MATIUS 24

PASSALA 24–25

HATO'BA RIPASSALA ALLO KALA'BUSANG

Sapo Allataala larisosara

24:1-2

(Mark. 13:1-2; Luk. 21:5-6)

1Rimaenna injo ansulukangi Isa battu ri Sapo Allataala, ampai a'lampa. Riekimu ana'-ana' gurunNa na lajo'jo'i Sapo Allataala. 2Appaui Isa mange ri iyai, ”Mujanjang ngase'i injo? Sitoje'na Nakke appau mange ri kaui, gele larie' manna se're batu larilappasang a'lonjo' ri bahonna batu maraeng; larisosara ngase'i.”

Pakaramulana kasissaang

24:3-14

(Mark. 13:3-13; Luk. 21:7-19)

3Rihattunna Isa attolong rate ri Bonto Zaitun, riekimu ana'-ana' gurunNa mange ri Ia la'bisara akkale-kalei surangi Ia. Lakuamo, ”Paui mae ri kambe, sikuraiya laa'jari passala injo na anteekamua tanra parie'Mu surang tanra kala'busanna lino inni?” 4Pappihalinna Isa mange ri iyai, ”Tutulaloko solanna anda rie' tau appa'lingu mange ri kau! 5Saba' lohe tau labattu lapake arengKu na lakua: Nakkemo Almase, na iyai injo laappakalingu tau lohe. 6Lallangngeriko sa'ra passala pa'bundukang iyareka kareba pa'bundukang. Mingka tutulaloko na andaimoko bentere; saba' iangase'na injo parallui a'jari, mingka ia injo gelepa allo kala'busang. 7Saba' bangsa laammenteng a'bali bangsa, na pakkaraengang la'bali pakkaraengang. Larie' kalarakang bakka' na ri antee-tee mae langgeong tana. 8Mingka iangase'na injo ampamo pakaramulana kasissaang laantama' rijammang bau.

9 # Mat. 10:22 Rihattu injo ripassareangiko larisissa, na larihunoiko surang larikalikkingangiko risikuanna tau passabakang ri arengKu, 10na lohe tau laa'bali'ballang na lassipassareangi surang lassikalikkingang. 11Lohe nabbi palusu lambua' na laappakalingu tau lohe. 12Saba' pela' lohena kadorakaang, jari lalohe todo' tau a'jari la'ba pangamaseanna. 13Mingka tau jarre' injo tappa'na sa'genna larapi' allo kala'busanna lasalama'i. 14Injili Pakkaraengang inni laripala'bangi risibatu lino a'jari passa'bi risikonjo bangsa, maempa injo ampamu larapi' allo kala'busanna.”

Sissaang sarro na Almase palusu injo

24:15-28

(Mark. 13:14-23; Luk. 21:20-24)

15 # Dan. 9:27, 11:31, 12:11 ”Jari, ampa anjanjangko nugele samara ammenteng ri tampa' gele siratang, assituru' pauna Allataala nulapabattu injo Nabbi Daniel – sikonjo paaji parallui lapina'na' – 16jari sikuanna tau rie' ri Yudea parallui lari nai' ribaho bonto. 17#Luk. 17:31Tau rie' injo rate ri pa'buhungang andamu naung langalle barang-barang lalang ri kalesaponna, 18na tau rie' injo ri koko andamu muliang langalle pakeanna. 19Silakamu bahine tianang injo iyareka idong appasusu injo juapa ana' lolo rihattu injo. 20Ngera dowaangiko, solanna rihattummu lari anda rie' tau a'dappe' rihattunna bosi sarro iyareka ri allo Passambajangang. 21#Dan. 12:1; Pan. 7:14Saba' rihattu injo laa'jari kasissaang bakka' assimpole nugelepa maeng a'jari minang riuruna lino sa'genna konni-konnina na gelemu laa'jari poleang. 22So'di hattu injo gelei ribodoi, jari gelemo rie' manna se're tau laripakasalama'; mingka passabakang tau ripile injo, hattu injo laripakabodo.

23Rihattu injo ampa rie' tau appau mange ri kau: Tilingii, Almase rie' ri inni, iyareka Almase rie' konjomange, akomo tappa'. 24Saba' lalohe Almase palusu surang nabbi palusu laammumba na iyai injo lappaa'jari tanra-tanra bakka' na nugele samara, sa'genna so'di injo ma'ringi, iyai injo laappakalingu todo'i tau ripile injo. 25Pina'na'lalo, Nakke la'bi riolomu maeng Kupau mange ri kaui. 26#Luk. 17:23-24Jari, ampa rie' tau appau mange ri kau: Janjangimu, Ia rie'i ri parang luara, akomo a'lampa mange konjo; iyareka: Janjangimu, Ia rie'i lalang ri bili', akomo tappa'. 27Saba' assimpole kila' ta'bebe battu ripambuakang na assau sinara'na sa'genna rikasa'rakang, appakonjo todo'i sallo' pariekanna Ana' Rupatau. 28#Luk. 17:37Ri antee mae rie' bonara, ri intu lohe kalaa' a'domung.”

Pariekanna Ana' Rupatau Pakkalebarang ripassala poong kaju ara

24:29-36

(Mark. 13:24-32; Luk. 21:25-33)

29 # Yes. 13:10, 34:4; Yeh. 32:7; Yl. 2:10, 31, 3:15; Pan. 6:12-13 ”Gele sallo maenna kasissaang sarro injo, laa'jari etangi matanna allo na bulang gele lassau na sikonjo bintoeng laa'dappe'i battu ri langi' na sikonjo kahasa rie' injo ri langi' laanggeong. 30#Dan. 7:13; Pan. 1:7Rihattu injo lakajanjangangi tanrana Ana' Rupatau ri langi' na sikonjo bangsa ri lino lapparau na iyai lanjanjang Ana' Rupatau rie'mu a'dongko' rammang ri langi' lalang risikonjo kakahasaang na kala'biranNa. 31Ia lalasuro ansulu' sikonjo malaeka'Na appaoni timboe' nusanna' bakka' sa'ranna na iyai injo lappasse're tau pileanNa battu ripatang sulapa'na lino inni, battu ri bangkeng langi' se'reang mange ri bangkeng langi' maraeng.

32Allelalo pappilajarang battu ripakkalebarang poong kaju ara injo. Ampa kalumemu tangke-tangkena na pakaramulamu assu'la', muisse'i ma'nassana gelemu sallo nabambangi allo. 33Appakonjo todo'i, ampa mujanjangi iangase'na inni, piissekilalo ma'nassana gelemu sallo hattunna, rie'mu ri babaang. 34Sitoje'na Nakke appau mange ri kaui: tau konni-konni gelei laallalo, rigelenapa a'jari iangase'na inni. 35Langi' na lino inni laallalo, mingka pauKu gele laallalo.

36 # Mark. 13:32 Mingka allo na hattu injo gele rie' laisse'i manna se're tau, sikonjo malaeka' ri suruga gele todo'i, na manna Ana' injo gele todo'i, Amma jua kale-kalenna laisse'i.”

Pappasang solanna a'jaga-jaga

24:37-44

(Luk. 17:26-30, 34-36)

37 # Kej. 6:5-8 ”Saba' anteekamua passala'na ri jammanna Nuhung, appakonjo todo'i sallo' rihattu pariekanna Ana' Rupatau. 38Anteekamua iyai rigelenapa battu a'ba bakka' injo nganre na nginungi, a'bonting na ripa'bontingangi, sa'genna larapi' hattu antama'na Nuhung ri lopi, 39#Kej. 7:6-24na iyai gele rie' nulaisse', rigelenapa battu a'ba bakka' injo na lapakalannya' ngase'i, appakonjo todo'i passala'na sallo' rihattu pariekanna Ana' Rupatau. 40Rihattu injo ampa rie' rua tau ri koko, sitau larierang na sitau laribokoi; 41ampa rie' rua bahine mutara gilingang batu, sitau larierang na sitau laribokoi. 42Injomo saba'na, a'jaga-jagailaloko, saba' gele muisse' rihattu ngurana narie'i Karaemmu.

43 # Luk. 12:39-40 Mingka piisseki inni: Ampa opuna sapo laisse'i hattu ngurana ribangngina larie' palukka', attantu ia a'jaga-jagana, na gele lapa'biang saponna rilukkaki. 44Injomo saba'na, paralluko tulusu sadia, saba' Ana' Rupatau larie'i rihattu nugele injo musanna-sanna.”

Pakkalebarang ripasalla ata mallang surang ata daa

24:45-51

(Luk. 12:41-48)

45”Inaimo ata mallang na mangisse', turiangka' ri karaenna battu risikonjo taunna laa'jari pasare kanre mange ri iyai ampa larapi' hattunna? 46Sunggulaloko ata turirumpa' injo ri karaenna lajama jama-jamaanna, rihattu mulianna karaenna. 47Sitoje'na Nakke appau mange ri kaui: Karaeng injo lalaangka'i a'jari pajaga risikonjo anunna. 48Mingka, ampa daa sipa'na ata injo na appaui lalang ri atina: 49Gele juapai larie' karaengku, maeng injo ia pakaramulamu larabung ata maraeng injo, na nganre manginungi assurang sikonjo painung, 50jari karaenna ata injo larie'i ri allo nugele lasanna-sanna, na rihattu nugele laisse', 51na ia lalahuno na lalapassimpole passareanna tau munape' injo. Ri injomo mange lakalangngerang parau na gigi a'rekuki.”

Currently Selected:

MATIUS 24: LAI_SLY

Highlight

Copy