Ubwandilo 21
21
Ukupapiwa ukwa Yisaki
1U Mwene akamukumbuka u Sala nukumubombela vivyo akamulayizizya. 2#Heb. 11.11U Sala akamela ulwanda, po akamupapila u Abulahamu umwana umulumendo mubughosi bwache. Umwana yula akapapiwa pakabalilo kako u Chala akamulayizya. 3U Abulahamu akamwita umwana yula ukuti we Yisaki. 4#Ubw. 17.12; Imbo. 7.8U Abulahamu akamusilimula umwana wache yula, bo ali namasiku eyiti, ukuyana namumo u Chala akamulamulila. 5U Yisaki akapapiwa, bo Abulahamu ali na maka 100.
6U Sala akati, “U Chala anhobosya nukunsekelesya.#21.6 nukunsekelesya: Itabwa ilyakuti Yisaki mu Chihebeli kokuti, Akuseka (ennya sona 17.17-19). Umuntu wesi yuyo akwiza pakwivwa zinizi akwiza pakusekela poka nane.” 7Akanena sona akati, “Nkimba wewenu akamanyagha ukuti u Sala akwiza pakonkezya umwana? Loli namupapila u Abulahamu umwana umulumendo, bo aghosipa.”
8Umwana yula akakula, po isiku ilyakuti u Sala amulesya pakonka ibele, u Abulahamu akayannya ulusekelo ulukulu nkani.
U Abulahamu akumwefya u Hagala nu Ishimayeli
9Loli bo u Sala ennya ukuti u Ishimayeli umwana yuyo u Hagala umuntu uwa muchisu icha Ijiputi, akamupapila u Abulahamu ali pakumobezya#21.9 Pakumobezya: Pamo pakwangala nu. u Yisaki umwana uwa Sala, 10#Gal. 4.29-30akamubuzya u Abulahamu akati, “Umuchimbizye umukolo umuzya uyu poka nu mwana wache. Pakuti umwana uwa mukolo uyu umuzya atangapyana ichilingo pa mwana wane u Yisaki.”
11Ifundo iyi yikamuvulazya nkani u Abulahamu mumoyo pachifukwa ichakuti wepe nu Ishimayeli akaba mwana wache. 12#Lom. 9.7; Heb. 11.18Loli u Chala akamubuzya u Abulahamu akati, “Ifundo yiyo u Sala anena nizya mwana wako poka nu muchi wako umuzya u Hagala, yitakakuvulazye mumoyo. Bombagha bulo chosi chicho u Sala akukubuzya, pakuti awe ukwiza pakuba na baluko babo nkakulayizya ukwendela mwa Yisaki. 13Nkwiza pakumupa sona abana abinji nkani umwana uwa muchi wako umuzya yula, umwakuti bakwiza pakuba luko. Pakuti wepe u Ishimayeli mwana wako.”
14Pandabindabi nkani u Abulahamu akasenda ichakulya ni nyambi iyikwela iya mizi nukumupa u Hagala. Akamubaghalizya ivyakulya pavipunko nukumubuzya ukuti abukaye poka numwana wache. U Hagala akanyamuka, akendakendagha bulo munkolongo iya Belisheba.
15Bo amizi ghamala munyambi mula, akamubika bulo umwana wache yula mukazundila aka mpanya. 16Akayitantama impanya yila amamita 100 nukwikala pasi nukuti, “Ntangamwenelezya bulo bo umwana wane ali pakufwa, awe.” Bo achili ikaye pasi palapala, umwana yula akanda pakulila.
17U Chala akamwivwa umwana yula akulila, po uwantumi uwa Chala akamubuzya u Hagala akati, “Wee Hagala, nkimba choni chatamya? Utakanyilaye, u Chala ivwa ukulila ukwa mwana. 18Nyamuka, kamuleme panyobe nukumunyamula. Pakuti abaluko lwache bakwiza pakuba luko ulukulu nkani.”
19U Chala akamwighula amaso u Hagala, po u Hagala akachennya ichiziba. U Hagala akabuka pachiziba pala, akasemba amizi nukwizuzya inyambi yache iyikwela lila, po akamung'wesyako nu mwana wache.
20U Chala akamusungilila akiza umwana yula, bo akukula munkolongo iya Palani. Po akaba muntu umubingi umukulu nkani. 21Unyina akamusendela umukolo uwa muchisu icha Ijiputi pakuba muchi wache.
Ulufingo ulwa Abulahamu nu Abimeleki
22 #
Ubw. 26.26
Pakabalilo kalakala u Abimeleki nu Fikolo usongo uwa basilikali akabuka kwa Abulahamu nukuti, “U Chala ali nawe muvyosi vivyo ukubomba. 23Polelo lapa pano pamaso pa Chala ukuti utakwiza pakunzimbula ane, pamo abana bane, pamo abaluko lwane. Ane nkaba ne muntu umusubiliwa pamaso papako, po nawe lapa ukuti ukwiza pakuba we muntu umusubiliwa pamaso papane muchisu chicho mukwikalamo.”
24U Abulahamu akati, “Nkulapa.”
25Po u Abulahamu akilumbusya kwa Abimeleki nizya chiziba chicho abambombo bache bakafyula. 26U Abimeleki akati, “Ntamumenye umuntu yuyo azibombite zinizi. Awe utakambuzyapo, sona nivwa bulo ilelo.”
27Po u Abulahamu akamupa u Abimeleki ing'ozi ni ng'ombe, sona abantu babili aba bakafingana ulufingo. 28U Abulahamu akasabula abana abang'ozi seveni pakasi pa ng'ozi zyache, 29po u Abimeleki akamulalusya akati, “Nkimba choni chicho ukubomba bunubu?”
30U Abulahamu akamula akati, “Pokela bulo abana abang'ozi seveni aba. Pakubomba bunubu kokuti ukwitika ukuti nene nkakumba ichiziba chinichi.”
31Po ubuzilo bula bakabwita ukuti we Belisheba,#21.31 Belisheba: Itabwa ili mu Chihebeli kokuti, Ichiziba icha Chilapo, pamo Ichiziba icha Seveni (ennya sona 26.33). pachifukwa ichakuti abantu babili bala bakalapa ichilapo palapala.
32Bo bamala pakufingana ulufingo lula pa Belisheba, u Abimeleki nu Fikolo bakabwela kuchisu icha ba Filisiti. 33Po mu Belisheba mulamula u Abulahamu akabyalamo ikwi ilya mupandapanda nukumwiputa u Mwene, u Chala uwa bwila na bwila. 34U Abulahamu akikala muchisu icha ba Filisiti amaka aminji nkani.
Currently Selected:
Ubwandilo 21: LMB2024
Highlight
Share
Copy
Want to have your highlights saved across all your devices? Sign up or sign in
Lambya Bible © Bible Society of Malawi, 2024.
