Luke 17
17
1Nhxp-nghawt khaw vj 'Boipaw Yesyuq' na a'tabeq heq j "khrawng heq na a'kret poqcai hawn nj lholhen tiq heq a'mhawnmx a'mji. Sinakha khrawng heq na a'kret poqcai laq hawn thxtthon pet ti heq khrawng bji yju uq. 2Khrawng kyaw vj a'kret na'poqcai sawk hai caw na'punghaw nyhaw bjng ngj lung krjng bawq-e na pawnglai yj na'soi khrawng yawng jn thawk kj a'bji yai. 3Jnkhennj na'punghaw ko na'punghaw sunsawng nge na a'mji lx. Nang ta-nawu ci-nawu heq na nang ngj a'kret an'poqcai hxvj kha cokhawu bjiq. An'lung an'suisaw ye ba hxvj kha lhjq pet bjiq. 4Nhi na khrawng khonhxp nhxp-nghawt pjttj krawn-seq cop hawn nj nang ngj a'kret poqcai theqna nhi a'kret a'poqcai mhji nang ceng ngj lo theqna 'ka'lung ka'suisaw ye ba pjn' tiyj a'khawqhyawq-e lo na ce nhi khrawng lhjq pet bjiq. 5Jn hxvj yawng a'tabeq (Tavawkaq) heq na "ke'hi yj yum hai lungbong heq ni tawn yaq kong sawk maw va" tiyj 'Boipaw Yesyuq' j an'cuhyawk. 6'Boipaw Yesyuq' na kha mungyang ciq tiq bawng na'yum na ce cjt te nghaw tiq ni pxu-e thing ngj na'yung ngj ka'thoq phu ve yok theqna pawnglai duk kj cjt te ya tiyj nan'hawu hxvj kha jn thing na nang'hi kheu a'nge yai. 7Nang'hi mapaw khrawng lai a'thon nawk kj kxq kha siyju seq, to,sya a'cong nawk kj kxq kha siyju seq a'lo ba hxvj "a'yawng ngj lo theqna ke dj e-o lo va" tiyj nang'hi duk j kxq hu-u na nan'hawu vai. 8 'Ni baw na'hawu hai caw 'ke e-hai u-nghawt e-nghawt poqcai na ke e-cawng hawn nj ka'ceng ka vj cong maw. Pjnnj yawng nang e-o bjiq' tiyj nan'hawu vai siyju vaw. 9Nhi na a'poqcai laq hai khrawng heq a'poqcai laq yawng khennj a'boipaw na nhi seye naw hai siyju. 10Jn baw vj nang'hi na kha nan'poqcai laq hai mji tiq heq tomti nan'poqcai cawng pjnnj "ke'hi khrawng nan'ma yawng khen cuvj seye naw law yju. Kan'punghaw poqcai laq hai khrawng heq kan'poqcai ye yawng tina hawu bjiq cuq" tiyj a'hawu. 11'Boipaw Yesyuq' khrawng 'Yeruqsalawng' luq pawt a'cet hxvj 'Syamariq' kre na 'Galiqle' kre kra vj ljt na a'cet. 12Nam, nam nghawt tjq a'khrai na ce niq len mawq pjingha khrawng 'Boipaw Yesyuq' dj a'lhawm caw vj tung theqna. 13"'Boipaw Yesyuq' j ke hi man pet maw va" tiyj tha vj an'pang. 14'Boipaw Yesyuq' na nhi tiq a'mhuq hxvj "pawucoq pawq tiq 'Mhawpaw' heq ceng tjq cet na nang'hi pumyo dawn ne ye yjn" tiyj a'hawu. Nhi tiq khrawng an'cet duk kung ngj an'niq len heq a'khrxk txm ba kyaq. 15Jn heq duk kj kxq pjinghawt na khrawng a'niqnawng heq a'khrxk ba pjn nawk khrawng a'cokmhuq-e hxvj 'Boipaw Yesyuq' ceng tjq lo ba theqna 'Pxtpaw Phawlaw' phun heq pang pheng a'tjuqkauq ve nawk. 16Jnpjnnj ce nhi khrawng 'Boipaw Yesyuq' khocju vj bok theqna 'Boipaw Yesyuq' a'seye nawk. Jn khrawng khrawng 'Syamariq' khrawng yx vj a'thon. 17Jnkhaw hxyawng 'Boipaw Yesyuq' na "khrawng pjingha a'kang ba sawk siyju. A'kyaw pjikoq ce i-bawng ngj yawng. 18Khraw kyaw yx vj thonne tiq ni khrawng pjinghawt tj kxq loi na 'Pxtpaw Phawlaw' phun tjuqkauq ve hai yj lo ba tiq heq a'kyaw pjinghawt kha mji tiyju uq vaw" tiyj a'nghiq ba. 19A'nghiq pjnnj 'Syamariq' khrawng yx vj "nang thju na cet ba nghxq yawng. Nang yum khrawng na nang khrawng a'kang ba sawk pjn" tiyj a'hawu. 20Nhxp-nghawt khaw vj 'Phariqsye' heq na 'Boipaw Yesyuq' j "'Pxtpaw Phawlaw' neng-ngeng i-khaw bawng ngj a'pjudawng lo vai" tiyj an'nghiq. 'Boipaw Yesyuq' na "'Pxtpaw Phawlaw' neng-ngeng khrawng nang'hi mhuq njn khrawng ljk baw vj pjudawng lo hai siyju. 21So vjn. ni dxn nj a'mji, jn dxn nj a'mji tiyj kha hawu khoq yju. Ibahai yj nawk hxce 'Pxtpaw Phawlaw' neng-ngeng khrawng nang'hi heq lungbong duk kj yawng a'mji khennj" tiyj a'hawu. 22Pjnnj ce 'Boipaw Yesyuq' na a'tabeq heq j "nang'hi na 'Ceqcaw' a'mji khrawng khonhxp duk kj kxq nhxpnghawt bawng mhu dang tina kha nan'mhuq laq yaq nhxp a'mji lo vai. 23Khrawng heq na nang'hi yj 'jn dxn nj 'Ceqcaw' a'mji,ni dxn nj 'Ceqcaw' tiyj hawu u-na kha nhi tiq nhu yun na cet kawq cuq 24Khraikha a'lhawulhawu hxvj hawnnhi cu a'daw baw vj 'Ceqcaw' a'lo ba nhxp pj kha jn baw a'thon nai. 25Sinakha 'Ceqcaw' khrawng a'lhji yj kong tiq niqnawng heq khawm laq maw theqna tuq j kxq khrawng heq na an'caqtit khrawng a'khawm laq ai. 26'Nawiq' khekf kj thon nghxt tiq baw tjng ngj 'Ceqcaw' a'lo ba hxvj kha a'thonne lo vai. 27Tui na luiq naw theqna somdek a'khrak lhawn nj 'Nawiq' khrawng sawmphju duk tjq a'vawng nhxp a'khrai tjq khrawng heq khrawng e-pheng, o-pheng, im-thong e-pheng, an'caw-nawu om-nawye sawk pheng an'lung lhju na an'mji ye. Jnpjnnj tui a'luiq lo hxvj jn khrawng heq khrawng an'bjt kyaq laq. 28Jn baw tjng ngj 'Lawtaq' khekg kj kha 'Tawdung' luq j kxq khrawng heq e-o pheng, lhe pheng, ye pheng, lin pheng, sawk pheng jn baw tjng ngj an'mji nghxt. 29Sinakha 'Lawtaq' jn luq j kxq a'thok cawng nhxp pj hawnnhi yj kxq gaiq dj nhjuq ve tiq mi khayawq na a'awk nawk khennj 'Tawdung' luq j mji tiq khrawng heq an'bjt kyaq laq. 30'Ceqcaw' a'lo ba nhxp pj kha jn baw tjng ngj a'thon nai. 31Jn khonhxp pj khasaw vj mji tiq khrawng heq kha imduk kj vawng theqna boiqma heq lju yaq kaw vj dek kj kom na an'cen laq ai. Laikhan duk kj mji tiq heq kha im pawt cet ba laq hai siyju. 32'Lawtaq' immawq nuh i-baw a'thonne nghxt nawk khrawng a'tokpju bjiq cuq. 33Punghaw sawk heng hai yawng thathxn ne tiq ce an'sawk sum laq ai. Punghaw sawk an'sum khawm tiq ce an'sawk heng laq ai. 34Nang'hi yj ke hawu hai lx khrawng ce jn yawn nj ip-nawk dxn nj ip nghaq tiq pjinhiq duk kj kxq pjinghawt khrawng a'ciq-e khrawng khawm laq theqna pjinghawt ce a'mji ye nghxt laq ai. 35Cawng ten nghaq tiq hji mhutaw pjinhiq duk kj pjinghawt ce ciq-e khrawng khawm laq na pjinghawt ce a'mji nghxt laq ai. 36Laikhan duk kj kxq mhutaw pjinhiq j kxq pjinghawt ce a'ciq-e hawm laq na pjinghawt ce a'tawk nghxt tai tiyj a'hawu. 37Jnkhennj a'tabeq heq na "'Boipaw Yesyuq' j i-khjk dxn nj ni baw a'thon nai" tiyj an'nghiq. 'Boipaw Yesyuq' na kha "bjt tiq heq mji nawk dxn nj langtaq haw heq cuq-e na an'mji soi" tiyj a'hawu.
Currently Selected:
Luke 17: ctpv-rv
Highlight
Share
Copy
Want to have your highlights saved across all your devices? Sign up or sign in
This translation of the Chin-Laitu Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.
