Luke 21
21
1နွို့ခေါင်း ကိုယ်တော်ယေရှုန တပည့်တော်ဘို့ဘက်နွို့နောင်း ကောင်ဗိမာန်တော်နွို့ တန်းဘာ့မိုင်မဲ့နွို့ ကိုယ်တော်နောင်း တော့ကု့ဇာ့အမ်နွို့ ဆောင့်ပတ်ရေစ်နောင်း လို့ဘာ့ချမ်းထာဘို့ဘက်နောင်း ပဆံခွို့ဘို့ဘက်နွို့ ကောင်အလှူခံသေတ္တာနွို့ ထို့မဲ့ကြဘို့နောင်း ရင်ဟောက်နွို့နဲ့။ 2နွို့ခေါင်း ဘာ့ဆန်းရဲမဲ့ မိတ်ဆို့မအာ့်ကွက်နောင်းလဲဉ်း လောက်ပိုတွို့ထာ လတ္တာဒင်္ဂါးအဲဉ်ပလက်န ထို့လှူမဲ့နွို့နောင်းလဲဉ်း ကိုယ်တော်နောင်း ရင်ဟောက်နွို့နဲ့။ 3ချန်နွို့နု့ ကိုယ်တော်ယေရှု တပည့်တော်အမ်နွို့နု့ “ပွို့နွို့နု့ အို့တဖြိုအ့်မှန်နွို့နု့ မိတ်ဆို့မနီး အမ်ဘာ့လှူဇာ့နွို့နောင်း လို့အ့်ခြားဘာ့အာ ပဆံနွို့မှ တန်ဖိုးမှန်းဟိုဟောက်။ 4ရွားနွို့ပဒေကား လို့ချမ်းထာမေ့မေ့နွို့နောင်း ကောင်ပစ္စည်းဥစ္စာလိုလ်နွို့စယ် ထို့လှူကြဘို့နွို့နဲ့။ စနွို့လဲ မိတ်ဆို့မနီးနောင်း ဆန်းရဲလွန်းဟောက်နွို့လဲ တာ့အထက်ခမ်းစွေအမ်နွို့နား တာ့အမ်နွို့ဇာ့ဘာဟိုနွို့နု့ ထို့လှူပွို့နွို့ခေါင်း ကိုး” နွို့ဟောဖြိုမနနဲ့။ 5နွို့ခေါင်း တပည့်ကိုယ်တော်ယေရှုတောင်ခိုင့်နွို့နောင်း ဘာကနိုမဲ့သန်းမှုဘို့ဘက်၊ ဘာ့လှူဘို့မဲ့ပစ္စည်းဘို့ဘက်နွို့န ဆန်ဗွို့နွို့ခေါင်း ကနိုလွန်းဟောက်နွို့ဟိုမနခေါင်း ဖြိုကြဘို့နွို့ကိုးနဲ့။ 6စနွို့လဲ ကိုယ်တော်ယေရှုနား “ပွို့ဘာ့ရင်မဲ့ အကြောင်းအရာဇာ့နီးမေ့မေ့နောင်း အချန်ဘာ့ဖျောက်နွို့နောင်း မောင်းလောက်ပိုတွိုနွို့နဲ့။ သန်းမှု့အသန်းဇယ်မှ တာ့လွက်တာ့ရှိနွို့ ထန်မှတံလွန်ကောနွို့အောင် မင်ယို့ဖျောက်ခံလောက်ဟောက်ကိုး” နွို့ဟောဖြိုမနနဲ့။ 7တပည့်တော်နွို့နား ကိုယ်တော်နွို့ “ကိုယ်တော် အဖြစ်အပျက်ဘို့ဘက်နောင်း အချန်မွှား မောင်းဖျောက်ဟောက်နောင်း။ အဖြစ်အပျက်ဘို့ဘက်နွို့ ကနိုကော မောင်းဖျောက်ဟောက်နွို့ မို့ရေစ်တွို့တတ်ထားန အေ့ငန်းနိုင်းဟောက်နောင်း” နွို့မားမနနဲ့။ 8ချန်နွို့နု့ ကိုယ်တော်ယေရှုနား ခွို့နွို့နု့ “အချန်ကာလနွို့ဆောင့်လောက်ပိုနောင်း ပွို့နွို့နု့ ဘာ့မွှားမှ မင်လှည့်စွေကောအောင် ဗွို့ကြဘို့သတိ။ ရွားနွို့ပဒေကား လို့ဘို့ဘက်နွို့နား တခွို့နွို့နား အခွင့်အာအို့ ဟိုဟောက်နွို့ ဖြိုလွဲတွို့ထာ ခွို့နွို့နောင်း ကလုဲင်မေရှိယနွို့လဲ ဖြိုလောက်ဟောက်။ စနွို့ဖုန် ခွို့နွို့နောင်း ‘ကမ္ဘာကုန်းနီး မောင်းတုတ်တွို့နောင်း လောက်ပိုတွို့ကိုး’ နွို့လဲဉ်း ဖြိုကြလောက်ဟောက်ပွို့။ စနွို့လဲ ပွို့နွို့နောင်း ဘတ်လို့ဇာ့နွို့နား လာ့ကု့လွမ်းန။ 9နိုင်ငံဘို့ဘက်နောင်းလဲဉ်း နိုင်ငံအာ့်နိုင်ငံန အာ့်နိုင်ငံ ဒုတွို့ပွို့ထာ ဇာ့ဘာ့ဟိုပြည်သူဘို့ဘက်နောင်းလဲဉ်း အစိုးရခွို့နွို့ ဆန်ကျင်ကြမဲ့ဘို့နောင်း ဆောင်အွမ်နွို့ လာရကြနဘို့။ ရွားနွို့ပဒေကား ဇာ့နွို့ဘို့ဘက်နောင်း ကလုဲင်ပွိုလောက်ဟောက်ငွမ်းနွို့လဲဉ်း ကမ္ဘာကုန်း အချန်ဘာ့တုတ်နွို့ အတိတွိုန်းလာ့ခါလောက်ပွိုကော” နွို့ဟောဖြိုမနနဲ့။ 10ဆက်တွို့ထာ ကိုယ်တော်ယေရှုမှ လို့မျိုးအာ်မာ့နအာ့်မာ့၊ နိုင်ငံအာ်နိုင်ငံန အာ့်နိုင်ငံနွို့နောင်း ဆန့်ကျင်ဒုကြလောက်ပွို့။ 11ကမ္ဘာကုန်းတလွက်အနှံ့အနှောနွို့လဲဉ်း ငလျှင်နွို့ဖုန်၊ ဘာ့ငတ်ကြဘို့နွို့ဖုန်န ရောဂါဘာ့ဆို့နွို့နား ကလုဲင်ပိုလောက်ဟောက်။ ကွေတအောင်နို့လဲ ခမ်းရလွန်းဘို့ဘက်နွို့န ဘာ့ထူးခြားမဲ့အဖြစ်အပျက်ဘို့ဘက်နွို့ ကလုဲင်ပွိုလောက်ဟောက်။ 12စနွို့လဲ အဖြစ်အပျက်ဘို့ဘက်နွို့မေ့မေ့ ခါဖြစ်ပျက်ကောနွို့နု့ ရန်သူပွို့နောင်း ပွို့နွို့နု့ စက်ယော့ နှိက်စက်တွို့ထာ တာ့ဓမ္မာရုံနွို့ ယိုဇ်တွိုထာ ပွို့နွို့နား ထို့လောက်ပွို့ကောင်ထောင်တောင်ဓိ။ ပွို့နွို့နောင်း ကလုဲင်တပည့်အို့နွို့ခေါင်း ဖရင်ဘို့ဘက်န တာငွမ်းလို့အုပ်ချုပ်နွို့ မင်စစ်ဆေးခံနွို့နု့ ပွို့နွို့နား ဟက်ကု့လောက်ဟောက်။ 13တာကလုဲင်ပွို့စနွို့နု့ ပွို့နွို့နောင်း ခံမ့်အို့နောင်း ခံတွို့သက်သေထာ ခွို့နွို့နား ဖြိုအွမ်အောင် ဗင်လောက်ဟောက်အခွင့်ရေးနွို့နဲ့။ 14စနွို့နား ပွို့နွို့နောင်း သိုလ်ပွို့သိုလ်ပွို့ မောင်းကာကွယ်နွို့နွို့နု့ မင်ဖြိုဇာ့မွှားနွို့ပဒေနား လာစိုးရိမ်ကောအောင် ဆုံးဖြတ်ကြဘို့ အခိုင်အမာ။ 15ရွားနွို့ပဒေကား ရန်သူပွို့နွို့မေ့မေ့နွို့နု့ ပွို့နွို့နု့ ဆက်ညောင်တွို့ထာ ဗင်နိုင်းကောအောင် ဘာ့မင်ဖြိုမဲ့ပနောင်န ဉာဏ်ပညာနွို့ ပွို့နွို့နား အိုအာဟောက်နွို့ခေါင်း ကိုးနဲ့။ 16မိတ်ပါပွို့၊ မို့တွေ၊ ကမာ့၊ ဘို့ပေ့ဘို့ဘက်နွို့နား ပွို့နွို့နု့ သစ္စာဖောက်တွို့ထာ တာလို့ဘာ့အုပ်ချုပ်နွို့ အပ်နှံတွို့ထာ ရန်သူပွို့နွို့နား အာလောက်ဟောက် အကူအညီတနွို့နဲ့။ လို့ဘာ့ချုပ်ဘို့ဘက်နောင်း ကောင်ပွို့နွို့နု့ တောင်ခိုင့်နောင်း ဗီကြလောက်ဟောက်ဘို့။ 17ယုံကြည်ကိုးကွယ်အို့နွို့ခေါင်း လို့မေ့မေ့နောင်း ပွို့နွို့နု့ ရှိအိလောက်ဟောက်ဘို့။ 18စနွို့လဲ ဆောင်ကွေမှ အစဉ်ထာဝရ အာနိုင်းကောဒုက္ခနွို့ခေါင်း လာစိုးရမ်ကြနပွို့ 19ဇာ့နီးမေ့မေ့နွို့ ခံနိုင်ရည်ဟိုတွို့ထာ ယုံကြည်ခြင်းအို့နွို့ တာ့စွန်တောဝ်ကောနွို့နု့ နိစ္စထာဝရအထက်နွို့ဗင်လောက်ဟောက်နွို့နဲ့။ 20နွို့ခေါင်း ကိုယ်တော်ယေရှုနောင်း “မြိုဂျေရုဆလင်နွို့ စစ်တပ်ရန်သူဘို့ဘက်နောင်း ဝန်းပို့ဟို့နောင်း ပွို့ဆောင့်ရင်နောင်း စစ်တပ်ဇာ့နွို့ဘို့ဘက်နောင်း ကနို့ကော မြိုမေ့မေ့နွို့ မောင်းယို့ဖျောက်နွို့ ပွို့နွို့နား ငန်းမဲ့သေသေချာချာနွို့နဲ့။ 21ချန်နွို့နု့ ဖြိုင်ယုဒနွို့ ဘာ့ဟိုနွို့နောင်း ကွေဗွေနွို့ ငန်းတတ်လောက်ဟောက်။ ကောင်မြိုဂျေရုဆလင်နွို့ လို့ဘာ့ဟိုနွို့နောင်းလဲဉ်း စွန်တောဝ်တွိုမြိုထာ ဖက်ပလန်းမြိုနွို့ ကံ့လေးပွန်လောက်ဟောက်။ တောတဘိုဘို့ဘက်နွို့နောင်းလဲဉ်း ကောင်မြိုနွို့ လာ့ကွက်နိုင်းကောနွို့နဲ့။ 22ရွားနွို့ပဒေကား ဖြားနောင်း လို့မြိုဂျေရုဆလင်နွို့နား ပြင်းပြင်းထန်ထန် မောင်းအာတွို့အပြစ်နွို့ခေါင်းကိုးနဲ့။ စနွို့ အာအပြစ်နွို့နောင်း ကောင်လိတ်ကျမ်းနွို့ ဘာတဲင်ပွို့နွို့အတွိုန်း ပြည့်စုံပိုအောင်နွို့ခေါင်း ကိုးနဲ့။ 23ချန်နွို့နောင်း လို့စောင်ကွန်ဘို့ဘက်န မွေးဒုဗုလို့ပေ့ဘို့ဘက်နွို့နောင်း တာ့သိုလ်ပလက်လေးခွို့နွို့ ပလက် ဘာ့ရစ်ရန်းတွို့ထာ ဒုက္ခဆန်းရဲလွန်းအချန်နွို့ကိုးနဲ့။ ရွားနွို့ပဒေကား ဖြိင်နွို့မေ့မေ့ဗဟိုလို့ဘို့ဘက်နောင်း ဘာ့ဆို့လွန်းမဲ့ ဘေးဒုက္ခနွို့ မင်ခံစွေယော့ ဖြားနောင်း လို့မျိုးဖြိုင်အစ္စရေးနွို့ ပြင်းပြင်းထန်ထန် မောင်းအာတွို့အပြစ်နွို့ခေါင်းကိုးနဲ့။ 24ခွိုနွို့တောင်ခိုင့်နောင်း နှိက်န စစ်သားနွို့နု့ မင်မောင်ဗီးခံတွို့ထာ လို့ဘာလွန်နွို့နောင် အ့်ကလုဲင်ကျွန် ဖြိုင်အခြားနွို့ မင်ဟက်ကု့ခံလောက်ဟောက်နွို့နဲ့။ မြိုဂျေရုဆလင်နောင်း မေရှိယ မောင်းကြွပို့အခွပ်နွို့ ခါလောက်ကောအောင် လို့မျိုးခြားဘာ့အုပ်ချုပ်နွို့” မင်ခံလောက်ဟောက်နွို့နဲ့။ 25နွို့ခေါင်း ကိုယ်တော်ယေရှုနား “ကမ္ဘာကသေ့ကုန်းနီးနွို့ အချန်တုတ်ဆောင့်လောက်နွို့နောင်း ပွို့နွို့နောင်း ရှိ၊ ကသို့၊ ကလန်းဘို့ဘက်နွို့ ဘာ့ထူးဆန်းမဲ့နွို့နု့ ကလုဲင်ပွိုလောက်ဟောက်နို့နု့ မင်ရင်ဟောက်နွို့နဲ့။ ဘာဟိုလို့မျိုးနွို့ နိုင်ငံအမာ့မာ့နွို့လဲဉ်း လိုအများနောင်း ကရက်ပင်လယ်ဘာ့ကလေ့ဘို့ဘက်နွို့န လှိုင်းအွူကုန်း ကရက်ဘာ့ပေါ်နွို့ နွက်လက်လက်န ကရောလောက်ဟောက်ပွို့နွို့နဲ့။ 26လို့နောင်း ကွေကသေ့ကမ္ဘာနီး ခမ်းရလွန်း ဘေးအန္တရာဇ်ဘို့ဘက် ကလုဲင်ပိုနွို့ခေါင်း ရရောလွန်းတွို့ဘို့ထာ မူးရေးလောက်ဟောက်ကြဘို့နွို့နဲ့။ ရွားနွို့ပဒေကား ဖြားနောင်း ကလန်းဘို့ဘက်၊ ဂြိုဟ်ဘို့ဘက်နအနုဲင်နုဲင် ဘာ့ဗဟိုကွေတအောင်နွို့ ဇာ့ဘာ့ဟိုနွို့နား ကမိုက်ဟောက်နွို့ခေါင်း ကိုးနဲ့။ 27ဘာကု့မြတ်မဲ့ ဖုန်းတန်ခိုးတော်နအနုဲင်နုဲင် ဖုန်းတန်ခိုးနွို့နား နွို့ဘာ့ပလေမဲ့ ကလေစ်အံနွို့ ဝန်းတွို့ထာ အို့နောင်း ကွေကသေ့ကမ္ဘာနွို့ ကြွပိုနွို့နဲ့။ ချန်နွို့နု့ ဗဟိုစေ့လွက် လို့မေ့မေ့နွို့နု့ အို့ကွန်ဖြားနား ရင်လောက်ဟောက်နွို့နဲ့။ 28ခမ်းဘာရရောလွန်းမဲ့ အဖြစ်အပျက်ဘို့ဘက်နွို့ ဘာ့စဖြစ်ပျက်ပွိုနွို့နောင်း ပွို့နွို့နောင်း ကလာလာန အောက်အိုတွို့ထာ ယုံကြည်မှု့အဗြောက်န ကတောင်ပွို့နွို့နောင်း မော့ပွို့စေး။ ရွားနွို့ပဒေကား ကနိုကော ဖြားနောင်း မို့နား ကောင်ဒုက္ခဆန်းရဲ နွို့မှ မောင်းကယ်တင်တွို့နွို့ခေါင်းကိုး” နွို့ဟောဖြိုမနနဲ့။ 29နွို့ခေါင်းကိုယ်တော်နောင်း တပည့်တော်အမ်နွို့ ပုံဥပမာအာ့်မာ့န ဖဟာဖြိုဟောက်နွို့နဲ့။ ကိုယ်တော်နား ခွို့နွို့နု့ “ဆုပ်ပ္လေ့ ဒု တကက်ကောလဲ ဆုပ်တခြားနွို့ ရေစ်တွို့ထာ အွေကြဘို့သင်ခန်းစာနေ။ 30တာဆုပ်ထေ့နွို့ လာ့ထေ့ထုပေ့ဘို့ဘက် ဘာ့လေးပိုနွို့ ဆောင့်မင်ရင်နောင်း လောက်ပွိုတွို့ ချန်ကာလွက်နွို့ ပွို့ငန်းလောက်ဟောက်။ 31ဇာ့နွို့အ့်တွိုန်း အခို့ပွို့နွို့နား အို့ဘာ့ဟောဖြိုနွို့နောင်း ဘာ့ရရောလွန်းမဲ့ အဖြစ်အပျက်ဘို့ဘက်နွို့ စကလုဲင်ပိုနွို့နောင်း ထာထနာတော်ဖြားနောင်း အချန်ခါကနိုကောနွို့ စပေါ်လေးပိုတွို့နွို့ခေါင်း ပွို့နွို့ သေသေချာချာ ငန်းနိုင်းလောက်ဟောက်နွို့နဲ့။” 32ပွို့နွို့နား အို့တာဖြိုအ့်မှန်နွို့နု့ “အခို့ အထက်ဘာ့ပလုဲင်ကြမဲ့ပွို့ လို့မေ့မေ့နွို့နောင်း အဖြစ်အပျက်ဘို့ဘက်နွို့ ခါကလုဲင်ကောနွို့အောင် ဘာဗီးနွို့နား လာ့လောက်နိုင်းကော။ 33တအောင်န ကသေ့မင်လွန်လွန်နောင်း လာ့တည်မြဲကောနွို့လဲဉ်း ပနောင်အို့နောင်း ထာဝရ တည်မြဲလောက်ဟောက်ကိုးနဲ့။” 34“စနွို့လဲ ပွို့နွို့မင်မန်းဇာ့မွှားနွို့နား ဗွို့ကြဘို့သတိနေ။ ပွို့နွို့နောင်း ပျော်လှူးတွို့ထာ စွေလွမ်းမူးလွမ်း၊ ဘဝပြဿနာပွို့နု့နွက်လက်လန်းန အချန်ဘို့ဘက်နွို့နား လာဖြန်ဖျောက်နကြဘို့။ တာယိုဇာ့နွို့နု့ ပွို့နွို့နောင်း အို့ဘာ့ကြံပိုအချန်နွို့ လာ့ကလုဲင်ကော အဆင်သင့်နွို့နဲ့။ ရွားနွို့ပဒေကား တိရစ္ဆာန်အာ့်ကွက် နာ့ဘေ့ဒေါင်မာန့်နွို့ အို့နောင်းလဲဉ်း ပွို့ဘာ့ထုန်ကော အချန်နွို့နု့ တရုတ်ရုတ် ကြွရန်းပွို့တွို့နွို့ခေါင်း ကိုးနဲ့။ 35ရှိနွို့နု့ ဘာ့ဖြစ်ပျက်ပွို့ဇာ့နွို့နောင်း ဗဟိုကသေ့မင်ကမ္ဘာဘာ လို့မေ့မေ့နွို့ အာလောက်ပွိုတွို့ထာ ဘေးဒုက္ခန မင်ကျင်လောက်ဟောက်။ 36စနွို့နား ဇာ့အချန်ဘာ့ဟိုနွို့နား သတိဟိုကြဘို့။ ဘာ့ကလုဲင်ပွိုအဖြစ်အပျက်ဘို့ဘက်နွို့နောင်း ခံနိုင်းအောင်န ငွမ်းကွန်ဖြားနွို့ ယုံကြည်ချက်ဟိုဟိုန အောက်အိုနိုင်းအောင် တဖြားနွို့ ဆုတောင်းစေ့ကြဘို့” နွို့ဟောဖြိုမနနဲ့။ 37နွို့ခေါင်း ကိုယ်တော်ယေရှုနောင်း ရှိခါနွို့နု့ မြိုဂျေရုဆလင် ကောင်ဗိမာန်တော်နွို့ ဟောဖြိုကရီတွို့ထာ ဖက်ခို့ခါနွို့ လေးတွို့ဖက်ပလန်းထာ ကွေဗွေသံလွင်နို့ကု့တွို့ထာ 38လို့ဖုန်ကုန်းဘို့ဘက်နောင်းလဲဉ်း ကိုယ်တော်ယေရှုဘာ့ဟောဖြိုကရီအာနွို့နု့ မောင်းနာအွေနွို့ အောက်တွို့ငွမ်းခါစောစာထာ တလွက်ကိုယ်တော်ဘာ့ဟို ကောင်ဗိမာန်တော်နွို့ လောက်ပိုကြဘို့နွို့နဲ့။
Currently Selected:
Luke 21: dtpv-rv
Highlight
Share
Copy
Want to have your highlights saved across all your devices? Sign up or sign in
This translation of the Dannau Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
