုဟစာယွမ်ထွို့ အီလေအန်ကိုထိုင်နောင်အာ" ဝေဖန်ဒေါင့်လိုကာနိန်းအွယ့်။ 8ထွို့မဲ့ ဇက္ခဲအွယ့် အိုထွိုင်ထွို့ "ဗွယ်၊ ဗွယ်၊ ငါးကပွိုင်ဒါတာဖုန်းအွယ့် ငါးအီပါးဖီကေ့ ပလူးလီအိုဟ ဆင်ရဲစာဖုန်းအခို့။ ထွို့ဒါ့မဲ့ ကကောက်လွို့ဒါ ပလူးပိန်ပလားပလားဆောင့် တခွန်ကွမ့်ဖုန်းအွယ့်ဟိုလဲ့ ငါးအီပြန်ဖီချာဒါ့ လွို့ထိုင် အန်လွူဆ"လျှောက်ဒင်နိန်းအွယ့်။ 9ကိုယ်တော်အွယ့် " ပလူးဒွိုးပလားဒွို အိုတိုနောင်အာဗြဟံ တယွမ်အန်မျိုမဲ့ တေးဟန်ငြီး ဗွယ်ဖရာကယ်လိထွို့ပလူးကအိုဒါ ယွမ်ဒွိုးမာစာကားကအို။ 10ဗွယ်ဖရာဖုခုဒွို ကြွလင်တို အီကွင်ဖီ ပလူးတမာစာဖုန်းထွို့ အီကယ်ဖီတာတို" မိန့်လေနိန်းအွယ့်။ 11ကိုယ်တော်အွယ့် မိန့်လင်ထိုင်ဒါ့ ပလူးကနာဒါ့ အကြောင်ခရာဒွိုးဘာစာဖုန်း နောင်ပုံဥပမာအဘာ ။ကွက်တဟနာမေဒေါင့်အွယ့် ကိုယ်တော်အွယ့် တိုလေးလိ ဂျေရုဆလင်ဝိန်းဆောင့်အွယ့်မဲ့ ပလူးဖုန်းအွယ့် ထင်လိုကာ ဗွယ်ဖရာသာသနာတော်ဒွိုး အီပိုထန်လိအလိုင်ချင် အွယ့်ကြားမဲ့ဟနေ။ 12အွယ့်ကြားမဲ့ ကိုယ်တော်ယေရှုအွယ့် "ပလူးအီဆက်ခံခွမ့်ခမ်းခမ်းလန်ဒီ့ ဖီကလအုပ်ချုပ်ခွင် ပျန့်နောင်ခွမ့်ခမ်း အာကအိုစို့ဒါကန်အွယ့်ကန် တာထွို့ အာပြင်နန် အီလေချွော်ခွင့် ခွမ့်ခမ်းဧကရာဇ်ဆောင့်။ 13အာခလေးကောင်းနိန်းအွယ့်ခါ့ အာအွယ့် ဟောင့်စွမ်းအစီ့ပလားထွို့ အပလားပလားအွယ့် အာဖီ ကွမ့် အမိနာ့ ညီနောင် တမိုးခ အန်တွမ့်လတာထွို့ "စုံနောင် ကွမ့်ဒွိုးဘာထွို့ မိုးကစီပွားဖုန်း တွိုတွို့ ကကကျိန်တွိုချာလုဲင်" မိန့်ကွင်စေးကန်းနိန်းအွယ့်။ 14ဒေါင်မားလဲ့ ပလူးကအိုဒါ ကန်အွယ့်ကန်စားအွယ့် လွသျှီးက ပလူးအီဆက်ခံခွမ့်ခမ်းခမ်လန်စာအွယ့်ပလားမဲ့ ကြွလေကာ ကိုယ်စာလှယ်ဖုန်း အာကန်စာ့ထွို့ "က့အိုလူဟ ပလူးဒွိုးပလား အီအုပ်ချုပ်က့ကလွို့" အန်ချန်လျှောက် ဧကရာဇ်ခွမ့်နိန်းအွယ့်။ 15ဒေါင့်မာလဲ့ အာအွယ့် ခံဒင်မြောက်ပျန့်ခွမ့်ခမ်းထွို့ ကျိန်းချာဒါ့အကန် ပျန့်နောင်ခွမ့်ခမ်းတာ့ထွို့ အာအန်ချန်ဟောင့်စွမ်း အာကဖီစေးကန်းဒါကွမ့်အွယ့်ဟိုဖုန်း အာမေငါ့။ အာအွယ့်ဘာသသိ နောင်အာကဖီစေးကန်းကွမ့် ပလူးအွယ့်ဟို စီးပွာထန်တျာမာ။ 16စွမ်းအကီစွက်ပလား လေးတွိုထွို့ "ခွမ့်ခမ်းကဖီစေးကန်းဒါ့ ကွမ့် အမိနာ့အွယ့် ငါးမိုးပွားဖီလီ အစီ့ဆအာ့" လျှောက်နိန်းအွယ့်။ 17ခွမ့်ခမ်းအွယ့် "မေလိထွို့။ နားနုဲင့် နောင်အပွမ့်ပီပီဟိုလဲ့ ပျန့်စွမ့်ခို သစ္စာအိုအွယ့်မဲ့ ငါးအီဖီပွိုင်နား ဝိန်းအစီ့ဝိန်း" ဒေါင့်နိန်းအွယ့်။ 18ဒုတိယပလားကုအွယ့် "ခွမ့်ခမ်းကဖီစေးကန်းဒါ့ ကွမ့် အမိနာ့အွယ့် ငါးမိုးပွားဖီလီ အန်ငေဆအာ့" ထွိုင်းလျှောက်ဒင်နိန်းအွယ့် 19ခွမ့်ခမ့်အွယ့် "ဖီပွိုင်းနား ဝိန်းအန်းငေးဝိန်း" မိန့်နိန်းအွယ့်။ 20စွမ့်လငါ့ပလားအွယ့် လေးလေထွို့ "ခွမ့်ခမ်း၊ ဗွယ်ကွမ့်ဒွို အိုတိုဒွို။ ငါးစွမ့် ကျောက်ဆျန်စေးကန်းတိုနောင် ပိတ်ယာ။ 21ဗွယ်ဒွို ပျန့်တို ပလူးနွိုင်ထွို့ ဥစ္စာ နားလီပွိုင်ဆိုင်ဘာဟလဲ့ ဆျန်ဒါ။ ဟန်တွမ့်ဟန်လားဖုန်း နားလီစူ့ဘာဟလဲ့ ချွော်ကေးဒါ အွယ့်ကြားမဲ့ ငါးစွမ်း စကန်ဗွယ် အွယ့်မဲ့ဟနေ" လျှောက်နိန်းအွယ့်။ 22ထွို့မဲ့ အာအွယ့် " စွမ်းသေ့၊ ငါးအီချမိန့်နား နောင် နားငိုကထန်အတွိုင်" ငါးဥစ္စာတကလွိုင် လီမေဟလဲ့ ငါးချွော်ဒါ၊ ငါဒွို လီအန်စူ့ဘာဟလဲ့ ငါးကေ့ဒါအွယ့်ကြားမဲ့ ငါးဒွို့ ပျန့််ပလူး ချွော်ဆျန်းဒါစာအွယ့်မဲ့ နားမေအိုသိတို ငါဒွို့ ပျန့်မလူးနွိုင်လဲ့ 23ကွက်တဟနာ နားလီအပ်ဟ ငါးကွမ့် ဘဏ်ကု။ မေအပ်စေကန်းအွယ့် ငါးမေကျိန်းခါ့ ငါးအီလထိုင် ကွမ့်အွယ့်ဟိုနောင်အအီ" မိန့်နိန်းအွယ့်။ 24ထွို့မဲ့ ခွမ့်ခမ်းအွယ့် ဟောင့်စွမ်းလငါ့ဖုန်းထွို့ "ချွော်ကွမ့် အာဆောင့်ထွို့ ဖီစွမ်းလငါ့ ကမိုးပွာဒါအစီ့ပွမ့်စာ ဆောင့်လုဲင်" ဒေါင့်နိန်းအွယ့်။ 25ထွို့မဲ့ ပလူးအွယ့်ဟိုအွယ့် "ခွမ့်ခမ်း၊ အာဆောင့်ဒီ့ ကွမ့်အိုထွို့လိ အစီ့မိနာ့"ပြန်လျှောက်ချာဒါ့ နိန်းအွယ့်။ 26ဒေါင့်မာလဲ့ ခွမ့်ခမ်းအွယ့်လဲ့ "ငါးဒေါင့်နားက့ဒွို၊ အိုတစွိုစွိုထွို့ ပလူးမိုးပွာဒါစာအွယ့် အီဖီလွို့တို။ ဒေါင့်မာလဲ့ အိုအကျီ့ဟိုထွို့ လီမိုးပွာဒါဟစာဆောင့်အွယ့် အာကာဆောင့်ကအိုဒါ အကျီ့ဟို့အွယ့်လဲ့ အီခံဘာ ချွော်ကေ့ဟနေ။ 27ဟောင့်လေးပလူးလီအိုလူဟ ငါ့အုပ်ချုပ်တာ ငါးရန်ဆူစာဖုန်း ဒွိုးကုပါထွို့ မိုးစီ့ကေ့တွို့ ငါးမေငါ့ကုဒွိုလုဲင်" မိန့်နိန်းအွယ့်။ 28ကိုယ်တော်အွယ့် ဟိုတာနိန်းအွယ့်ထွို့ ကြွလေး ဂျေရုဆလင်ဝိန်းကု။ 29အာကာတွိုလေးထွို့ သံလွင်ခေါင့်ဆောင့် ဗက်ဖာဂေဝိန် နောင် ဗေသနိဝိန်းထွို့ အန်းကြွလေးကီအာတပည့် အန်းတငြီ့ ဖီကဟွိုင့်ဖီကလေ့မေငါ့။ 30ကိုယ်တော်အွယ့် "နားက့လေးကာ ဒုန့်မေငါ့ဒီ့ဒုန့်လုဲင်။ တေးကနွူးကျိန်းအာကာဒုန့်ကုထွို့ အီသျှီလိုကားဘာ လမားလီတွမ်ဖိုဟကောင်း မြည်း အဘာ အိုတွိုင့်တာ အွယ့်ကု။သျှီ့အာနန်ပီးထွို့ ကျွူလေးငါးဆောင့်လုဲင်။ 31အပလားပလား "နားက့မိုးဟနာ သျှီ့ဖီကေ့ မြည်း နန်ပီးအယ် မေတစီ့အွယ့် ဗွယ်အိုလူအာ အွယ့်မဲ့" ဖြေကာနိန်းအွယ့်လုဲင်" မိန်းလေနိန်းအွယ့်။ 32အာတပည့်အန်ငြီ့ပလားအွယ့် ထွိုင်းတိုထွို့ဒုန်ကုခါ့ ဗွမ့်နောင် ကိုယ်တော်ယေရှု ကမိန့်စေးကန်း အာကာသျှီ့ကာ မြည်းပီအွယ့်ကုပါ။ 33အာကာ အိုသျှီ့ဖီ မြည်းနန်ပီးတွင် အာဗွယ်ဖုန်းအွယ့် "နားကမိုးဟနာ သျှီ့ကာကေ့ မြည်းနန်ပီးအယ်" တစီ့လိုကာနိန်းအွယ့်။ 34အာကားအွယ့်လဲ့ "ဗွယ် အိုလူအာအွယ့်ကြားမဲ့" ဖြေလိုကာနိန်းအွယ့်။ 35အာကာအွယ့် ကျွူကျိန်ကာမြည်း ကိုယ်တော်ယေရှုဆောင့်ထွို့ လျာလိုကာပိတ်ယာ အာငင်လောင်ထွို့မဲ့ဒင်ထန်လိုကာ ကိုယ်တော် အွယ့်ဘာလောင်ထွို့ ဖီတွမ်လိုကာ။ 36တွမ်မြည်းအွယ့်ဘာထွို့ လေးလေ ယေရုရှလင်ကလေ့ကုအွယ့် လူထုပရိသတ်ဖုန်းအွယ့် လျာဖီလိုကာ အာကာကန်ကျိန်း ကိုယ်တော်မေငါ့။ 37ကိုယ်တော်ယေရှုအွယ့် အိုခေါင့်သံလွင်လောင် အလင်းခါ့ ပရိသတ်ဖုန်းအွယ့် ကိုယ်တော်ယေရှု ကမိုးစေးကန်းဒါ တထူဆန်းခရာကားကအိုတာ အန်ဖရာလိုကာ ဗွယ်ဖရာဂုဏ်တော် နောင် တဟွမ်ခို။ 38အာကာအွယ့် "နောင် ဗွယ်ဖရာနျန်း ကကြွလေးဒါ ခွမ့်ခမ်းဒွို မင်္ဂအိုယွမ့်တွို့။ ဝိန်းခမ်းကု ဖီကငြိမ်ချမ်။ ဗွယ်ဖရာတန်ခိုတော် ဖီကခါ့လက်" က့ကာနိန်းအွယ့်။ 39ပလူးကျွိုကု ကအိုဒါ ဖာရိရှဲ ပိန်ပလားပလားအွယ့် "ဆရာ၊ အန်ချန့်ရပ်ကေ့ နားတပည်ဖုန်း ဒေါင့်လိုကာတာနုဲင့်ဟိုလုဲင်" လျှောက်ကာ ကိုယ်တော်နိန်းအွယ့်။ 40ထွို့မဲ့ ကိုယ်တော်အွယ့် "ငါးဒေါင့်နားဒွို့ ၊မေဘသာအန်ချန့််ရပ်အာကာ က့တာဖုန်းလဲ့ လုံဒွိုးဟို အီကာ့ထန်းကားဟနေ" ဒေါင့်အာကာနိန်းအွယ့်။ 41ထွို့မဲ့ ကိုယ်တော်အွယ့် တွိုလေးဂျေရုဆလင်ဝိန်းဆောင့်ထွို့ ထွိုင်သျှီဝိန်းခါ့ မေးသျှီ့အိုလင်းတာထွို့ 42"တဟနာ အီကျီ့လေးဖီ ငြိမ်ချမ်ရေ နားက့ဆောင့် နာက့လီသိဟဒွို ခုဲင်ယွမ်တွို့။ အခိန်းဒွိုးခါ့ ခံလိုကာဘာ အန်ဒင်အွို ဖီနားက့ကျန်သိမာတာအွယ့်ဘာမာ။ 43နားရန်ဆူဖုန်းအွယ့် အီတွိုက်ကာနားတာ အီအိုခွူ့စေးကန်းကာဝိန်းတပေါင်းခိန်းဒွို အီတွိုလေး။ 44အာကာအွယ့် လုံအမာ့လောင်ငါ့လဲ့ လီဖီကေ့ဟ လုံဒါ့အမာ့လောင် ဖီကလင်ပိုင်းကာဟန်လောင်ထွို့ နားနောင်နားဖုဖုန်းလဲ့ အီမိုးကေ့ကာ။ ကွက်တဟနာ မေဒေါင့်အွယ့် နားဒွိုလီသိဟ ဗွယ်ဖရာအီကယ်နားတာ ကြွလေအချိန်ဟနေ" မိန့်နိန်းအွယ့်။ 45ထွို့မဲ့ ကိုယ်တော်ယေရှုအွယ့် နွူးကျိန်း ဗိမာန်တော်ကုထွို့ ဝါစွာ့ထန် တအန်ကားစာဖုန်း ဗိမာန်တော်ကွင်ကု။ 46ကိုယ်တော်အွယ့် "ကျမ်းကု ကတျန်းစေကန်းဒါ ဗွယ်ဖရာ ကဒေါင့်စေးဒါငိုဖုန်းဒီ့ ငါယွမ်ဒွို အီပျန့်ဘာတိုခမ်းလန် ကိုးကွယ် ခမ်းလန်ဝယ်တို" ပျန့်တိုနိန်းအွယ့်လဲ့ ဒွိုးခါ့ နားက့ဒွို့မိုးဖီ ဗိမာန်တော်ပျန့် တတောင်ကွမ်းဖုန်း ကျွန်ဖုန်း အိုအွပ်စို့ခမ်းလန်" မိန့်နိန်းအွယ့်။ 47ကိုယ်တော်အွယ့် ဟိုတရာဖုန်း ဗိမာန်တော်ကု ကျွမ်ငြီးငြီး။ ပရောဟိတ်ပဒူဖုန်း၊ ကျမ်ဒါဆရာဖုန်းနောင် ဂျူးခေါင်းဆောင်ဖုန်းဒီ့လဲ့ ကြိုစာလိုကာ အီမိုးစီ့ကိုယ်တော်တာ။ 48ဒေါင့်မာလဲ့ ပလူးဖုန်းအွယ့် ဘသာနားလွမ်လိုကား ကိုယ်တော်ယေရှုတရာဖုန်းထွို့အိုဘို့လိုကာအွယ့်ကြားမဲ့ အာကာအွယ့် အီမိုးစီ့ကိုယ်တော်တာ ကြံတနယ်ဖုန်း လီဒါဟ။
Currently Selected:
Luke 19: ltpv-rv
Highlight
Share
Copy
Want to have your highlights saved across all your devices? Sign up or sign in
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
