Luke 21
21
1Jnpjnnj 'Boipaw Yesyuq' na a'sot te hxvj boima tiq heq na phjisa a'lhu an'san nawk kj a'lhu phjisa heq an'san ne khrawng a'mhuq. 2Cek ke tiq mhe'nu pjinghawt na kha a'phu neu tiq kri tawngkaw khaiq-nhiq khrawng phjisa a'lhu an'san nawk kj a'san khrawng a'mhuq. 3Jnkhaw vjyawng 'Boipaw Yesyuq' na "nang'hi yj ke na a'mhawn ka'hawu hai khrawng ce jn cek ke tiq mhe'nu khrawng a'kyaw boima tiq heq thawk kj a'petsot pjn. 4Ibahai yj nawk hxvj ce a'kyaw khrawng heq na ce an'boiqma duk kj kxq krem tiq phjisa an'lhu. Sinakha ni mhe'nu na ce cek ke na kha nhi na a'tawk ke caw khrawng a'boiqma heq tomti a'petsot kyaq pjn" tiyj a'hawu. 5Jnpjnnj a'kyaw a'tabeq heq na Phawlaw kyong khrawng pawi ye tiq lung heq 'Pxtpaw Phawlaw' vj an'petsot khrawng boiqma heq j a'saw ye tiyj an'hawu. 6"Nang'hi na nan'mhuq laq khrawng tomti heq krak hai tiq yawng. Lung lung-nghawt pawngsum cxkcxk a'mji nawk dxn nj mji tiyaq na i-tom a'krak hai nhxp khrai lo vai" tiyj a'hawu. 7Jnkhaw vjyawng jn heq na 'Boipaw Yesyuq' j "sarapaw vj, jn baw vj a'thonne lo hai khrawng i-khaw bawng ngj a'thon lo vai. Jn heq khrawng a'thonne lo vai hxvj i-baw nimik heq a'pjudawng lo vai" tiyj an'nghiq. 8'Boipaw Yesyuq' na "an'lhaq-e nawk khrawng khawm laq yaq hawn nj tatiq taw ye bjiq cuq. Ibahai yj nawk hxce khrawng batnghawt na ke 'Ceqcaw' baw vj thonne theqna 'ke khrawng 'Mesyiyaq' j ka'thonne, somdek krak hai cxn a'hyju lo pjn' tiyj an'hawu vai. Sinakha nhi tiq nhu yun kawq cuq. 9Nang'hi na an'sunkawp pe khrawng sitawng heq nan'yawk khaw hxvj kiqkawq cuq. Ibahai yj nawk hxce ni baw heq j cxkcxk a'thon lo maw vai. Sinakha somdek krak cxn khrawng mhoknghawt pjttj khrai lo hawm hai siyju tiyj a'hawu. 10Jn pjnnj 'Boipaw Yesyuq' na 'khrawng yx, yx-nghawt na yx-nghawt, neng-ngeng nghawt na neng-ngeng nghawt an'sunkawp petong ngai. 11Liu'nu liu'paw a'lo vai. Luq lai heq, nam heq, tomti yj e-ok heq khe theqna niqnawng heq a'kong lo vai. Hawnnhi yj kha kiqca hai bji tiq heq, nimik len heq a'pjudawng lo vai. 12Sinakha ni heq a'thon lo lhawn nj khrawng heq na ke tok kj nang'hi krawng mawn u-na an'kulu nawk kai, damarung ngj tala phansa theqna thong an'khrawk kai. Ke nhu yun tiq heq j nan'thonne khen cuvj mawnglen na an'tha mji ti heq mhawimhaw vj a'sawu khrawng nan'khawm laq ai. 13Ni baw nan'khawm laq khrawng ke tok kj sawksi yj nan'tung nge khrawng ngj a'thonne yai. 14Jnkhennj nang'hi na i-baw nan'hawu ba laq ai nawk khrawng lhawq-e kawq cuq. 15Ibahai yj nawk hxce nang'hi sunkawp pe pui heq na nang'hi yj ca-ye khok yaq hawn nj nan'hawu laq hai kheukhaw heq coktawt khrawng heq ka'pet tai. 16Nang'hi nu-paw, ta-nawu, bongbawi, khepui heq kung na nang'hi yj cetcaw an'phjk kai. Nang'hi duk kj kxq a'kyaw khrawng heq kha an'tuk kai. 17Nang'hi nu-paw, ta-nawu, bongbawi, khepui heq kung na nang'hi yj cetcaw an'phjk kai. Nang'hi duk kj kxq a'kyaw khrawng heq kha an'tuk kai. 18Sinakha nang'hi luki yj kxq lusawm kang nghawt kha krak laq hai siyju. 19Nan'lung nan'xptop pe hxvj yawng a'ljulawk ke khrawng nan'khawm laq ai". 20"'Yeruqsalawng' luq khrawng cektai heq na a'vondya khrawng nan'mhuq khaw hxvj jn luq khrawng diu hai siyju a'krak laq ai nghxq nawk khrawng co bjiq cuq. 21Jn nhxp a'khrai na ce 'Yuqdaq' kre yj mji ti heq ce tong hawn nj an'cen nai. Luq duk kj mji tiq heq kha luq krawng pawt an'thok laq ai. Luq krawng ngj mji tiq heq kha luq duk vawng sawk kawq-cuq. 22Ibahai yj nawk hxce jn khonhxp heq j 'Pxtpaw Phawlaw' na a'kret a'pet tai. Kyengcaw duk kj yo ve tiq heq khrawng jn khonhxp pj a'thon lo vai. 23Jn khonhxp heq j hjnmawq nu heq na cuitui-o dikcaw heq mji tiq nu mawq heq khrawng a'lhji yj si an'khom mai. Ibahai yj nawk hxvj ce jn kre yj sisaw len heq khrai lo theqna jn khrawng yx heq na 'Pxtpaw Phawlaw' na a'thisju nawk khrawng an'khawm laq ai khennj. 24Nhi tiq khrawng cimcoi si khom theqna an'sum khen cuvj a'kyaw kre a'dxndxn tjq a'mawn khawm me theqna an'ciq-e khrawng an'khawm laq ai. Khrawng kyaw yx heq na an'om khrawng khek a'pjiq hawm yaq tjq 'Yeruqsalawng' luq na jn khrawng heq an'kho vj an'kyaqcot khrawng a'khawm laq ai. 25Jn tawn yaq "Khoni, Khraw, Ase, heq khrawng xt nawk yaq khrawng nimik heq j a'thonne lo vai. Pawnglai lhenglum thai khennj somdek kj kxq khrawng heq khrawng lhawqpawq-e laq theqna an'kiqca-e laq ai. 26Somdek khrung ngj thon lo hai a'sisaw heq khrawng heq na khin cok theqna khauq vai thuiq hawn nj an'kiqca ai. Ibahai yj an'khin cok laq nawk hxvj ce hawnnhi a'lhxnlhok ke yai khen cuvj. 27Jn hxvj 'Ceqcaw' khrawng a'phun len theqna bjikhji pheng khoset cum na a'lo khrawng khrawng heq na an'mhuq laq ai. 28Jn baw heq j cat na a'thon lo na ce nang'hi a'krundiu caw vj tung theqna nan'luki tangauq naw na nan'lung lhju bjiq cuq. Ibahai yj nawk hxce cek ke khrawng ngj kxq nang'hi nan'ljt hai cxn a'hyju lo pjn khennj tiyj a'hawu. 29Jnpjnnj ce 'Boipaw Yesyuq' na nhi tiq j khuicut nawk u-nghawt a'hawu khrawng ce "thabeq thing na a'kyaw thing heq so vjn. 30A'se nju caw heq a'thok lo khrawng nan'mhuq na ce kho a'lhok nghxq nawk khrawng nang'hi na a'lxlx caw vj nan'cok siyju vaw. 31Jn baw tjng ngj tuq j ni baw ka'hawu nghxt khrawng heq a'thonne lo khrawng nang'hi na nan'mhuq lo laq na ce 'Pxtpaw Phawlaw' neng-ngeng a'pjudawng hai a'hyju lo nghxq nawk khrawng co theqna mhawt te bjiq cuq. 32Ke na a'mhawn ka'hawu vai tuq j ke hawu khrawng heq a'thon lo hawm yaq tjq ni khrawng yx heq i-hxvj kha khrxk txm khoq hai siyju uq. 33Hawnnhi na somdek cimkrak na kha ke kheukhaw ce sawktakhon i-khaw tom mj sawk nghawt a'mji yai". 34O-e na lung lhju khrawng, nan'sawk heng hai tok nan'lhawqpawq-e khrawng heq j nang'hi lungbong yeqtuk yaq hawn nj tatiq taw ye bjiq cuq. Jn baw siyaqna ce jn ke hawu khrawng heq thon lo hai khonhxp khrawng yoikvawng baw vj nang'hi lomcawng ngj a'ji ye lo vai. 35Ibahai yj nawk hxce jn khonhxp khrawng somdek khrung ngj mji tiq tomti yj a'cukraw ye yai j thonne. 36Jnkhennj nang'hi heq kha thonne lo hai ti heq j kxq ljt theqna 'Ceqcaw' mhawimhaw vj tung khoq hawn nj nhxp mhji yawnmhji ningkham me na suqtong pheng mji bjiq cuq tiyj a'hawu. 37'Boipaw Yesyuq' khrawng a'nhxp pj ce Phawlaw kyong ngj tala tawmthong soqsai theqna a'yawn nj ce 'Tenglvawng' tong ngj a'mji ye. 38Khrawng heq bong-nghawt kha 'Boipaw Yesyuq' tala tawmthong nge hai yj ngomyawn sikbat Phawlaw kyong pawt an'lo soi.
Currently Selected:
Luke 21: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
