Luke 1
1
1ကရိုသေထွိုက်ဒါ သီဟိုဖိလက်ဖုန်း ။ ပလူးဖုန်း တျန်ထန်းထွို့လိထွို့ အစီရင်ခံစာဖုန်း ဆိုင်ဒေါင် က့ကုပျန့်ထန်ဒါ အကြောင်ခရားထူးထူးဆန်ဆန်ဖုန်း။ 2ကာ့ဟွမ်ထွို့လိထွို့ ဗွယ်ဖရာငိုစတင်း အွိုက် ပလူးကသျှီးဘာဒါအကြောင်ခရာ အွယ့်ဘာ ကပျန့်ထန်ဒါ အထိ့ကုစာဆောင့်။ 3ကွက်အွယ့်မဲ့ ငါးလေ့လာကျက်ချေ ကြိုင်ကြိုင် တာကပျန့်ထန်ဒါ ကားကအိုထွို့မဲ့ ငါးကတျန်ထန်ဘာ အစီရင်ခံစာ နားက့ဆောင့် ဒွို့ ငါးတာလဲ့ ခိုခို။ 4ငါးကတျန်ထန်ဘာဒါ နိန်းဒွိုးဒွို ဖီနားကသိဘာ နားကကစွမ့်ဘာဒါအကြောင်ခရာဒီ့ အိုမှန်တွိုဟနေ။ 5ခွမ့်ခမ်းဟေရုဒ် ကအုပ်ချုပ်ဒါယုဒကန်ခိန်း ပုရောဟိတ် ဇာခရိဒီ့ ပျန့်တို ကဟောင့်ဒါ အဘိယ စွိုကုဟနေ။ အာမာ့ ဧလိရှဗက်ဒီလဲ့ ပျန့်ပျန့်ပလူးပရောဟိတ်မိသားစုကုဟို့။ 6အာကားဒီ့ လွိုက်နား မှန်ကန်ယွမ့်တွို့ ဗွယ်ဖရာစည်းကမ်းဖုန်း ဒေါင် ဥပဒေလငါ့ဖုန်းအွယ့်မဲ့ ဗွယ်ဖရားမေငါ့ကုအွယ့် ပျန့်ကားတို ပလူးခိုးဖုန်း။ 7အာကာ့ဒီ ဖုအိုကားဟ။ အားကား အန်းတငြီ့လူးအွယ့် ဆက်ဒူလွန်ကာလိမဲ့ ဧလိရှဗက်ဒီ အိုဒေါင့်ဒါဒွမ်း။ 8အငြီးကု ပရောဟိတ် ဇာခရိဒီ့ မငြီးဘာမိုး တာဝန်ကျွမ်ငြီးအွယ်ဘား ခလှည့်တွိုလေးထွို့မဲ့အာလေးလေ ဗိမာန်တော်ကု။ 9နောင်ထုံစမ်အတွိုင် ဖီလိပူးဇော်နံစား ဗွယ်ဖရာဗိမာန်တော်ကုတာ ဘုမဲထွို့လွိုက်ရွေးလိုကာဇာခရိ။ 10ဇာခရိ အိုပူဇော်နံစာတွင်ပလူးဖုန်းအွယ့် အိုထွိုင်းထွို့ ဆုတောင်လိုကားတာ ခုနောင့်ဒိုင့်။ 11ထွို့မဲ့ ဗွယ်ဖရာကကြွလင်းဒါးလွှော်အွယ့် ပြနေ့ထန်း ဇာခရိ အာနန်။လွှော်အွယ့် အိုထွိုင်တာ ပလားကပူးဇော်ဒါ နံစာဟွမ်းဖုန်း ပလ္လင်ပန်ချိုဒိုင့်။ 12ဇာခရိဒီ့ အာထွိုင်သျှီလွှော်ထွို့ အာသဝစကမ်လွမ်ထွို့ စွိုပါနေတွို့။ 13ဒေါင့်မား လွှော်အွယ့် "ကျန်စကမ်မာ၊ဇာခရိ။ ဖရာအိုဟွမ့်တိုနားတဆူတောင်အွယ့်စားမဲ့ နားမာ့ 'ဧလိရှဗက်' ဒီ အီအန်လွူဖီ နားတာ ဖုခုရတနာအပလား။ နားအီဖီနျန်းဘာ အနျန်း 'ယောဟန်'။ 14ဖုခုအွယ့်ပလား မေအန်းလွူခိန်း ဗွမ့်နောင် နားက့ ဟွမ်ခို ဟွမ်ပျော် ပလူးဖုန်းလဲ့ အီဟွမ့်ခိုဟွမ့်ပျော်လိုကာဗာ။ 15ယောဟန်ဒီ့ ဗွယ်ဖရာမေငါ့ကု အီပျန့်ပလူးဒါ ပလူးမြတ်အပလား။ အာဒီ့ ဝိုင်ဖုန်းသိဖုန်းလဲ့ လီအို့အွိူးဆက်ဟာ အလိုင်းလိုင်းဟာ။ ထျက့်အာခအန်လွူကောင်းခါ့ကား အာလောင်ဒီ ဉာဏ်ရောင်တော်ဖုန်း အီအိုဝေ့ထွို့တို။ 16အာဒီ အီမိုးဖီး ပလူးအစ္စရေးဖုန်း ဖီးကလနောင်တထွို့ လှည့်ကျိန်းချားဒါ့ ကပျန့်ဒါ အာကာဖရာ ဗွယ်ဆောင့်။ 17ဗွမ့်နောင် ပရောဖက်ဧလိယ ယောဟန်ဒွို အခွင်အာဏာနောင် တန်းခိုဖုန်းအီအိုထွို့ အီပျန့်ယေရှုကလေ့မေငါ့စာ။ အာဒီ အီပလောင်ဖီး မွိုဖဖုန်း ဒေါင် ဖုဖုန်းသသာထွို့ အာအီစွမ့်ဖီးတို ပလူး လီနားခံဒါဟတာစာဖုန်း။ ယေရှုမေလင်းခါ့ ပလူးဖုန်း အီအိုရျန်းစေးကန်းထွို့နန်" ဒေါင့်နိန်းအွယ့်ကြား။ 18ထွို့မဲ့ ဇာခရိဒီ့ "တမျိုနိန်းအွယ့် အီးပျန့်ထန်ဒွို က့အီသိကြိုင်ဒါနိန်းမာ။က့တမာဝါးအန်တငြီ့ဒွို အိုပလာကာလွမ်လိ" ဒေါင့်ချာဒါ့လွှော်။ 19လွှော်အွယ့်လဲ့ " ငါးဒွို ပျန့်တိုဖရာတမိုးစာ 'ဂါဗြေလ'။ ဗွယ်ဖရာ အန်ကြွလင်းငါး ဖီကဒေါင့်နေ့ မင်္ဂလာစတင်းခို ဒွိုးဘာ နားဆောင့်။ 20အွယ့်စားမဲ့ အခိန်းမေတွို့ခါ့ အီးပျန့်ထန်ဘာနောင် ငါးတဒေါင့်ဒွို့ နားလိယွမ်ဟမဲ့၊ တွိုတွို့မငြီးတာဒွိုးဘာပျန့်ထန် နားဒွိုဒေါင့်ငို ဒါဟထွို့ အီအိုအ့"ပြန်ဖြေချာဒါ့အာ။ 21ဇာခရိဒေါင်လွှော်ဖုန်း အိုဒေါင့်စူ့လိုကာ ဗိမာန်တော်ကုတွမ် ပလူးဖုန်း အိုပွိုင်းလိုကာဇာခရိ ခူနောင့်ဒိုင့်။အာကာဟွမ့်ဆန်လိုကာ ဇာခရိ ဘာဟနာ အိုကြာငြီးတာ ဗိမာန်တော်ကု။ 22ဒေါင့်မာလဲ့ ဇာခရိထန်ခူနောင်ခိန်းအွယ့် အာဒေါင့်စူဒါဟဒွမ်းနောင်အာကာအွယ့်စားမဲ့ ပလူးဖုန်း သိနားလိုကာ အာအိုဗိမာန်တော်ကူခိန်း အာသျှီဘာ နိမိတ်လက္ခဏာအဘာထွို့ အာအွယ့်လဲ့ ဒေါင့်ဒါးဟငိုထွို့ မိုးနေဘို့ နောင်ကျွော်နောင်ခင်။ 23ဇာခရိမိုးဖီထွို့တမိုနောင်း ပရောဟိတ်အပလားမိုးဘာတမိုး ဗိမာန်တော်ကုထွို့ အာကျိန်းအာယွမ်။ 24ကွဲငြီးငြီးလေထွို့ ဇာခရိမာ့ ဧလိရှဗက်အွယ့် အိုဒွိုင့်ထန်။ ဧလိရှဗက်အွယ့် လေးဟပလူးအမျာခါး တွိုတွို့ အန်ငေလ။ 25ထွို့မဲ့ "ဗွယ်ဖရာဒွို ခွင်ဖီလိငါးအိုဒေါင့်တာ။နောင်အာအလိုအတွိုင် မိုးသမာဖီလိထွို့ ပလူးအများဖုန်း တအန်းစွမ်တထင်ပီးနောင် တနည်ဒွိုး" အာဒေါင့်ချာတိုးနိန်းအွယ့်။ 26ဧလိရှဗက် အိုဒွိုင့်တာ အီလအန်စွော့်လခိန်း ဗွယ်ဖရာ ကြွလင်းဂါဗြေလ အွိုက် ဂါလိလဲဒေသ နာဇရက်ဝိန်းကု။ 27အွယ်မဲ့ ဗွယ်ဖရာလွှော် ဂါဗြေလ လင်ဒေါင့်ငို မာရိဆောင့်။ မာရိဒွို ပျန့်တမွော်အပလားဒေါင့်ဖီစေးကန်းထွို့နောင် အိုခွမ့်ဒါဝိဒ်ခွိုလင်း ယောသပ်။ 28လွှော်စွို့ မာရိထွို့ "ဗွယ်ဖရာ ကအိုကိုဒါနားဆောင့်နုဲင့် နေ့ထိုင်လွို့ဒါ့လိထွို့ အာဂရုဏာဒူအိုနားလောင်" ဒေါင့်နိန်းအွယ့်။ 29ဒေါင့်မာလဲ့ မာရိထွိုင်းဟွမ့်ငိုစွို့ထွို့ အာသရှုပ်ချက်ထန်တွို့ ထွို့ လွှော်ဘာသဒေါင့်ဟနာ အာအိုဟွမ့်ဆန်။ 30ထွိုမဲ့ လွှော်အွယ့် "ကျန်စကန်မာ မာရိ။ ဗွယ်ဖရာဒွို ဖီလွို့လိနားမေ့ငါ။ 31နားနုဲင့် အိုဒွိုင့်ထွို့ အီပွာဘာဖူခူအပါးထွို့ ဖီနျန်းဘာအာနျန်း ယေရှု။ 32အာအွယ့် အီပျန့် ပလူးမြတ်ထွို့ ပလားအီဟောင့်ကာအာ အမြတ်စွက် ဗွယ်ဖရာဖုခု။ ဗွယ်ဖရာ အီဖီအာ အာဖာ့ပလာခွမ်ခမ်းဒါဝိဒ် ပလင်။(သာသနာပလ္လင်) 33အာအွယ့် အီအုပ်စိုငါ့ ပလူးယာကုပ်ခွိုနွယ်ကားကအိုထွို့ အာခွမ့်ဆွက်လဲ့ အမျိုအီကျွော်ဒါလဲ့ မေဒွမ်း"ဒေါင့်နိန်းအွယ့်။ 34အွယ့်ခါ့အွယ့်"ငါးဒွို့ မေပျန့်တို သမွော်အပလား တာနိန်းအွယ့်အီပျန့်ဒါနိန်းမာ" မာရိဒေါင့်လွှော်နိန်းအွယ့်။ 35ထွို့လွှော်အွယ့် "ဉာဏ်ရောင်တော်ဒွို အီလင်းလင်နားဆောင့် ထွို့ ဖရာတန်းခိုလဲ့ အီအိုပါအွို့ နားလောင်။အွယ့်ခိန်းအွယ့် ပသားနားအီအန်လွူလင်းဒွို့ အီးပလင့်ပလီးမြတ်ထွို့ ပလားအီဟောင့်ကာ ဗွယ်ဖရာဖုခု။ 36ကပျန့်ဒါနားပွော်ဝေ 'ဧလိရှဗက်' ဒီ့ အိုပလာလိထွို့ ပလားထင်လိုကား လီအနးလွူဒါဒွမ်းဖုလဲ့ အာအိုဒွိုင့်တာ အီလလိအန်စွေ့ာ်လ။ 37ဗွယ်ဖရာဒွို့ အာမိုးဒါလူးတာကားကအို" ပြန်ဒေါင့်ချားအာ နိန်းအွယ့်။ 38ထွို့မဲ့ မာရိဒီ့ "ငါးဒွို ပျန့်ဗွယ်ဖရာစွမ်း အပလား။နောင်နားဒေါင့်ငို ဖီငါးပျန့်ဘာမှန်မှန်နောင်ဗွယ်ဖရာအလို" ဒေါင့်ချာလွှော်နိန်းအွယ့်။ 39ထွို့မဲ့မာရိပျင်အာနမ်ထွို့ နျက်လေးလေ ဇာခရိကအိုဒါ ယုဒဝိန်း ခေါင်လောင်ကူ့။ 40အာအွယ့် ထွိုင်နွူးကျိန်း ဇာခရိယွမ်ကူထွို့ အာကျိန်စွို့ ဇာခရိမာ့ဧလိရှဗက်။ 41ဧလိရှဗက်ထွိုင်ဟွမ့်စွို့ထွို့ မာရိငိုစွို့ထွို့ ပသာကအိုဒါ အာဖွော့်ကု ပလားလဲ့ စွိုထန်ထွို့မဲ့ ဧလိရှဗက်လဲံ့ နောင်ဉာဏ်ရောင်တော်မဲ့ ဟွမ့်ခိုနိတ်စက်ထွို့ အန်ဖရာထန် ဗွယ်ဖရာ။ 42ဧလိရှဗက်အွယ့် "ဗွယ်ဖရားဒီ ဖီနားတခိုတချမ်စား လွိုထိုင် ပမွော်လငါ့ကားကအိုထွို့ ပသာနားအီအန်လွူအွယ့်ပလားလဲ့ အီလ တခိုတချမ်စာ။ 43ငါးဗွယ်မွို လေတွို့ ငါးဆောင့်ကေကျူဒွို့ ကွက်တာဟနာ ငါးလ။ 44ငါးထွိုင်ဟွမ့်ထွို့ နားငိုစွို့ ထွို့ ပသာအို ငါးဖွော်ကုပလား ပျော်ထွို့ စွိုထန်။ 45''နားယွမ်အန် ဗွယ်ဖရာဗျာဒိတ်ငိုဒွို အီပျန့်ထန်ယွမ်အွယ့်ကြားမဲ့ မင်္ဂလာအိုယွမ်တွို့" ဒေါင့်စင်း မာရိနိန်းအွယ့်။ 46ထွို့မဲ့ မာရိအွယ့်လဲ့ "ငါးအန်ဖရာတို ဗွယ်ဖရာဂုဏ်တော်။ 47ငါးသဝိညာဉ်ဒွို့ ပျော်စွင့်အားရာဘာကွက် ဗွယ်ဖရာ။ 48ငါးဒွို ပျန့်ဘို့ကိုယ်တော်စွမ်းအရန်းဖွို့ ဒေါင့်မာလဲ့တေဒွိုးမာမေငါ့ ပလူးဖုန်းကားကအိုကျွမ်ဆက်ဆက်ဒွို အီဒေါင့်ကာငါး ပလူးခံဘာ တခိုမင်္ဂလာ။ 49တန်းခိုတော်ကမြတ်ဒါ ဗွယ်ဖရာဒွို မိုးဖီတခိုဖုန်းထွို့တွိုလေးလိ ငါးလောင်။ 50ဗွယ်ဖရာဒွို အာနေတင်းရှာတစေစေ ဂရုဏာမြတ်တာဒူး ပလူးကရိုသေကိုးကွယ်ဒါအာ ခွိုအဆက်ဆက်စာ။ 51ဗွယ်ဖရာဒွို ပလူးမာန်မာနထွိုင်စာကားကအို မိုးတချွန်ပလင့်ပလီးဒေါင်အာတန်းခို။ 52ဗွယ်ဖရာဒွို ထွိုးလင်းကေ့ ပလူးအုပ်စိုစာဖုန်အွိုက်အာကားပလင်လောင်ထွို့ ပလူးခံအောက်ဒါပလားစာကားကအိုအွယ့် အမ်းဒင်ဖီး အွိုက်ခမ်လန် အရေပါကူ့။ 53ဗွယ်ဖရာဒွို အာအီဖီတညင်တခို ပလူးအိုဝီတာစာဖုန်းထွို့ သူဌေသူကြွယ်ဖုန်းအွယ့် အာအီဖီကြွကျိန်းချာဒါဘို့။ 54ဗွယ်ဖရာဒီ့ကယ်ဆယ်လိထွို ပလူးအစ္စရေးမျိုးကသိနန်ဒါး အာဂရုဏာဒူးထွိုမိုးဖရာတမိုးစာဖုန်း။ 55ဗွယ်ဖရာဒွို ခံငိုသစ္စာအတွိုင် အိုဟွိုင့်တစေစေတို ကပျန့်ဒါ ငါးမွိုးပလာ ဖပလာ၊ အာဗြဟံခွိုအဆက်ဆက် ဖုန်းလောင်" ပူဇော်အန်ဖရာလေဗွယ်ဖရာဂုဏ်တော်နိန်းအွယ့်။ 56မာရိ အွယ့် အိုကိုဒေါင်ဧလိရှဗက် ကြာအန်တွမ်လအာ့ထွိုမဲ့ အာကျိန်းချာဒါ အာယွမ်။ 57ထွို့မဲ့ ဧလိရှဗက်အွယ့် ပသာပီပွာလင်းခိန်း တွိုလင်းအွယ့်ကြားမဲ့ ၊အာပွာလင်းဖုခုအပလား။ 58ဧလိရှဗက်လောင် ဗွယ်ဖရာမေတ္တာဒူတျားမာ ပလူးအာယွမ်ဆောင့်ယွမ်တီးစာ နောင် အာပွော်အဝေဖုန်းလဲ အိုဟွမ့်အိုသိစေကမ်းလိုကာမဲ့ ဟွမ့်ခို နေဆက်ဘာနောင်း အဗွယ်နန်။ 59ပသာပီးအန်လွူထွို့ လအန်စူးငြီးကု အီမိုးဖီ တာအိုလူမိုးခရာ ဝတ္တရာနောင်း ဒွူးယားမင်္ဂလာတာ ပလူးဖုန်းတွိုလေကာခိန်း အာကာအွယ့် သျွှော်အာဖာ့ဇာခရိနျန်းထွို့ဘာတဖီးနျန်းလိုကာ ပသာအွယ့်ပလားနျန်း ဇာခရိ။ 60ဒေါင့်မာလဲ့ ပသာမွိုအွယ့် "ဟောင့်ဘာအာနျန်း ယောဟန်တို" အာဒေါင့်နိန်းအွယ့်။ 61"နားခွိုမျိုကူ့နုဲင့် နျန်းနိန်းဒွိုးလီအိုဟာ" ပလူးကားကအို ဒေါင့်အာ နိန်းအွယ့်။ 62ကွက်အွယ့်မဲ့ အာကာနေ့နောင်ကျွော်နောင်ခင်းထွို့ တစီလိုကား ပသာပီဖာ့ ဇာခရိဘာသာဖီနျန်းနျန်းနိန်းမာ။ 63ဇာခရိအွယ့် ကွူ့စမ်ဖုန်အဘာထွို့ အာဖုနျန်းဒွို ပျန့်တိုယောဟန် အတျန်လင်နိန်းအွယ့်။ အွယ့်ထွို ပလူးကသျှီစာကားကအိုအွယ့် ဟွမ်ဆန်ကာ။ 64'ဇာခရိ'အွယ့် ဒေါင့်ဒါထန်တွို့ငို အလိုင်းချင်ထွို့ တေအန်ဖရာပူဇော်လေ ဗွယ်ဖရာဂုဏ်တော်။ 65ယွမ်ဆောင့်ယွမ်တီးစာနောင် ပွော်ဝေဖုန်းကားကအိုအွယ့် ထွိုင်းသျှီတာကပျန့်အွယ့်ဟိုထွို့ စကမ်တဝါ့လိုကာ။ပလူးကားကအိုဒါ ယုဒကန် ခေါင့်လောင်ကျွမ်တောင်တောင်ကုအွယ့် ဒေါင့်လိုကား စတင်းအွယ့်ဘာ။ 66ပလူးကသိဟွမ့်ဒါးစတင်းအွယ့်ဘာကားကအိုအွယ့် "ပသာပီအွယ့်ပလား မေဒူထန်ခါ့ အီပျန့်နိန်းမာ" ဒေါင့်လိုကာနောင်သဘာသိနိန်းအွယ့်။ 67ထွို့မဲ့ ပလင့်ပလီစင်ကလယ် ဉာဏ်ရောင်တော်မြတ်အွယ့် တွိုလင် အာဖာ့ဇာခရိလောင်ထွို့ အာဟိုလင်နောင်းအွိုက်ခလားဒွိုး။ 68အန်းဖရာတို ဗွယ်ဖရာဂုဏ်တော်။ ပလူးအစ္စရေးမျိုကားကအိုစာဖရာဒွို ကြွာ့လင်းဘာ အီကယ် ပလူးကားကအိုတာ။ 69အာဒွို ဖီလိထွို့ တန်းခိုအာဏာကဒူဒါ ဗွယ်ကယ်ဆယ်စာ ကအိုဒါ အာစွမ်းခွမ့်ဒါဝိဒ်ကုလင်း က့ကျွမ်းပလားလားတာ။ 70အွိုက်အကီကီခါ့ ဗွယ်ဖရာကမိန့်စေးကန်းဒါ အရိယာသူတော်ကောင်မြတ်ဖုန်းအတွိုင် 71တန်းခိုကဒူဒါ ဗွယ်ကယ်ဆယ်စာဒွို အီကယ်ဖီက့ ရန်ဆူကားကအိုကုကာဟ အီကယ်ဖီ ပါပလူးလွှသျှီကစာအန္တရာယ်ကု။ 72ဗွယ်ဖရာဒီ့ နေ့ကမွိုပလာဖပလာနောင် ဂရုဏာဒူထွို့ အာအီဖီတည်တို အာခံငိုသစ္စာ။ 73ဗွယ်ဖရာဒွို ဗွမ့်နောင်း အာကခံစေကန်းဒါးငိုသစ္စာ ကမွိုပလာဖပလာ အာဗြဟံဆောင့်အတွိုင် 74အီကယ်ထန်က့ ရန်ဆူအန္တရာယ်ကျွော့်ကုထွို့ က့ဆက်အိုမွမ်ကျူအဘောင်ကုဒွို က့အီမိုးကာဒါ့ ဖရာတမိုးနောင်တစကမ်ကင်ကင်။ 75ဗွမ့်နောင်အွယ့် က့ဒွိုလဲ့ အိုနောင် တစင်ကလယ် တမျက် အာမေ့ငါ့ကုထွို့ ဖဝကာအိုကေ့ တွိုတွို့ ဆက်ကလူး။ 76အီဟောင့်လိုကာငါးဖု အစွိုင်းစွက် ဗွယ်ဖရာအရိယာဆူတော်ကောင်ထွို့ အီပျန့်ပလူးပျင်စေးကန်းဖီဘာဗွယ်ကလေ့။ 77အာအီဒေါင့်နေဖီ ပလူးဖုန်း ဗွယ်ဖရာဒွို မေခွင်လွက်ဖီပလူးအပျက်ဖုန်းထွို့ အီဖီတို တကယ်ဆယ်ခွင်။ 78ဗွမ့်နောင်း မွိုင်အိုခါ့လက်တာမုလောင် က့ဗွယ်ဖရာမေတ္တာ၊ ဂရုဏာဒူဖုန်းဒွို အီခါ့လင်းက့လောင်ထွို့ 79တရောင်ခါ့လက်အွယ့်ဘား အီးနေ့ကလေ့ တုန်လေဖီပလူးကကြုံးဘာ တစီ့တရာစာဖုန်း ဖီးကလွတ်တလီခိုဟကုထွို့ တွိုဘဝငင်ကု"နိန်းအွယ့်ဟနေ။ 80ဒွို့ခါ့ယောဟန်အရွယ်လထန်ထွို့ ဉာဏ်ရောင်တော်အွယ့် အိုကိုနောင်အာလောင်ထွို့ အာအွယ့်အိုကျဲင်လဲဗို့ နွေိုင့်ကန္တာရကု တွို့တွို့ မငြီ့ ဗွယ်ဖရာဘာသအန်ချန်အာတွိုလေးအစ္စရေးစာဆောင့်။
Currently Selected:
Luke 1: ltpv-rv
Highlight
Share
Copy
Want to have your highlights saved across all your devices? Sign up or sign in
This translation of the Lahta Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
