MATIUS 26

Makapingappa'mu lapappiissekang passala kasissaanna Isa – Naha-nahannai lahunoi Isa

26:1-5

(Mark. 14:1-2; Luk. 22:1-2; Yah. 11:45-53)

1Hattunna Isa a'maemmo ngajara, Ia appaui ri ana'-ana' gurunNa, 2#Kel. 12:1-27”Muisse' ngase'mu ma'nassana ruangallopai nalaripassua'-suarangi allo Pa'lappasang, jari Ana' Rupatau ripassareangi larisalli'.”

3Rihattu injo a'rappungimu sikonjo imang ponggaha na tutoa-toana bangsa Yahudi ri sapo pammarianna Imang Bakka' arenna Kayafas, 4na a'naha-nahaimu se're nudaa lalajakkalai Isa surangang lalakelo ampai lahuno. 5Mingka appau ngase'i, ”Anda rihattu passua'-suarang, solanna anda rie' ammumba pa'beserang bakka' ritangngana tau lohe.”

Isa ribarakkaki

26:6-13

(Mark. 14:3-9; Yah. 12:1-8)

6Hattu rie'namo Isa ri Betania, ri saponna Simon tau kattakang injo, 7#Luk. 7:37-38rie'mo se're bahine mange ri Ia ngerang sibatu buli-buli assinna minnya' hondu nuka'jala ballinna. Minnya' injo ritirikang rate ri ulunna Isa, nuattangngai attolong nganre. 8Lajanjanna a'moro-moroimu ana'-ana' gurung injo na lakua, ”Apamo matu-matunna pa'labo-laboang inni? 9Saba' minnya' intu akkulle ribalukang ka'jala na ballinna akkulle ripa'dahu-dahuang mange ri tau kaasi-asi.” 10Mingka Isa latarrusu pikkirannai jari appaui, ”Ngura mukasusaangi tubahine inni? Ia maeng lageokammu se're panggeokang baji' mae ri Nakke. 11#Ul. 15:11Saba' tau kaasi-asi intu tulusu larie' juai ri kaui, mingka Nakke gelea lasitulinna larie' assurang-surang kau. 12Saba' rilatirikanna minnya' injo ri kalengKu, ia a'bua'i se're pappataja ripanguburangKu. 13Sitoje'na Nakke appau mange ri kaui: Ri antee juai mae Injili inni ripau risibatu lino, apa nulageokang inni laripau todo'i pangu'rangi ri ia.”

Yudas lapassareangi Isa

26:14-16

(Mark. 14:10-11; Luk. 22:3-6)

14Maenna injo a'lampamu se're tau battu risampulorua suro-suro injo, turiareng injo Yudas Iskariot, mange ri imang ponggaha injo. 15Ia appau, ”Apa a'ra' lamupassareang mae ri nakke, solanna Ia kupassareang mange ri kaui?” Iyai a'bajarai tallumpulo doe' salaka mange ri ia. 16Pakaramula rihattu injo ia tulusu a'bojai hattu baji' lalapassareangi Isa.

Isa nganre Pa'lappasang surangang Suro-suroNa

26:17-25

(Mark. 14:12-21; Luk. 22:7-14, 21-23; Yah. 13:21-30)

17Ri allo makase'rena rihattu passua'-suarang Roti Tide' injo Bibina riekimu ana'-ana' gurunna Isa mange ri Ia na appaui, ”Ri antee mae a'ra'Mu tapappasadiaang panganreang Pa'lappasamMu?” 18Appihali Isa, ”A'lampako ri kota mange ri Anu na paui mange ri ia: Pappasanna Guru: Simpirimu hattung-Ku; lalang ri saponna Nakke a'ra' assua'-suara pa'lappasang surang suro-suroKu.” 19Maeng injo suro-suroNa lageokangi assimpole nulasuroang injo Isa mange ri iyai na appakasadiai pa'lappasang.

20Sungka'i bangngi, attolommu Isa nganre assurang sampulorua injo suro-suro. 21Rihattunna attangnga juapa nganrei, appaui Isa, ”Sitoje'na Nakke appau mange ri kaui, sala se'renna ri kau intu lalapassareanga.” 22Jari sanna' pa'risi nyahanai appau tasse're-se're mange ri Ia, ”Gele nakke, Karaeng?” 23#Mzm. 41:10Appihali Isa, ”Ia tau assurang injo Nakke lalapaloma karameng limanna naung ri kembokang inni, iamo lalapassareanga. 24Ana' Rupatau toje'i laa'lampa assituru' nurie' injo ta'ukiri ripassala'na Ia, mingka silakamu tau injo ampa rikanarana Ana' Rupatau ripassareang. La'bi bajikangi mange ri tau injo ampa ia gele rilaherang.” 25Yudas tau a'ra' injo lapassareang Isa appau, ”Gele nakke, Guru?” Appaui Isa mange ri ia, ”Kaumo appau.”

Rihattu panganre palappasanna

26:26-29

(Mark. 14:22-25; Luk. 22:15-20; 1 Kor. 11:23-25)

26Rihattu nganrenai juapa, Isa ngalle roti, masa barakka'i, labissa'-bissa'i roti injo ampai lapassareang mange ri suro-suroNa na lakua, ”Allei, kanrei, iamo inni batangkalengKu.” 27Maenna injo Ia ngalle galasi, masa barakka'i ampai lapassareang galasi injo mange ri iyai na lakua, ”Inungi, kau ngase', ri galasi inni. 28#Kel. 24:8; Yer. 31:31-34Saba' iamo inni raraKu, rara passitallikang, nuta'to'lo'kang ri tau lohe lallappasi kadorakaang. 29Mingka, Nakke appau mange ri kaui: Pakaramula rikonni-konnina Nakke gelemu lakuinung pole hassele poong anggoro inni sa'genna larapi' allo palaKuinunna, iamo intu nubau, assurang kau ngase' lalang ri Pakkaraenganna AmmangKu.”

Petrus lalasassali Isa

26:30-35

(Mark. 14:26-31; Luk. 22:31-34; Yah. 13:36-38)

30Sungka'i maemmu lakelongang kelong pappakala'biri, a'lampamu Isa surang ana'-ana' gurunNa mange ri Bonto Zaitun.

31 # Za. 13:7 Jari appaui Isa mange ri iyai, ”Bangngi inni kau ngase' laa'maling-maling tappa'mu kanara ri Nakke. Saba' rie' ta'ukiri: Nakke lamuno pakalahaki na bakkalang jimbala injo latassia'-siara. 32#Mat. 28:16Mingka rimaengKumo attallasa muliang, Nakke laa'lampa rioloang na kaui mange ri Galilea.” 33Petrus appihali ri Ia, ”Manna injo iyai ngase' intu a'maling-maling tappa'na kanara Ditte, nakke gele sikalia.” 34Isa appau mange ri ia, ”Sitoje'na Nakke appau mange ri kaui, bangngi inni, rigelenapa a'kongkoroa' jangang, kau pintallummoko assassala ri Nakke.” 35Appaui Petrus mange ri Ia, ”Manna injo nakke parallu lamate surangang Ditte, nakke gele sikali lassassala ri Kau.” Sikonjo suro-suro maraeng injo appau appakonjo todo'i.

Ri koko Getsemani

26:36-46

(Mark. 14:32-42; Luk. 22:39-46)

36Gele sallo' ambattumu Isa surang ana'-ana' gurunNa rise're tampa' nuriare' Getsemani. Jari Isa appau mange ri ana'-ana' gurunNa, ”Attolongiko ri inni, Nakke lamangea konjo ngera dowaang.” 37Ia laurangi Petrus surang ruaiya ana'na Zebedeus. Ia pakaramulamu appisa'ring simpung surang bentere. 38Jari pauNa mange ri iyai, ”NyahaKu sanna' simpunna, assimpolemu tulamate. Attolongiko ri inni na assurangki a'jaga-jaga.” 39Maeng injo Ia a'lampai mange ri a'rakang siso'di', ampai joppa' ngera dowaang, ”O AmmangKu, so'di injo ma'ringi, lappasammu kasissaang inni allalo battu ri a'rakangKu, mingka andamu assimpole a'ra'Ku laa'jari, passangadinna assimpole a'ra'Mu laa'jari.” 40Rimaenna injo Ia muliangi mange ri suro-suroNa na larapikang ngase'i tinro. Jari Ia appau mange ri Petrus, ”Geleikoka akkulle attahang a'jaga-jaga surang Nakke manna ra'gajua sijaang. 41A'jaga-jagako surang ngera dowaangko, solammu anda a'dappe' antama' lalang ripasso'ri: nyaha inni toje'i lumu, mingka lamma batangkale inni.” 42Maeng injo Ia a'lampai isse' makapinruanna na ngera dowaangi, ”O AmmangKu ampa kasissaang inni gele ma'ring a'lili, passangadinna ampa laKulaloi, a'jarimu a'ra'Mu!” 43Rihattunna Ia muliang pole, Ia larapikangimu isse' tinro ngase', saba' bera'mu matannai. 44Ia labokoi suro-suroNa ri injo ampai a'lampa na ngera dowaang makapintallunna na pangera dowaang injo tulusu lapau. 45Rimaennamo injo Ia muliangi lapiuppai suro-suroNa na appaui mange ri iyai, ”Tinroi juapako? Janjangi, larapi'mu hattunna ma'nassana Ana' Rupatau laripassareang lalang limanna tau doraka injo. 46Ambaungimoko, maemoko laa'lampaki. Ia tulalapassareang injoa gelemu dere.”

Isa rijakkala

26:47-56

(Mark. 14:43-50; Luk. 22:47-53; Yah. 18:1-11)

47Rihattu a'bisarana juapa Isa rie'mu Yudas, sala se're tau battu ri suro-suro sampulorua injo, na ngurangi sibakkalang bakka' tau ngerang pa'dang surang panrabung, turisuroi battu risikonjo imang ponggaha na tutoa-toana Yahudi. 48Tau lalapassareang injo Isa maeng lapappiissekammu se're tanra inni mange ri iyai, ”Tau kuhau injo, iamo injo Isa, jakkalai.” 49Lassirimu ia mange ri a'rakang lapiuppai Isa na lakua, ”Salama' Guru,” ampai anghau ri Ia. 50Mingka appaui Isa mange ri ia, ”Oe baha', injo jua mupamaeang konni?” Jari mangeimu labintantangi Isa na lajakkalai. 51Mingka rie' se're tau battu ri iyai tuminahang injo ri Isa laangka' limanna, labu'bu' pa'danna na lapasimbe'i mange ri tau risuro injo ri Imang Bakka' sa'genna tappu' tolinna. 52Jari appaui Isa mange ri ia, ”Pantama'i muliang pa'dammu intu ri banoana, saba' inai make pa'dang, lamatei rikanara pa'dang. 53Iyareka pa'ngare'mu ma'nassana Nakke gelea akkulle a'nga'ngara mange ri AmmangKu, solanna Ia lassiri assuro la'bi loheang battu ri sampulo injo rua bakkalang malaeka'Na lattulung ri Nakke? 54Ampa appakonjoi, anteei kamua laripa'rupa nuta'ukiri injo lalang ri Kitta' Tangkasa, nulakua injo ma'nassana parallui laa'jari appakonjo?” 55#Luk. 19:47, 21:37Rihattu injo Isa appaui mange ri tau lohe, ”Pa'ngare'mui Nakke inni palukka', jari riekiko mae sangka' muerang pa'dang na panrabung lamujakkalia? Na allo bangngi jua Nakke attolong ngajara ri Sapo Allataala, na gelea mujakkali ri injo. 56Mingka, iangase'na inni a'jari solanna a'rupa nurie' injo ta'ukiri lalang ri kitta'na sikonjo nabbi.” Jari amminsa'bu ngase'mu ana'-ana' gurung injo na a'lampa derei.

Isa ri pangadelang agama

26:57-68

(Mark. 14:53-65; Luk. 22:54-55, 63-71; Yah. 18:12-14, 19-24)

57Rimaennamo lajakkali Isa, laerangimu Isa mange ri Kayafas, Imang Bakka'. Ri injo lohemo guru Tora' na tutoa-toa a'rappung. 58Na Petrus minahang dere ri Ia sa'genna antama' rijurunna sapo Imang Bakka', na riantamakannamo, ia attolongi rialla'na sikonjo pajaga Sapo Allataala lalajanjangi anteekamua kamaenganna iangase'na injo.

59Imang ponggaha na urang maraenna ri Pangadelang Agama injo a'bojai sa'bi bura mange ri Isa. Solanna Ia akkulle ri hukkung mate, 60mingka iyai gelei nguppa, manna injo rie' lohe passa'bi bura. Mingka sikalinna rie' rua tau assa'bi, 61#Yah. 2:19nulakua, ”Tau inni appau: Nakke akkulle kuroka Sapo Allataala na Kubaungi pole lalang hattu tallungallo.” 62Jari ammentengi Imang Bakka' injo na appaui mange ri Ia, ”Gele-Ko laassare pappihali risikonjo pappitinana sa'bi inni mange ri Kau?” 63Mingka Isa tulusu gele appihali. Jari appaui pole Imang Bakka' injo mange ri Ia, ”Passabakang ri Allataala, paui mae ri nakke, apa Kaumo Almase, Ana' Allataala, iyareka gele.” 64#Dan. 7:13Appihali Isa, ”Kaumo mupaui. Mingka, Nakke appau ri kau, pakaramula allo inni lamujanjangi Ana' Rupatau laattolong risa'ri kananNa Tukaminang kahasa injo na larie'i a'dongko rammang ri langi'.” 65#Im. 24:16Lasesse' pakeanna Imang Bakka' injo na appaui, ”Ia attadea ri Allataala. Apa parallu juapaki pole sa'bi? Konni-konnina mulangngerimu pau pattadeaNa. 66Anteekamua panguppamui?” Appihali ngase'mu, ”Ia parallui rihukkung mate!”

67 # Yes. 50:6 Maeng injo lape'ruimu rupanNa na lajagurui; tau maraeng injo anrabung ri Ia, 68na lakua, ”Sobamu pau mae ri kambe, oe Almase, inai anrabung ri Kau?”

Petrus lasassali Isa

26:69-75

(Mark. 14:66-72; Luk. 22:56-62; Yah. 18:15-18, 25-27)

69Rihattu injo Petrus attolongi pantarang ri juru. Jari rie'mo se're tau pagahe bahine mange ri ia, lakua, ”Kau sanging assurang todo'ko Isa, tau Galilea injo.” 70Mingka ia assassalai ri a'rakanna tau lohe injo, lakua, ”Gele kuisse', inai intu mukuangang.” 71Rihattu a'lampana mange ri babaang, se're pagahe bahine maraeng lajanjangi na appaui mange ri tau lohe injo, ”Tau inni uranna todo' Isa, tau Nazaret injo.” 72Ia assassalai pole surangang sapatta, ”Gele kuisse' tau intu.” 73Gele sallo maenna injo lohemo tau mange ri Petrus na lakua, ”Tantu kau sala se'renna todo'ko battu ri iyai, injo kata'raangi ribisarammu.” 74Jari pakaramulamu Petrus attadea na assapatta, ”Nakke gele kuisse' tau intu.” Rihattu injo akkongkoroa'mu jangang. 75Jari lau'rangimu Petrus rinulapau injo Isa mange ri ia, ”Rigelenapa akkongkoroa' jangang, kau pintallumma musassali.” Jari ia a'lampai ansulukang na apparau bakka'i pammate pa'risi'na.

Currently Selected:

MATIUS 26: LAI_SLY

Highlight

Copy