Luke 7
7
1ခေါင်ထုပရိတ်သတ်အောလ် ဟောပြောပါလ်နောလ် ကိုယ်တော်ယေရှုခေါမ် ကပေရနောင်လုအောလ် အကြွဘွာလ်။ 2အင်(မ်)လုအောလ် ရောမအင်ပါယာ တပ်မှူးပွလ်ဟှတ် အမယ်။ အင်(မ်)ခေါင်နှစ်သက်ခေါမ် အစေခံပွလ်ဟှတ် ကွားထေ့နား ဘလ်ဟိုင်ထုအထောလ်။ 3အင်(မ်)တပ်မှုနား ကိုယ်တော်ယေရှုအကြောင်းအယှောက်ဟိုဝေါလ် အချို့ဂျူးခေါင်းဆောင်လှီ့ကိုယ်တော်စငေါလ် လှိထေ့နား အစေခံဓူပက်ဟိုင်ရိုး အဖိတ်။ 4အင်(မ်)ခေါင်းဆောင်လှီ့ ကိုယ်တော်စငေါလ် ဈာတ်ထေ့နား အင်(မ်)ခေါင်ကူညီပက်ဟိုင် အာမ်လျှောက်။ အင်(မ်)ခေါင်းဆောင်လှီ့နား "နီတပ်မှူးခေါမ် ကိုယ်တော်အကူညီ ခံထိုက်တိရိုအထောလ်။ 5အင်(မ်)ခေါင်ခေါမ် ကေးမီးယှီယောင်လှီ့မြတ်နိုးထေ့နား ဓမ္မာရုံပွလ်ဟှတ်ခါ အလှူဒါန်းဟိလ့်" တိရို အာမ်လျှောက်။ 6အင်(မ်)ခန်းနောလ် ကိုယ်တော်ယေရှုခေါမ် အင်(မ်)လှီ့ဓေါလ်ဟှတောလ်အကြွ။ အင်(မ်)တပ်မှူးအိမ်ကာခိုက်ရိုက်ဟိလ့်ဟိုဝေါလ် တပ်မှူးနား ခီပွီလှီ့လှိထေ့နား ကိုယ်တော်ဝေါလ် "အရှင် ကေးမီးတွက် ဆိတ်ခါမ်ထေ့နား ကြွလူးကောအား။ ကေးအိမ်မယ် နာကြွလူးဟိုင် ကေးနောက်ခေါမ် အရှင်ဓေါလ် ထိုက်တန်ယတိယောင်။" 7အင်(မ်)အပြင် "အရှင်စငေါလ် ကေးကလူးဟိုင်ခါ ထိုက်တန်ဟီ "အရှင်နား အမိန့်ပက်ကုံးငေါလ် ကေးအစေခံ ရောဂါအခိလ်ဘွာလ်ဝိုက်။" 8ကေးလက်အောက်ကာလ် စစ်တပ်လှီ့ပူနူးအမယ်ထေ့နား အင်(မ်)လှီ့အောလ် ကေးနားဈာတ်တားတိရို အမိန့်ကပက်နားစေ့ အဈာတ်လောဒ့်။ လူးဝြားတိရို အမိန့်ပက်နားစေ့ အလူးလောဒ့်။ ကေးနား ကေစေခံလှီ့အောလ် နီစိုင်းတိရို ဟောင်နားစေ့ အင်(မ်)လှီ့နား အာမ်စိုင်းလောဒ့်" တိရို အလျှောက်ဆောက်။ 9အင်(မ်)ဘော်ဟောင်ခေါမ် ကိုယ်တော်ယေရှုနား အယှောက်ဟိုဝေါလ် စါစ်နိုးထေ့နား အနှုဝေါလ်ရုရ်းလူးတိလှီ့ ခေါင်ထုအောလ် "ကေးနား နာ(င်)မီးရိုး ဟောင်ဟိုင်ကလီခေါမ်စေ့ အစ္စရေးတခွင်ငေါလ် နီဟို့ယုံကြည်မှုလန်တိ မှူးဖူဟာမ်းဟီ" တိရိုအဟောင်။ 10တပ်မှူးလှီ့အိမ်မယ် ခိုက်ဘွာလ်ဟိုဝေါလ် အင်(မ်)အစေခံ အခိလ်ဘွာလ်ခေါမ် အာမ်မုလောဒ်။ 11အထာနှိုပ်ဟှတောလ် ကိုယ်တော်ယရှုအတပည့်လှီ့ဓေါလ် ဟှတောလ် နာဣနလုအောလ် ကြွဟိုဝေါလ် ခေါင်ထုလှီ့နားခါ အာမ်ရုန်းလူး။ 12ကိုယ်တော်ယေရှု လုဝင်ပေါက်ကာ ခိုက်လူးဟိုဝေါလ် ဘာလ်တိရုတ် ခိဟိုင် ခေါင်စုဟှတ်နား ပါးထေ့နား လုပြင်ငေါလ် အာမ်ထုတ်လူး။ အင်(မ်)ဘာလ်တိခေါမ် မှာလ်နူးနားပွလ်ဟှတ်ဘွတ်စော အတောဒ့်ကာလ်ခေါမ် အစိုးဝေါလ်ထောလ်ထေ့နား လုအောလ်ကိခေါင်လှီ့နားခါ အင်(မ်)မှာလ်နူးဓေါလ်ဟှတောလ် အာမ်ထောက်ပက်။ 13ကိုယ်တော်နား အင်(မ်)မုတော အမုဟိုဝေါလ် မာနယ်လုန်ဝင်ထေ့နား "ကာပ်ကော့အား" တိရို အဟောင်။ 14အင်(မ်)ပါလ်နောလ် ကိုယ်တော်နား အင်(မ်)ခေါင်လှီ့ ပါးလူးခေါမ် ရုတ်စင်ကာဝေါလ်ဈာတ်ထေ့နား ရုတ်စင်ခေါမ် ကွတ်တောလ် အလှမ်းမယ်။ အင်(မ်)ဟိုဝေါလ် ရုတ်စင် ပါးလူးတိလှီ့နား အာမ်ဒိလ်ပက်ဟိုဝေါလ် ကိုယ်တော်နား "ဒိပ်စော၊ နာ(င်)ငေါလ်ကေးနား ကဟောင်ဝိုက်။ ထုလ်ဝြား" တိရို အမိန့်။ 15အင်(မ်)ဘော် ယေရှုနားအဟောင်ဟိုဝေါလ် ချက်ချင်းကုံး အင်(မ်)ဘာလ်တိ ဒိပ်စော ငွာဘွာလ်ထေ့နား အခေဘွာလ်။ ကိုယ်တော်ယေရှုနား အင်(မ်)ဒိပ်စော အနူးဝေါလ် အအပ်(ပ်)ဘွာလ်။ 16ခေါင်လှီ့နား အံ့ဩထေ့နား "ကေးမီးဓေါလ် ဟှတော် မြင့်မြတ်တိပညာရှိ ပရောဖက်ပါးဟှတ် အပေါ်လူးပါလ်။ ဖုလော်ရှင်နား အခေါင်လှီ့ ကယ်တင်ဟိုင်ရိုး အခိုက်လူးပါလ်" တိရို ဖုလော်ဂုဏ်တော် အာမ်ချီးမွမ်း။ 17အင်(မ်)ပါလ်နောလ် ကိုယ်တော်ယေရှု ဆောင်ရွက်ဟိလ့်ခေါမ် နီဆတင်းခေါမ် ယုဒဘီ တစ်ခွင်လုံး နား နိုင်ငံအနှံ့အပြာဝေါလ် အပျံနှံ့ရောခ့်။ 18အင်(မ်)ပါလ်နောလ် ယောဟန်တပည့်လှီ့နား ကိုယ်တော်ယေရှု အကြောင်းလှီ့ ယောဟန်ရိုး အာမ်ဆိုက်(က်)ဟိုဝေါလ် ယောဟန်နား အတပည့်ပွလ်နှို အပါနယ်။ 19ယောဟန်နား အတပည့် ပွလ်နှိရိုး "ကိုယ်တော် နောက်ခေါမ် အကြွလူးဝိုက် တိရို အာမ်ဟောင်ခေါမ်ငါ။ ဆီးယနာ ကေးမီးနား အစွာပွလ်ဟှတ် ကာမ်စောင့်လောဒ့် ဟာမ်းမိုက်ယား" တိရို ဟီးယေဟိုင်ရိုး ကိုယ်တော်စငေါလ် အလှိ့။ 20အင်(မ်)ဟွဒ့် ကိုယ်တော်ယေရှုစငေါလ် အဟီခိုက်လူးဟိုဝေါလ် "သွီးဓေါလ်မင်္ဂလာပက်တိ ဆရာကြီးယောဟန်နား ကိုယ်တော်စငေါလ် တိလူးထေ့နား ကိုယ်တော်ခေါမ် အကြွလူးဝိုက် တိရိုဟောင်ခေါမ်ငါ၊ (ဆီးယနား) ကေးမီနား အစွာပွလ်ဟှတ် ကာမ်စောင့်လောဒ့်ဟာမ်းမိုက်ယား' တိရို အဟိ့လူးဆောက်" တိရို အဟီလျှောက်။ 21အင်(မ်)ချိန်ငေါလ် ကိုယ်တော်ယေရှုနား ကွားတိလှီ့ကုသပက်ထေ့နား နတ်ဆီးပူးကပ်ခံလောဒ့်တိလှီ့စငေါလ်ကိ နတ်ဆီးလှီ့ နှင်ထုတ်ခေါမ်တင်ယ မိတ်မှူးယတိလှီ့ခါ မိတ်မှူးဘွာလ်ဟနောလ် အဓူပက်။ 22အင်(မ်)ပါလ်နောလ် ကိုယ်တော်နား ယောဟန်တိလူးခေါမ် အင်(မ်)ဟွဒ်ရိုး "နာ(င်)မီးနား နမုလောဒ့်ခေါမ်လှီ့ကိမ်ကိမ် ယောဟန်စငေါလ်ဈာတ်ထေ့နား ဟောင်ဘွာလ်ဘွတ်စူး။ မိတ်မှူးယတိလှီ့ တုအောလ်မိတ်အမှူးဘွာလ်ပါလ်၊ ကွတ်ခူသန်စွမ်းယတိလှီ့ခါ အာမ်ကောက်ကာလ်ခွတ်ဘွာလ်ပါလ်၊ အနာကြီးရောဂါမို့လှီ့ ရောဂါအာမ်ခိတ်ဘွာလ်ပါလ်၊ နှိုရောယတိလှီ့နားခါ အာမ်ယှောက်ဘွာလ်ပါလ်၊ ဘလ်တိလှီ့ အာမ်ဟာင်ဘွာလ်ပါလ်၊ စက်ကာလ်တိလှီ့နား ဆတင်းပွန် အာမ်ယှောက်လောဒ့်ပါလ်။ 23ကေးစိုင်းခေါမ်လှီ့ ဆန့်ကျင်ကောဝေါလ် ငြင်းပယ်ယတိလှီ့ ဖုလော်ရှင်နား ကောင်းချီးမင်္ဂလာ အပက်တိုက်" တိရို အမိန့်။ 24ယောဟန်နား အလှိလူးခေါမ် ခေါင်လှီ့ အာမ်ဈာတ်ဘွာလ်ပါလ်နောလ် ကိုယ်တော်နား ခေါင်ထုပရိတ်သတ်လှီ့အောလ် ယောဟန်အကြောင်း အဟောခေါမ်စေ့ "နာ(င်)မီး တောကန္တာရဒုလ်ကာလ် နာမ်ဈာတ်ဟိုဝေါလ် ဟိအီဘောင်လှီ့ ဓေါ်ဟိုင်ရိုး နာမ်ဈာတ်။ ခီလူးဘော်စကာလ်တိ ပါထိင့်ဆောင်းတိလှီ့ယာ။ 25နာ(င်)မီး အပြင်ငေါလ်ထွက်ထေ့နား ဟိဘောင်ပုဂ္ဂိုလ်လှီ့မှူးဟိုင်နာမ်လီ။ ဆူပွန်ဆောက်ပွန် ခုအယ်တိလှီ့မှူးဟိုင်နာမ်လီဝြာ။ အဖူဂါတိဆူပွန်ဆောက်ပွန် ခုအယ်ထေ့နား စည်းစိမ်ခံတိလှီ့ ဆောင်ဖလောင် နန်းဒုလ့်ကာလ်ယောင် မုလောဒ့်အိုက်။ 26နာ(င်)မီး အပြင်ငေါလ်ထွက်ထေ့နား ဟိအီဘောင်ပုဂ္ဂိုလ် မှူးဟိုင်နာမ်လီ။ ပရောဖက် မှူးဟိုင်နာမ်လီဝြာ။ နာ(င်)မီးရို ကေးနား ဟောင်ဟိုင်ကလီခေါမ်စေ့ အင်(မ်)ခေါင်စေး ပရောဖက်ထက်ကာလ် ကြီးမြတ်တိအောလ် အထောလ်။ 27ကျမ်းစော်ဝေါလ် ဖုလော်ရှင်နား အမိန့်ခေါမ်စေ့ "ကေးနား နာ(င်) ဈာတ်နောက်ဟိုင် လာမ်းမာလ် အဆင့်သင့်ထောလ်ဟိုင်ရိုး နာ(င်)ထက်ကာလ် အရင်ငေါလ် ကေး စေတမန် ကလှိ့အိုက်" တိရို အဖော်ပြအယ်။ 28နာ(င်)မီးရိုး ကေဟောင်ဝိုက်။ ယောဟန်ထက်ကာလ် ကြီးမြတ်တိ ပွလ်ဟှတ်ခါ နီဆုမ်သပ့်ခုံးငေါလ် မယ်ဟာမ်းယော်ဟ။ အင်(မ်)ဘော်နားခါ ဖုလော်ရှင် သာသနာတော်ဝေါလ် အလေးပေးခံလောဒ့်ယတိကုံးခါ ယောဟန်ထက်ကာလ် အကြီးမြတ်" တိရို အမိန့်။ 29ကိုယ်တော်မိန့်ခေါမ်လှီ့ ရောလောဒ့်တိလှီ့ဒုလ်ကာလ် ယောဟန်စငေါလ် သွီးဓေါလ်မင်္ဂလာခံဟိလ့်တိလှီ့ အခွန်ကောက်လှီ့ခါ အာမ်ပူလ်။ 30အင်(မ်)ဘော်နားခါ ဖာရိရှဲလှီ့လား ကျမ်းတက်ဆရာလှီ့နား ယောဟန်စငေါလ် သွီးဓေါလ်မင်္ဂလာခံထေ့နား ဖုလော်ရှင်ပညတ်တော်လှီ့ လိုက်နာဟိုင်လား ယောဟန်စငေါလ် နှစ်ခြင်းခံဟိုင် အာမ်ငြင်းဆန်ဟိလ့်။ 31အင်(မ်)ပါလ်နောလ် ကိုယ်တော်နား ဆက်ကယ်နား အဟောင်ခေါမ်စေ့ "နာ(င်)မီး ဟအီဓေါလ်နာတူဝေ၊ ဟိဘောင်ခေါင်လှီ့အောလ် နာမ်ထောလ်နောက်ဟိုဝေါလ်စေ့ 32ဈေးဒုလ်ကာလ် ငွာထေ့နား မာန်းငယ်တိဒိပ်စောလှီ့ဘော်" ကေးမီးနား အွတ်တုမ်းနားခါ နာ(င်)မီး လာမ်ထေ့ယော်စူး၊ ကေးမီးကာပ်နားခါ နာ(င်)မီးကာပ်ထေ့ယော်စူး" တိရို ဟောင်ဝေတောင်တိရို နာဟှတယ်။ 33သွီးဓေါလ်မင်္ဂလာပက်တိ ဆရာယောဟန် အေအောတ်ရှောင်ထေ့နား ဈာတ်ရောခ့်နားခါ နာ(င်)မီးနား "ယောဟန်စငေါလ် နတ်ဆီး အပူးကပ်" တိရို နာမ်ဟောင်။ 34အင်(မ်)ဘော်နားခါ ခေါင်စိုးနား အေအူးထေ့နား အဈာတ်ရောခ့်ဟိုဝေါလ်ခါ နာ(င်)မီးနား "ယေရှုခေါမ် အေလန်တိ အခွန်ကောက်တိလှီ့၊ ဒုစရိုက်ပြစ်မို့လှီ့ဓေါလ် ခီပွီအဖွဲ့" တိရို နာမ်ဟောင်။ 35အင်(မ်)ဘော်နားခါ ဖုလော်ရှင်ဉာဏ်အလင်းတော် လက်ခံတိလှီ့နား အင်(မ်)ဉာဏ်အလင်းတော် အမှန်နောက်ခေါမ် အာမ်ဓေါင်" တိရို အမိန့်။ 36အင်(မ်)ပါလ်နောလ် ဖာရိရှဲပွလ်ဟှတ်နား ကိုယ်တော်ယေရှု အအိမ်မာလ် အမီဘုအေဟိုင် အဖိတ်။ အင်(မ်)ဘော်ခန်းနောလ် ကိုယ်တော်ခေါမ် ဖာရိရှဲအိမ်မာလ် ကြွထေ့နား ဘုအေနောက်ခုံးငေါလ် ဘုအေဟိုင်အငွာ။ 37အင်(မ်)ပါလ်နောလ် ဖာရိရှဲပွလ်ဟှတ်နား ကိုယ်တော်ယေရှု အအိမ်မာလ် အမီဘုအေဟိုင် အဖိတ်။ အင်(မ်)ဘော်ခန်းနောလ် ကိုယ်တော်ခေါမ် ဖာရိရှဲအိမ်မာလ် ကြွထေ့နား ဘုအေနောက်ခုံးငေါလ် ဘုအေဟိုင်အငွာ။ 38အင်(မ်)ပါလ်နောလ် အင်(မ်)မုတော ကိုယ်တော်ကာဝေါလ် လူးထေ့နား တုလ်ဗာန် အကာပ်ဟိုဝေါလ် အမိတ်ခီ ကိုယ်တော်ခူအရွားခန်းနောလ် အခူ အလူဝေါလ် ဝှါးဟနောလ် အဟွတ်ပက်။ အင်(မ်)ပါလ်နောလ် ကိုယ်တော်ခူ နှာမ်ထေ့နား ရေမွှေး အလှုပ်။ 39ကိုယ်တော် ဖိတ်လူးတိ ဖာရိရှဲနား အမုဟိုဝေါလ် "နီခေါင်နောက်ခေါမ် အရိယသူတော်စင် အမှန်ဟိုဝေါလ်စေ့ အပုန်းဟိုးလှမ်တိ မုတော ဟိဘောင် မုတောနောက်ခေါမ် အစုတ်လောဒ့်အိုက်။ ပွန်းယတိ မုတောနောက်ခေါမ်ခါ စူတ်လောဒ့်အိုက်"တိရို အတွေးယေ။ 40အင်(မ်)ဟိုဝေါလ် ကိုယ်တော်နား အင်(မ်)နောလ် "ရှိမုန်၊ နာ(င်)ငေါလ် အူဟှတ်ဘောင် ကဟောင်ဟိုင်မယ်" တိရို အဟောင်ဟိုဝေါလ် 'ရှိမုန်'နား "မိန့်ငါ" တိရို အဟောင်ဘွာလ်။ 41ကိုယ်တော်နား "ဒေါင်းဂိုဗူတိပွလ်ဟှတ်စငေါလ် ခေါင်ပွလ်နှိနား ဒေါင်းဂို အာမ်ဟီဗူ။ ပွလ်ဟှတ်နား ဒေါင်းဂိုဖို့ပိုးဟိုရ်၊ အထာပွလ်ဟှတ်နားစေ့ ဒေါင်းဂိုဟိုးကိပ် လရ်အဟီတင်။ 42အင်(မ်)ဟွဒ်နား လရ်မို့ပိုးဝေါလ် လရ်အဟီပက်ဘွာလ်ခွတ်ယခန်းနောလ် လရ်မို့ပိုးနား နာ(င်)ဟီလရ် ပက်ဘွာလ်လိုတိယော် တိရိုအဟောင်ဟိုဝေါလ် ဟအူနား လရ်မို့ပိုးဝေါလ် ပိုဝေထေ့နား ဆိအယ်နောက်ကိုက်" တိရို အင်(မ်)ခေါင်ငေါလ်အဟိ့။ 43ရှိမုန်နား "ကေးနား ကအူတ်နောက်ခေါမ်စေ့ လရ် အလှလ်ရိုး ပူတိနား ဆိအယ်နောက်ဂွလ်ငိုက်" တိရို အဟောင်။ ကိုယ်တော်နား "နာ(င်) နာမှန်" တိရို အဟောင်ဘွာလ်။ 44ကိုယ်တော်နား အင်(မ်)မုတော ဓေါ်ဝေါလ်ထေ့နား 'ရှိမုန်' ငေါလ် "နာ(င်)နား နီသတိနာတောဒ့်ကာ ကေး နာ(င်)မီးအိမ်မာလ် ကကြွလူးဟိုဝေါလ် နာ(င်)နား ကေးခူပွတ်တယ်နောက်ဟိုင် ဓွီပက်ဟိလ့်ယော်တိ၊ အင်(မ်)ဘော်နားခါ အင်(မ်)မုတောနား ကေးခူ အမိခီရိုး ပွတ်ထေ့နား အလူဝေါလ် ဝှါးဟိုင်နောလ် အဟွတ်ဟိလ့်ဗက်။ 45နာ(င်)နား ကေးကြွလူးဟိုဝေါလ် ကေးနှာမ်းထေ့နား ကြိုဟိလ့်ယော်တိ။ အင်(မ်)မုတောနားစေ့ ကေးခူ အဆက်မပြတ်အနှာမ်ဟိလ့်။ 46နာ(င်)နား ကေးလကီ သံလွင်ဆီဂုံးခါ နာလှုပ်(င်)ဟိလ့်ယနားခါ အင်(မ်)မုတောနား အဖူဂါတိ ရေမွှေးရိုး ကေးခူဝေါလ်အလှုပ်ဟိ့လ်။ 47အင်(မ်)ဘော်ခန်းနောလ် ကေးနားဟောင်ဟိုင်ဝိုက် နီမုတော အပြစ်လှီ့ ခွင့်လွှတ်ခံလောဒ့်ခန်းနောလ် နီမုတောနား ပိုဝေနား အခစ်။ အပြစ်ဒုစရိုက်မက်စိုးယောင် ခွင့်လွှတ်ခံလောဒ့်တိနားစေး မက်စိုးယောင် အခစ်" တိရို အမိန့်။ 48အင်(မ်)ပါလ်နောလ် ကိုယ်တော်နား အင်(မ်)မုတောဝေါလ် "နာ(င်)အပြစ်ဒုစရိုက်လှီ့ ကိမ်ကိမ်ခွင့်ကလွှတ်ပါလ်" တိရို အဟောင်။ 49အင်(မ်)ဟိုဝေါလ် ကိုယ်တော်ယေရှုဓေါလ်ဟှတောလ် ငွာတိလှီ့နား "အပြစ်ဒုစရိုက် ကုံးခါခွင့်လွှတ်ခွတ် တိရို ဟောင်တိစေး ဟအူ" တိရို အာမ်ခေဝေတောင်။ 50အင်(မ်)ဘော်နားခါ ကိုယ်တော်ယေရှုနား အင်(မ်)မုတောဝေါလ် "နာ(င်)ယုံကြည်ခေါမ်ကြောင့်ငေါလ် တုအောလ် နာ(င်) ဖုလော်ရှင်နား နာ(င်)အကယ်တင်ပါလ်။ နာ(င်) နာငြိမ်းချမ်းပါလ်" တိရီု အမိန့်။
Currently Selected:
Luke 7: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Songlai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
