Luke 10
10
1အင်(မ်)ပါလ်နောလ် အရှင်နား အစွာတပည့်လှီ့ ဆိကိပ်(ပ်)ဆလာပွလ်နှိ ရွေးထေ့နား ပွလ်နှိတွဲဟှပွလ်နှိတွဲဟှ ကိုယ်တော်ကြွနောက်ဟိုင် လုတိုင် နာမ်(မ်)တိုင်ငေါလ် ကြိုတင်ငယ်နား အတိ။ 2ကိုယ်တော်နား အင်(မ်)လှီ့အောလ် "လို(င်)ကွင်းဒုလ်ကာလ် အဌေ့လှီ့ ပူနူးမယ်။ အင်(မ်)ဘော်နားခါ ယှိင်း(င်)ဟိုင်ခေါင်လှီ့ အာမ်နည်း။ အင်(မ်)ဘော်ခန်းနောလ် စောင်(င်)ယှိင်းဟိုင်ခေါင်ပူနူး အလှလ်လွတ်ဟိုင် စောင်(င်)ဒွါးမို့စငေါလ် ဟောင်ဘွတ်စူး။ 3တုကုံးငေါလ်ဈာတ် ဘွတ်စူး။ အင်(မ်)ဘော်နားခါ နာ(င်)မီး ကေတိခေါမ် နှီးဖွဲဒုလ်ကာလ် မိစိုးလှီ့လှိခေါမ်ဘော်ယောင်။ 4နာ(င်)မီးနား ဒေါင်းဂိုအိတ်၊ ခရီးဆောင်အိတ်၊ ခူပတပ်လှီ့ ဈီ့အယ်ကောစူး။ လာမ်းမယ်တုလ်ထေ့နား ခေါင်လှီ့နှတ်ဆက်ဗာန် အချိန်ဖြုန်းကောစူး။ 5နာ(င်)မီး အိမ် အိမ်ဟှတ်တောလ် နာ(င်)ဝင်ဟိုဝေါလ် 'နီအိမ် ငြိမ်းချမ်းဆက်' တိရို ဆုတောင်းပက်ဘွတ်စူး။ 6အင်(မ်)အိမ်မာလ်ကိ ခေါင်လှီ့နား ငြိမ်းချမ်းမှုအာမ်လီဟိုစေ့ နာ(င်)မီးပို့သခေါမ် မေတ္တာ အင်(မ်)လှီ့နား အာမ်ခံစား လောဒ့်အိုက်။ အင်(မ်)ဘော်နားခါ အင်(မ်)လှီ့နား ငြိမ်းချမ်းမှု အာမ်လီယဟိုစေ့ နာ(င်)ပို့သခေါမ် မေတ္တာ နာ(င်)မီးစငေါလ် အခိုက်လူးဘွာလ်ဝိုက်။ 7နာ(င်)မီး အင်(မ်)အိမ်မာလ် မယ်ထေ့နား အိမ်မို့လှီ့နား အာမ်ပက်ခေါမ် အေဘွတ်စူး။ အီဘော်ဟိုင်ရို နောက်ဟိုစေ့ ဟိုဆော်လှီ့နား အာမ်ခိုဇောက် အာမ်လောဒ့်တင်(င်)ခန်းနောလ်။ အိမ်ဟှတ်နားအိမ်ဟှတ် လင်(င်)လော်(င်)ကော့စူး။ 8အပုံငေါလ် နာ(င်)မီး နာမ်မာလ်ကိလှီ့ ခေါင်လှီ့နား အာမ်ဖိတ်ဟိုဝေါလ်စေ့ အာမ်လှီ့နား အာမ်ကျွေးခေါမ် နာမ်အေခွတ်။ 9စာန်းယတိလှီ့ နာ(င်)ဓူပက်ဟိုဝေါလ် 'ဖုလော်ရှင်သာသနာတော် နာ(င်)မီးစငေါလ် အထွန်းကားလူးဝိုက်ဟိလ့်' တိရို ဟောင်ဘွတ်စူး။ 10အင်(မ်)ဘော်နားခါ လုအောလ်ကိ ခေါင်လှီ့နား နာ(င်)မီး အာမ်ဖိတ်ယဟိုစေ့ လာမ်းမယ်ထွက်ထေ့နား နီဘော်ဟောင်ဘွတ်စူး။ 11'ကေးမီးနား နာ(င်)မီး ငြင်းပယ်ခေါမ်အနေရိုး ကေးမီးခူဝေါလ်ကိ သပ်ဖောပ်ပေဟိလ်တိုက်။ ဖုလော်ရှင်သာသနာတော် နီဓိလ်နောလ် အခိုက်လူးဝိုက်ဟိလ့်' တိရို ဟောင်ဟိလ့်ဘွတ်စူး။ 12ကေးနား ကေဟောင်ဝိုက် တလာစီရင်နှိုပ်ပါလ် ဖုလော်ရှင်နား အင်(မ်)လုအောလ် မယ်တိခေါင်လှီ့ထက်ကာလ် သောဒုံလုအောလ် မယ်တိခေါင်လှီ့အပေါ်ဝေါလ် ပိုဝေနား အညှာတာဝိုက်" တိရို အမန့်။ 13"ခေါရာဇိန်လုဆော်လှီ့၊ နာ(င်)မီးဆိတ်နာခေါမ်ပါလ်၊ ဗက်ဇဲဒလုဆော်လှီ့ခါ ဆိတ်အာမ်ခေါမ်ပါလ်။ အကြောင်းစေး နာ(င်)မီး စိုင်းဟိလ့်ခေါမ် ထူးဆန်းတိ တန်ခိုးလက္ခဏာလှီ့ တုရုလား ဇိဒုန်လုအောလ် စိုင်းဟိလ့်ဟိုဝေါလ်စေး အင်(မ်)လုအောလ်ကိ ခေါင်လှီ့ခေါမ် ဟမယ်ကထု လျှော်တေကြမ်း ဆူဆောက်(က်) ခုအယ်ထေ့နား အာမ်လကီရို ဝှိုင်ဝိ့တောလ်ငွာထေ့နား နောင်တ အာမ်လောဒ့်ဟိလ့်တိုက်။ 14အင်(မ်)ဘော်နားခါ တလာအစီရင်ဟိုဝေါလ် နာ(င်)မီးထက်ကာလ် တုရုလား ဇိဒုံလုအောလ် ပိုဝေနား အသက်သာဝိုက်။ 15ကပေရနောင်လုဆော်လှီ့ နာ(င်)မီးနား ဟြှားလုအောလ် ချီးမြှင့်မြောက်စားခေါမ် နာမ်ခံယူလောဒ်အိုက် တိရိုနာမ်ခိလ်နောလ်ယာ။ နာ(င်)မီး ငရဲရိုဈာတ်ဟိုင်လှီ့ယောင် တိရို အမိန့်။ 16ကိုယ်တော်နား အတပည့်လှီ့အောလ် "နာ(င်)မီးခေခေါ ငေတိခေါင်လှီ့စေ့ ကေးခေခေါ ငေတိလှီ့ဓေါလ်ဟှယောင်။ နာ(င်)မီး လက်ခံယတိ ခေါင်လှီ့နောက်ခေါမ် ကေး လက်ခံယတိ ခေါင်ငေါလ်ထောလ်ထေ့နား ကေးလက်ခံယတိခေါင်လှီ့နောက်ခေါမ် ကေးတိလူးတိ ဖုလော်ရှင်ခါ လက်ခံယတိလှီ့အောလ် အာမ်ထောလ်" တိရို အမိန့်။ 17တပည့်တော်ဆိကိပ်(ပ်)ဆလာပွလ်နှိ အာမ်ခိုက်လူးဘွာလ်ဟိုဝေါလ် အင်(မ်)လှီ့ ပျော်ရွှင်ဝမ်းမြောက်ဗာန် "အရှင် ကေးမီးနား နတ်ဆီးလှီ့ နာ(င်)မိန်ဆုမ်မယ်ထေ့နား အမိန့်ကေပက်ဟိုဝေါလ် အင်(မ်)လှီ့နား အာမ်ငေး" တိရို အာမ်လျှောက်။ 18ကိုယ်တော်နား "နေဟြှလ်နောလ်ကိ ကာဖားလလှောက်ဘော် မာရ်နတ်အကိုးလူးခေါမ် ကေမုလောဒ့်။ 19ကေးနား နာ(င်)မီးရိုး ဖွာဆီးလှီ့၊ တီလှီ့ လိဟိုင် အခွင့်အာဏာကေအပ်ပါလ်။ နာ(င်)မီး ဆုလ်ပွီ နှိမ်နှင်းခွတ်နောက် တန်ခိုးအာဏာလှီ့ ကေအပ်ပါလ်။ 20အင်(မ်)ဘော်နားခါ နာ(င်)မီးနား နတ်ဆီး နာ(င်)နှိမ်နှင်ခွတ်ဘွတ်တိရို ပျော်ကောစူး။ နာ(င်)မီးမိန်လှီ့ ဟြှားလုအောလ် ရေးမှတ်အယ်ခေါမ်လှီ့ယောင် ပျော်ဟိုင်အခိလ်" တိရို အဟောင်။ 21အင်(မ်)ဟိုဝေါလ် ဖုလော်ဉာဏ်အလင်းတော်နား ကိုယ်တော်ယေရှုဝေါလ် "နီဆုမ်သပ့်လား ဟြှားလု ပိုင်တိ ဖုလော်။ နီအရှင်ခေါမ် ဟြှားလုအောလ် မယ်တိ အကြောင်းလှီ့ အမြှော်မြင်မယ်တိလှီ့ခေါင်လှီ့လား ပညာတက်တိလှီ့ကုံးနားခါ စုတ်(င်)ယဟနောလ် ထုထေ့နား ပညာဉာဏ်နည်းတိ သာမန်ခေါင်လှီ့နား ယှောက်စုတ်(င်)ခွတ်ဟနောလ် ဆောက်ရွက်ပက်တိ ဖုလော်ရှင်စေး ကျေးဇူးအလန်။ နီဘော်ထောလ်လူးခေါမ်စေး ဖုလော်ရှင် လီဘော်တိုင်ငေါလ်ယောင်။ 22အဖဖုလော်နား ကေးရို ခပ်သိမ်းတိ အရာအပက်ပါလ်။ ကေးဟအူနောက်ခေါမ် ဖုလော်ပါးဟှတ်နား ယောင်အစုတ်(င်)။ အဖဖုလော်ရှင် ဟအူနောက်ခေါမ်ခါ သားတော်လား သားတော်နား ရွေးချယ်ငေါလ်ကိလွဲထေ့နား အူနားခါစူးယော်ဟ" တိရို အဟောင်။ 23အင်(မ်)ပါလ်နောလ် ယေရှုနား အတပည့်လာမ်းမင်ထေ့နား "တုအောလ် နီလှီ့ နာ(င်)မီးနား မုလောဒ့်ခွင့် နာ(င်)လောဒ့်ခေါမ် မင်္ဂလာအမယ်။ 24ပရောဖက်လှီ့လား ဆောင်ဖလောင်လှီ့နား နာ(င်)မီး မုယှောက်ဟိလ်ခေါမ်လှီ့ကိမ်ကိမ် မုဟိုင်၊ ယှောက်ဟိုင် အာမ်လီဟိလ့်။ အင်(မ်)ဘော်နားခါ အင်(မ်)လှီ့နား မုယောဟိလ့်လောဒ့်ယော်ဟ" တိရို အဟောင်။ 25ဟမယ် ကျမ်းတက်ပညာရှင် ပွလ်ဟှတ်နား ယေရှုအောလ် မေးခွန်းဟိ့ဟိုင် တုလ်ထေ့နား "အရှင်၊ နိစ္စထာဝရဆောက် လောဒ်ဟိုင်တွက်ကာလ် ဟအီလှီ့ စိုင်းလောဒ့်အိုက်" တိရို အဟိ့။ ဟမာလ် ကျမ်းတက် ပညာရှင် ပွလ်ဟှတ်နား ယေရှုအာလ် မေးခွန်းဟိ့ဟိုင် တုလ်ထေ့နား "အရှင် ၊'နိစ္စထာဝရဆောက်'လောဒ်ဟိုင်တွက်ကာလ် ဟအီလှီ့ စိုင်းလောဒ့်အိုက်"တိရို အဟိ့။ 26ကိုယ်တော်ယေရှုနား "ကျမ်းစော်ဝေါလ် ဟအီလှီ့ အရေးယေဟိလ့်၊ နာ(င်)နား နီလှီ့ဟိဘော် နာ(င်)ယှောက်စုတ်(င်)" တိရို အဟိ့။ ကိုယ်တော်ယေရှုနား "ကျမ်းစော်ဝေါလ် ဟအီလှီ့ အရုရ်ကာလ်ဟိလ့် ၊နာ(င်)နားနီလှီ့ ဟိဘော် နာ(င်)ယှောက်စုတ်(င်)"တိရို အဟိ့။ 27အင်(မ်)ပုဂ္ဂိုလ်နား "ကျမ်းစော်ဝေါလ် ဖုလော်ရှင်ငေါလ် ပုန်း၊ လုန်၊ ပါးထုမ်လုံးငေါလ် ကြည်ညို ဆည်းကပ်ဘွတ်စူး။ နာ(င်)အိမ်စင်း(င်)ပွီရိုးခါ နာ(င်)ပုန်းဟို့နားနာ(င်)ပုန်းဟို့ နာခစ်တယ်ဘော် ခစ်ဘွတ်" တိရို အပူလ် တိရို အဟောင်။ 28ကိုယ်တော်နား "နာ(င်) အဖြေမှန်။ နီဘော် နာ(င်)စိုင်းဟိုဝေါလ်စေ့ နာ(င်)နားနောက်ခေါမ် နိစ္စထာဝါရအဆောက် နာ(င်)လောဒ့်အိုက်" တိရို အမိန့်။ 29အင်(မ်)ဘော်နားခါ အင်(မ်) ပုဂ္ဂိုလ်နောက်ခေါမ် အပုန်းဟို့ ပညာဖော်ပြဟိုင် အလီခန်းနောလ် "ကေးမီးအိမ်စင်း(င်)ပွီနောက်ခေါမ်စေ့ ဟအူလှီ့" တိရို အဟိ့။ 30အင်(မ်)ဟိုဝေါလ် ကိုယ်တော်နား "ခေါင်ပွလ်ဟှတ် ဂျေရုရှုလင်လုအောလ် ကထု ယေရိခေါလုအောလ် ဈာတ်နောက်လာမ်းမယ် ဓားပြလှီ့ဓေါလ် ခေါမ်းမယ်ထေ့နား အပူလ်နောက်ခေါမ် ဝန်လာလှီ့ အဟု့အခံလောဒ့်။ ဓါးပြလှီ့နား အင်(မ်)ခေါင် မွာထေ့နား ဘလ်ဟိုင်ထုအထောလ်လူးဟိုဝေါလ် အာမ်တောဒ့်ဟိလ့်။ 31အင်(မ်)ပါလ်နောလ် ပရောဖက်ပွလ်ဟှတ်နား အင်(မ်)ဘော် ထောလ်ပါလ်နလ် အင်(မ်)လာမ်းဘော်တိုင်း အလူး။ အင်(မ်)ခေါင် ဟြမ်းဘောင်းတိ အမုဟိုဝေါလ် အစွာလာမ်းမယ် အာမ်ဖင်းနယ်။ 32အင်(မ်)ပါလ်နောလ် ဗိမာန်တော်စောင်တိ လေဝိခါ အင်(မ်)ဒိလ်နောလ် အခိုက်လူး။ မွခါမ်လောဒ့်တိ အင်(မ်)ခေါင်မုဗာန် အစွာလာမ်းမယ် အဖင်းနယ်ဘွာလ်တီ။ 33အင်(မ်)ဟိုဝေါလ် ရှမာရိ မိန်နိုးတိ ပုတောပွလ်ဟှတ် ခရီးအထွက်လူးဟိုဝေါလ် အင်(မ်)လာမ်းမာလ် အခိုက်လူး။ အင်(မ်)နား အင်(မ်)ခေါင် အမုဟိုဝေါလ် အလုန် ပွန်ယေယော်။ 34အင်(မ်)ခေါင် အင်(မ်)စငေါလ် အဈာတ်တယ်။ အင်(မ်)ခေါင် အမှိုလှီ့ သံလွင်ဆီနား စပျစ်ဝိုင်လှီ့အောလ် ပွတ်ပက်ထေ့နား ဆူဆောက်ကာလ် အပတ်ပက်။ အင်(မ်)ပါလ်နောလ် အဆာ့ခုံးငေါလ်တင်ထေ့နား တည်းခိုရိပ်သာဝေါလ် အဈိပူလ်နောက်။ အင်(မ်)တည်းခိုရိပ်သာဝေါလ် ခိုက်ယေပါလ်နောလ် အင်(မ်)ခေါင် နိမို့ အပြုစုပက်။ 35ထာနှိုပ်ဟှတ် ခိုဝြားဟိုဝေါလ် အင်(မ်)နား တည်းခိုခန့်မို့အောလ် ဒေါင်းဂိုကာပ်နှိပက်ထေ့နား "ကျေးဇူးပြုထေ့နား နီနိမို့ ပြုစုပက်မော်ဘွတ်။ အင်(မ်)ခေါင် နာပြုစုခေါမ် ထက်ကာလ် ပိုဝေနားကုန်ကျဟိုဝေါလ်ခါ ကေလူးဘွာလ်ဟိုဝေါလ် ကေပက်ဘွာလ်ဝိုက်" တိရို အဟောင်ဟိလ့်။ 36အင်(မ်)ပါလ်နောလ် ယေရှုနား "အင်(မ်)ခေါင်ပွလ်ထုမ်ဒုလ်ကာလ်ကိ ဓါးပြတိုက်ခါမ်လောဒ့်ထေ့နား မွခါမ်လောဒ့်တိ အအိမ်စင်း(င်)ပွီအစစ်စေ့ ဟအူဘောင်" တိရို အဟိ့။ 37အင်(မ်)ကျမ်းတက်ဆရာနား "နိမို့အပေါ်ဝေါလ် မာင်နောလ်ထေ့တိယောင်" တိရို အဟောင်ဘွာလ်။ ကိုယ်တော်နား "နာ(င်)ခါ အင်(မ်)ဘော်တိုင်းငေါလ် စိုင်းဘွတ်" တိရို အမိန့်။ 38ခရီးဆက်လှူဟိုဝေါလ် ကိုယ်တော်ယေရှုလား အတပည့်လှီ့ နာမ်(မ်) နာမ်(မ်)ဟှတ်တောလ် အာမ်ခိုက်ယေ။ အင်(မ်)နာမ်(မ်)မာလ်ကိ မာသ မိန်နိုးတိ မုတောပွလ်ဟှတ်နား ကိုယ်တော်လားအတပည့်လှီ့ အိမ်မယ်အဖိတ်။ 39အင်(မ်)မုတောနား မာရိတိရို မိန်နိုးတိ အနောင် ပွလ်ဟှတ်အတောဒ်ကာလ်၊ အင်(မ်)မုတော ကိုယ်တော်မော်ဝေါလ်ငွာထေ့နား တရားတော်လှီ့ အငေ။ 40မာသနား ခိလ်းလှီ့ ဧည့်ဝတ်ပြုဟိုင် အဆို့ဆာတ်ကာလ်။ နောက်ဆုံးငေါလ် အင်(မ်)မုတော ကိုယ်တော်စငေါလ် ချည်းကပ်ထေ့နား "အရှင်၊ ကေးနောင်(င်)နား ကေးအတောက်(င်)ဟိလ့်ခန်းနောလ် အမှူကိစ္စလှီ့ကိမ်ကိမ် ကေးအားဘွတ်နားယောင် ကေစိုင်းလောဒ့်။ ကေးနောင်(င်)ဝေါလ် အရှင်၊ အပြစ်တင်ယော်တိအာ။ ကေးကူညီပက်မိုဝြား" တိရို အလျှောက်။ 41အင်(မ်)ဟိုဝေါလ် ကိုယ်တော်နား "မာသ၊ နာ(င်)နောက်ခေါမ် အမှုကိစ္စလှီတောဒ် ဆော့ဆော်ဗာန် ဆို့ဆာတ်ကာလ်လားခါ လိုအပ်ခေါမ် ပွလ်ဟှတ်မယ်ဟာမ်း။ 42မာရိနားစေ့ အပွန်တိ အူဟှတ် အရွေးဟိလ်ပါလ်။ အင်(မ်)စေ့ မာရိစငေါလ်ကိ ဖယ်ရှားဝေါလ် လောဒ်တီးယော်" တိရို အဟောင်။
Currently Selected:
Luke 10: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Songlai Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
