YouVersion Logo
Search Icon

Ubwandilo 22

22
U Chala akumuyela u Abulahamu
1 # Heb. 11.17-19 Bo pachilapo akabalilo, u Chala akamuyela u Abulahamu. Akamwitizya akati, “Wee Abulahamu!”
U Abulahamu akamula akati, “Indi pano.”
2 # 2 Imb. 3.1 Po u Chala akumubuzya akati, “Senda u Yisaki umwana wako, mwene na mwene, sona yuyo umughanite nkani, ubuke kuchisu icha Moliya. Kulakula umubike ukuti abanje chakwiyipa ichakocha pighamba lilyo nkwiza pakukubuzya.”
3Pandabindabi nkani u Abulahamu, akayannya apakwikalapo pampunda yache nukudumulannya inkwi izyakochela ichakwiyipa. Akanyamuka ubulendo bwache ubwakubuka kuko u Chala akamubuzya. Pabulendo bwache akabuka nu mwana wache u Yisaki poka na bambombo bache babili. 4Pisiku ilyabutatu, bo u Abulahamu ali pabutalipo akatalankannya nukubwennya ubuzilo bubo akabukaghako. 5Akababuzya abambombo bache babili bala akati, “Amwe ikala pano ni mpunda iyi, bo ane nu mulumendo tukubuka kula pakumwiputa u Chala, po tukwiza pakubagha.”
6U Abulahamu akamunyamulisya u Yisaki inkwi izyakochela ichakwiyipa ichakocha, bo umwene anyamuye ichipeni numoto. Bo bakulongozannya, 7u Yisaki akamwitizya uwise akati, “Wee tata!”
U Abulahamu akamula akati, “Choni, mwana wane.”
U Yisaki akamulalusya akati, “Umoto ninkwi vilipo, nkimba umwana uwa ng'ozi yuyo akwiza pakuba chakwiyipa ichakocha ali ko kwiyi?”
8U Abulahamu akamwamula akati, “Wee mwana wane, u Chala akwiza pakutupa umwana uwa ng'ozi yuyo akwiza pakuba chakwiyipa ichakocha.” Abantu babili aba bakendelela pakulongozannya.
9Bo bafika pabuzilo bubo u Chala akamubuzya, u Abulahamu akazenga ichighemo nukuzilambalika inkwi pachighemo pala. Akamupinya umwana wache yula nukumughoneka pamwanya pankwi zila. 10Po u Abulahamu akawesa ichipeni ukuti amughoghe umwana wache. 11Loli uwantumi uwa Mwene akamwitizya akati, “Wee Abulahamu, Abulahamu!”
U Abulahamu akamula akati, “Indi pano.”
12Uwantumi yula akamubuzya akati, “Utakamughoghe pamo ukumuvulazya napo panandi. Ilelo nazimanya ukuti naloli we muntu uwakumunyila u Chala, pachifukwa ichakuti utakanyima umwana wako, mwene na mwene.”
13U Abulahamu akatalankannya nukumwennya udubi impembe zyache zibadiye mumpanya. Akamusenda udubi yula nukubika ukuti abanje chakwiyipa ichakocha mubuzilo ubwa mwana wache. 14U Abulahamu akabwita ubuzilo bula ukuti “U Mwene akupa.”#22.14 Akupa: Pamo akwennya. Nilelo bulo abantu bakuti, “Pighamba ilya Mwene, yuyo akupa.”
15Uwantumi uwa Mwene yula akamwitizya sona u Abulahamu akabubili 16#Heb. 6.13-14nukuti, “U Mwene akuti, ‘Nkulapa ukuti nkwiza pakukusaya nkani pachifukwa ichakuti utakanyima umwana wako, mwene na mwene. 17#Heb. 11.12Naloliloli nkwiza pakukusaya nkani, sona nkwiza pakubapela abaluko lwako pakuba binji nkani ngati zyo ntondwa, sona ngati musesenga uwa mulubazu ulwa nyanja. Abaluko lwako bakwiza pakubapota abalwani babo bosi. 18#Imbo. 3.25 Inko zyosi pachisu ichapasi nkwiza pakuzisaya ukwendela mubaluko lwako, pachifukwa ichakuti awe wanyivwila.’ ”
19Po u Abulahamu akanyokela ku bambombo bache, po bosi poka bakanyamuka nukubwela ku Belisheba, kuko u Abulahamu akikalagha.
Abaluko ulwa Naholi
20U Abulahamu akivwa ukuti u Milika umuchi uwa muzuna wako Naholi amupapila abana eyiti: 21U Uzi akaba we katote, sona nu muzuna wache u Buzi nu Kemuweli uwise uwa Alamu, 22nu Kesedi nu Hazo nu Pilidashi nu Yidilafe sona nu Betuweli. 23U Betuweli akaba we wise uwa Labeka. U Milika akamupapila abana bosi eyiti banaba u Naholi, umuzuna uwa Abulahamu. 24U Lebuma, umuchi umuzya uwa Naholi akamupapila abana folo, u Teba nu Gahamu nu Tahashi sona nu Maaka.

Currently Selected:

Ubwandilo 22: LMB2024

Highlight

Share

Copy

None

Want to have your highlights saved across all your devices? Sign up or sign in