Luke 11
11
1အငြီးကု ကိုယ်တော်ယေရှုအွယ့် အိုဆုတောင်တာ ခမ်းလန်အတောင်ကု ထွိုင်းဆုတောင်ထွို့ခိန်း တပည့်အပလားကုအွယ့် "ဗွယ်၊ ဗွမ့်နောင်ယောဟန် စွမ်ဖီးအာတပည့်ဖုန်း ဗွယ်စွမ်းဖီကိုက့ တဆုတောင်နယ်" လျှောက်နိန်းအွယ့်။ 2ကွက်အွယ်မဲ့ ကိုယ်တော်အွယ့် "နားက့ မေဆုတောင်တာခါ့ 'ဖဖရာ၊ အန်းဖရားတို ဖဖရာဂုဏ်တော်။ ကြွာ့လင်းအုပ်စိုးဖီ ပလူကန်မွန်။ 3ဖီးသညင်ဖီး က့ တပည့်ဖုန်းတား အငြီးတာ ကအိုလူဒါ စာအာဟာရဖုန်းမွန်ကျွမ်းငြီးငြီး။ 4ဗွမ့်နောင် က့ခွင်လွှတ်ဖီ ပလူးမိုးတလီခိုဟက့လောင်ဖုန်း၊ ခွင်လွှတ်ဖီဒါ က့တလီခိုဟဖုန်းမွန်။ တအော် ဖီက့ကမိုးတလိခိုဟဖုန်းကုလဲ့ ရေးဖီးပါလုဲင်'ဆုတောင်ကာ နိန်းအွယ့်လုဲင်" မိန့်နိန်းအွယ့်။ 5ထွို့မဲ့ ကိုယ်တော်ယေရှုအွယ့် "နားကားကု ပလားအပလားအွယ့် ဖောဝ်မေအိုအပလားလဲ့ မွိုင်နားခိန်း လေးဖောဝ်အွယ့်ပလားဆောင့်ထွို့ 6ငါးဖောဝ် အပလား တွို့လေးငါးဆောင့်ထွို့ အန်လွူအာတား တစွိုငါးလဲ့ လီအိုဟမဲ့ ဖီငါငါး တကိုးအန်တွမ့်မာ့အာ့" မေဒေါင့်နိန်းအွယ့် 7နားဖောဝ်အွယ့် " ကျန်းမိုးရှုပ်မာငါးမာ၊ ကန်တင်းလဲ့ ဖီဒင်ထွို့လိ၊ ငါးနောင်ငါးဖုဖုန်းလဲ့ ကျိန်းကာလိ ခမ်းလန်ငြီ့ကု၊ ငါအိုခမ်းလန်ငြီ့ကုထွိုင်းထွို့ လီဖီဒါဟာနား တစွိုစွိုဟာ" အီဒေါင့်ချားနိန်းအွယ့်။ 8ငါးဘာသဒေါင့်နားက့ဒွို နားခံလျှော့ဟမဲ့ နားမေကွူ့ထိုင်ဒါ့အွယ့် အာအိုခမ်းလန်ငြီ့ကုထွိုင်ထွို့ အာအီဖီးတိုနားကအိုလူတာ ကားကအိုဖုန်း။ 9အွယ်စားမဲ့ နားဒေါင့်နားက့ဒွို့ "ကွူ့လိုကာလုဲင်၊ နားကအီလဘာတို။ ကွင်ကာလုဲင်၊ အီးသျှီတို။ ဒုန်းကန်တင်းလုဲင်၊ အီဘောင့်ဖီးတို ကန်တင်။ 10ပလူးကျွူစာ ကျွမ်းပလားပလား အီးလကာဘာ။ပလူးကွင်းစာဒွို အီမို့။ ဒုံးကန်တင်းလုဲင်း၊ အီးဘောင်ဖီးတို ပလူးဒုံး ကန်တင်းစာကျွမ်းပလား။ 11အေ့နေ့ချန်း နားက့ဖုဖုန်း မေကွူ့တားအဘားအွယ့် နားက့ကု ဖကမာပလား ခရားအီဖီတားအဘာထွို့ ဖီကူအဘာ။ 12အေ့နေ့ချန်း နားက့ဖုဖုန်း မေကွူ့စာ့ဇျီးအွယ့် ဖကမာပလားအွယ့် အီဖီကင်းမြှီးကောက်။ 13အွယ့်မဲ့ နားကားဒွို့ ပျန့်တိုပလူးလီခိုဟလဲ့ နားက့မေဖီးဒါးတို နားက့ဖုတခိုဖုန်းအွယ့် ဝိန်းခမ်းကုကအိုဒါ ဖဖရာဒွို့ ပလူးကကွူ့စာ လမားမားခယောဝ် ဉာဏ်ရောင်တော်မသဲ အီဖီတာ အိုစေးကန်းလိအထွို့။ 14အလိုင်ကု ကိုယ်တော်ယေရှုအွယ့် ဝါစွာ့ထန်းကေ့ လွှော်သေ့ အိုမိုးစေကမ်းဒါ ပလူးအပလား ဖီဒေါင်ငို ကျန်ဒါမာ။ ကိုယ်တော်ယေရှု ထွိုင်ဝါစွာ့ကေ့ လွှော်သေ့ထွို့ ပလူးအိုအ့အွယ့်ပလား ဒေါင့်ထန်ငိုအွယ့်ကြားမဲ့ ပရိသတ်ဖုန်း ဟွမ့်တဝါ့လိုကာ။ 15ဒေါင့်မာလဲ့ ပလူးပိန်ပလားလားအွယ့် "ပလူးဒွိုးပလားဒွို့ ဝါစွာ့ထန်းကေ့ လွှော်သေ့အွယ့်ဟိုဖုန်း နောင်လွှော်သေ့ဖုန်းခွမ် ဗေလဇေပုလ" ဒေါင့်ကာနိန်းအွယ့်။ 16ပလားလငါ့ဖုန်းလဲ့ ဘာသကျန်လိုကာ ကိုယ်တော်။အွယ့်ကြားမဲ့ အာကာအွယ့် ကွူလိုကာကိုယ်တော် ဖီကနေ့ဖီ ဗွယ်ဖရာ နိမိတ်လက္ခဏာအစွိုစွို။ 17ကိုယ်တော်အွယ့် အိုသိ ပလူးအွယ့်ဟို အိုယူကားနိန်းမာ အွယ့်ကြားမဲ့ "ကန်အကန်ကု မေဆန့်ကျင် လီဗွမ့်လိုကာဟထွို့ တွိုက်လိုကာဘို့တာကျွမ်းကန်ကန်အွယ့် အီကေ့လေးဘာတာ။ ဗွမ့်နောင်အွယ့် ယွမ်အယွမ်ကုအွယ့် မေဖျတ်လိုလေကာဘို့အွယ့် ယွမ်းအွယ့်ဘာလဲ့ အီကေ့ကေ့။ 18အေ့နေ့ချန်း မာရ်နတ်အွယ့်လဲ့ အာနန်ကုတိုး မေဆန့်ကျင်လီဗွမ့်ကာဟအွယ့် အာကန်ဒီ အီတည်ဒါနိန်းမာ။ ဒွိုးခါ့ နားက့ဒေါင့်လိုကာ ငါဒွို ဝါစွာ့ထန်လွှော်သေ့ဖုန်း နောင်ဗေလဇေပုလ။ 19အေ့နေ့ချန်းငါးဝါစွာ့ တလိခိုဟ နောင်အာအွယ့် နားကတပည့်ဖုန်းနုဲင့် အီဝါစွာ့လွှော်သေ့ဖုန်းနောင် လမာတန်ခိုအာဏာ။ နောင်းနိန်းအွယ့်ကြားမဲ့ အာကဒီ့ အီပျန့်ကောဆုံးဖြတ်ဖီ နားက့တရာစာဖုန်း။ 20ဒေါင်မားလဲ့ ငါဒွို စုံဗွယ်ဖရာဘုန်းတန်းခိုတော်ထွို့ ဝါစွာ့လွှော်သေ့ဖုန်း မေဒေါင်နိန်းအွယ့်အွယ့် မိုးနေဒါလိထွို့ဆက်သေ ဗွယ်ဖရားသာသနားဒွို တွိုလိထွို့ နားကားဆောင့်။ 21ပလူးအားဆန်းစာအပလား အာနန်တို ပန်စီနတ်ထွို့ မေအိုပွိုင်ဟွောင့်တိုးအာယွမ် အာကပွိုင်းဒါ့တာကားကအိုအွယ့် အီလုံခြုံတို။ 22ဒေါင့်မားလဲ့ ပလူးအားဒူးထိုင်အာစာ လေတွိုက်အာထွို့ မေပေးဒါးခါ့ အာကအာကွိုဒါ လက်နက်ဖုန်း ပလားအီဆျန်ထွို့ အာကတွိုက်လဒါ တာကားကအိုအွယ့် အီဝေးဖီကေ့ ပလားလငါးဖုန်း။ 23ပလူးလီပါဟ ငါးဒိုင့်လမာမားယောဝ် ပျန့်ပလူးဆန့်ကျင်ငါး။ပလူးလီအိုစုဟ နောင်ငါးစာဒီ့လဲ့ အီပျန့်လိုကားဘာ အပလားအတောင်တောင်။ 24လွှော်သေ့အွယ့် စစွာ့ထန်းအာအိုပူစာကုထွို့ စကွင်ခမ်းလန်အိုနားတာ ခမ်းလန်အတောင်ထွို့ စစွာ့လေတာ ကန္တာရကု။ ဒေါင့်မာလဲ့ အိုနာခရာ ခမ်းလန်လီမိုဟ အတောင်တောင်မဲ့ "ကျိန်းချာဒါဘို့ ငါးကာစစွာ့ထန်ဒါ့ ခမ်းလန်ဇျီး" ဒေါင့်နိန်းအွယ့်ထွို့ အကျိန်း။ 25ထွိုင်ကျိန်းတွို့ထွို့ ပလူးအွယ့်ပလားအွယ့် ဗွမ့်တွို့ ယွမ်အိုဝေ့ပလင့်ပလီစေးကန်း ထွို့ သျှီဘာ ပလူးအိုစာ လီအိုဟ။ 26ထွို့မဲ့ လွှော်သေ့အွယ့် ဟောင့်ကျိန်း လွှော်သေ့သေ့လွို့ထိုင်အာ အနျွူဘာ။ အာကာထွိုင်းကျိန်အိုလူးကား ပလူးအွယ့်ပလားနန်ကူခါ့ ပလူးအွယ့်ပလား အခြေအနေအွယ့် ဟိုက်လွို့ ထိုင်အကီခါ့" မိန့်လေနိန်းအွယ်။ 27ကိုယ်တော်ယေရှု အိုဟိုဒေါင့်ဖီလူထုဖုန်းခိန်း ပမွော်အပလားအွယ် " ပမွော်ကပွာလင်း ထွို့ လွန်လားဖီဗွယ်စာအွယ့် ပျန့်တို ပလူးမင်္ဂလားအို" လျှောက်ဒင်းလေးနိန်းအွယ်။ 28ထွို့မဲ့ ကိုယ်တော်အွယ့် "မှန်တို။ ဒေါင့်မာလဲ့ ပလူးကနာဘာဒါ ဗွယ်ဖရာမင်္ဂလာတရာမြတ်ဖုန်း ထွို့ ကလွိုက်နာစာဖုန်းဒွို ပျန့်ပလူးမင်္ဂလာယိမ်းအိုစာ" ပြန်မိန့်နိန်းအွယ့်။ 29ပလူးဖုန်းအွယ့် အိုးရံစုလိုကား ကိုယ်တော်ခိန်း ကိုယ်တော်အွယ့် "ပလူးခေတ်ဒွိုးခါ့ဒွို ပျန့်တိုပလူး ကေလွမ်မျိုဆက်ဖုန်း။ ယောနတပျန့်အွယ့်ဘာမဲ့ နေ့နားက့ နိမိတ်လက္ခဏာအဘာ။ 30ဗွမ့်နောင် ယောနတပျန့်ဒီ နေဖီ နိနေဝေဝိန်းစာဖုန်း နိမိတ်လက္ခဏာထွို့ ဖရာဖုခုဒွိုးလဲ့ ပလူးမျိုးဆက်ဒွိုးတာ အီပျန့်နိမိတ်လက္ခဏာ အဘာ။ 31မေတွို့ အခိန်းဆုံးဖြတ်တရာခါ့ ရှေဘ ကန် ခွမ့်မွော်အွယ့် အီတွူ ပလူးမျိုဆက်ဒွိုးခါ့ထွို အီစွယ်တရာနားက့။ ခွမ့်မွော်အွယ့်ပါးအွယ့် ဘသာနား ငို ပညာစာ ရှောလမုန်ဆောင့် အွယ့်မဲ့ အိုကလေယားမိုင်ပေါင် တျာမားမားထွို့ လေးခင်နေ။ ဒေါင့်မာလဲ့ အွယ့်ကူအွယ့် ပလူးမြတ်ထိုင် ပညာစာ ရှောလမုန် တွို့ကီလိထွို့။ 32နိနေဝေ ဝိန်းစာဖုန်းအွယ့် အီစွယ်နားက့တရာထွို့ အီတွူလိုကာနားက့။ အာကားအွယ့် ပျန့်တိုပလူး 'ယောန' ဟိုစွမ်ဖီးထွို့မဲ့ လကာနောင်တထွို့ ပူဇော်လေလိုကာ ဖရာစာ။ ဒေါင့်မာလဲ့ ဒွိုးကူဒွို ပလူးမြတ်လွို့ထိုင်ယောနတွို့လေလိ" မိန့်လေနိန်းအွယ့်။ 33ကိုယ်တော်အွယ့် "လမာအိုအန်ဒင်အွို မီးအိမ် ကလီစေးကန်းဒါ နောင်မီး၊ ခရောင်လားလဲ့ လမာအိုအန်ဒင်အွို။ ပလူးကနျူးကျိန်းယွမ်းကုစာ ဖီးကခါ့တား မီးအိမ်အွယ့် ပလားအန်းပွိုးဘို့ မီးထွမ်းလောင်ဟို့။ 34နားကားမေးဖုန်းနုဲင့် ပျန့်တို ဗွမ့်နောင် မီအိမ် နားက့နန်တာ။ နားမေးမေခိုအွယ့် နားကအိုလူဒါ တခါ့ဖုန်း ကားကအို လဒါထွို့၊ နားမေးမေလီခိုဟအွယ့် တာကားကအိုးဒွို အီသျှီးတိမ်နေတွို့။ 35ကွက်အွယ့်မဲ့ မိုးစေးချာစေးကန်း နားက့တခါ့ရောင်းအွယ့် ဖီကျန်းပျန့်မာ တသျှီ့မာ။ 36နားဆောင့် တရောင်းခါ့ မေအိုးအွယ့် တသျှီးတစွိုစွိုလဲ့ လိအိုဒွမ်ထွို့ အီခါ့လက်တွို့ကျွမ်းတောင်တောင် ဗွမ့်နောင် မီအိမ် ခါ့လက်လင်း နားလောင် နောင်အာ တရောင်ခါ့လက်" မိန့်နိန်းအွယ့်။ 37ထွိုင်းမိန့်ထွို့ နိန်းအွယ့်ထွို့ ဖာရိရှဲအပလားအွယ့် အီးခံသျှင်းမွိုင်ဟတား ပင်းကျိန်းကိုယ်တော်ယေရှုအာယွမ်ကု။ 38ကိုယ်တော်အွယ့် ကြွကျိန်းအာယွမ်းထွို့ အိုနန်းလင်းတာ ယျန့်ခုံးဆောင့်။ ကိုယ်တော်အွယ့် အီအန်းယျန်ခိန်း ကူဟကျွော့်ထွို့ အိုနန်းတာ ယျန်ခုံးဆောင့် အွယ့်စားမဲ့ ဖာရိရှဲအွယ် ဟွမ်ဆန်းလွမ်အာ။ 39ကွက်အွယ့်မဲ့ ကိုယ်တော်အွယ့် "နားက ဖာရိရဲဖုန်းဒွို တီပလင့်ကားဘို့ တင်းချွူ၊ ယျန်ပွိုင်း ခူးနောင့်ဒိုင့်ဟို့ထွို့ နားကသ ကုန်ကူဖုန်းနုဲင့် အိုးကီးကာတိုနောင် တလောဖာ တရာဖုန်း။ 40ပလူးမွိုက်ဖုန်း၊ ဗွယ်ဖရာဒွိုး ဖင်ဆင်ဖီးစေးကန်း ကုန်ကူ ဒေါင့် ခူနောင့် အန်းငြီ့ဒိုင့် လူး။ 41နားကားဒွို နားက့ကု ကအိုဒါတာဖုန်း မေလှူဖီးမေဝေးဖီး ဆင်ရဲစာဖုန်းအွယ့် နားက့တာ တာကားကအိုဒွို အီပလင့်ပလီတို။ 42ဖာရိရှဲဖုန်း နားကဒွို မို့ကာလိထွို့ တခုဲင်းဖုန်း။ နားကခြန့်ကူ ကထန်းဒါး တသားတလားဖုန်း ဗွမ့်နောင် ဖျောင်ဖင်ဖုန်း၊ ဟန်ဖိုင့်ဖုန်းအွယ့် လှူလိုကား ဗွယ်ဖရာ အစီ့ပွမ့် အပွမ့်။ ဒေါင့်မားလဲ့ နားကားဒွို ကိုက်အန်းပလူးလငါ့လောင်ထွို့ ရက်ကာဟ ဗွယ်ဖရာ။ နားကားဒွို လှူကာ ဗွယ်ဖရာ အစီ့ပွမ့် အပွမ့်ထွို့ကာဟ ပလားလငါ့လောင်လဲ့ ကင်ကျန်ဒေါင့် တရာရာထွို့ အီရက်အီသညင်ဘာ။ 43ဖာရိရှဲဖုန်း၊ နားကားဒွို့ မို့ကာလိထွို့ တခုဲင်းဖုန်း။ နားက့နုဲင့် ဓမ္မာရုံးကူဖုန်းလဲ့ ချွော်ခမ်းလန်ထွို့ အိုနန်းလိုကာမေငါ့စွက်။ ကန်စီကု ပလူးဖုန်း မေအန်ဒင်ရေကြိုစွမ်လဲ့ ဟွမ့်နိတ်ဆက်လိုကာ။ 44ဒေါင့်မာလဲ့ နားကဒွို မို့ကာလိထွို့ တခုဲင်းဖုန်း။ နားကဒွို ဗွမ့်တွို့နောင့် ဆင်ခိုင်အောင့် လိအိုဟနောင် တမှတ်ဖုန်း။ ပလူးဖုန်းဒွို လီသိလီသျှီကာဟထွို့ စစွာ့စို့ဒါ ခမ်းလန်လီအိုဟနောင် တမှတ်လောင်" မိန့်လေနိန်းအွယ့်။ 45ထွို့မဲ့ ကျမ်ဒါဆရာအပလားအွယ့် "ဆရာ၊ကမိန့်လင်ဒါ နိန်းဒွို့ဒွို ဗွမ့်တွို့ ဒင်အပျက်ထွို့ အန်စွမ်ကာ"လျှောက်နိန်းအွယ့်။ 46ကိုယ်တော်အွယ့် "ကျမ်ဒါဆရာဖုန်း၊ နားကားဒွိုလဲ့ မို့ကာလိထွို့ တခုဲင်း။ နားကားဒွို အန်းချန့်ကား ပလူးဖုန်း ယိုးလိုကာဝန်ထွို။ ဒေါင့်မာလဲ့ နားကနုဲင် နောင်နားကကျွေ့ာ်နာ့ငါးလဲ့ လိခွိုင်းစွယ်ကိုဟ ပလူးအွယ့်ဟို ကယိုးဒါးဝန်းဖုန်း။ 47နားကားဒွို ပျန့်ယွမ်လိထွို့ တခုဲင်းစွမ်းဖုန်း။ အွိုက်ကီကီခါ့ နားကမွိုပလား ဖပလားဖုန်း ကမိုးစီ့ဒါး ပညာစာအရိယာဆူတော်ကောင်းဖုန်းတာ နားက့စူ့ဖီလိုကာ တထွမ်တမှတ်လက္ခဏာဖုန်း။ 48ကမိုးဒါးနိန်းအွယ့်ဒီ ကွက်တွို့ နားက့ယူတို နားက့မွိုပလာ ဖပလာဖုန်း မိုးတမှန်းတိုဟနေ။ နိန်းအွယ့် မေလိမေဟအွယ့် ပလူးအွယ့်ဟို ကမိုးစီ့စေးကန်းဒါး ပညာစာအရိယာဆူတော်ကောင်ဖုန်းတာ လီစူ့ကာဟ တမှတ်လက္ခဏာထွမ်းဖုန်းဟာ။ 49ကွက်အွယ့်မဲ့ ဗွယ်ဖရာဒွိုး ဟိုမိန့်လင်း အာကာမိုးတလီခိုဟခရာ နောင်ဉာဏ်ရောင်တော် နိန်းဒွိုး "အီကြွလေဖီ အရိယာဆူတော်ကောင်ဖုန်း နောင် သာဝကဖုန်း နားကဆောင့်။ ဒေါင့်မာလဲ့ အရိယာဆူတော်ကောင်ဖုန်း၊ သာဝဖုန် ပိန်ပလားပလားအွယ့် နားကားအီးမိုးစီ့ ထွို့ ပိန်ပလားလား အွယ့် နားက့ နိတ်စက်လိုကာ" နိန်းအွယ့်ဟနေ။ 50ပလူးဒွိုးခါ့စာဒီ့ မိုးစီ့က အရိယာဆူတော်ကောင်ဖုန်းကားကအို ထျက်ကမ်ဖာတေးတာ့ခါ့ကား မဲ့ ခံလိုကာဘာလိထွို့ အပျက်ဖုန်း။ 51ဆူတော်ကောင်အွယ့်ဟိုကုအွယ့် တေးတာ့စွက်တွို့ အာဗေလထွို့ တွိုတွို့ ဇာခရိ ကခံဘာပလားမိုးစီ့ ဗိမာန်တော်ကုနောင် ပူဇော်ပလ္လင်ခါ့။ ထွို့မဲ့ တာအွယ့်ဟိုကားကအိုတာ နားက့ပလူးဖုန်း အီခံဘာအပျက်ဖုန်းဒွို့ သေချာအမှန်ဟနေ။ 52ကျမ်ဒါဆရာဖုန်း၊ နားကနုဲင့် မိုက်လွမ်ကားတွို့တာ။ နားက့အွယ့် ဆျန်စေးကန်း တသိပညာဘဏ်တိုက် ကန်တင်းစိုး ဆိုင်နောင်ဗွယ်ဖရာထွို့ နန်တိုးလဲ့ လီနွူးဟ၊ ပလားတငါ့လဲ့ ချန်းအိုရေး မိန့်လင်းနိန်းအွယ့်။ 53ထွိုင်မိန်းလင်နိန်းအွယ့်ထွို့ ကိုယ်တော်ယေရှုအွယ့် အိုအွယ့်ရပ်ကုထွို့ စစွာ့ထန်။ ထွို့မဲ့ ကျမ်ဒါဆရာဖုန်းနောင် ဖာရိရှဲဖုန်းဒီ့ ဝေဖန်ဒင်ပျက်ယွမ်းကာတွို့ ကိုယ်တော်လောင်ထွို့ တစီ့လိုကာ ကိုယ်တော် ဆိုင်နောင်အကြောင်ခရာလငါ့ဖုန်း။ 54ပလူးအွယ့်ဟိုအွယ့် ကိုယ်တော်ယေရှုမိန့်ငိုဖုန်းကု တမှားတစွိုစွိုမေပါအွယ့် အီဒင်ပျက်ထွိုယိုကားကိုယ်တော်ယေရှုအွယ့်မဲ့ အိုပွိုင်းလိုကာဟနေ။
Currently Selected:
Luke 11: ltpv-rv
Highlight
Share
Copy
Want to have your highlights saved across all your devices? Sign up or sign in
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
